1. Anto ray panmoria na totoo ed panagkimey?

DIAD lugar yo, antoy panmoria na totoo ed panagkimey? Diad dakel ya bansa, saray totoo et mantratrabaho ya impasya tan mas andukey. Kanian anggapo lay panaon da parad painawa, pamilya ra, tan pandayew ed Dios. (Ecl. 2:23) Wala balet iray totoo ya agdan talaga labay so mankimey tan dakel so baraan da.​—Pro. 26:13, 14.

2-3. Antoy alimbawa nen Jehova tan Jesus ed panagkimey?

² No ikompara ed panmoria na sayan mundo, duma so panmoria nen Jehova tan Jesus. Labalabay nen Jehova so mankimey. Oniay imbaga nen Jesus: “Say Amak et mankikimey ni anggad natan, tan ontan ak met.” (Juan 5:17) Isipen pay amin ya ginawa na Dios sanen pinalsa to so dakdakel ya anghel tan say maaw-awang ya uniberso. Dakel met so marakdakep ya ginawa na Dios diad dalin ya panaayaman tayo. Duga so imbaga na salmista: “Agaylay karakel na saray kimey mo, O Jehova! Amin iratan et ginawam ed karunongan. Say dalin et napno na saray ginawam.”​—Sal. 104:24.

³ Inalig nen Jesus so Ama to. Sikatoy tinmulong sanen “imparaan [na Dios so] katawenan” tan kaiba nen Jehova “bilang marundunong a komikimey.” (Pro. 8:27-31) Insan nen wadiad dalin si Jesus, ginawa to so kimey ya ipapagawa nen Jehova ed sikato. Satan ya kimey et impasen ton singa naakan, tan apaneknekan ed saray kimey to ya sikatoy imbaki na Dios.​—Juan 4:34; 5:36; 14:10.

4. Antoy naaralan tayod si Jehova tan Jesus nipaakar ed panagpainawa?

 ⁴ Kasin ipapanengneng na alimbawa nen Jehova tan Jesus ya agtayo kaukolan so manpainawa? Andi. Agbalot nakesawan si Jehova, kanian agto kaukolan so manpainawa. Balet nabasa ed Biblia ya kayarin pinalsa nen Jehova so tawen tan dalin, “sikatoy tinmundan nankimey insan nampainawa.” (Exo. 31:17) Mapatnag ya say labay ya ibaga na satan et tinmunda si Jehova tan nanliketan to iray ginawa to. Tan anggano makulin nankimey si Jesus nen wadiad dalin, impanaon toy manpainawa tan mangan kaiba iray kakaaro to.​—Mat. 14:13; Luc. 7:34.

5. Antoy mairap ya balansien na dakel ya lingkor na Dios?

⁵ Ibabaga na Biblia ya saray totoo na Dios et kaukolan day mankimey. Saray lingkor to et nepeg ya makuli, aliwan mangiras. (Pro. 15:19) Nayarin mantratrabaho ka pian nitaryam so pankaukolan na pamilyam. Ontan met, responsabilidad na amin a disipulo nen Kristo ya ipulong so maong a balita. Balet kaukolan tayo met so manpainawa. Kasin no maminsan et naiirapan ka ya balansien so panaon mo parad pananap na pambilay, ministeryo, tan panagpainawa? Panon tayon nabalanse so panaon tayo ed panagkimey tan panagpainawa?

6. Base ed Marcos 6:30-34, panon ya impanengneng nen Jesus ya balanse so panmoria to ed panagkimey tan panagpainawa?

⁶ Importante ya balanse so panmoria tayo ed panagkimey. Insulat nen Arin Solomon: “Walay panaon na amin a bengatla.” Imbaga to ya walay panaon parad pantanem, pangipaalagey, panakis, panelek, pansayaw, tan arum ni. (Ecl. 3:1-8) Malinew ed satan ya say panagkimey tan panagpainawa et importantin kabiangan na bilay. Si Jesus et balanse so panmoria to ed panagkimey tan panagpainawa. Aminsan, pinmawil iray apostol manlapud impanpulong da tan “ngalngali anggapoy panaon da anggan mangan.” Kanian imbaga nen Jesus: “Ti’la, ta onla itayo ed sakey a nisulinek a pasen pian makapanpainawa itayon magano.” (Basaen so Marcos 6:30-34.) Tua ya no maminsan et agla makapanpainawa si Jesus tan saray disipulo to anggano labalabay da, balet amta nen Jesus ya kaukolan da so painawa.

7. Antoy gunggona no aralen tayo so ganggan nipaakar ed Sabaton?

⁷ Talagan kaukolan tayoy manpainawa odino ontundan magano ed inagew-agew ya kimey tayo. Natalosan tayo itan no aralen tayo imay uksoyan ya inter na Dios ed saray totoo to nensaman—say sinimban Sabaton. Agtayo la sakop na Mosaikon Ganggan, balet nagunggonaan itayo no aralen tayo so nipaakar ed Sabaton. Makatulong itan pian nausisa tayo so panmoria tayo ed panagkimey tan panagpainawa.

8. Base ed Exodo 31:12-15, parad anto so agew na Sabaton?

⁸ Ibabaga na Biblia ya kayari na anemiran “agew,” tinmunda so Dios ed impamalsa to ed saray bengatla diad dalin. (Gen. 2:2) Balet labalabay nen Jehova so mankimey, tan anggad natan et “mankikimey ni.” (Juan 5:17) Anemiran “agew” ya nankimey si Jehova tan sikatoy nampainawa ed komapiton “agew.” Mipara itan ed samay imbaga tod saray Israelita ya nepeg iran manpainawa diad kada komapiton agew. Imbaga na Dios ya say agew na Sabaton et sakey a tanda ed baetan to tan na Israel. Satan ya agew et parad “sigpot a pampainawa,” tan “masanto itan parad si Jehova.” (Basaen so Exodo 31:12-15.) Agnayari so mankimey ed satan ya agew, pati saray ugugaw, aripen, tan  anggan saray ayayep. (Exo. 20:10) Lapud satan et walay panaon na saray totoo ya mandayew ed Dios.

9. Diad panaon nen Jesus, anto so lingon panmoria na totoo nipaakar ed Sabaton?

⁹ Say Sabaton et parad pankaabigan na saray lingkor na Dios; balet, dakel ed saray lider na relihyon ed panaon nen Jesus et masyadon istrikto tan panatiko ed impanumbok da ed Sabaton. Ibabaga da ya no Sabaton et agnayari so man-arurot na dawa odino mantambal na mansasakit. (Mar. 2:23-27; 3:2-5) Satan ya ibabaga da et kontra ed panlabayan na Dios, tan impalinew itan nen Jesus ed saray babangatan to.

10. Antoy naaralan tayo ed Mateo 12:9-12 nipaakar ed panmoria nen Jesus ed Sabaton?

¹⁰ Nginilinan nen Jesus tan saray Judion papatumbok to so Sabaton lapud sakop ni ra na Mosaikon Ganggan. * Balet diad salita tan gawa et impanengneng nen Jesus ya say pan-ngilin na Sabaton et nepeg ya makatunongan tan nayari so manggawa na kamaongan tan ontulong ed arum. Imbaga to: “Say panggawa na maabig diad Sabaton et unong ed ganggan.” (Basaen so Mateo 12:9-12.) Agto impasen ya kontra ed Sabaton so itulong ed arum tan panggawa na kamaongan. Nanengneng ed saray ginawa nen Jesus so manunan gagala na Sabaton. Lapud ontundan mankimey iray totoo na Dios no Sabaton, makapampokus ira ed panagdayew da. Si Jesus et binmaleg ed pamilya ya seseguroen dan kada agew na Sabaton et mandayew ira ed Dios. Napatnagan  itan ed samay ginawa nen Jesus nen sikatoy linma ed baley to ya Nazaret: “Unong ed niyugali to lad agew na Sabaton, sikatoy linmoob ed sinagoga tan inmalagey pian manbasa.”​—Luc. 4:15-19.

11. Siopay angipanengneng ed si Jesus na maabig ya alimbawa ed panagkimey?

¹¹ Seguradon inalig nen Jose so panmoria na Dios ed panagkimey nen imbangat ton mankarpentero si Jesus. (Mat. 13:55, 56) Tan seguradon naobserbaan nen Jesus so inagew-agew ya makulin pankikimey nen Jose pian walay pambilay na ombabaleg lan pamilya to. Kalabas na panaon, oniay imbaga nen Jesus ed saray disipulo to: “Say komikimey et makanepegan ed upa to.” (Luc. 10:7) On, naaralan nen Jesus so makulin panagkimey.

12. Anto ran teksto ed Biblia so pakabasaan na nipaakar ed makulin panagkimey?

¹² Ontan met ed si apostol Pablo. Say manunan kimey to et ipulong so nipaakar ed si Jesus tan saray bangat to. Balet nantrabaho si Pablo pian makalmo na pambilay to. Amta na saray taga Tesalonica ya sikatoy ‘agew-labi ya nankimey tan nansagpot pian agmagmaliw a pabelat ed anggan siopa.’ (2 Tes. 3:8; Gawa 20:34, 35) Nayarin say tutukoyen nen Pablo et say anapan ton managgaway tolda. Legan a walad Corinto, sikatoy akiayam ed abung di Aquila tan Priscila tan “nankimey a kaiba ra, ta managgaway tolda so anapan da.” Anggano imbaga nen Pablo ya sikatoy “agew-labi” ya nankimey, agto labay ya ibagan agtinmundan nantrabaho. Nampainawa met, a singa no diad agew na Sabaton. Sasamboten to itan ya agew pian pulongan iray Judio, ya manpapainawa met legan na Sabaton.​—Gawa 13:14-16, 42-44; 16:13; 18:1-4.

13. Antoy naaralan tayo ed alimbawa nen Pablo?

¹³ Maabig ya alimbawa si Pablo. Kaukolan toy mananap na pambilay; balet sinegurado to ya regular a makapibiang ed “masanton kimey” ya ‘pangiyabawag na maong a balita na Dios.’ (Roma 15:16; 2 Cor. 11:23) Ontan met so impaseseg ton gawaen na arum. Bilang resulta, akaiba nen Pablo si Aquila tan Priscila diad “kimey nen Kristo Jesus.” (Roma 12:11; 16:3) Pinaseseg nen Pablo iray taga Corinto ya naynay komon a ‘dakel so gawaen dan kimey na Katawan.’ (1 Cor. 15:58; 2 Cor. 9:8) Onia ni ingen so impaisulat nen Jehova ed si apostol Pablo: “No walay siopaman ya agto labay so mankimey, agyo papakanen.”​—2 Tes. 3:10.

14. Antoy labay ya ibaga nen Jesus ed samay nabasa diad Juan 14:12?

¹⁴ Say sankaimportantian ya kimey ed sayan kaunoran iran agew et say panagpulong tan panaggaway babangatan. Diad tua, impasakbay nen Jesus ya mas dakel so gawaen na saray disipulo to nen saray agawaan to! (Basaen so Juan 14:12.) Agto labay ya ibagan manggawa itayo met na saray milagro ya singa ginawa to. Imbes, saray papatumbok to et manpulong tan manbangat diad mas dakel ya lugar, mas dakel ya totoo, tan mas andukey ya panaon nen say impanpulong to.

15. Anto ray itepet tayo ed sarili tayo, tan akin?

¹⁵ No walay trabahom, itepet mo iraya ed sarilim: ‘Kasin kabkabat ak ya makuli ed pantratrabahoan ko? Kasin nasusumpal kod dugan oras iray trabahok tan gagawaen koy anggaay nayarian ko?’ No say ebat mo et on, seguradon pantiwalaan ka na amom. Nayarin lapud satan et mas dengelen na saray makakaobserba ed sika so mensahe na Panarian. No diad kimey a panagpulong tan panagbangat, itepet mo iraya ed sarilim: ‘Kasin kabkabat ak ya makuli ed ministeryo? Kasin manpaparaan ak ya maong parad unonan pitongtong? Kasin papawilen kon tampol iray interesado? Tan kasin  regular ak ya mibibiang ed nanduruman kimey diad ministeryo?’ No say ebat mo et on, naliketan ka ed pankikimey mo.

16. Antoy pandumaan na panmoria nen Jesus tan saray apostol to ed saray dakel a totoo natan no nipaakar ed panagpainawa?

¹⁶ Amta nen Jesus ya kaukolan to met tan saray disipulo to so manpainawa. Balet, dakel ya totoo nensaman tan natan so kapara na samay mayaman a laki diad ilustrasyon nen Jesus. Oniay panmoria na saman a laki: “Manpainawa ka, mangan ka, oninum ka, manliket ka.” (Luc. 12:19; 2 Tim. 3:4) Inisip to ya say sankaimportantian ed bilay et say pampainawa tan panliket. Duma balet si Jesus tan saray apostol to lapud agda inyuna ed bilay da so pamaliket ed sarili da.

17. Antoy panguusaran tayo ed day off tayo ed trabaho?

¹⁷ Aaligen tayo met natan si Jesus. Uusaren tayoy day off tayo ed trabaho aliwa labat ya pian manpainawa noagta pian manpulong tan onatendi ed saray Kristianon pantitipon. Diad tua, importantin maong ed sikatayo so panaggaway babangatan tan piaral kanian pansasagpotan tayoy regular ya makapibiang ed saratan ya sagradon aktibidad. (Heb. 10:24, 25) Anggano wala tayod bakasyon, seseguroen tayo ya makaatendi tayo ed saray aral anggan iner so kawalaan tayo, tan manaanap tayoy pankanawnawa ya ipaamta so katuaan ed saray nakakatongtong tayo.​—2 Tim. 4:2.

18. Antoy labay na Ari tayon si Kristo Jesus ya gawaen tayo?

¹⁸ Talagan misalsalamat itayo lapud say Ari tayon si Kristo Jesus et makatunongan tan tutulongan to tayon nawalaan na balansin panmoria ed panagkimey tan panagpainawa! (Heb. 4:15) Labay ton makapanpainawa tayo na susto. Labay to met ya makuli tayon mantrabaho pian nitarya tayoy pankaukolan tayo tan makapibiang tayo ed makapaliket ya kimey a panaggaway babangatan. Diad onsublay ya artikulo, pantongtongan tayo no antoy ginawa nen Jesus pian nibulos tayo ed kasalanan.