Nen sinulatan nen apostol Pablo iray Kristiano ed Tesalonica, oniay imbaga to: “No walay aliwan matulok ed saray ibabaga mi diad sayan sulat, sikatoy markaan yo.” (2 Tes. 3:14) Dati say amta tayo, sayan instruksion et para labat ed saray elder. Kanian nensaman, no walay agi ya agto uunoren iray prinsipyo na Biblia anggano aminpiga lan sinimbawa, nayarin mandesisyon iray elder ya sakey ed sikara so manpaliwawa pian napasakbayan so kongregasyon. Lapud sayan paliwawa, natalosan na saray agagi ya agda la nepeg ya piulopan imay agi, puera labat diad aral tan diad panagpulong.

Pero anguman so pakatalos tayod saya. Mapatnag ya sayan bilin nen Pablo et nepeg ya gawaen na kada Kristiano ed kongregasyon. Kanian agla kaukolan ya wala ni manpaliwawan elder pian napasakbayan so kongregasyon. Akin et anguman so pakatalos tayo ed saya? Pian naebatan itan, amtaen tayo no antoy tutukoyen nen Pablo nen inter to yan bilin.

Imbaga nen Pablo ya wala ray agagi ed kongregasyon na Tesalonica ya “masunggay.” Say tutukoyen to et saramay agagin ag-ondengel ed simbawa ya nanlapud Salita na Dios. Diad akaunan imbisita to ed Tesalonica, oniay imbaga ton gawaen da: “No walay siopaman ya agto labay so mankimey, agyo papakanen.” Anggano wala la ’tan ya imbaga nen Pablo, abalitaan to ya wala ni ran siansiay agagi ya agda labay so mantrabaho anggano maksil so laman da. Tan aliwan satan labat. Pibabalian da met iray agda nepeg ya pibabalian. Antoy nepeg ya gawaen na saray agagi no wala ray ontan ed kongregasyon?—2 Tes. 3:​6, 10-12.

“Sikatoy markaan yo,” kuan nen Pablo. Say Griegon salita ya inusar nen Pablo dia et ontutukoy ed panalwar ed sakey ya too ya mauges so impluensya to. Ayan instruksion et parad interon kongregasyon, aliwa labat ya diad saray elder. (2 Tes. 1:1; 3:6) Kanian no naimano na sakey ya Kristiano ya ag-uunoren na sakey ya agi iray bilin na Biblia, sikaton mismo so mandesisyon no kasin ‘agto la piulopan’ itan ya agi ya “masunggay.”

Labay to kasin ibaga ’ya et ituring lan singa nakal ed kongregasyon iyan agi? Andi, ta oniay imbaga nen Pablo: “Itultuloy yon simbawaen bilang sakey ya agi.” Kanian sarag da nin nakaiba diad saray aral tan diad panagpulong. Pero agda la iimbitaan o itatagar no wala ray okasyon o gathering. Akin ey? “Pian sikatoy nabaingan,” kuan nen Pablo. On, no ontan so gawaen da, diman natalosan na samay agi ya aliway gagawaen to tan ompan napakiwas ya manguman.—2 Tes. 3:​14, 15.

Panon tayon niyaplika iyan bilin natan? Dapat seguroen tayo ni ya amay gagawaen to may agi et talagan kontra ed ibabaga na Biblia tan magmamaliw lan “masunggay” ya singa imbaga nen Pablo. Tandaan ya ag-iya ontutukoy ed saray agagi ya wala ray gagawaen dan agnaako na konsiensia tayo pero agmet kontra ed ibabaga na Biblia. Tan agmet iya ontutukoy ed saray agagin asakitan day liknaan tayo. Say espisipikon tutukoyen dia nen Pablo et saramay agagin gagagalaen dan ag-unoren iray bilin ya nanlapud Biblia anggano asimbawa la ra.

Kanian no walay naimano tayon agi ya ag-ondengel ed simbawa ya nanlapud Biblia, a sikatayon mismo so mandesisyon no kasin agtayo la imbitaan o itagar iyan agi ed saray okasyon odino gathering. Lapud personal iyan desisyon, agtayo la ibabagbaga ed arum, puera labat ed saray kapamilya tayon Tasi ya kaamong tayo. Tandaan tayo ya sarag tayo nin siansia ya piulopan iman ya agi diad saray aral tan panagpulong. No anguman la tan intunda to lay aliwan gagawaen to, sarag tayo lan ipawil so datin pipiulop tayod sikato.