1. Antoy sarag ya gawaen na sakey ya akagaway seryoson kasalanan?

 DIAD imbeneg ya artikulo, naamtaan tayo no antoy imbaga nen apostol Pablo ya gawaen na kongregasyon ed Corinto nen walay agin akagaway seryoson kasalanan. Lapud agmagbabawi imay nankasalanan, kaukolan ya ekalen ed kongregasyon. Pero singa nanengneng ed pinagkateman teksto na sayan artikulo, no say sakey et akagaway seryoson kasalanan, sarag toy magbabawi. (Roma 2:4) Antoy gawaen na saray elder pian natulongan dan magbabawi imay agi?

2-3. Antoy nepeg tayon gawaen no naamtaan tayon akagaway seryoson kasalanan so sakey ya agi, tan akin et gawaen tayo itan?

² No ag-amta na saray elder ya say sakey ya agi et akagaway seryoson kasalanan, agda natulongan. Kanian antoy nepeg tayon gawaen no naamtaan tayon akagaway seryoson kasalanan so sakey ya agi, ya lapud satan et posiblin naekal ed kongregasyon? Kaukolan tayon katongtongen iman ya agi tan pasesegen tayon manpatulong ed saray elder.​—Isa. 1:18; Gawa 20:28; 1 Ped. 5:2.

³ Panon to balet no agto labay may agi so onasingger ed saray elder? Sikatayo lan mismo so mangibagad sikara pian natulongan da lan tampol. Gawaen tayo itan ta inar-aro tayo imay agi. No agto itunda so panggagawa toy aliwa, napepeligroy relasyon tod si Jehova tan ompan naderal so reputasyon na kongregasyon. Kanian anggano aliwan mainomay, makpel tayon ipaamta itan ed saray elder ta inar-aro tayoy Jehova tan amay mismon agi.​—Sal. 27:14.

 ANTOY GAWAEN NA SARAY ELDER PIAN NATULONGAN DA SO AKAGAWAY SERYOSON KASALANAN?

4. Antoy manunan gagala na saray elder no katongtongen da la imay agin akagawa na seryoson kasalanan?

⁴ No walay agi ed kongregasyon ya akagaway seryoson kasalanan, mamili so ulop na mamatatken na taloran kualipikadon elder. Sikara so magmaliw ya komite ya mitongtong ed samay agi. a Kaukolan ya mapaabeba irayan elder. Gawaen dan amin pian natulongan imay agi, pero nepeg dan bidbiren ya agda napilit ya manguman so sakey ya too. (Deu. 30:19) Amta na saray elder ya aliwan amin ya akagaway kasalanan et ondengel ed panangipetek, ya singa ginawa nen Arin David. (2 Sam. 12:13) Nayarin say arum et ibaliwala da labat iray simbawa nen Aman Jehova. (Gen. 4:​6-8) Antokaman so magmaliw ya reaksion to imay agi, say manunan gagala na saray elder et tulongan dan magbabawi. Anto ran prinsipyo ed Biblia so nepeg ya tandaan na saray elder no katongtongen da la imay akagaway seryoson kasalanan?

5. Anton ugali so nepeg ya ipanengneng na saray elder no katongtongen da la may nankasalanan? (2 Timoteo 2:​24-26) (Nengnengen met so litrato.)

⁵ Sankanonot na saray elder ya amay nankasalanan et karnero nin siansia nen Jehova ya mabmabli ed sikato. (Luc. 15:​4, 6) Kanian no katongtongen da la, agda pansalitaan na ansakit tan maaroy pantrato dad sikato. Agda iisipen ya say rason na pitongtong da et pian tepet-tepetan da labat ya anggad naamtaan da no anton talagay agawa. Andi, aliwan ontan. Pansagpotan na saray elder ya ipanengneng iramay ugali ya abitlad 2 Timoteo 2:​24-26. (Basaen.) Gawaen day anggaay nayarian dan mansiansian mauyamo tan maulimek pian nasabi da so puso to may agi.

6. Panon ya niparaan na saray elder so puso ra antis dan katongtongen imay nankasalanan? (Roma 2:4)

⁶ Kaukolan ya iparaan na saray elder so puso ra. Gawaen day anggaay nayarian dan aligen so maaron panagtrato nen Jehova ed saray nankasalanan, ta sankanonot da may insulat nen Pablo ya: “Diad kaabigan [na Dios] et labay to kan pakiwasen a magbabawi.” (Basaen so Roma 2:4.) Sankanonot met na saray elder ya pastol ira tan walay eebatan da ed Kristo, kanian kaukolan dan aligen so alimbawa to. (Isa. 11:​3, 4; Mat. 18:​18-20) Antis ya katongtongen na komite imay agi, ipikasi rad si Jehova ya igiya to ra pian natulongan dan magbabawi. Ipikasi da met ya tulongan to ran natalosan so kipapasen to. Importante ya amtaen day ibabaga na Biblia tan man-research ira ed saray publikasyon tayo. Isipen dan maong so background to yan agi ya nayarin akaapekto ed panagnonot tan ugali to, ta ompan sakey itan ed  saray rason no akin ya akagaway kasalanan.—Pro. 20:5.

7-8. Panon ya naalig na saray elder so inkaanos nen Jehova no katongtongen da la imay agin nankasalanan?

⁷ Importante ya aligen na saray elder so inkaanos nen Jehova. Sankanonot da no panon ya tinulongan nen Jehova iray akagawa na seryoson kasalanan nensaman. Singa bilang, maan-anos ya kinatongtong nen Jehova si Cain. Pinasakbayan to no antoy nagawa no agmanguman. Tan pinaseguroan to met ya bendisyonan to no gawaen toy duga. (Gen. 4:​6, 7) Imbaki nen Jehova si propetan Natan pian ipetek si David. Angusar na ilustrasyon si Natan pian nasabi so puso nen David. (2 Sam. 12:​1-7) Tan “aminpigapiga” ya angibaki si Jehova na saray propeta pian natulongan ya magbabawi iray rebelden Israelita. (Jer. 7:​24, 25) On, agla inalagar nen Jehova ya magbabawi iray lingkor to antis to ran tulongan. Sikato lay inmunan nanggaway paraan pian napakiwas to ran magbabawi.

⁸ Atan ya ugali nen Jehova so aaligen na saray elder no tutulongan day sakey ya agin akagawa na seryoson kasalanan. Base ed 2 Timoteo 4:​2, importante ya ‘maanos’ iray elder no ipepetek da so sakey ya agi. On, kaukolan ya kalmado tan mapasensya so sakey ya elder pian napakiwas imay nankasalanan ya gawaen no antoy duga. No pinunuyan balet na elder so sanok to, ompan agla ondengel ed simbawa imay nankasalanan tan aglaingen napakiwas ya magbabawi.

9-10. Antoy gawaen na saray elder pian natalosan to may agi no akin ya kinmapuy so espiritualidad to?

⁹ Amtaen na saray elder iray posiblin rason no akin ya akapankasalanan imay agi. Singa bilang, kasin kinmapuy ed espiritual ta agla manpi-personal study tan manpupulong? Kasin matalag lan manpikasi ed si Jehova tan aliwa lan impapuso iray pikakasi to? Kasin agto la lalabanan iray mauges ya pilalek to? Siopa ray lanang ton kaulop tan anto ray pipilien ton libangan? Antoy epekto na saratan ed puso to? Kasin natatalosan to ya asakitan toy Aman Jehova ed ginawa to?

¹⁰ No itepet iratan na saray elder ed samay nankasalanan ya agi, diman to natalosan no akin ya kinmapuy so espiritualidad to ya anggad akagaway kasalanan. Gawaen da itan diad maaron paraan tan iwasan dan itepet iray agda la nepeg ya naamtaan. (Pro. 20:5) Sarag da met so mangusar na ilustrasyon ya singa ginawa nen Natan nen impetek toy David, pian natalosan to may agi ya aliway ginawa to. No ontan so gawaen na saray elder, ompan diad unona ni labat ya pitongtong da et bidbiren la na samay agi ya talagan walay nankulangan to. Tan ompan diad saman ni labat et napakiwas lan magbabawi.

11. Panon so impantrato nen Jesus ed saray nankasalanan?

¹¹ Pansagpotan na saray elder ya aligen si Jesus. Nen kinatongtong nen Jesus si Saulo ya taga Tarso, oniay intepet to: “Saulo, Saulo, akin et papasegsegangen mo ak?” Lapud satan ya tepet, atalosan nen Saulo ya aliway gagawaen to. (Gawa 9:​3-6) Tan no nipaakar ed samay “bii a si Jezebel,” b oniay imbaga nen Jesus: “Sikatoy inikdan koy panaon pian magbabawi.”​—Apo. 2:​20, 21.

12-13. Antoy gawaen na saray elder no agmagbabawi so sakey ya nankasalanan kayari na unonan impitongtong dad sikato? (Nengnengen met so litrato.)

¹² Aaligen na saray elder so alimbawa nen Jesus. Agdan tampol iisipen ya say sakey ya nankasalanan et anggapo lay pag-asa ton magbabawi. Wala ray nankasalanan ya nayarin diad unona ni labat ya pitongtong na komite  et magbabawi la ra. Pero, say arum balet et kaukolan da ni panaon. Kanian ompan aliwa labat ya maminpinsan so pitongtong na saray elder ed sakey ya nankasalanan. Nayarin diad unonan impitongtong da et pannonotan ton maong iramay imbaga dad sikato. Ompan napakiwas met ya manpikasid si Jehova tan mapaabeban onkerew na panamerdona. (Sal. 32:5; 38:18) Kanian diad ontumbok ya pitongtong dad sikato, ompan wala lay angumanan to komparad samay unaan ya impitongtong da.

¹³ Pian natulongan na saray elder ya magbabawi imay nankasalanan, kaukolan dan ipalikna ed sikato ya imamalasakit da tan natatalosan day dadalanen to. Iilaloan tan ipipikasi rad si Jehova ya bendisyonan toy pansasagpot da ya natulongan imay agi, tan natenyeg komon so puso to ya anggad napakiwas lan magbabawi.​—2 Tim. 2:​25, 26.

14. Siopay nirayew no nagbabawi so sakey ya nankasalanan, tan akin?

¹⁴ Talagan makapaliket no nagbabawi so sakey ya nankasalanan! (Luc. 15:​7, 10) No nagawa itan, siopay nirayew? Tua, ginawa na saray elder so anggaay nayarian da pian nipetek imay agi. Pero siopan talagay tinmulong ed sikato? Nanonotan yo may imbaga nen Pablo nipaakar ed saray nankasalanan? Kuan to: “Agla piga ya abuloyan ira na Dios a magbabawi.” (2 Tim. 2:25) On, si Jehova so talagan tinmulong ed samay nankasalanan pian manguman tan magbabawi, aliwan too. Binitla nen Pablo iray balibalin resulta no say sakey et magbabawi—mas onaralem so pakatalos tod katuaan, ompawil so dugan panagnonot to, tan makablos ed saray patit nen Satanas.​—2 Tim. 2:26.

15. Antoy gawaen na saray elder pian tuloytuloy dan natulongan so nagbabawin nankasalanan?

¹⁵ Anggano nagbabawi la so sakey ya nankasalanan, mangiyuksoy nin siansia so komite na maminpiga nin pan-shepherding ed sikato pian tuloytuloy dan natulongan ya labanan iray patit nen Satanas, tan pian tuloytuloy ton nagawaan no antoy duga. (Heb. 12:​12, 13)  Siempre, agnepeg ya ipaamtad arum na saray elder so ginawa ton kasalanan. Pero, antoy nepeg dan ipaamta ed kongregasyon?

“IPETEK MO ED ARAP NA AMIN”

16. Diad samay nabasad 1 Timoteo 5:​20, siopa may “amin” ya tutukoyen nen Pablo?

¹⁶ Basaen so 1 Timoteo 5:20. Imbaga nen Pablo ed kapara ton elder ya si Timoteo ya no walay akagawa na seryoson kasalanan ed kongregasyon, kaukolan ton ipetek o baaten ed “arap na amin.” Antoy labay ya ibaga nen Pablo? Kasin amay “amin” ya imbaga to et ontutukoy ed interon kongregasyon? Andi met. Say tutukoyen to et saramay makaamta ed kasalanan ya ginawa to may agi—nayarin sikaran mismo so akanengneng ed ginawa to odino sikaray angipatuaan to na kasalanan to. Sikara labat so pangibagaan na saray elder ya nipetek la imay agin nankasalanan tan inaksionan da la itan.

17. No balitado la ed kongregasyon so kasalanan ya ginawa to may agi odino baleg so posibilidad ya naamtaan da met lanlamang itan, antoy iyanunsio ed kongregasyon, tan akin et kaukolan itan ya iyanunsio?

¹⁷ Panon to balet no balitado la ed kongregasyon so kasalanan ya ginawa to may agi odino baleg so posibilidad ya naamtaan da met lanlamang itan? No ontan so situasyon, amay “amin” ya binitla nen Pablo et ontutukoy la ed interon kongregasyon. Kanian walay elder ya mangiyanunsio ed kongregasyon ya samay brother o sister et impetek o abaat. Akin et kaukolan itan ya iyanunsio? Imbaga nen Pablo ya ‘onkana itan ya pasakbay ed arum’ pian napakiwas ira ya manalwar tan labanan so kasalanan.

18. Antoy gawaen na saray elder no say akagawa na seryoson kasalanan et bautismadon menor-de-edad? (Nengnengen met so litrato.)

¹⁸ Panon to balet no say akagawa na seryoson kasalanan et bautismadon menor-de-edad, iramay anggapo ni 18 da? Mamili so ulop na mamatatken na duaran elder ya mitongtong  ed samay menor-de-edad kaibay Tasin atateng to. c Amtaen na saray elder no anto la ray ginawa na saray atateng pian natulongan dan magbabawi so anak da. No ondedengel ed sikara imay anak da tan manggagawa met lay pananguman, nayarin mandesisyon imay duaran elder ya saray atateng to la so mangipetek ed sikato. Duga met labat itan, ta saray atateng so angimatalekan nen Jehova na ontan ya responsabilidad. (Deu. 6:​6, 7; Pro. 6:20; 22:6; Efe. 6:​2-4) Pero siempre, panapanaon ya kumustaen na saray elder iramay atateng pian naseguro ya tutulongan da imay anak da. Panon to balet no agmagbabawi imay bautismadon menor-de-edad tan agto labay so manguman? No ontan so situasyon, manbuo la so ulop na mamatatken na komite ya mitongtong ed sikato kaibay Tasin atateng to.

“SI JEHOVA ET MAAR-ARO TAN MAPANGASI”

19. Panon ya aaligen na saray elder si Aman Jehova no tutulongan da so sakey ya akagaway seryoson kasalanan?

¹⁹ Responsabilidad na saray elder ya kaiba ed komite ya pansiansiaen ya malinis so kongregasyon. Amta ra ya walay eebatan da ed si Jehova. (1 Cor. 5:7) Pero gawaen da met so anggaay nayarian da ya tulongan ya magbabawi imay nankasalanan. Legan dan tutulongan imay agi, ag-ira nanaekalan na ilalo ya manguman met lanlamang. Akin ey? On ta labay dan aligen si Jehova, say “maar-aro tan mapangasi” ya Ama tayo. (Sant. 5:11) Ontan ya ugali so impanengneng nen apostol Juan. Nen maedad la, oniay insulat tod saray Kristiano: “Inad-arok ya ananak, insulat kod sikayo irayan bengatla pian agkayo makapankasalanan. Balet, no walay mankasalanan, walay sakey a mananulong tayo a kaiba na Ama, salanti, si Jesu-Kristo, a sakey a matunong.”​—1 Juan 2:1.

20. Antoy pantongtongan tayo ed sampot ya artikulo na sayan isyu?

²⁰ Makapaermen balet ta wala ray agagin nankasalanan ya agan talaga magbabawi, kanian kaukolan iran ekalen ed kongregasyon. No ontan, anto lay onsublay ya gawaen na saray elder? Atan so pantongtongan tayo ed sampot ya artikulo na sayan isyu.