1. Diad anto ran paraan ya makapikimeyan tayod si Jehova?

GAGALA na Amalsa ya makapikimeyan ed sikato iray perpekton totoo pian nasumpal iray gagala to. Balet anggano aliwan perpekto iray totoo natan, siansian sarag na saray matoor so mikimeyan ed si Jehova diad kada agew. Singa bilang, sarag tayoy magmaliw ya ‘kakimeyan na Dios’ diad pangipulong tayoy maong a balita na Panarian to tan diad panggawa na babangatan. (1 Cor. 3:5-9) Isip mo pa labat no panon kabaleg a pribilehyo so magmaliw a kakimeyan na makapanyarin amin ya Amalsa na uniberso diad kimey ya ipapasen ton importante! Anggaman ontan, aliwa labat ya say panagpulong tan panaggaway babangatan so paraan pian makapikimeyan tayod si Jehova. Aralen tayod sayan artikulo iray arum nin paraan​—diad itulong ed kapamilya tayo tan ed saray agagi, diad pagmaliw ya maparawes, diad pamboluntaryo ed saray teokratikon proyekto, tan diad pamalaknab ed sagradon panaglingkor tayo.​—Col. 3:23.

2. Akin et aliwan maabig no ikomparam so nagagawaan mo parad si Jehova ed nagagawaan na arum?

² Legan tayon aaralen iyan artikulo, agmo ikokomparay nagagawaan mo parad si Jehova ed nagagawaan na arum. Tandaan ya nandurumay edad, kondisyon na laman, kipapasen, tan abilidad na kada sakey. Oniay pinuyanan ya imbaga nen apostol Pablo: “Usisaen komon na kada sakey so gagawaen to, tan kayari na satan et  sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.”​—Gal. 6:4.

3. Akin et nibagan mikokoopera ed Dios iramay mangaasikaso ed pamilya da?

³ Iilaloan nen Jehova iray lingkor to ya asikasoen day pamilya da. Singa bilang, nayarin kaukolan moy mantrabaho pian itaryay pinansyal ya pankaukolan na saray inad-arom. Dakel ya ina so wala ed abung pian asikasoen so angkekelag nin ananak da. Tan arum ya ananak balet et nayarin kaukolan dan asikasoen so matatken lan atateng da. Importante iratan ya gawaen. Ibabaga na Salita na Dios: “No walay siopaman ya agto tataryaan iramay walad pudir to, nagkalalo la iramay membro na pamilya to, impulisay to lay pananisia tan alabas ni nen say toon anggapoy pananisia to.” (1 Tim. 5:8) No walay ontan iran responsabilidad mo, ompan anggapo lay dakel ya panaon mo ed saray teokratiko iran kimey anggano labalabay mo komon a gawaen iratan. Balet agka nadidismaya! Naliliketan si Jehova no itataryam so pankaukolan na pamilyam.​—1 Cor. 10:31.

4. Panon ya niyuna na saray atateng iray interes na Panarian, tan anto ray resulta?

⁴ Saray Kristianon atateng et mikikimeyan ed si Jehova no tutulongan da ray ananak da ya nawalaan na saray teokratikon kalat. Dakel ed saray atateng ya ontan so ginawa ra et linmoob ed full-time ya panaglingkor iray ananak da diad arawin pasen. Say arum et nagmaliw ya misionero; wala ray nagmaliw ya payunir diad lugar ya baleg so pankaukolan ed saray manangipalapag; saray arum balet et manlilingkor diad Bethel. Lapud arawi rad sakey tan sakey, nayarin matalag la ran makapaniiba a singa dati. Anggaman ontan, papasesegen na saray masakripisyon atateng so ananak da ya mantultuloy ed saray asainmin da. Akin? Naliliketan iran maong no nanenengneng dan iyuuna na ananak da iray interes na Panarian. (3 Juan 4) Nayarin dakel ed sarayan atateng so makakalikna ed singa alikna nen Hana, ya angibagan “ipabayes” toy anak ton si Samuel ed si Jehova. Ipapasen na saratan ya atateng ya balbaleg a pribilehyo itan. Anggapo lay arum ya labay da likud ed satan.​—1 Sam. 1:28, paimanod leksab.

5. Panon kan makapangiter na praktikal iran tulong ed saray kakongregasyon mo? (Nengnengen so litratod gapo na artikulo.)

⁵ No anggapoy ambelat ya responsabilidad mo ed pamilyam, kasin sarag moy ontulong ed saray agagi ya mangaasikaso ed kapamilya da tan ed saramay makapuy lay laman da, matatken la, odino saramay mankaukolan? Maabig no imanoen mo iramay mankaukolan ed kongregasyon yo. Nayarin ibaan mo so matatken lan ateng na sakey ya Kristianon sister legan ya gagawaen to ray arum a kimey to. Ompan sarag mon tulongan iramay naiirapan lan miaral odino mitindaan, iramay agda la nagawaan so arum ya kimey da, odino ibaan iran ombisita ed sakey a walad ospital. No gagawaen mo iratan, nayarin mikikimeyan ka ed si Jehova pian ebatan so sakey a pikakasi.​—Basaen so 1 Corinto 10:24.

6. Antoy kaiba ed pagmaliw a maparawes?

⁶ Kabkabat ya maparawes iray kakimeyan na Dios. Diad Kristianon Griegon Kasulatan, say salitan impatalos ya “panagparawes” et mankabaliksan na “ipatnag so kaabigan ed saray estranghero.” (Heb. 13:2; paimanod leksab) Dakel ya salaysay ed Salita na Dios so mangibabangat ed sikatayo a kaukolan tayon ipanengneng itan ya klase na panangaro. (Gen. 18:1-5) Sarag tayo itan ya gawaen tan kaukolan tayon anamoten iray pankanawnawa pian natulongan tayoy arum, balanglan “kapananisiaan tayo” ira odino andi.​—Gal. 6:10.

7. Akin et maabig no pannonotan mo so pamarawes ed saray ombibisitan walad full-time a panaglingkor?

⁷ Sarag mo kasi so mikimeyan ed Dios diad  pamarawes ed saray ombibisitan walad full-time a panaglingkor? (Basaen so 3 Juan 5, 8) Pankanawnawa iratan pian “makapanpapasesegan.” (Roma 1:11, 12) Imanoen so eksperiensya nen Olaf sanen sikatoy kabataan ni. Nanonotan to ni pigaran dekada lay apalabas, anggapod kongregasyon da so makasarag ya mamatuloy ed single nin manangasikaso na sirkito. Tinepetan nen Olaf iray ateng ton aliwan Tasi no nayarin manpundo ed abung da so manangasikaso na sirkito. Pinmayag ira balet imbaga dan say ugipan nen Olaf et diad sopa. Sulit iman ya impansakripisyo to. “Talagan balibali iman ya simba!” so nanonotan nen Olaf. “Siak tan samay manangasikaso na sirkito et masakbay ya ombabangon kada kabuasan tan dakel iray balibalin pantotongtongan mi legan kamin manga-almusal. Lapud panamaseseg ya naawat ko, binmiskeg so pilalek kon onloob ed full-time a panaglingkor.” Diad apalabas ya 40 taon, akapanlingkor si Olaf bilang misionero diad nanduruman bansa.

8. Akin et siansian kaukolan tayon ipanengneng so kamaongan anggano diad gapo et singa ag-itan naapresya na arum? Mangiter na alimbawa.

⁸ Sarag mon ipanengneng so panangaro ed saray estranghero diad dakel a paraan anggano diad unaan et agda inapresya itan. Imanoen iyan alimbawa. Legan ya mangiyaaral na Biblia so sakey a manangipalapag ed Spain, naimano to ya say iyaaralan ton si Yesica, ya datin taga Ecuador, et akis lan akis. Tinepet to no akin. Imbaga nen Yesica ya antis ton tinaynan so bansa ra, mair-irap so bilay to tan aminsan et anggapoy naakan to. Danum labat so niiter tod anak ton bii. Papaugipen to lay anak to legan ton manpipikasi. Agnambayag, walay duaran Tasi ya binmisita ed sikato, balet nampasnokan ira nen Yesica tan pinilat toy magasin ya inter na saray sister. “Aya so labay yon ipakan kod ana’ko?” so intepet to. Sikatoy sinalin ligliwaen na saray sister, balet anggapoy agawaan da. Kayari to man, angitilak ira na baskit ya nankargay naakan diad arap na puerta to. Atenyeg so liknaan nen Yesica lapud kamaongan da, tan nababaingan no nanonotan to ya agto manaya inimano so ebat na Dios ed pikakasi to. Balet natan, sikatoy determinado lan manlingkor ed si Jehova. Talagan balibali so resulta na inkamaiter da!​—Ecl. 11:1, 6.

9, 10. (a) Anto ray pigaran pankanawnawa diad panaoy Biblia ya kinaukolan a manboluntaryo iray totoo na Dios? (b) Antoy pigara ed saray pankaukolan a maslak ya aasikasoen na saray mabulos ya brother diad kongregasyon natan?

⁹ Nensaman diad Israel, wala ray nanduruman pankanawnawa ya kinaukolan iray boluntaryo. (Exo. 36:2; 1 Awa. 29:5; Neh. 11:2) Natan, dakel met so pankanawnawam ya manboluntaryo pian nausar moy panaon, kaykayarian, tan abilidad mo diad itulong mod saray agagi. Tan seguradon malikeliket ka tan dakel so naawat mon bendisyon diad itulong mo.

¹⁰ Papasesegen na Salita na Dios iray brother ed kongregasyon ya mikimeyan ed si Jehova diad pandampot da na saray pribilehyo na panaglingkor tan panangidaulo. (1 Tim. 3:1, 8, 9; 1 Ped. 5:2, 3) Saramay ontan so ginawa ra et labay dan tulongan so arum diad praktikal tan espiritual a paraan. (Gawa 6:1-4) Kasin tinepetan ka la na saray elder no labay moy manlingkor bilang attendant odino ontulong ed pangasikaso na saray literatura, teritorya, panmintina, odino arum ni? Saramay mangaasikaso ed saratan ya asainmin so makapangibaga ed sika ya talagan makapaliket so ontulong ed arum.

11. Panon ya agunggonaan so sakey ya sister ed impakawalaan to na kakaaro diad saray teokratikon proyekto?

¹¹ Saramay manboboluntaryo ed saray teokratikon proyekto et maslak ya nawawalaan na balo iran kakaaro. Imanoen pay eksperiensya nen Margie, sakey ya sister ya namboluntaryo ed saray proyekton panagpaalagey na  Kingdom Hall diad loob na 18 taon. Legan na saratan a taon, wala ray atulongan ton mas ugaw nin sister diad impangipasal tod sikara. Apruebaan tod satan ya eksperiensya to ya sankaabigan iman ya paraan pian makapanpapasesegan ed espiritual. (Roma 1:12) Diad saray panaon ya ondadalan ed subok si Margie, sikatoy papasesegen na saramay kakaaro to ya akabat to diad panagpaalagey iran proyekto. Kasin asalim lay namboluntaryo ed ontan iran klase na panagpaalagey ya proyekto? Balanglan lan walay abilidad mo odino anggapo, sarag mo kasi so manboluntaryo?

12. Antoy nayarin nitulong mo no walay agawan kalamidad?

¹² No wala ray onsabin kalamidad, walay pankanawnawa na saray totoo na Dios ya mikimeyan ed sikato diad itulong dad saray agagi ed praktikal iran paraan. Singa bilang, mangiiter iray pinansyal a tulong ed saramay apektado. (Juan 13:34, 35; Gawa 11:27-30) Say sakey nin paraan et diad itulong ed panaglinis tan pangapiger ed saray aderal ya abung. Si Gabriela, sakey a sister ya taga Poland, et aderal so abung to lapud delap, balet aliketan nen anengneng ton sinmabi iray agagi manlapud asingger iran kongregasyon pian ontulong. “Agko labay ya pantongtongan iray naandi ed siak​—materyal labat iraman,” so imbaga to. “Imbes, labay kon ibaga ed sikayo no panon karakel so niwala ed siak. Lapud sayan eksperiensya et apaseguroan ak ya say pagmaliw a kabiangan na Kristianon kongregasyon et aliwa labat lan nikadkaduman pribilehyo, noagta lapuan met na liket.” Dakel ed saray akaawat na tulong kayari na kalamidad et ontan met so nalilikna ra. Tan saramay mikikimeyan ed si Jehova diad itutulong dad arum et talagan maliket met.​—Basaen so Gawa 20:35; 2 Corinto 9:6, 7.

13. Panon ya say pamboluntaryo tayo et makatulong pian ombiskeg so relasyon tayod si Jehova? Mangiter na alimbawa.

¹³ Si Stephanie tan arum ni ran manangipalapag et naliliketan ya mikikimeyan ed Dios panamegley na itutulong dad saray agagi ya refugee diad United States. Tinmulong ira ya nananap tan nan-ayos ed saray abung ya panayaman na saray pamilya a nanlapud saray lugar ya naapektoan na guerra. “Apabiskeg kami ed liket tan ed apresasyon dad panangaro na agagi ed interon mundo,” so imbaga nen  Stephanie. “Say amta na saray pamilya et atulongan mi ra, balet diad tua et sikami so mas atulongan da.” Imbaga to ni, “Say panangaro, pankakasakey, pananisia, tan panagmatalek ed si Jehova ya naimatonan min mismo so talagan amabiskeg ed panangaro mi ed si Jehova, tan mas naapresya mi so amin ya naaawat mi panamegley na organisasyon to.”

14, 15. (a) Anton espiritu so impanengneng nen propeta Isaias? (b) Panon ya naalig na saray managpulong na Panarian natan so inkiwas nen Isaias?

¹⁴ Kasin labay mo ni mikimeyan ya nagkalalo ed si Jehova? Kasin mabulos kan onalis ed lugar ya kaukolan so dakel nin manangipalapag? Siempre, agto met labay ya ibagan kaukolan ya manbiahe na arawi iray lingkor na Dios pian nipanengneng dan masakripisyo ira. Balet iyaabuloy na sirkumstansya na arum ya agagi a makapanboluntaryo ira ed ararawin lugar. Say inkiwas da et mipara ed si propeta Isaias. Bilang ebat ed tepet nen Jehova ya, “Siopay ibakik, tan siopay mangirepresenta ed sikami?” say ebat to et: “Wadia ak! Ibaki mo ak!” (Isa. 6:8) Kasin labay mo tan iyabuloy na sirkumstansyam so manboluntaryo ed saray teokratikon kimey? Diad anto ran paraan?

¹⁵ Nipaakar ed panagpulong tan panaggaway babangatan a kimey, imbaga nen Jesus: “Dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” (Mat. 9:37, 38) Kasin sarag moy manlingkor bilang payunir ed lugar ya mas baleg so pankaukolan? Odino kasin sarag mon suportaan so arum ya manggawa ed satan? Dakel ed saray agagi so makapangibaga ya say sankaabigan a paraan ya nipanengneng so panangaro ed Dios tan ed kaparan too et say pampayunir diad saray lugar odino teritorya ya baleg so pankaukolan ed saray komikimey. Kasin walay nanonotan mo nin paraan pian napalaknab odino naaruman moy panaglingkor mo? Talagan makapaliket so panggawa ed satan.

16, 17. Anto ray arum nin paraan a nagawaan mo no labay mo nin palaknaben so pikikimeyan mod si Jehova?

¹⁶ Kasin mabulos kan manlingkor ed Bethel odino manboluntaryo ed panagpaalagey na teokratikon pasilidad, balanglan temporaryo odino bilang sakey a commuter? Tuloytuloy so pankaukolan ed saray agagi ya makapanlingkor ed si Jehova, inerman so pangiyasainan ed sikara tan antokaman so kimey ya iter ed sikara. Nayarin kaukolan day mankimey ed sakey ya asainmin lapud satan so mankaukolan, anggano say abilidad tan eksperiensya da et miduma ed satan. Balet aapresyaen nen Jehova so masakripisyon espiritu na saray agagi ya mabulos a manlilingkor, inerman ya walay pankaukolan.​—Sal. 110:3.

¹⁷ Kasin labalabay moy makaawat na kaaruman iran panangipasal pian mas epektibom ya nasumpal so sagradon panaglingkor mo? No on, ompan kualipikado ka lan manaral ed School for Kingdom Evangelizers. Sayan eskuelaan et mangipapasal ed saray maespiritual a lalaki tan bibii ya manlilingkor lan full-time pian mas nausar ira ed organisasyon na Dios. Saramay man-apply ed sayan eskuelaan et nepeg a mabulos ya mangawat ed anggan anton asainmin ka-graduate da. Kasin maliket mon awaten itan ya pankanawnawa pian nilukas ed sika so arum ni ran pribilehyo na panaglingkor?​—1 Cor. 9:23.

18. Anto ray bendisyon ya naawat mo no mikikimeyan kad si Jehova diad kada agew?

¹⁸ Bilang totoo nen Jehova, napapakiwas itayon magmaliw ya maparawes​—ya pakapatnagan na kamaongan, kaabigan, tan panangaro—tan ipanengneng so malasakit ed arum kada agew. No gawaen tayo itan, nalikna tayo so liket, kareenan, tan gayaga. (Gal. 5:22, 23) Antokaman so kipapasen mod bilay, magmaliw kan maliket no aaligen moy inkamaiter nen Jehova tan no sakey ka ed saray papablien ton kakimeyan!​—Pro. 3:9, 10.