1. Antoy kaukolan a gawaen na amin a Kristiano?

NO WALAY sakit mo odino naksawan ka, kasin mila ka ed lumbay batik ya antam ya mairap? Ompan andi. Imbaga balet nen apostol Pablo ya amin a tuan Kristiano et kaiba ed lumbay batik. (Heb. 12:1) Tan amin tayo, ugaw man o matatken, mabiskeg man o makapuy, et kaukolan tayoy mansungdo anggad anggaan no labay tayon naawat so premyo ya iter nen Jehova.​—Mat. 24:13.

2. Base ed 2 Timoteo 4:7, 8, akin ya walay kanepegan nen Pablo ya mansimbawa?

² Walay kanepegan nen Pablo ya mansimbawa lapud sikaton mismo et ‘asumpal to anggad sampot so pilulumba to.’ (Basaen so 2 Timoteo 4:7, 8.) Balet anton lumba so tutukoyen nen Pablo?

3. Anton lumba so tutukoyen nen Pablo?

³ No maminsan et uusaren nen Pablo iray pagalaw nensaman diad Gresya pian ibangat iray importantin leksion. (1 Cor. 9:25-27; 2 Tim. 2:5) Aminpiga ton inkompara so bilay na Kristiano ed lumbay batik. (1 Cor. 9:24; Gal. 2:2, paimanod leksab; Fil. 2:16) Say sakey ya too et onggapon ombatik ed sayan “lumba” sano idedika to lay sarili tod si Jehova tan manpabautismo. (1 Ped. 3:21) Nibagan sikatoy akasabi la ed finish line sano iter la nen Jehova ed sikato so andi-anggaan a bilay.​—Mat. 25:31-34, 46; 2 Tim. 4:8.

4. Antoy aralen tayo ed sayan artikulo?

⁴ Anto ray pamparehoan na lumbay batik tan say bilay na  Kristiano? Walay pigara, tan aralen tayo ed sayan artikulo so talora. Unona, nepeg ya mansiansia tayo ed dugan dalan; komadua, kaukolan tayoy manpokus ed pakasabi ed finish line; tan komatlo, nepeg ya agtayo ontutundan ombatik anggano wala ray subok.

5. Anton dalan so pansiansiaan tayo, tan akin?

⁵ Pian manalo so sakey ya atleta ed literal a lumba, kaukolan ton tumboken so dalan ya imbaga na saray nan-organisa ed pagalaw. Ontan met ed sikatayo ran Kristiano. Pian naawat tayo so premyo ya andi-anggaan a bilay, kaukolan tayoy mansiansia ed dugan dalan, say malinis a kabibilay parad saray Kristiano. (Gawa 20:24; 1 Ped. 2:21) Balet labay nen Satanas tan saray onsusuporta ed sikato ya agtayo tumboken itan; labay da ya ‘miulop tayo ed sikara diad marutak a dalan.’ (1 Ped. 4:4) Babalawen da so kabibilay tayo tan ibabaga ra ya mas mainawa so kabibilay da ta bulos ira. Balet diad tua et andi.​—2 Ped. 2:19.

6. Antoy naaralan mo ed eksperiensya nen Brian?

⁶ Saramay mimiulop ed saray naimpluensyaan na mundo nen Satanas et nanengneng da lanlamang ya diad dalan ya pinili ra et aliwa ran bulos noagta aripen ira. (Roma 6:16) Imanoen so eksperiensya nen Brian. Sikatoy pinabaleg na atateng to diad Kristianon kabibilay. Balet nen tinedyer la, inisip to ya agmagmaliw ya maliket ed satan ya dalan. Kanian nandesisyon si Brian ya miulop ed saramay naimpluensyaan na sayan mundo nen Satanas. “Agko naisip a say panggawa na amin a labay ko et manresultad dakel a problema,” so kuan to. “Nagmaliw ak lan adik, buanges, tan imoral lay kabibilay ko. Diad tinmumbok iran taon, kalkalna ak met ya angusar na mas mabiskeg iran druga tan naaripen ak na saratan. . . . Nanlako ak na saray druga pian nasuportaay bisyok.” Balet nandesisyon lanlamang si Brian ya manbilay base ed estandarte nen Jehova. Inuman toy kabibilay to tan nampabautismo nen 2001. Sikatoy malikeliket la natan lapud tutumboken to lay Kristianon kabibilay. *

7. Base ed Mateo 7:13, 14, anton duaran dalan so pampilian tayo?

⁷ Importante sirin ya pilien tayoy dugan dalan! Labay nen Satanas ya ontunda tayon ombatik ed makisir a dalan ya “ompugta ed bilay” tan ombasil tayo ed maawang  a dalan ya kawalaan na dakel ya totoo ed mundo. Labalabay da ditan ta mainomay so ombatik, balet “ompugta ed kadederal.” (Basaen so Mateo 7:13, 14.) Pian mansiansia tayo ed dugan dalan tan agtayo natukson ombasil, nepeg ya manmatalek tan ondengel tayo ed si Jehova.

8. No natumba so sakey ya atleta, antoy gawaen to?

⁸ Say sakey ya atleta ya milulumba ed batik et akanengneng ed dadalanen to pian agnapatakba. Balet ompan napatir nin siansia na kapara ton atleta odino lapud saray abot ed dalan. No natumba, onalagey tan ituloy toy ombatik. Say sankanonot to et aliwan say akapatiran to, noagta say pakasabi tod finish line tan say awaten ton premyo.

9. No bilang ta natumba itayo, antoy nepeg tayon gawaen?

⁹ Diad pilulumba tayo, ompan maminpiga tayon napatir odino nalingo ed ibabaga tan gagawaen tayo. Odino nasakitan itayo lapud lingo na saray kaiba tayon ombabatik. Agtayo la itan pankelawan. Anggapoy perpekto ed sikatayo tan makisir so dalan ya kawalaan tayo. Kanian no maminsan et agtayo naiwasan so “makapanbabanggaan.” Imbaga nen Pablo ya no maminsan et wala ray nagawaan tayon “ireklamo” na arum. (Col. 3:13) Balet imbes ya sankanonot tayo no antoy akasakitan o akapatiran tayo, manpokus tayo ed premyo. No bilang ta natumba tayo, onalagey tayo tan ituloy tayoy ombatik. Ta no ombarong tayo tan manem-em tayoy sakit na linawa tan agtayo la labay so onalagey, agtayo makasabi ed finish line tan agtayo naawat so premyo. Sakey ni, ompan sikatayo laingen so rason ya napatakba odino nagapol iramay mansasagpot ya ombatik ed makisir ya dalan paarap ed bilay.

10. Antoy gawaen tayo pian agtayo magmaliw ya ‘pakagapolan odino makaamper’ ed saray kaiba tayon ombabatik?

¹⁰ Say sakey nin paraan pian naiwasan tayoy magmaliw ya ‘pakagapolan odino makaamper’ ed saray kaiba tayon ombabatik et no agtayo ipilit so labay tayo tan no abuloyan tayo ran mandesisyon parad sarili da. (Roma 14:13, 19-21; 1 Cor. 8:9, 13) Tandaan tayo ya agtayo  aaligen iray atleta ed literal a lumba ya labay dan natalo iray kaiba ran ombabatik. Say labay da et sikara so makaala ed premyo. Kanian ompan itulak day kaiba ran ombabatik pian makauna ra. Duma balet so kawalaan tayon lumba, ta agtayo milalaslasan ed saray kaiba tayon ombabatik. (Gal. 5:26; 6:4) Labay tayon tulongan so dakel ya totoo anggad posible pian saniiba tayon makasabi ed finish line tan mangawat na premyo. Kanian uunoren tayo imay simbawa nen Pablo ya ‘anapen tayoy pankaabigan na arum, aliwan say pankaabigan tayo labat.’​—Fil. 2:4.

11. Antoy akapokusan na sakey a milulumba, tan akin?

¹¹ Say sakey ya atleta ya milulumba ed batik et aglabat akanengneng ed dadalanen to, noagta akapokus met ed finish line. Anggano agto ni itan nanenengneng, iimadyinen to lay pakasabi to ditan tan say pakaala to ed premyo. Kanian ganado ya ombatik.

12. Antoy impaseguro nen Jehova?

¹² Diad pilulumba tayo, impaseguro nen Jehova ya saramay makasabi ed finish line et ikdan toy premyo​—bilay ya andi-anggaan diad tawen odino diad paraison dalin. Satan a premyo et idedeskribe na Biblia kanian sarag tayon imadyinen no panon kaliket itan ya bilay. No sankanonot tan ipapapuso tayo itan ya ilalo, agtayo abuloyan ya walay makaamper ed pilulumba tayo.

13. Antoy lamang tayo ed saray literal ya atleta?

¹³ Diad saray pagalaw ed Gresya nensaman, normal labat ya nakesawan iray atleta tan onsakit so laman da legan iran ombabatik. Balet ag-ira onsusuko ta nipasal so laman da ed satan, kanian amta ran sarag da. Kapara tayo iratan ya atleta ta ipapasal itayo nen Jehova pian makapaot tayod pilulumba tayo. Balet ta walay lamang tayod sikara. Sarag tayoy onkerew na biskeg ed si Jehova ta anggapoy limitasyon na pakapanyari to. No manmatalek tayod sikato, insipan to ya agto tayo labat ipasal noagta pabiskegen to itayo met!—1 Ped. 5:10.

14. Panon ya makatulong so 2 Corinto 12:9, 10 no ondadalan tayod saray subok?

¹⁴ Dakel so subok ya dinalan nen Pablo. Asali toy ininsulto tan pinasegsegang, tan wala ray panaon ya makapkapuy. Kaukolan ton anosan so sakey a subok ya tinawag ton “sabit ed laman.” (2 Cor. 12:7) Balet imbes ya onsuko, inisip to ya saratan ya subok et pankanawnawa pian ipanengneng toy panagmatalek ed si Jehova. (Basaen so 2 Corinto 12:9, 10.) Kanian sikatoy tinulongan nen Jehova ed amin ya subok ya dinalan to.

15. No aligen tayoy Pablo, antoy nalikna tayo?

¹⁵ Nayarin iinsultoen odino papasegsegangen itayo na arum lapud pananisia tayo. Ompan onkakapuy lay laman tayo tan mikekesaw tayo la. Balet maabig no aligen tayoy Pablo. Isipen tayo ya saratan ya subok et pankanawnawa pian nalikna tayoy maaron panangasikaso nen Jehova.

16. Anggano makapuy lay laman mo, anto ni sarag mon gawaen?

¹⁶ Kasin agka la makabangon odino aka-wheelchair ka la? Kasin onkakapuy la ray pueg mo odino ngalngali agka la makanengneng? No ontan so situasyon mo, sarag mo ni kasi ombatik kaiba iray ugugaw ni tan mabiskeg? On, sarag mo! Dakel so matatken tan mansasakit ya ombabatik ed dalan paarap ed bilay. Siempre, agda iya nagawaan no diad sarili dan biskeg. Manmamatalek irad biskeg ya  iiter nen Jehova diad idedengel dad saray aral panamegley na cellphone o telepono odino babantayan da iratan diad video streaming. Tan pupulongan da iray doktor, nurse, tan saray kakanayon da.

17. Antoy nalilikna nen Jehova ed saramay makapuy lay laman da?

¹⁷ No agmo la nagawaan iray datin gagawaen mo parad si Jehova, agka nadidismaya tan agmo iisipen ya agmo la sarag ya ituloy so pilulumbam. Inar-aro ka nen Jehova lapud pananisiam ed sikato tan papablien toy amin ya agawaan mo parad sikato. Mas kakkaukolan moy tulong to natan, tan insipan to ya agto kan balot taynan. (Sal. 9:10) Diad tua, lalo ni ingen ya onapit ed sika. Imanoen so imbaga na sister ya dakel so sakit to: “Ngalngali agak la makapanpulong ta masakit ak la. Balet amtak ya anggano daiset so nagagawaan ko, napapaliket koy Jehova kanian naliliketan ak met.” No onkakapuy so liknaan mo, tandaan mo ya kaibam si Jehova. Isip moy alimbawa nen Pablo, tan agmo lilingwanan iyan imbaga to: “Manliliket ak diad saray kakapuyan, . . . ta no kapigan a makapuy ak, diman ak mabiskeg.”​—2 Cor. 12:10.

18. Anton mas mairap ya situasyon so dadalanen na arum?

¹⁸ Walay duman subok ya dadalanen na arum ya agagi. Say situasyon da et ag-amta tan agnatalosan na arum. Singa bilang, nayarin walay depresyon da odino agda nakontrol so panagpaga ra. Akin ya mas mairap iyan subok ya dadalanen na sarayan inar-aron lingkor nen Jehova? No say sakey et aputeran na lima odino aka-wheelchair, sankanengneng na amin ya mairap so situasyon to kanian nakasian da tan tulongan da. Balet saramay walaay sakit ed emosyon odino isip et nayarin agnanengneng na arum ya walay problema da. Say situasyon da et mair-irap tan ansakit ya singa met ed samay aputeran na lima, balet ompan ag-ira natutulongan ta ag-amta na arum.

19. Antoy naaralan tayo ed si Mefiboset?

¹⁹ No wala ray subok ya dadalanen mo ya lapud satan et agmo la nagawaan iray datin gagawaen mo parad si Jehova tan agka natatalosan na arum, napaseseg ka ed alimbawa nen Mefiboset. (2 Sam. 4:4) Sikatoy lupoy tan aminsan et hinusgaan nen Arin David. Aliwan si Mefiboset so sengegan na saratan ya subok. Balet anggano onman so situasyon to, agnanisip na negatibo; inapresya to ray maong ya agawad bilay to. Pisalsalamatan toy kamaongan nen David ed sikato. (2 Sam. 9:6-10) Kanian nen hinusgaan nen David, tinalosan nen Mefiboset so situasyon. Agbinmarong ed si  David, tan agto tinetel si Jehova ed ginawa nen David. Say nampokusan nen Mefiboset et no antoy nagawaan to pian nasuportaan so tinuro nen Jehova ya ari. (2 Sam. 16:1-4; 19:24-30) Impaisulat nen Jehova ed Biblia so balibalin alimbawa nen Mefiboset pian pakaaralan tayo.​—Roma 15:4.

20. Antoy epekto na alabas ya panagpaga, balet antoy nepeg tayon tandaan?

²⁰ Say arum ya agagi et agda nakontrol so panagpaga ra kanian lanang iran mannerbiyos tan natatakot iran milimog ed totoo. Ompan agda labay so onlad lugar ya dakel so totoo, balet onaatendi ni ran siansia ed saray aral, asemblea, tan kombension. Nayarin natatakot iran mitongtong ed agda kabat, balet manpupulong ni ran siansia. No ontan so situasyon mo, agmo bukbukor. Nalilikna met itan na arum. Tandaan mo ya naliliketan si Jehova ed interon puso ya pansasagpot mo. Diad tua, say tuloytuloy ya panlilingkor mo et paneknek ya bebendisyonan tan papabiskegen to ka. * (Fil. 4:6, 7; 1 Ped. 5:7) No manlilingkor kad si Jehova anggano walay pisikal odino emosyonal ya sakit mo, tandaan mo ya napapaliket moy Jehova.

21. Antoy sarag tayon gawaen diad tulong nen Jehova?

²¹ Maong labat ta walay pidumaan na literal ya lumba ed samay lumba ya tinukoy nen Pablo. Diad literal ya lumba nensaman, saksakey labat so manalo. Balet diad lumba parad bilay, amin ya mananos ya ombatik anggad finish line et makaawat na andi-anggaan ya bilay. (Juan 3:16) Diad literal ya lumba, amin ya ombabatik et kaukolan ya mabiskeg so laman da, ta no andi, ag-ira manalo. Balet diad lumba parad bilay, dakel so makapuy lay laman da ya tuloytuloy nin ombabatik. (2 Cor. 4:16) Diad tulong nen Jehova, makasabi tayon amin ed finish line!