Si Ester et Judio ya manaayam ed syudad na Susan diad Persia. Dakel lan taon ya ataynan na pamilya to so Jerusalem ta kaiba ira ed saramay asakop nen Nabucodonosor. Si Ester et pinabaleg na kapinsan ton si Mardokeo, ya lingkor na ari na Persia ya si Ahasuero.

Manaanap si Arin Ahasuero na balon reyna. Inawit dad sikato iray sankagangganaan ya bibii ya walad sakop to, kaiba si Ester. Diad amin ya bibii, si Ester so pinili na ari ya magmaliw ya reyna. Binilin nen Mardokeo si Ester ya agto ibabagan sikatoy sakey ya Judio.

Walay malastog a lakin say ngaran to et Haman. Sikato so pangulo na amin ya prinsipe. Labay to ya ontuek ed sikato so amin ya totoo. Balet aglabay nen Mardokeo so ontuek ed si Haman, kanian mamapasnok tan labay ton pateyen si Mardokeo. Nen naamtaan nen Haman ya Judio si Mardokeo, implano to ya pateyen so amin ya Judio ya walad sakop nen Ahasuero. Imbaga tod ari: ‘Ag-uunoren na saray Judio so ganggan mo; kanian nepeg ya ompatey iran amin.’ Imbaga nen Ahasuero: ‘Gawam no antoy labay mo.’ Insan inikdan nen Ahasuero si Haman na autoridad ya manggaway ganggan. Nanggawa si Haman na ganggan ya nepeg a pateyen na totoo so amin ya Judio diad koma-13 ya agew na bulan na Adar. Nanenengneng nen Jehova so amin ya nagagawa.

Ag-amta nen Ester itan ya ganggan. Kanian impawitan nen Mardokeo na kopya na ganggan tan imbaga tod si Ester: ‘La ka, mitongtong kad ari.’ Imbaga nen Ester: ‘Anggan siopa ya onlad ari ya agto impatawag et pateyen. Tan 30 ya agew ak lan ag-impatawag na ari! Balet onla ak. No iyunat toy setro to, nabilay ak. No andi, ompatey ak.’

Linmay Ester ed sular na palasyo na ari. Nen anengneng na ari si Ester, inyunat toy setro to. Inmasingger si Ester tan tinepetan na ari: ‘Ester, antoy labay mon gawaen ko parad sika?’ Inmebat si Ester: ‘Manparaan ak na panangan, labay ta kayon imbitaan  tan si Haman.’ Nen mamangan la ra, inimbitaan ira lamet nen Ester ed panangan ya iparaan to. Diad komaduan panangan, tinepet lamet na ari ed si Ester: ‘Antoy labay mon gawaen ko parad sika?’ Imbaga nen Ester: ‘Walay malabay ya mamatey ed siak tan saray kabaleyan ko. Komon ta iligtas mo kami.’ Tinepet na ari: ‘Siopa tay malabay ya mamatey ed sika?’ Imbaga nen Ester: ‘Ayan mauge-uges ya Haman.’ Nampasnok ya maong si Ahasuero kanian impapatey ton tampol si Haman.

Balet agla nayarin umanen so ganggan ya ginawa nen Haman. Anggan say ari et agto sarag ya umanen. Kanian ginawa na ari si Mardokeo ya pangulo na saray prinsipe tan inikdan toy autoridad ya manggawa na balon ganggan. Nanggawa si Mardokeo na ganggan ya sarag na saray Judio ya idepensay sarili da ed saray malabay ya mamatey ed sikara. Nen koma-13 ya agew na Adar, tinalo na saray Judio iray kalaban da. Manlapu lad saman, tinaon la ya seselebraan da iyan impanalo da.