1. Base ed 1 Tesalonica 5:11, mitulongan tayo ed anton kimey?

 KASIN asali la na kongregasyon yo so akitulongan ed construction o renovation na Kingdom Hall? Antoy alikna yo diad samay sankaunaan ya impantitipon yo ditan? Seguradon misatsalamat kayod si Aman Jehova. Ompan wala ray emosyonal legan na kansion, tan ompan akalua ni ingen so arum. Napapagalangan si Jehova lapud saray balibalin Kingdom Hall tayo. Pero lalo tayon napagalangan so Dios no mitulongan tayo ed sakey nin klase na panagpaalagey ya mas importante nen say panagpaalagey na literal ya bilding. Anto iya? Say pamabiskeg ed saray agagi—saray totoo ya oonla ed pasen ya pandadayewan tayo. Diad pinagkateman teksto tayo, say inusar nen apostol Pablo ya Griegon salita parad “pabiskegen” et literal ya mankabaliksan na “ipaalagey.” (Basaen so 1 Tesalonica 5:11.) Labay ton ibaga, say pamabiskeg ed sakey tan sakey et singa construction project.

2. Antoy pantongtongan tayo ed sayan artikulo?

² No tungkol ed pamabiskeg ed saray agagi so pantongtongan, ompan si apostol Pablo so sakey ed saray naisip tayon tampol. Talagan walay malasakit tod saray agagi. Pantongtongan tayod sayan artikulo no panon to ran tinulongan pian (1) naanosan da ray subok, (2) napansiansia so deen ed kongregasyon, tan (3) ombiskeg so pananisia ra ed si Jehova. Amtaen tayo no panon tayon naalig so alimbawa to tan no panon tayo met ya napabiskeg iray agagi natan.—1 Cor. 11:1.

3. Akin et nibagan balanse si apostol Pablo?

³ Inar-aro nen Pablo iray agagi. Natatalosan toy situasyon da no ondadalan irad subok ta anggan sikaton mismo et asali to  itan. Singa bilang, wala may panaon ya anggapo lay akeran kuarta nen Pablo kanian kaukolan toy mantrabaho pian walay pambilay to tan saray kakaiba to. (Gawa 20:34) Amta nen Pablo so manggaway tolda. Kanian nen kasabi tod Corinto tan akabat toy Aquila tan Priscila, angiba ed panaggaway tolda ta atan so anapan da. Pero “kada sabaton,” seseguroen to ya napulongan to ray Judio tan Griego. Nen sinmabi la balet si Silas tan Timoteo, “inusar [la] nen Pablo so amin ya panaon to parad salita na Dios.” (Gawa 18:2-5) Anggan antoy situasyon nen Pablo, inyuna to nin siansia so panaglingkor ed si Jehova. Makulin nantrabaho si Pablo pero makuli met ed ministeryo. Apaneknekan ton mismo ya agmamaulyan si Jehova. Kanian binilin to ray agagi ya anggan antoy irap na bilay, dapat iyuna da so panagdayew ed si Jehova ta atan so ‘mas importante.’—Fil. 1:10.

4. Antoy ginawa nen Pablo tan Timoteo pian natulongan da ray agagi ya anosan so graben isusumpa?

⁴ Nen kakkapanbuo ni labat na kongregasyon ed Tesalonica, dakdakel so kinmontra ed saray Kristiano. Pinuntirya day Pablo tan Silas, pero nen agda ra aromog, inggayugoy day “pigaran agagi pian awiten da rad saray manuley na syudad,” tan iyeeyag da: “Susumpaen na sarayan . . . totoo iray ganggan na Cesar.” (Gawa 17:6, 7) Imadyin mo pay alikna na saray agagi ditan. Anta balo-balo ni ra labat ya Kristiano, halos amin ya totoo ed lugar da et kontrad sikara. No anggapoy mamaseseg ed sikara, ompan onkapuy so pananisia ra. Aglabay nen Pablo ya ontan so nagawa. Kanian anggano kaukolan toy onalis kaibay Silas, sinegurado to ya walay mangasikaso ed sayan balon kongregasyon. Oniay nabasa ed sulat nen Pablo ed saray agagid Tesalonica: “Imbaki mi Timoteo, ya agi tayo . . . pian pabiskegen tan ligliwaen to kayo nipaakar ed pananisia yo, pian anggapod sikayo so onkapuy lapud sarayan kairapan.” (1 Tes. 3:2, 3) Akin et dugaruga ya si Timoteo so imbaki nen Pablo ya mamaseseg ed saray agagid Tesalonica? On ta posiblin naeksperiensyan mismo nen Timoteo so graben isusumpa diad Listra, say baley ya binalegan to. Anengneng to met ya mismo no panon ya pinabiskeg nen Pablo iray agagi diman tan no panon ya ag-iran balot pinaulyanan nen Jehova. Nen wala lad Tesalonica si Timoteo, segurado ya lanang ton ibabaga ed saray agagi ya anosan da labat ta wadtan si Jehova ya onsuporta ed sikara.—Gawa 14:8, 19-22; Heb. 12:2.

5. Antoy epekto na panamaseseg na sakey ya elder ed si Bryant?

⁵ Anto ni ginawa nen Pablo pian ombiskeg iray agagi? Diad samay impawil to ed Listra, Iconio, tan Antioquia kaibay Bernabe, “anuro ra na mamatatken diad kada kongregasyon.” (Gawa 14:21-23) Seguradon baleg so nitulong na sarayan balon manangidaulo pian naligliwa iray agagi, ya singa gagawaen met na saray elder natan. Imanoen so eksperiensya nen Bryant. Oniay imbaga to: “Nen 15 ni labat so taon ko, tinaynan kami nen tatay ko insan adispelo si nanay ko. Pakaliknak et bukbukor ko tan pakaskasi ak.” Panon ya asarag nen Bryant iyan mair-irap ya situasyon? Kuan to: “Balbaleg so nitulong ed siak nen Kuya Tony, amay sakey ya elder mi. Lanang da ak ya kukumustaen tan walan-walay panaon dan miistoryaan ed siak diad Kingdom Hall. Iistoryaen dad siak iray agagi ya dinmadalan ed subok pero maliket ni ran siansia. Imbasa dad siak so Salmo 27:10 tan lanang dan ipapanonot si Hezekias, ya matoor ya nanlingkor ed si Jehova anggano aliwan maong ya alimbawa si ama to.” Antoy epekto to ’ya ed si Bryant? Imbaga to: “Ag-abayag, nandesisyon ak ya manpayunir. Misatsalamat ak ya maong ed panamaseseg tan malasakit nen  Kuya Tony.” On, sikayo ran elder, komon ta wadtan kayon lanang parad saray agagi ya singa si Bryant ya mankaukolan na panamaseseg.—Pro. 12:25.

6. Panon ya inusar nen Pablo so istoryay bilay na saray matoor ya lingkor nen Jehova nensaman pian napaseseg to ray kapara ton Kristiano?

⁶ Impanonot nen Pablo ed saray agagi ya wala lay “baleg a grupo na saray tasi” ya asarag da iray subok diad tulong nen Jehova. (Heb. 12:1) Amta nen Pablo ya say istoryay bilay na sarayan matoor a lingkor nen Jehova so mamaseseg ed saray Kristiano ya manmatoor met tan maan-anos dan alagaren so “syudad na mabilay a Dios.” (Heb. 12:22) Diad tua, napapaseseg tayo met no nababasa tayod Biblia no panon ya tinulongan nen Jehova si Gideon, Barak, David, Samuel, tan arum ni. (Heb. 11:32-35) Napapabiskeg tayo met kada no basaen tayoy istoryay bilay na saray matoor ya agagi tayo. Diad world headquarters, lanang kamin makakaawat na sulat na saray agagi ya binmiskeg kunoy pananisia ra nen abasa day istoryay bilay na sakey ya agi.

7. Antoy naaralan mo ed samay bilin nen apostol Pablo ya nabasad Roma 14:19-21?

⁷ Say sakey met ya paraan ya napabiskeg tayo ray agagi et no ipanengneng tayod sikara ya importantin maong so deen diad kongregasyon. Anggano mandudumaan so opinyon tayo, aleg komon ya lapud satan et naderal so pankakasakey tayo. Agtayo ipipilit so labay tayo no anggapo met so nalalabag ya prinsipyo ed Biblia. Imanoen so agawad kongregasyon diad Roma nensaman. Say arum ya agagi ditan et Judio pero walay met iray aliwan Judio. Diad saman et agla obligado iray Kristiano ya unoren so Mosaikon Ganggan kanian sarag da lan kanen iramay datin ibabawal na Mosaikon Ganggan. (Mar. 7:19) Wala ray Judion Kristiano ya kakanen da lan amin. Pero agni itan natanggap na arum ya Judion Kristiano. Nagmaliw laingen itan ya isyu ed kongregasyon. Binagaan ira nen Pablo ya no ipilit day kanya-kanyan opinyon da, naderal so deen lapu labat ed panangan. Binilin to ra: “Say sankaabigan et agka mamangan na karne odino oniinum na alak odino manggagaway antokaman a pakagapolan na agim.” (Basaen so Roma 14:19-21.) Impaimano nen Pablo ya ompan atan laingen so rason ya onkapuy so espiritualidad na sakey ya agi tan nadamay so interon kongregasyon. Anggan sikaton mismo et akibagay ed saray agagi pian agto ra nagapol tan ag-onkapuy so pananisia ra. (1 Cor. 9:19-22) On, naprotektaan so deen no agtayo ipipilit so opinyon o panlabayan tayo.

8. Antoy ginawa nen Pablo nen walay linmesan isyu ya posiblin manderal ed deen na kongregasyon?

⁸ Maong ya alimbawa si Pablo ta pinansiansia toy deen anggano wala ray agagi ya ipipilit day opinyon da. Singa bilang, wala ray agagi nen inmunan siglo ya ibabaga ran nepeg ya segaten iray aliwan Judio ya labay day magmaliw ya Kristiano pian ag-ira kuno balawen na saray Judio. (Gal. 6:12) Amta nen Pablo ya aliwa ra. Pero, imbes ya ipilit tod saray agagi ya sikato so duga, inkonsulta to itan ed saray apostol tan mamatatken ed Jerusalem. (Gawa 15:1, 2) Lapud satan ya ginawa to, anengneng na saray agagi ya talagan importante ya pansiansiaen so liket tan deen ed kongregasyon.—Gawa 15:30, 31.

9. Panon tayon naalig so alimbawa nen Pablo?

⁹ No wala ray onlesan isyu, ikonsulta tayo itan ed saray elder lapud sikara so tinuro nen Jehova ya mangasikaso ed kongregasyon. Tan sarag tayon i-research ya mismo iray instruksion ed saray publikasyon tayo o diad saray  guidelines ya iiter na organisasyon. No tumboken tayo iratan ya instruksion imbes ya ipilit tayo no antoy labay tayo, proprotektaan tayo so deen na kongregasyon.

10. Anto ni ginawa nen Pablo pian napansiansia so deen ed kongregasyon?

¹⁰ Pian napansiansia so deen ed kongregasyon, nampokus met si Pablo ed saray balibalin ugali na agagi, aliwan saray kakapuyan da. Diad bandad sampot na sulat to ed saray Kristiano ed Roma, binitla to so ngaran na nanduruman agagi. Tan espisipiko ton binitla iray maong ya agawaan tan ugali da. Naalig tayoy Pablo no ipasal tayon komendaan iray agagi lapud maong ya ugali o nagagawaan da, tan ibaga tayo met itan ed arum. No ontan so gawaen tayo, mas naka-close tan naar-aro tayoy sakey tan sakey, kanian ombiskeg so kongregasyon.

11. Antoy gawaen tayo no walay nakabarongan tayon agi?

¹¹ No maminsan, anggan saray maespiritual ya Kristiano et mandumaan met so opinyon da tan makapan-alaan met iray salita. Agawa itan ed si Pablo tan ed kaaro ton si Bernabe. Wala may panaon ya labay ya ipila nen Bernabe si Marcos diad onsublay ya pambiahe da bilang misionero. Pero kontran maong si Pablo. Lapud saya et walay agawan “ampetang a sangsangan” ed si Pablo tan Bernabe, ya anggad nankanya-kanya la ra. (Gawa 15:37-39) Pero, inayos lanlamang nen Pablo, Bernabe, tan Marcos iyan problema ra lapud mas importantid sikara so deen tan pankakasakey ed kongregasyon. Nanengneng ed saray tinmutumbok ya sulat nen Pablo ya anggapo lay sakit na linawa to ed si Bernabe tan Marcos. (1 Cor. 9:6; Col. 4:10) Ontan met so nepeg tayon gawaen. No bilang ta walay nakabarongan tayon agi, ayosen tayon tampol so problema tan manpokus tayo ed maong ya ugali tan nagagawaan to pian agnaderal so deen tan pankakasakey ed kongregasyon.—Efe. 4:3.

12. Anto ray subok ya aarapen na saray agagi natan?

¹² Napabiskeg tayo ray agagi no tulongan tayo ra no nasusubok so pananisia ra. Say arum ya agagi et babalawen na saray kakanayon, katrabaho, o kaklase ran aliwan Tasi. Wala ray mansasakit na grabe. Say arum et mairap dan lingwanan so ginawa ed sikara na sakey ya agi. Wala met iray akukulaw tan mamasiken la natan ya abaybayag da lan aalagaren so isabi na anggaan. Nayarin nasubok so pananisia na sakey ya Kristiano ed sarayan situasyon. Asali met iratan na saray Kristiano nen inmunan siglo. Antoy ginawa nen Pablo pian napabiskeg to ray agagi?

13. Panon ya tinulongan nen Pablo iray agagin babalawen na arum lapud pananisia ra?

¹³ Inusar nen Pablo so Kasulatan pian napabiskeg toy pananisia na saray agagi. Wala ray Judion Kristiano nensaman ya agda amtay iyebat da no balawen ira na kapamilya ra tan ibaga ran mas atagey so Judaismo nen say relihyon na saray Kristiano. Seguradon binmiskeg so pananisia ra nen sinulatan ira nen Pablo. (Heb. 1:5, 6; 2:2, 3; 9:24, 25) Akatulong so malinew ya eksplinasyon to pian amta ray iyebat da ed saray mamabalaw ed sikara. No wala ray agagi tayo ya babalawen na arum, ibaan tayo ran man-research ed saray base ed Biblian publikasyon tayo pian naidepensa ray papanisiaan da. Singa bilang, no wala ray mamabalaw ed saray kabataan lapud manisia iran walay Dios, makatulong no i-discuss tayod sikara imay impormasyon ya nabasad saray brosyur ya Pinalsa Kasi Bilay? tan The Origin of Life—Five Questions Worth Asking pian malinew dan naipaliwawa ed arum ya talagan walay Amalsa.

14. Antoy ginawa nen Pablo anggano akapokus ed kimey ya panagpulong tan panagbangat?

 ¹⁴ Pinaseseg nen Pablo iray agagi ya ipanengneng day panangaro panamegley na “maabig iran kimey.” (Heb. 10:24) Impanengneng toy panangaro aliwa labat ya diad salita, noagta pati diad gawa. Singa bilang, nen walay agawan eras ed Judea, tinmulong si Pablo ya mangibunog na saray pankaukolan na agagi. (Gawa 11:27-30) Anggano akapokus si Pablo ed kimey ya panagpulong tan panagbangat, manggagawa na paraan pian natulongan to ray agagin mairap-bilay. (Gal. 2:10) Ontan so ginawa to ta labay ton nalikna na agagi ya ag-iran balot paulyanan nen Jehova. Ontan met natan. Napapabiskeg tayoy pananisia na saray agagi no uusaren tayoy panaon, biskeg, tan abilidad tayo pian natulongan iramay biktima na kalamidad, tan no lanang tayon mandonasyon parad sankamundoan ya kimey. On, kada no mangiiter tayoy praktikal ya tulong ed saray agagi, nalikna da ya ag-ira paulyanan nen Jehova anggan antoy nagawa, kanian ombiskeg so tiwala rad sikato.

15-16. Panoy pantrato tayo ed saramay agagi ya kinmapuy so pananisia ra?

¹⁵ Agsinmawa si Pablo ya pabiskegen iramay kinmapuy so pananisia ra. Tinalosan nen Pablo so situasyon na agagi. Maar-aro tan makapaseseg so impitongtong tod sikara. (Heb. 6:9; 10:39) Singa bilang, nen sinulatan to ray Hebreon Kristiano, mabetbet ya angusar na salitan “tayo” tan “sikatayo” pian nalikna ra ya anggan sikaton mismo et kaukolan ton iyaplika so bilin to. (Heb. 2:1, 3) Aligen tayoy Pablo, agtayo susukoan iray agagin kinmapuy so pananisia ra. Napabiskeg tayo ra no tuloytuloy tayon ipanengneng so malasakit tan panangaro ed sikara. No katongtong tayo ra, seguroen tayo ya makapaseseg tan maaro so panagsalita tayo.

¹⁶ Impanonot nen Pablo ed saray agagi ya agbalot  lingwanan nen Jehova so amin ya ginawa ra parad Sikato. (Heb. 10:32-34) Ontan met so gawaen tayo no papasesegen tayoy sakey ya agi ya kinmapuy so pananisia to. Ipaistorya tayod sikato no panon ton nalmo so katuaan odino saray eksperiensya to nensaman ya aliklikna toy tulong nen Jehova. Ipaseguro tayod sikato ya agbalot lingwanan nen Jehova so amin ya sakripisyo tan impanlingkor to nensaman. Tan anggapoy nepeg ton takotan ed saray nagawad arapen ta agbalot paulyanan nen Jehova. (Heb. 6:10; 13:5, 6) No ontan iray topic tayo no katongtong tayo irayan inar-aron agagi, posiblin napaseseg ira ya magmaliw lamet ya aktibo ed panaglingkor da.

17. Antoy tuloytuloy tayon gawaen?

¹⁷ Diad ilalabas na panaon, say sakey ya construction worker et lalon ondudunong ed kimey to. Ontan tayo met. Diad ilalabas na panaon, mas nanaaralan tayo iray epektibon paraan no panon tayon napabiskeg so sakey tan sakey. Napaseseg tayo ray agagi ya mananos no istoryaen tayod sikara iray lingkor nen Jehova ya akapan-anos anggano mair-irap so situasyon da. Napansiansia tayo so deen no saray maong ya ugali tan nagagawaan na agagi so pampokusan tayo, no agtayo ipilit ed arum so opinyon o panlabayan tayo, tan no ayosen tayo ray agpantatalosan. Napabiskeg tayo met so pananisia na saray agagi no tulongan tayo ra pian mas lalo dan natalosan iray importantin katuaan ed Biblia, no mangiter tayoy praktikal ya tulong, tan no agtayo onsasawan pasesegen iramay kinmapuy so pananisia ra.

18. Antoy determinadom ya gawaen?

¹⁸ Malikeliket iray agagi ya manboboluntaryo ed saray construction project na organisasyon tayo. Malikeliket tayo met no mitutulongan tayo ed espiritual ya panagpaalagey—say pamabiskeg tayo ed sakey tan sakey. Aliwan singa saray literal ya bilding ya diad ilabas na panaon et ondaan insan naderal, say resulta na espiritual ya pampapaalagey tayo et mansiansia ed andi-angga. Komon ta determinado tayo sirin ya “pasesegen tan pabiskegen so sakey tan sakey.”—1 Tes. 5:11.