AKAALAGEY si Sara ed pegley na kuarto tan araldalem so nononoten to. Imadyin mo pay bii ya tagad Middle East ya maam-amo so mata to. Kasin anggan panon et naeermenan? Natural met labat ya ontan so nalikna to. Dakel so nailiw to ed sayan abung. Abayag iran nanayam dia nen asawa to ya si Abraham. * Nantulongan ira pian nipaalagey itan.

Manaayam irad Ur, mayaman a syudad ya dakel so marundunong ya trabahador, managdesinyo, tan negosyante. Kanian seguradon amayamay so gamit da. Balet parad si Sara, say abung da et aliwa labat ya panagsinopay gamit. Dakel so memories da dia nen Abraham, wala ray maliket tan wala met so maermen. Diad sayan abung et agla nabilang so impanpikasi dad inar-aro dan Dios ya si Jehova. Kanian talagan inar-aro nen Sara iyan lugar.

Pero pinmayag si Sara ya taynan irayan amin ya akasanayan to. Anggano manga 60 to la ed saman, sikatoy onlad lugar ya agto amta, isapalaran toy bilay to anggano delikado tan mairap, tan nayarin aglan balot ompawil. Akin et inawat to itan ya baleg a pananguman ed bilay to? Tan antoy naaralan tayo ed pananisia to?

Posiblin dia lanlamang ed syudad na Ur so binalegan nen Sara. Diad panaon tayo, anggapo lay manaayam ed satan a syudad. Balet diad panaon nen Sara, dakel so negosyanten ondadalan ed Ilog Eufrates ya awi-awit da ray lako ra ed sayan mayaman a syudad. Naynay ya amayamay so too ed saray karsada na Ur, mansasbi ray barko ed pier tan amayamay so lako ed saray puesto. Imadyin moy Sara ya halos kabat toy amin ya totoo ed satan a syudad ta ditan binmaleg. Seguradon kabkabat da met ta magangganan bii. Sakey ni dakel so kakanayon da ditan.

Ibabaga na Biblia ya mabiskeg so pananisia nen Sara—balet aliwan diad dios ya bulan a dadayewen na totood Ur. Walay atagtagey ya tore ya impaalagey da parad satan a dios. Say dadayewen nen Sara et say tuan Dios, si Jehova. Ag-ibabaga na Biblia no panon ya awalaan na pananisia ed si Jehova si Sara. Diad tua, say tatay to et datin managdayew ed idolo. Basta say amta tayo, akiasawa si Sara ed si Abraham, ya mas matatken ed sikato na samploy taon. * (Genesis 17:17) Akabkabat si Abraham bilang “ama na amin a walaan na pananisia.” (Roma 4:11) Diad inlabas na panaon, mas inmelet so aroan da, sankapatnagay respeto dad sakey tan sakey, maong so komunikasyon da, tan nantulongan ira anggan antoy problema. Pero say manunad bilay dan sanasawa et say panangaro dad Dios da.

 Inar-aro ya maong nen Sara si Abraham, tan nanayam irad Ur pian asingger irad saray kakanayon da. Balet walay problema. Ibabaga na Biblia ya si Sara et ‘ag-onanak; anggapoy anak to.’ (Genesis 11:30, paimanod leksab) Diad kultura da ed saman ya panaon, makapaermen tan makapabaing so situasyon nen Sara. Balet nanmatoor si Sara ed Dios tan ed asawa to. Say ulila lan kaanakan dan si Lot so inturing dan singa anak. Tuloy labat so bilay—anggad walay agawan baleg a pananguman.

Aminsan, eksayted si Abraham ta walay ibalita tod si Sara. Agmakapanisia ed agawa. Say Dios ya dadayewen da et akitongtong ed sikato—nampanengneng ni ingen panamegley na anghel! Imadyin moy Sara, ya madengedengel ed si Abraham, tan eksayted ton intepet: “Antoy imbaga tod sika ey? Ibagam la sirin!” Seguro yinmurong ni Abraham pian onkalma; insan to imbagad Sara imay ingganggan nen Jehova: “Taynan moy dalin mo tan saray kakanayon mo tan la kad dalin ya ipanengneng kod sika.” (Gawa 7:2, 3) Kayari ton inistorya so imbaga nen Jehova, inisip day pagagawa tod sikara. Taynanan da so mainawan bilay, manayam irad tolda, tan onalis-alis ira! Ompayag kasi si Sara? Seguradon tatalaranan nen Abraham so ebat to. Suportaan to kasi si Abraham ed sayan baleg a pananguman ed bilay da?

Ompan isipen tayo ya agnagawad sikatayo imay agawad si Sara. Nayarin nonoten mo, ‘Agak nin balot ingganggan na Dios ya ontan so gawaen ko odino gawaen mi nen asawak!’ Pero singa pareho met so situasyon tayod sikara di ba? Manbibilay tayod materyalistikon mundo, kanian nayarin natukso tayon iyunay mainawan bilay, mansaliw na gamit, odino mantipon parad arapen. Balet duma so ibabaga na Biblia ya gawaen tayo—iyunay espiritual iran bengatla tan say pamaliket ed Dios imbes ya say sarili tayo. (Mateo 6:33) Legan mon nononotey ginawa nen Sara, tepetan moy sarilim, ‘Siak ey, antoy iyunak ed bilay ko?’

Legan ya mani-impake si Sara, aproblema no antoy awiten to tan no antoy itilak to. Agto nayarin awiten iray angkakabaleg ya gamit ya agnilugan ed beneg na asno tan kamelyo, odino agmet nausar ed panayam dad tolda. Kanian dakel ya gamit da so ilako odino ipakerew la. Taynan to met lay komportablin bilay ed syudad—ya asingsingger so tindaan odino tiangge ya napangaliway belas, karne, prutas, kawes, tan arum nin pankaukolan tan labay to.

Ompan say mas mairap ed si Sara et say panaynan tod abung to. No say kabaleg na abung da et singa saray akotkot na saray archaeologist ed Ur, talagan mainawa tan balibali bilay nen Sara. Say arum ed saraman ya abung et masulok ya labindua  so kuarto to, walay banyo ed loob na abung, tan aliwan problema so suplay na danum. Anggan say sankamelagan ya abung et walaan na matibay ya atep, padir, tan puerta ya nayarin italak. No tolda lay panayaman da, ompan mainomay iran natakewan. Sakey ni, wala ray leon, leopardo, oso, tan lobo—ya dakel ni ed saman ya panaon.

Say pamilya da ey? Siopa ray nataynan nen Sara? Nayarin subok ed si Sara ya unoren so ganggan na Dios ya “taynan moy dalin mo tan saray kakanayon mo.” Lapud maar-aron bii, seguradon maapit so liknaan tod saray agagi to, kakaanakan to, tan saray panginaen tan pangamaen to. Amta ton ompan agto la ra nanengneng lamet. Pero nilabanan nen Sara iratan ya nalilikna to, tan intuloy toy namparaan parad iyalis da.

Anggano aliwan mainomay so desisyon da, akaparaan lay Sara ed ibuat da. Lapud si Tera so ulo na pamilya, akila ed si Abraham tan Sara, anggano ngalngali 200 lay taon to. (Genesis 11:31) Seguradon si Sara so iilaloan ya mangasikasod sayan maedad lan ateng da. Akila met ed sikara si Lot nen inunor day Jehova ya ‘taynan so dalin na saray Caldeo.’—Gawa 7:4.

Tinonton day direksion na agus na Ilog Eufrates ya anggad akasabi rad Haran, manga 960 kilometro paonlad norte. Nanayam ni ran agano ditan. Nayarin nansakit si Tera kanian agda nituloy so manbiahe. Nansiansia rad ’tan anggad nen inatey si Tera diad edad ya 205. Antis dan ituloy so biahe, akitongtong lamet si Jehova ed si Abraham, tan ingganggan to lamet ya taynan iyan dalin tan onlad dalin ya ipanengneng nen Jehova ed sikato. Balet diad sayan impitongtong na Dios, onia ni imbaga to: “Pagmaliwen ta kan baleg a nasyon.” (Genesis 12:2-4) Nen tinaynan day Haran, 75 lay Abraham tan 65 la nen Sara, et anggapo ni anak da. Kanian panon ya manlapud si Abraham so sakey a nasyon? Mangasaway sananey? Naisip met seguro nen Sara itan ya posibilidad ta iyaabuloy so pangasawa na pigara nensaman.

Kanian tinaynan day Haran tan intuloy day biahe da. Pero naarumay kaiba da. Ibabaga na salaysay ya inawit na pamilya nen Abraham so atipon dan kayamanan tan “amin ya ariripen a kaiba ra ed Haran.” (Genesis 12:5) Seguradon impaamta nen Abraham tan Sara so pananisia da ed siopaman ed sikara ya malabay ya ondengel. Ibabaga na arum ya Judio ya sarayan totoo et nagmaliw iran proselita, labay ton ibaga mandadayew met la rad si Jehova. Nayarin akombinse rad mabiskeg ya pananisia nen Sara no ibabaga tod sikara so tungkol ed Dios to tan say ilalo to. Balibalin aligen itan ta dagdaiset la natan so totoon walaan na pananisia tan ilalo. Kanian no walay naaralan mod Biblia, maong no ibagam itan ed arum.

Kabasil dad Ilog Eufrates, nayarin say petsa ed saman et Nisan 14, 1943 B.C.E., intuloy day biahe da paonlad dalin ya impromisa nen Jehova ed sikara. (Exodo 12:40, 41) Imadyin mo pay Sara ya panlikliketan toy nanenengneng to, ta marakdakep tan mabunabuna so dalin, tan balibali klima. Diad asingger ed angkakabaleg ya kiew na More, asingger ed Siquem, nampanengneng lamet si Jehova ed si Abraham, tan oniay imbaga to: “Iter ko iyan dalin ed ilalak mo.” Seguradon apaisip si Abraham ed samay salitan “ilalak”! Ompan anonotan to may imbaga nen Jehova diad hardin na Eden ya onsabi panaon et walay ilalak ya maneral ed si Satanas. Imbaga la nen Jehova ed si Abraham ya nabendisyonan so amin ya totoo ed interon mundo panamegley na nasyon ya manlapud sikato.—Genesis 3:15; 12:2, 3, 6, 7.

Balet siempre, dinmalan met ed nanduruman problema so pamilya da. Walay agawan eras ed Canaan, kanian nandesisyon si Abraham ya onla rad Ehipto. Pero alikas to ya napepeligroy bilay to. Kanian imbaga tod si Sara: “Dengel ka, ipangasim! Amtak a maganggana kan bii. Kanian sano nanengneng ka na saray Ehipsio et seguradon ibaga ra, ‘Asawa to iya.’ Insan pateyen da ak, balet agda ka pateyen. Ipangasim, ibagam ya agi ta ka, pian anggapoy mauges a nagawad siak nisengeg ed sika, tan niliktar so bilay ko.” (Genesis 12:10-13) Singa nikadkaduma itan ya imbaga nen Abraham. Akin kasi?

 Ibabaga na arum ya matila tan payakot si Abraham. Pero diad tua, talagan agi toy Sara, ta saksakey so ama ra. Tan walay makatunongan ya rason na panaalwar to. Amta nen Abraham tan Sara ya kaukolan ya nasumpal so gagala na Dios ya nawalaay ilalak si Abraham tan manlapud sikato so sakey ya nasyon. Kanian nepeg dan protektaay bilay nen Abraham. Sakey ni, base ed archaeology, normal labat ed saray makapanyarin lalaki ed Ehipto nensaman so man-kidnap na bii insan da pateyey asawa to. Kanian duga so ginawa nen Abraham, tan maong labat ta mapaabeban inmunor si Sara ed desisyon to.

Ag-abayag, agawan tua imay tatakotan nen Abraham. Wala ray prinsipe na Faraon ya apansin day ganggana nen Sara—anggano maedad la. Imbaga dad Faraon, kanian impaala ton tampol! Imadyin mo pay pakakaaburido nen Abraham tan say pannerbiyos nen Sara. Balet ta mapatnag ya trinato dan kagalgalang ya bisita si Sara, aliwan singa hostage. Labay na Faraon ya naalay tiwala nen Sara tan pabiliben ed kayamanan to, insan to katongtongey “kuya” to pian naasawa to.—Genesis 12:14-16.

Imadyin mo pay Sara ya akatandag ed bintana odino walad veranda tan sankanengneng toy kaliberliber na palasyo. Anto kasi alikna to? Maliket kasi ta manaayam lamet ed baleg ya abung ya walaay padir tan atep, tan masarap iray ipaparungo dad sikato? Atukso kasin miasawad Faraon pian oninawa lamet so bilay to—ya mas mainawa nen say bilay tod Ur? Seguradon malikeliket si Satanas no taynan nen Sara si Abraham! Pero ag-itan ginawa nen Sara. Matoor ed asawa to, ed sipanan da, tan ed Dios to. No ontan labat komon so katooran na amin ya walaay asawa ed sayan imoral a mundo! Sarag mo kasin aligey katooran nen Sara diad panmatoor mo met ed saray inad-arom tan kakaarom?

Nanggaway paraan si Jehova pian protektaan iyan matoor ya bii—sinalot toy Faraon tan say sankaabungan to. Nen naamtaan na Faraon ya asawa manaya nen Abraham si Sara, impawil tod asawa to tan imbaga ton taynan da lay Ehipto. (Genesis 12:17-20) Seguradon malikeliket si Abraham nen amawil so inar-aro ton asawa! Nanonotan mo may imbaga tod si Sara ya: “Maganggana kan bii”? Diad tua, walay duman klase na inkaganggana nen Sara ya mas papablien nen Abraham tan mas importante nen say itsura. Maomaong so ugali tan inkatoo nen Sara, atan so ganggana ya talagan papablien nen Jehova. (1 Pedro 3:1-5) Atan met so ganggana ya nepeg ya walad sikatayo. No iyuna tayoy espiritual nen say materyal, no ibaga tayod arum so tungkol ed Dios, tan no manmatoor tayod saray estandarte na Dios anggano wala ray tukso, aaligen tayoy pananisia nen Sara.