ONLIING! No. 2 2018 | 12 Sekreto na Maliket ya Pamilya
12 Sekreto na Maliket ya Pamilya
Amayamay lay narerengelan tayon rason no akin ya nabubuyak iray pamilya. Pero anto ray rason no akin ya maliket so arum ya pamilya?
Manlapud 1990 anggad 2015, say bilang na saray mandidiborsyo diad United States ya mantaon na masulok ya 50 et adoble, tan saray masulok ya 65 et triple.
Ag-amta na atateng so panisiaan da: Say arum ya eksperto et irerekomenda dan lanang ya irayew so anak da, irerekomenda balet na arum ya istriktoan iran maong.
Saray kabataan et anggapod sikara iray dunong ya kaukolan da pian magmaliw iran responsablin adulto.
Anggaman ontan, diad tua . . .
Saray sanasawa et sarag dan pagmaliwen a maliket tan permanente so relasyon da.
Saray atateng et sarag dan maaron disiplinaen iray ananak da.
Saray kabataan et sarag day nawalaan na dunong ya kaukolan da no magmaliw la ran adulto.
Panon? Ipaliwawa ed sayan isyu na Onliing! so 12 sekreto na maliket ya pamilya.
1: Katooran ed Sipanan
Taloran praktikal ya suhestion ya ontulong ed sanasawa pian mansiansian malet so relasyon da.
2: Teamwork
Kasin say asawam et singam labat roommate?
3: Respeto
Amtaen no anto ray nepeg mon ibaga tan gawaen ya makatulong pian nasegurom ya nipapanengneng moy respetom ed asawam.
4: Panamerdona
Antoy makatulong pian napalampas moy ginawa na asawam?
5: Komunikasyon
Taloran importantin makatulong pian mas onapit kayod ananak yo.
6: Disiplina
Kasin nabawasan so kompiyansa ed sarili na anak mo no disiplinaen mo?
7: Prinsipyo
Anto ran prinsipyo so nepeg yon ibangat ed ananak yo?
8: Alimbawa
No labay yon unoren na ananak yo iray ibabaga yo, nepeg ya nanengneng da a gagawaen yon mismo iratan.
9: Inkatoo
Panon ya napanindigan na saray kabataan iray papanisiaan da?
10: Napantiwalaan
No mansagpot kan naala so tiwala na atateng mo, makatulong itan pian onkalakal ka.
11: Inkakuli
No aralen moy mankuli ed trabahom bilang kabataan, ontulong itan ed sika diad saray gawaen mo diad arapen.
12: Goal
No nagawaan mo ray goal mo, mas walay kompiyansam ed sarilim, mas onapit kad saray kakaarom, tan mas maliket ka.
Kaaruman ya Tulong Parad Pamilya
Mangiiter so Biblia na napanmatalekan ya bilin pian magmaliw ya maliket so relasyon yon sanasawa tan say pamilya yo.
