1. Akin et nanggawa na arum ya mabilay a pinalsa si Jehova?

DIAD gapo et bukbukor nen Jehova balet aliwan maermen anggano anggapoy kaiba to. Lapud maar-aron Dios si Jehova, labay to ya nalikna met na arum so liket. Kanian nanggawa na arum ya mabilay a pinalsa.​—Sal. 36:9; 1 Juan 4:19.

2. Antoy alikna nen Jesus tan saray anghel sanen ginawa nen Jehova so amin ya bengatla?

² Say unonan pinalsa nen Jehova et say Anak to ya si Jesus. Insan diad panamegley nen Jesus et “apalsa so amin ni ran bengatla,” kaiba la ray minilyon ya anghel. (Col. 1:16) Malikeliket si Jesus ya nankimey kaibay Ama to. Sikatoy tinawag ya “marundunong a komikimey.” (Pro. 8:30) Malikeliket met iray anghel nen anengneng day impanggawa nen Jehova tan Jesus ed tawen tan dalin. Akin et nibaga tayon malikeliket iray anghel? On ta “inkasil day boses da ed panangirayew” nen ginawa nen Jehova so dalin, tan seguradon agaylay liket da kada no walay nasumpal nen Jehova, kaiba lay obra maestra to​—saray totoo. (Job 38:7; Pro. 8:31) Nanengneng ed amin ya pinalsa nen Jehova ya sikatoy maar-aro tan marundunong.​—Sal. 104:24; Roma 1:20.

3. Base ed 1 Corinto 15:21, 22, antoy ilalo na totoo lapud dondon bagat nen Jesus?

³ Say gagala nen Jehova et manbilay ya andi-angga iray totoo diad balibalin planeta ya ginawa to. Balet nen nanrebelde  si Adan tan Eva, impatawir dad saray magmaliw ya ananak da so kasalanan tan ipapatey. (Roma 5:12) Antoy ginawa nen Jehova? Imbaga ton tampol no panon ton iliktar iray totoo. (Gen. 3:15) Iter toy Anak to pian dondonen iray ananak nen Adan tan Eva ed kasalanan tan ipapatey. Lapud dondon et nawalaan na bilay ya andi-anggaan iramay pilien day manlingkor ed Sikato.​—Juan 3:16; Roma 6:23; basaen so 1 Corinto 15:21, 22.

4. Anto ran tepet so pantongtongan tayo ed sayan artikulo?

⁴ Seguradon wala ray naisip mon tepet nipaakar ed sipan na Dios ya kioli na saray inaatey. Singa bilang, panon ya nagawa so kioli? Kasin nabirbir tayo iray kapamilya tan kakaaro tayo no bilayen la ra nen Jehova? Akin ya seguradon makapaliket itan? Tan akin ya no dalepdepen tayoy kioli et mas naapresya tayoy panangaro, karunongan, tan inkaanos nen Jehova? Pantongtongan tayo iratan ya tepet.

5. Akin et segurado tayo ya organisado tan aliwan bansa-bansag so pamaoli nen Jehova ed saray inaatey?

⁵ No paolien la nen Jehova iray minilyon ya inaatey panamegley na Anak to, nailaloan tayo ya aliwan bansa-bansag so pamaoli tod sikara. Akin et ontan so nibaga tayo? On ta no biglan ondakel so populasyon ed mundo, pansengegan itan na gulo. Aglabay nen Jehova ya nagawa itan lapud mauksoy tan organisado so amin ya gagawaen to. Seguradoen to ya organisado so pakagawa na kioli pian mansiansia so kareenan. (1 Cor. 14:33) Marundunong tan maan-anos si Aman Jehova legan dan ipaparaan nen Jesus so dalin antis ya palsaen so too. Kanian legan na Sanlibon  Taon ya uley nen Jesus, segurado tayo ya sikatoy marundunong tan maan-anos met ya mitulongan ed saramay akaliktar ed Armagedon diad pangiparaan da ed dalin parad saray onoli ed bilay.

6. Base ed Gawa 24:15, siopa ray kaiba ed saray paolien nen Jehova?

⁶ Sakey ed saray manunan responsabilidad na saramay makaliktar ed Armagedon et bangatan da iray napaoli nipaakar ed Panarian na Dios tan ed saray ganggan nen Jehova. Akin ya kaukolan dan gawaen itan? On ta dakel so napaolin “agmatunong.” (Basaen so Gawa 24:15.) Pian nagunggonaan ira ed dondon nen Kristo, kaukolan day manggawa na dakel ya pananguman. Kanian isipen pa labat no panon tayon bangatan so minilyon ya totoo ya anggapon balot so amta ra nipaakar ed si Jehova. Kasin sansasakey tayo ran iyaralan ya singa pangiyaaral tayo met natan? Kasin wala met so niyasain ya kongregasyon da tan nipasal met iran mangibangat ed saray ontumbok ya napaoli? Agtayo ni amta. Balet amta tayo ya diad sampot na Sanlibon Taon ya Uley nen Kristo, “say dalin et napano na kakabatan ed si Jehova.” (Isa. 11:9) Seguradon dakdakel so gawaen tayo tan malikeliket tayo ed satan ya panaon!

7. Akin ya nipatnag na saray lingkor na Dios so pililikna ed saray napaoli legan da ran babangatan?

⁷ Legan na Sanlibon Taon ya Uley nen Kristo, amin ya lingkor nen Jehova diad dalin et tuloytuloy ya manggaway pananguman pian sikatoy napaliket da. Kanian seguradon nipatnag day pililikna legan dan tutulongan iramay napaoli ya manggawa met na saray pananguman tan unoren iray ganggan nen Jehova. (1 Ped. 3:8) Onapit so liknaan na saray napaoli ed saray mapaabeban lingkor nen Jehova ya ‘mansasagpot met parad kililiktar da.’​—Fil. 2:12.

8. Akin et duga labat ya isipen tayon nabirbir tayo iray kapamilya tan kakaaro tayon paolien nen Jehova?

⁸ Walay pigaran rason no akin ya nailaloan tayon nabirbir tayo iray napaoli. Singa bilang, no ibase tayo ed saray pinaoli nen Jehova nensaman, nailaloan tayo ya ipawil nen Jehova so itsura, paraan na panagsalita, tan memorya na saramay paolien to diad arapen. Tandaan ya inkompara nen Jesus so patey ed iyugip tan say kioli et inkompara to ed pamangon ed naugip. (Mat. 9:18, 24; Juan 11:11-13) Di ba no bangonen mo so toon naugip, pareho nin siansia so itsura tan boses to kabangon to, tan ag-abural so memorya to. Imanoen imay agawad si Lazaro. Apat-agew lan inatey, kanian onggagapo lan nabulok so laman to. Balet nen sikatoy pinaoli nen Jesus, abirbir ya tampol nen Marta tan Maria tan abirbir to met ira.​—Juan 11:38-44; 12:1, 2.

9. Akin ya saramay paolien et aliwa nin perpekton tampol?

⁹ Insipan nen Jehova ya diad paraiso et anggapo lay mangibagan, “Mansasakit ak.” (Isa. 33:24; Roma 6:7) No ontan sirin, saramay paolien et anggapoy sakit da tan mabiskeg so laman da, balet aliwa ni ran perpekto. Ta no paolien ira nen Jehova ya perpekto la ra, ompan ag-ira nabirbir na saray kapamilya tan kakaaro da. Amin ya totoo et kalkalnan magmaliw ya perpekto legan na Sanlibon Taon ya Uley nen Kristo. Diad sampot na satan ya Sanlibon Taon et ipawil nen Jesus so Panarian ed si Ama to. Diad satan et agawaan la na Panarian so amin ya panlabayan nen Jehova tan perpekto la so amin ya totoo.​—1 Cor. 15:24-28; Apo. 20:1-3.

10. Antoy seguradon naliknam no nagawa la so kioli?

¹⁰ Isip mo pa no antoy naliknam sano abeten mo la iray inad-arom ed bilay ya paolien  nen Jehova. Kasin maka-eyag kad liket odino makaakis ka? Kasin lapud liket mo et kansionan moy Jehova na panangirayew? Seguradon mas naar-arom si Aman Jehova tan say Anak to ta lapud panangaro da et nagmaliw ya posible so kioli.

11. Base ed imbaga nen Jesus ya nabasa ed Juan 5:28, 29, antoy nagawa ed saramay napaoli ya unoren day ganggan na Dios?

¹¹ Isipen pa met so nalikna na saramay inmoli legan dan lalakseben so daan ya personalidad da tan pansasagpotan dan unoren iray ganggan na Dios. Saramay onunor ed si Jehova et ikdan to na pankanawnawan manbilay ya andi-anggaan. Balet ukomen to iramay manrebelde pian mansiansia so deen ed Paraiso.​—Isa. 65:20; basaen so Juan 5:28, 29.

12. Panon ya bendisyonan nen Jehova iray lingkor to diad Paraiso?

¹² Diad uley na Panarian, napruebaan na amin ya lingkor na Dios ya tua so ibabaga na Proverbio 10:22: “Say bendisyon nen Jehova so mamapayaman ed sakey, tan agto itan aaruman na pakasakitan.” Diad tulong na espiritu nen Jehova, amin tayo et magmaliw ya mayaman ed espiritual. Labay ton ibaga, kada agew et lalo tayon naaalig si Kristo ya anggad magmaliw tayo lan perpekto. (Juan 13:15-17; Efe. 4:23, 24) Kada agew et ombibiskeg so laman tayo tan ondadakep so ugali tayo. Talagan makapaliket lay manbilay ed satan! (Job 33:25) Balet antoy epekto tod sika no natan ni labat et dalepdepen mo la so kioli?

13. Base ed Salmo 139:1-4, akin et nibagan kabkabat itayo nen Jehova, tan panon itan ya pruebaan na ilalon kioli?

¹³ Singa apantongtongan tayo nen niman, no paolien nen Jehova so sakey a too, ipawil toy memorya tan inkatoo to. Isip mo pa no antoy labay ya ibaga na satan. Natan ni labat et iimanoen tan tatandaan nen Jehova so amin ya iisipen, naliliknam, ibabagam, tan gagawaen mo. Prueba itan ya talagan inar-aro to ka! Kanian no bilang ta paolien to ka diad arapen, matmainomay ton ipawil so memoryam, ugalim, tan inkatoom. Amta nen Arin David ya kabkabat nen Jehova so balang sakey ed sikatayo. (Basaen so Salmo 139:1-4.) Akin et balibalin naamtaan ya kabkabat itayo nen Jehova?

14. Akin et agtayo nepeg ya pampagaan ya kabkabat itayo nen Jehova?

¹⁴ Kasin nepeg tayon pampagaan ya kabkabat itayo nen Jehova? Andi. Tandaan ya iimanoen itayo nen Jehova lapud walay malasakit to ed sikatayo. Espisyal ed sikato so balang sakey ed sikatayo. Amta to so amin ya detalye na inkatoo tayo. Makapalikliket ya naamtaan itan! Agtayo sirin iisipen ya bukbukor tayo. Kada minuto ya onlalabas ed sanagew, wadtan ya lanang si Jehova ed abay tayo tan akaparaan ya ontulong.​—2 Awa. 16:9.

15. Akin ya say ilalon kioli et prueba ya marunong si Jehova?

¹⁵ Wala ray mauges ya totoo ed mundo ya tataktakoten day arum ya pateyen da ra no agda gawaen so labay da. No say sakey et antakot toy ompatey, traidoren to la ray kakaaro to tan manggawa met lay mauges pian labat nisalba toy bilay to. Pero sikatayo ran lingkor nen Jehova et ag-itayo nataktakot na saray mamubusol ed sikatayo. Manisia tayo ya anggano pateyen da tayo, paolien itayo nen Jehova. (Apo. 2:10) Kombinsido tayo ya anggan say patey et agto tayon balot nisian ed panangaro nen Jehova. (Roma 8:35-39) Talagan marunong si Jehova ed impangiter tod  sikatayo na ilalon kioli! Lapud satan et ag-itayo nataktakot nen Satanas tan walay pakpel tayo ya manmatoor ed si Jehova.

16. Anto ray nepeg mon itepet ed sarilim, tan panon iratan ya makatulong pian naamtaan mo no talaga kasin manmamatalek ka ed si Jehova?

¹⁶ No taktakoten ka na saray kalaban ya pateyen da ka, kasin mansiansia kan matoor lapud matalek ka ya paolien ka nen Jehova? Panon mon nasegurado ya ontan so gawaen mo? Tepetan moy sarilim: ‘Kasin nanengneng ed saray desisyon ko diad inagew-agew ya talagan manmamatalek ak ed si Jehova?’ (Luc. 16:10) Nia ni sakey ya itepet mod sarilim: ‘Kasin nanengneng ed kabibilay ko ya manmamatalek ak ed sipan nen Jehova ya itarya to ray materyal ya pankaukolan ko no iyunak so Panarian?’ (Mat. 6:31-33) No say ebat mo ed saratan ya tepet et on, ipapanengneng mo sirin ya talagan manmamatalek ka ed si Jehova tan akaparaan ka anggan anto ni tay subok ya onsabi.​—Pro. 3:5, 6.

17. (a) Akin ya say kioli et prueba ya maan-anos si Jehova? (b) Panon tayon nipanengneng ya aapresyaen tayoy inkaanos nen Jehova?

¹⁷ Wala lay eksakton agew tan oras ya inggeter nen Jehova ya deralen to iyan mauges ya mundo. (Mat. 24:36) Maan-anos ya aalagaren itan nen Jehova. Labalabay met la nen Jehova ya paolien iray inaatey. (Job 14:14, 15) Balet maan-anos ton aalagaren so dugan panaon pian bilayen ira. (Juan 5:28) Talagan pisalsalamatan tayo sirin so inkaanos nen Jehova! Isipen pa: Lapud maan-anos si Jehova, dakel ya totoo so awalaan na “pankanawnawan magbabawi,” pati sikatayo. (2 Ped. 3:9) Labay nen Jehova ya dakel nin totoo so nawalaan na ilalo ya manbilay na andi-anggaan. Panon tayon nipanengneng ya aapresyaen tayoy inkaanos nen Jehova? Samboten tayo iyan panaon ya anapen iramay “walaan na dugan kipapasen na puso parad bilay ya andi-anggaan” tan tulongan tayo ra ya aroen tan panlingkoran da met si Jehova. (Gawa 13:48) No ontan so gawaen tayo, nagunggonaan met ira ed inkaanos nen Jehova, ya singa sikatayo.

18. Akin ya nepeg tayon anosan so arum?

¹⁸ Amta nen Jehova ya dia nid sampot na Sanlibon Taon so pagmaliw tayon perpekto. Kanian anggad agni itan sinmabi, tuloytuloy itayon anosan nen Jehova tan perdonaen to ray kasalanan tayo. Aligen tayo sirin si Jehova, say nengnengen tayo ed arum et say maong ya ugali da tan palabasen tayo ray kakapuyan  da. Imanoen so alimbawa na sakey a sister ya say asawa to et agla mimiaral lapud agto nakontrol so panaaburido to (severe anxiety attack). “Ansaki-sakit iya ed siak,” so kuan to may sister. “Agko inilaloan ya oniay nagawad pamilya mi, aderal so amin ya plano mi.” Balet anggan onman so agawad asawa to, inanosan to. Nanmatalek iyan sister ed si Jehova tan agbalot sinmuko. Inalig toy inkaanos nen Aman Jehova, tan say nampokusan to la et saray maong ya ugali nen asawa to. Imbaga to: “Dakel so maong ya ugali nen asawak tan gagawaen toy anggaay nayarian to pian nakontrol toy panaaburido to.” Talagan importante ya anosan tayo ray kapamilya tan kakongregasyon tayo ya wala ray dadalanen dan subok!

19. Antoy determinadom ya gawaen?

¹⁹ Malikeliket si Jesus tan saray anghel nen ginawa nen Jehova so dalin. Balet seguradon mas malikeliket ira sano nanengneng da ya amin a totoo diad dalin et perpekto la, tan inar-aro tan panlilingkoran day Jehova. Isip mo pa met so liket na 144,000 ya kaiba nen Jesus sano nanenengneng da ya nabebendisyonan so amin a totoo lapud panuuley da. (Apo. 4:4, 9-11; 5:9, 10) Tan imadyin mo pa met ya anggapo lay onakis lapud panutot. Imbes, onakis tayo lapud liket! Anggapo met lay sakit, panermen, tan ipapatey. (Apo. 21:4) Legan mon aalagaren itan ya panaon, komon ta determinado kan aligen so panangaro, karunongan, tan inkaanos nen Aman Jehova. No ontan so gawaen mo, maliket ka nin siansia anggan anto ni tay subok ya onsabi ed sika. (Sant. 1:2-4) Talagan misalsalamat tayo ed sipan nen Jehova ya “walay kioli”!​—Gawa 24:15.