Ibabaga na Biblia ya “say katagey [nen Goliat] et anemiran kasiko tan sankarangan.” (1 Samuel 17:4) Say sakey a kasiko et 17.5 inches (44.5 sentimetro) so karukey to; say sankarangan et 8.75 inches (22.2 sentimetro). Kanian manga 9 feet tan 6 inches (2.9 metro) so katagey nen Goliat. Ibabaga balet na arum ya imposible itan, balet isip mo pa: Diad panaon tayo, say sankatageyan ya toon akarekord et masulok ya 8 feet tan 11 inches (2.7 metro) so katagey to. Kanian aliwan imposible ya si Goliat et mas atagey labat na manga 6 inches (15 sentimetro). Sikatoy nanlapud tribu na Refaim, ya totoon kabkabat ya ataragey. Nabasad sakey a dokumento ed Egypt nen koma-13 siglo B.C.E. ya wala ray masisibeg ya sundalo ed Canaan ya say katagey da et masulok ya 8 feet (2.4 metro). Kanian anggano aliwan normal so katagey nen Goliat, aliwan imposible itan.

Nensaman et wala ray scholar ya angibagan gawagawa labat so istorya nipaakar ed si Arin David, balet agda la nibaga itan natan. Walay daan ya sulat ya nalmo na saray archaeologist ya binitla toy “abung nen David.” Sakey ni, nanengneng ed saray imbaga nen Jesu-Kristo ya talagan nambilay si David. (Mateo 12:3; 22:43-45) Nabasa ed Biblia so duaran detalyadon listaan na kapolian ya prueban si Jesus so Mesias ya nanlapud poli nen Arin David. (Mateo 1:6-16; Lucas 3:23-31) Malinew sirin ya talagan nambilay si David.

Ibabaga na Biblia ya agawa so panlalaban diad Lawak na Elah. Tan mas espisipikon binitla ditan ya saray Filisteo et nankampo diad gilig na palandey ed baetan na duaran baley, say Soco tan Azeca. Saray Israelita balet et nankampo ed gilig na palandey diad biek na lawak. Talaga kasin wala ’ratan ya lugar?

Oniay imbaga na sakey ya turista ya pinmasyar ed saman ya lugar: “Amay guide mi, ya aliwan relihyoso, et inyakar to kami ed Lawak na Elah. Walay dinalan mi ya patatdang anggad akasabi kami ed toktok na palandey. Legan min babantagen so lawak, impabasa tod sikami so 1 Samuel 17:1-3. Insan to inturo so biek na lawak, tan imbaga to: ‘Niman iray geray na Soco, diad nikawigi yo.’ Insan linmingaw, tan imbaga to, ‘Diman balet iray geray na Azeca, diad nikawanan yo. Nankampo ray Filisteo diad baetan na saratan ya baley, diad gilig na palandey ya walad arapan yo. Kanian ayay akaalageyan tayo natan, nayarin dia so nankampoan na saray Israelita.’ Naiimadyin koy Saul tan si David ya akaalagey ed mismon kawalaan ko. Insan kami linmeksab diad lawak tan walay bineltang min kulos ya wala ray partin nakatan ya amayamay so bato. Naiimadyin koy David ya mandodokdok na limaran makinis ya bato, ya sakey ed saratan so amatey ed si Goliat.” Talagan pambiliban na sayan turista, tan arum ni, so inkasusto na saray detalye ed Biblia.

Anggapon balot so rason pian panduaruwaan tayo no kasin talagan agawa iyan istorya. Saray totoon abitla ditan et talagan nambilay tan saray lugar ya akagawaan to et talagan wala. Tan say sankaimportantian, kabiangan itan na impuyan a Salita na Dios, kanian nanlapu itan ed Dios na katuaan, say Dios ya “agto nayarian so mantila.”​—Tito 1:2; 2 Timoteo 3:16.