TALAGAN ansakisakit no tinaynan ka na asawam. Tua, wala ra may naperdona day magbabawin asawa da tan nipawil lamet so relasyon da. * Balet balanglan nipawil ni odino andi la so relasyon na sanasawa, saramay naamtaan dan agnanmatoor so asawa ra et makaliknay graben ermen tan sakit na liknaan. Panon dan nasarag itan?

Anggan ansakisakit so alikna na saray biktiman asawa, dakel ed sikara so aligliwa ed ibabagay Biblia. Naaralan da ya iimanoen na Dios so iyaakis da tan sikatoy mililikna ed sikara.​—Malaquias 2:13-16.

“Sanen nadadaeg ak na saray kapagaan, niligliwa tan pinakalma mo ak.”​—Salmo 94:19.

“Legan kon babasaen iyan bersikulo, naiimadyin koy Jehova ya papakalmaen toy liknaan ko, singa gagawaen na maar-aron ama,” so nanonotan nen Bill.

“Diad samay matoor et onkikiwas kan matoor.”​—Salmo 18:25.

“Agnanmatoor so asawak,” so imbaga nen Carmen, ya say asawa to et nan-bii ed pigay bulan. “Balet napanmatalkan koy Jehova ta matoor. Agto ak balot taynan.”

“Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew . . . tan say kareenan na Dios a palumbasan toy amin a pakatalos so manbantay ed saray puso [yo].”​—Filipos 4:6, 7.

“Paulit-ulit kon babasaen irayan bersikulo,” so imbaga nen Sasha. “Kada no manpipikasi ak, iikdan ak na Dios na kareenan na nonot.”

Amin irayan abitla et alikna dan labay da lay onsuko no maminsan. Balet nanmatalek irad si Jehova a Dios tan binmiskeg ira lapud Salita to, say Biblia. Oniay imbaga nen Bill: “Lapud pananisiak, walay direksion na bilay ko anggano singa la aderal itan. Anggano asalik so nanakar ed ‘ambilbilunget a dalan,’ kaibak so Dios.”​—Salmo 23:4.