“Nayari lan onalis so bus, balet natilak iyan Chinese!” Atan so nadngel nen Alexandra legan ton akayurong ed bus, ya manaalagar ya ombeltang diad border na duaran bansa ed South America. Sikatoy inmepas pian nengnengen no antoy nagagawa tan anengneng to so sakey ya kabataan ya lakin Chinese ya manpapairap ya man-Spanish legan ton ipapaliwawa so situasyon tod sakey ya guardia ed border. Lapud onaatendi si Alexandra ed sakey a kongregasyon na Saray Tasi nen Jehova ya mansasalitay Chinese, namboluntaryo ya magmaliw ya interpreter.

Imbaga na samay laki ya sikatoy residente ditan balet atakew iray dokumento tan kuarta to. Diad gapo et agpanisiaan na guardia so ibabaga to tan pansususpetsaan to ni ingen si Alexandra ya kaiba ed human trafficking. Balet inawat lanlamang na guardia so paliwawa na saman ya laki, pero kaukolan toy manbayar lapud anggapoy dokumento to. Anggapoy kuarta to kanian pinautang nen Alexandra na $20. Misasalamat ya maong imay laki tan imbaga to ni ya sulokan toy ibayar to. Impaliwawa nen Alexandra ya agto manaanap na reward; sikatoy maliket ya ontulong ta amta ton atan so dugan gawaen. Inikdan to may laki na pigaran literatura ed Biblia tan pinaseseg ton manaral na Biblia ed saray Tasi.

Makapalikliket ya naamtaan ya wala ray maiter anggan ed saray totoon agda kabat, tan seguradon ontan met so gagawaen na arum a totoo antokaman so relihyon da tan anggan saray anggapoy relihyon da. Kasin mabulos ka ya iyuna so pankaabigan na arum? Makapainteres itan ya tepet lapud imbaga nen Jesus: “Mas makapaliket so mangiter nen say mangawat.” (Gawa 20:35) Makapainteres met itan diad science, lapud ibabaga na saray researcher ya walay maong ya epekto ed sika na pangiter. Nengnengen tayo no panon.

Ipapanengneng na saray eksperiensya ya mankonektaan so panangiter tan liket. Insulat nen apostol Pablo ya “aaroen na Dios so maliket a mangiiter.” Say tutukoyen to et saray Kristiano ya mabulos ya nandonasyon pian natulongan iramay maniirap ya kapara dan mananisia. (2 Corinto 8:4; 9:7) Ag-ibabaga nen Pablo ya mangiiter ira lapud maliket ira, noagta kabaliktaran—maliket ira lapud mangiiter ira.

Diad tua, base ed sakey ya impanaral, say pangiter et “papaganaen to ray parte na utek tayo ya mikonektaan ed liket, pikakaaro, tan tiwala, kanian positibo so epekto to ed liknaan.” Naamtaan met ed sakey nin impanaral ya “saramay akibiang ed satan et mas aliketan ed pangiiter da na kuarta ed arum nen say no gastosen da itan parad sarili ra.”

Kasin aliknam la ya singa anggapoy niiter mo lapud situasyon mo? Diad tua, amin tayo et nayarin makalikna na liket ya resulta na inkamaiter. No dugay motibom ed panangiter, agkaukolan ya baleg so iter mo. Sakey ed saray Tasi nen Jehova so nansulat ed mangipa-publish na sayan magasin, tan walay kaiba na satan ya donasyon: “Pigaran taon ya melag labat so niiiter kon donasyon diad Kingdom Hall.” Balet intuloy  to: “Mas dakel so imbales nen Jehova a Dios ed siak nen say inter ko. . . . Salamat ta ginawa yon posible so pangiter ko na donasyon—maliket ak lapud satan.”

Siempre, aliwa labat ya kuarta so niiter. Dakel ni paraan ya makapangiter tayo.

Ibabaga na Biblia: “Say lakin mangipapatnag na kaabigan et nagugunggonaan, balet say maruksan too et mangiyaakar na problema ed sarili to.” (Proverbio 11:17) Saray totoon mangipapatnag na kaabigan et maiter tan mabulos dan iiter so sarili ra—say panaon da, biskeg da, panangasikaso da, tan arum ni. Lapud sayan gagawaen dan panangiter, nagugunggonaan ira ed dakel a paraan, singa bilang, maong so epekto na satan ed laman da.

Ipapanengneng na impanaral ya saramay namboluntaryon ontulong ed arum et nalmoan ya agmasyadon makakalikna na sakit tan depresyon. Kaslakan et mas maksil so laman da. Say inkamaiter et ontutulong ni ingen pian mas onkasil iramay walaan na graben sakit, singa say multiple sclerosis odino HIV. Ipapanengneng met na impanaral ya saray alkoholiko ya ontutunda lad kakainum da et agla masyadon nadi-depress tan mas daiset so tsansa ya ompawil irad bisyo da no ontutulong irad arum.

Say rason no akin ya ontan, ibabaga ya “no naliknam so panangasi, kamaongan, tan kaabigan, mas daiset so tendensiam ya nawalaay negatibon liknaan.” Nayari met ya onabebay stress tan blood pressure no mangiiter ka. Tan saray sintomas na depresyon et maples ya naeekal ed saray totoon inateyan na asawa no ontutulong ed arum.

Kanian segurado tayo. Maong so epektod sikatayo na panangiter.

Pinaseseg nen Jesus iray patumbok to: “Iyugali yo so mangiter, pian saray totoo et mangiter ed sikayo. Ikalbo rad saray akwalan yo so maabig a sukat, pinedper, sinedser, tan mantampuwag. Ta sikayoy sukaten unong ed sukat a panusukat yo.” (Lucas 6:38) No mangiiter ka, nayarin pisalamatan itan na totoo tan magmaliw met iran maiter. Kanian say panangiter et manreresulta ed kooperasyon tan pankakaaro.

Saray researcher ya aaralen day relasyon na totoo et naimano ra ya “saray totoo ya iyuuna ray pankaabigan na arum et nasasagyat da met so arum ya aligen itan.” Diad tua, “magmamaliw ya mas maiter iray totoo anggano makabasa labat ira na sakey ya ekstraordinaryon ginawa ya kamaongan.” Kanian, base ed sakey ya impanaral, “kada too ed sakey ya organisasyon et nayarian ton impluensyaan so pigara o anggan nilasus a totoo, ya arum ed sikara et agto ni akabat.” Diad arum a salita, say sakey labat ya ginawan impangiter et nayarin impluensyaan toy arum ya aligen itan tan onkayat iya ed saray totoo ed sakey a lugar. Labay moy manayam ed ontan a lugar? On, maong iray resulta no iyugali na mas dakel a totoo so mangiter.

Ontan so ipapanengneng na sakey ya eksperiensya ed Florida, U.S.A. Sakey ya grupo na saray  Tasi nen Jehova et namboluntaryo ya ontulong ed saray naapektoan na maksil ya bagyo. Legan ya aalagaren dan onsabi iray usaren da ed pangapiger ed sakey ya abung, naimano da ya aderal so alar na sakey ed saray kaabay, kanian inapiger da itan. “Misasalamat ak a maong,” so inkuan na kaabay diad sulat to ed world headquarters na Saray Tasi nen Jehova. “Sikara lay sankamaongan ya totoon akabat ko.” Lapud pisasalamat to, angipawit na baleg a donasyon ya usaren ed tatawagen ton ekstraordinaryon kimey na saray Tasi.

Naamtaan ed sakey ya makapainteres ya impan-research ed science ya “natural ed totoo so ontulong ed arum.” Unong ed sayan impanaral, saray ugugaw et “labay da lay manggawa na kamaongan ed arum anggano agda ni amtay mansalita.” Akin? Walad Biblia so ebat ta imbaga na satan ya pinalsa so totoo “unong ed indengan na Dios,” labay ton ibaga, saray arum a kualidad na Dios et wala met ed sikatayo.—Genesis 1:27.

Say inkamaiter et sakey a makapadinayew ya kualidad na samay nanggawa ed sikatayo, si Jehova a Dios. Inter tod sikatayo so bilay tayo tan amin ya kaukolan tayo pian magmaliw a maliket. (Gawa 14:17; 17:26-28) Nakabat tayo so Ama tayod tawen tan saray balibalin gagala to parad sikatayo no aralen tayo so Salita to, say Biblia. Ipapaamta na satan ya libro ya say Dios et nanggaway paraan pian nawalaan tayo na maliket ya arapen. * (1 Juan 4:9, 10) Lapud si Jehova a Dios so manunan alimbawa na inkamaiter tan ginawa to ka unong ed indengan to, agla pankelawan ya say panangiter—bilang pangalig ed Dios—et parad pankamaongan mo tan manresulta ed pakaawat moy pabor to.—Hebreo 13:16.

Nanonotan mo ni Alexandra ya abitlad gapo na sayan artikulo? Antoy nansumpalan na istorya to? Imbaga na kaiba ton ombiabiahe ed bus ya sinayang toy kuarta to, balet nen akasabi la rad syudad ya tinundaan na bus, kinontak na samay laki iray kakaaro to diman, tan binayaran ton tampol so $20 ya utang to. Sakey ni, ginawa na samay laki so imbaga nen Alexandra tan ginapoan toy manaral na Biblia. Makakaliket si Alexandra ta akapannengneng ira lamet kayari na taloy bulan diad sakey ya Chinese ya kombension na Saray Tasi nen Jehova ed Peru. Pian nipanengneng na samay laki so pisasalamat to ed amin ya ginawa nen Alexandra ed sikato, inimbitaan tod restaurant to si Alexandra tan saray kaiba ton nambiahe paonlad kombension.

Say panangiter tan say itulong ed arum et manresulta ed baleg a liket. Tan lalo la no natulongan mo so arum ya kabaten imay Lapuan na amin ya maong ya regalo—si Jehova a Dios! (Santiago 1:17) Kasin naeeksperiensyam la iray maong a resulta na ontan ya panangiter?