Aglabat sarag nen Jesus ya paabigen iray mansasakit tan bilayen iray inaatey, sarag to met ya kontrolen so dagem tan uran. Kayari nen Jesus ya nampikasi diad palandey, anengneng ton madaluyon so Dayat na Galilea ta walay bagyo. Walad baloto iray apostol to tan nanairapan iran manbegsay ta makmaksil so dagem. Inmepas si Jesus ed palandey tan nanakar ed tapew na danum paonlad baloto ra. Nen anengneng na saray apostol ya walay manaakar ed tapew na danum, ataktakot ira. Balet imbaga nen Jesus ed sikara: ‘Siak iya. Agkayo natatakot.’

Imbaga nen Pedro: ‘Katawan, no talagan sika ’tan, paonlam ak ed sika.’ Imbaga nen Jesus ed si Pedro: ‘Sige, gala dia.’ Kanian legan ya ombabagyo, inmepas ed baloto si Pedro tan nanakar ed tapew na danum paonlad si Jesus. Balet nen asingger lay Pedro ed si Jesus, ninengneng toy makmaksil ya dagem tan ataktakot. Insan to alikas ya onlelereg la. Inmeyag si Pedro: ‘Katawan, iligtas mo ak!’ Siningkat nen Jesus so lima nen Pedro, tan imbaga nen Jesus: ‘Akin et nakal so tiwalam? Kulang amo so pananisiam?’

Nen linmugan lay Jesus tan si Pedro ed baloto, tinmunda so bagyo. Imadyin mo pa, anto kasi alikna na saray apostol? Imbaga dad si Jesus: ‘Talagan Anak ka na Dios.’

Aliwan saya labat so agawa ya kinontrol nen Jesus so dayat tan dagem. Aminsan, nen akalugan ed baloto si Jesus tan saray apostol paonlad basil na dayat, naugip si Jesus diad bandad beneg na baloto. Legan ya nanaugip, biglan binmagyo na makmaksil. Onsisipwak ed baloto iray daluyon, kanian ngalngali la onlereg. Binangon na saray apostol si Jesus, ya iyeeyag da: ‘Managbangat, ompatey ti la! Tulongan mo kami!’ Binmangon si Jesus tan imbaga tod dayat: “Deen ka!” Tampol ya dinmeen so dagem tan dayat. Imbaga nen Jesus ed saray apostol to: ‘Kulang amo so pananisia yo?’ Imbaga na saray apostol ed sakey tan sakey: ‘Pati say dagem tan dayat et onuunor ed sikato.’ Naaralan na saray apostol ya no talagan mantiwala ira ed si Jesus, anggapoy nepeg dan takotan.