1-2. Antoy tuloytuloy tayon gawaen anggano abautismoan tayo la, tan akin?

 MAMINPIGA kan manlinis na abung yo? Seguro nen kakkapanpaalagey ni itan, nan-general cleaning kayo antis yon panayaman. Anto kasi nagawa no manlapud saman et agkayo lan balot nanlinis? Seguradon marabok tan marutdutak la. Pian malinis tan maayos so abung, dapat lanang ya lilinisan itan.

² Ontan met so kailangan tayon gawaen diad panag-isip tan inkatoo tayo. Antis tayon nampabautismo, dakel so ginawa tayon pananguman ed bilay tayo pian “[nalinisan] tayoy sarili tayo ed amin a karutakan na laman tan espiritu.” (2 Cor. 7:1) Pero anggano bautismado tayo la, uunoren tayo nin siansia imay bilin nen apostol Pablo ya ‘itultuloy tayoy manpasimbalo.’ (Efe. 4:23) Akin ey? On ta no agtayo itan gawaen, main-inomay ya narutakan na sayan mundo so panag-isip tayo. Pian mansiansia tayon malinis ed pakanengneng nen Jehova, dapat lanang tayon usisaen so panagnonot, inkatoo, tan saray pilalek tayo.

3. Antoy labay ya ibaga na bilin ed Roma 12:2 ya ‘uman yoy panagnonot yo’?

³ Antoy gawaen tayo pian nauman tayoy panagnonot tayo? (Basaen so Roma 12:2.) Say Griegon salita ya impatalos ya  ‘uman yoy panagnonot yo’ et nayari met ya ipatalos ya “i-renovate yoy panagnonot yo.” Singa onia ’tan ay: No bilang ta kaukolan mon i-renovate so abung mo, di ba talagan pasimbaloen mo? No imbagan “i-renovate,” agto labay ya ibagan dekorasyonan mo labat et duga la. Ontan met ed bilay tayo bilang Kristiano. Agto labay ya ibaga ya basta manggagawa tayoy maabig et duga la. Dapat usisaen tayo no anton talagay inkatoo tayo, tan no walay nanengneng tayon aliwliwan ugali o kagagawa tayo, umanen o ekalen tayo itan pian naliketan si Jehova ed sikatayo. Tuloytuloy tayo itan ya gawaen, aliwan maminpinsan labat.

4. Antoy gawaen tayo pian ag-itayo naimpluensyaan na mundo?

⁴ No perpekto tayo la, aliwa lan mairap ya gawaen no antoy makapaliket ed si Jehova. Pero lapud agtayo ni perpekto natan, kaukolan tayoy mansagpot ya maong. Base ed Roma 12:2, kaukolan tayo nin umanen so panagnonot tayo pian natalosan tayo no anton talagay makapaliket ed si Jehova. Nepeg tayo sirin ya usisaen iray desisyon tan pangarap tayo ed bilay. Kasin napatnagan ed saratan ya sankanonot tayoy panlabayan nen Jehova o kasin naimpluensyaan tayo la na mundo?

5. Antoy pakapatnagan ya sankanonot tayon asingsingger lay agew nen Jehova? (Nengnengen so litrato.)

⁵ Nengnengen tayoy sakey ya alimbawa. Ibabaga na 2 Pedro 3:12 ya labay nen Jehova ya ‘sankanonot tayon lanang so isabi na agew to.’ Tepetan moy sarilim: ‘Kasin nanengneng ed kabibilay ko ya panisiaan kon asingsingger lay Armagedon? Kasin nanengneng ed pinilik ya kurso o trabaho ya say sankaimportantian ed bilay ko et say panaglingkor ed si Jehova? Kasin mabiskeg so pananisiak ya iter nen Jehova so pankaukolan ko tan say pamilyak, odino aburido ak ya lanang ed pananap na  kuarta?’ Seguradon naliliketan si Jehova no nanengneng tod saray desisyon mo ya lanang mon iyuuna so panlabayan to.—Mat. 6:25-27, 33; Fil. 4:12, 13.

6. Antoy tuloytuloy tayon gawaen?

⁶ Tuloytuloy tayo sirin ya usisaen so panagnonot tayo. Tan no walay kaukolan tayon umanen, gawaen tayon tampol. Oniay imbaga nen Pablo ed saray taga Corinto: “Itultuloy yon suboken no kasin wala kayo ed pananisia; itultuloy yon paneknekan no anto kayo.” (2 Cor. 13:5) Agto labay ya ibaga ya no mimiaral tan manpupulong tayo et ‘wala tayo la ed pananisia.’ Napaneknekan tayo ya ‘wala tayo ed pananisia’ no seguroen tayo met ya duga so panagnonot, motibo, tan saray desisyon tayo. Kaukolan tayo sirin ya basaen so Biblia ya inagew-agew, aligen tayoy panagnonot nen Jehova, tan pansagpotan tayon gawaen so panlabayan to.—1 Cor. 2:14-16.

7. Base ed Efeso 4:31, 32, anto ni kaukolan tayon gawaen, tan akin et naiirapan so arum ya manggawa ed satan?

⁷ Basaen so Efeso 4:31, 32. Ibabaga met na Biblia ya kaukolan tayon “isulong so balon personalidad.” (Efe. 4:24) Pian nagawaan tayo itan, kaukolan tayon ekalen iray aliwliwan ugali tan kagagawa ya singa say “panem-em na sakit na linawa, pasnok, sanok,” tan arum ni ra. Pero no maminsan, aliwan mainomay itan. Ibabaga na Biblia ya wala ray totoon sipor lan “mipepetang so ulo” ra tan “misasanok.” (Pro. 29:22) No say sakey et wala ray ontan ya nilamot lan ugali to, kaukolan ton tuloytuloy ya kontrolen so sarili to anggano abautismoan la, ya singa nanengneng tayo ed sayay eksperiensya.

8-9. Akin et tuloytuloy tayon pansagpotan ya lakseben so daan ya personalidad, ya singa nanengneng tayod eksperiensya nen Stephen?

⁸ Si Stephen et nanairapan ya kontrolen so petang na ulo to. Oniay imbaga to: “Anggan nen abautismoan ak la, kailangan ko nin siansian aralen ya kontroley petang na ulok.” Aminsan nen manpupulong si Stephen kaiba iray kagrupo to, walay anakew ed radyo na luluganan to kanian inusilan to. Kuan to: “Nen ngalngalik la naabotan, inikbanan to may radyo tan tinmakas la. Nen iistoryaen kod arum no panon kon abawi may radyok, tinepetan to ak may elder ed grupo mi, ‘Stephen, no nabotan mod saman, antoy gawaen mo ey?’ Apaisip ak tan apakiwas [ak] ya pansagpotan nin kontroley sarilik.” b

⁹ Singa naeksperiensya nen Stephen, ompan say amta tayo et nakal lay aliwliwan ugali tayo pero bigla labat ya ompawil ya agtayo naliklikas. No nagawa itan ed sika, agka komon nadidismaya tan agmo iisipen ya mauge-uges kan too. Anggan si apostol Pablo et oniay inamin to: “Sano labay kon gawaen so duga, say mauges so walad siak.” (Roma 7:21-23) On, amin tayo et aliwan perpekto kanian walan-walay aliwliwan ugali tayo ya pawilpawil nin siansia. Singa iratan dutak tan dabok ed abung ya kaukolan ya naynay tayon panisen ta pian aga natipon. Anto sirin so dapat tayon gawaen?

10. Anto ray kaukolan tayon gawaen pian tuloytuloy tayon naekal iray aliwliwan ugali tayo? (1 Juan 5:14, 15)

¹⁰ Ipikasim ed si Jehova ya tulongan to kan naekal so aliwliwan ugalim. Seguradon dengelen to itan ya pikakasim ta unong ed linawa to. (Basaen so 1 Juan 5:14, 15.) Bilang ebat ed pikakasim, agto mamilagron ekalen  so aliwliwan ugalim, pero seguradon ikdan to kay biskeg pian nakontrol moy sarilim. (1 Ped. 5:10) Balet siempre, pansagpotan mon gawaen no antoy ipipikasim. Iwasan mo ray posiblin rason ya ompawil so daan ya personalidad mo. Singa bilang, agka manbabantay na saray pelikula tan palabas ed TV odino manbabasa na saray istorya ya liingen toy aliwliwan ugalim. No nalikas mo ya walay aliwliwan ompapasok ed isip mo, ekal mo itan ya tampol tan mannonot kay positibo.—Fil. 4:8; Col. 3:2.

11. Anto ray gawaen tayo pian tuloytuloy tayon nisulong so balon personalidad?

¹¹ Anggano alakseb mo lay daan ya personalidad, importantin isulong moy balon personalidad. Panon mon nagawaan itan? Alig mo ray ugali nen Jehova. (Efe. 5:1, 2) Singa bilang, no walay nabasam ed Biblia tungkol ed panamerdona nen Jehova, tepetan moy sarilim, ‘Siak ey, kasin mabulos kon peperdonaen so arum?’ No nabasam so tungkol ed impangasikaso nen Jehova ed saray lingkor ton mairap-bilay, tepetan moy sarilim, ‘Kasin imamalasakit ko ray agagi ya mankaukolan, tan manggagawa ak na paraan pian natulongan ko ra?’ On, tuloytuloy tayon nisulong so balon personalidad no anosan tayon umanen so panagnonot tayo.

12. Panon ya apatunayan nen Stephen ya sarag na Biblia ya umanen so bilay na sakey ya too?

¹² Si Stephen, ya abitla nen niman, et tuloytuloy ya nansagpot pian nisulong toy balon personalidad. Oniay imbaga to: “Manlapu nen abautismoan ak, dakel iray situasyon ya asubok so pasensiak. No papasyodoten ak na arum, naaralan koy onalis lan tampol odino pakalmaen so situasyon. Dakel so mankokomenda ed siak, kaiba lay asawak, ta siansian kalmadoy reaksion ko ed ontan iran situasyon. Anggan siak agak makapanisia. Agko aalaen so dayew ed sayan impanguman ko. Imbes, manisia ak ya ebidensya iya na pakayari na Biblia ya umanen so bilay.”

13. Antoy makatulong pian nalabanan tayo iray pilalek na laman? (Galacia 5: 16)

¹³ Basaen so Galacia 5:16. Pian nagawaan tayoy duga, iikdan itayo nen Jehova na masanton espiritu to. Kada no man-personal study tayo, ipapanengneng tayod si Jehova ya labalabay tayoy manpaigiya ed espiritu to. Makakaawat tayo met na masanton espiritu no mimiaral tayo. Ditan et nakakaiba tayo ray agagi ya pansasagpotan dan gawaen so duga, tan napapaseseg tayod alimbawa ra. (Heb. 10:24, 25; 13:7) Tan no espisipiko tayon ipikasi ed si Jehova ya tulongan to tayon labanan iray kakapuyan tayo, iter toy masanton espiritu to pian ombiskeg itayo tan agtayo onsuko. No gawaen tayo iratan ya amin, agmet automatiko ya naekal la ray mauges ya pilalek tayo. Pero baleg so nitulong na saratan pian nakontrol tayoy sarili tayo. Singa ibabaga na Galacia 5:16, no manakar tayo unong ed espiritu, “[agtayon] balot gawaen so pilalek na laman.”

14. Akin et importante ya tuloytuloy tayon labanan iray makalaman ya pilalek?

¹⁴ Agtayo papaulyanan iray espiritual ya rotina tayo pian tuloytuloy tayon nalabanan iray makalaman ya pilalek. Dapat alerto tayon lanang ta diad sayan mundo, anggan iner et walay tukso. Di ba anggan abautismoan tayo la, ompan no maminsan et natutukso tayo nin mansugal, manbuanges, tan onnengneng na pornograpiya. (Efe. 5:3, 4) Oniay inamin na sakey ya kabataan ya  brother: “Say sakey ya sankairapan ya subok ed siak et nagugustoan ko ray kaparak ya laki. Say amtak onlipas lanlamang itan ya liknaan, pero lalabanan ko nin siansia itan anggad natan.” Antoy makatulong no nanairapan kan labanan iray makalaman ya pilalek?

15. Akin et makatulong no tandaan tayo ya saray makalaman ya pilalek et lalabanan met na arum? (Nengnengen so litrato.)

¹⁵ Pian nalabanan moy mabiskeg ya pilalek na laman, makatulong no tandaan mo ya agmo bukbukor. Oniay ibabaga na Biblia: “Anggapoy tukso a sinmabid sikayo ya agni asali na arum a totoo.” (1 Cor. 10:13a) Imbaga itan nen apostol Pablo nen sinulatan to ray agagi ed Corinto. Say arum ed sikara et datin imoral, homoseksual, tan buanges. (1 Cor. 6:9-11) Isip mo pa, kasin anggapo lan balot so makalaman ya pilalek da nen abautismoan la ra? Wala ni. Anggano alanaan ira, nilabanan da nin siansia iray makalaman ya pilalek da ta agni ra perpekto. On, antokaman so makalaman ya pilalek ya lalabanan mo, tandaan mo ya alabanan la itan na arum. Kanian no asarag da, nasarag mo met. Ombiskeg so liknaan mo ta antam ya “saray onian klase na irap et naeeksperiensya met na amin ya agagi . . . diad interon mundo.”—1 Ped. 5:9.

16. Antoy agtayo nepeg ya isipen, tan akin?

¹⁶ No walay lalabanan mon kakapuyan, agmo komon iisipen ya anggapoy makatalos ed situasyon mo. Ta no ontay isipen mo, ompan onsuko ka la tan irason mo ya agmo lan talaga sarag so manguman. Pero ibabaga na Biblia ya sarag mo. Kuan to: “Matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan.” (1 Cor. 10:13b) On, anggano mabisbiskeg so pilalek  na laman, tandaan tayo ya diad tulong nen Jehova, anggapo tay tukso ya agtayo nalabanan.

17. Anggano walay makalaman ya pilalek tayo ya pawil-pawil nin siansia, antoy dapat tayon gawaen?

¹⁷ Lapud agtayo perpekto, ompan walay makalaman ya pilalek tayo ya pawil-pawil nin siansia. Pero no nalikas tayo la itan, aligen tayoy Jose—ibatikan tayoy tukso! (Gen. 39:12) Tandaan, agka natalo na saray pilalek mo no desidido kan labanan iratan.

18-19. Anto ray itepet tayod sarili tayo pian tuloytuloy tayon nauman so panagnonot tayo?

¹⁸ On, nauman tayoy panagnonot tayo no tuloytuloy tayon seguroen ya makapaliket ed si Jehova iray iisipen tan desisyon tayo. Lanang tayo sirin ya itepet iraya ed sarili tayo: ‘Kasin nanengneng ed kabibilay ko ya panisiaan kon asingsingger lan naderal iyan sistema nen Satanas? Kasin pansasagpotan kon isulong so balon personalidad? Kasin manpapaigiya ak ed espiritu nen Jehova pian nalabanan ko ray makalaman ya pilalek?’

¹⁹ No uusisaen moy sarilim, say nengneng mo et saray inaligwasan mo la. Balet no wala ni ray nanengneng mon kaukolan mon paaligwasen, agka nadidismaya. Natural labat itan ta agtayo perpekto. Pero siempre, say goal tayo et tuloytuloy ya onaligwas ya singa ibabaga na Filipos 3:16: “Antokaman so inaligwasan tayo la, mantultuloy tayo komon ya onabante.” On, no tuloytuloy mon umanen so panagnonot mo, seguradon bendisyonan nen Jehova so pansasagpot mo.