Pinablin Mangaaro ed si Jehova:

“Naamtaan yo so katuaan, tan say katuaan so mangibulos ed sikayo,” so imbaga nen Jesus. (Juan 8:32) Talagan makapaseseg iratan a salita! On, posiblin naamtaan so katuaan anggan diad sayan mapeligro tan mair-irap ya “kaunoran iran agew” ya napnoy katilaan. (2 Timoteo 3:1) Kasin nanonotan mo ni may panaon sanen naamtaan moy katuaan a walad Salita na Dios? Seguradon malikeliket ka!

Balet aliwan magenap ya amtam so katuaan tan regular mon ipupulong itan ed arum. Importante ya iyaplikam met itan ed bilay mo. Pian nagawaan mo itan, nepeg ya mansiansia ka ed panangaro na Dios. Antoy labay ya ibaga na satan? Say ebat et nanengneng ed samay imbaga nen Jesus diad samay labi antis na impatey to. Oniay imbaga to ed saray matoor ya apostol to: “No unoren yo iray ganggan ko, mansiansia kayod arok, no panon ya inunor ko iray ganggan na Ama tan nansiansia ak ed aro to.”​—Juan 15:10.

Imanoen a nansiansia si Jesus ed panangaro na Dios lapud inunor to ray ganggan nen Ama to. Ontan met so nepeg tayon gawaen. Pian mansiansia itayo ed panangaro na Dios, kaukolan tayon iyaplika so katuaan ed inagew-agew a bilay tayo. Oniay imbaga nen Jesus ed saman met lanlamang a labi: “Lapud amta yo la iraya, maliket kayo no gawaen yo.”​—Juan 13:17.

Komon ta natulongan ka na sayan libro pian nitultuloy mon niyaplika so katuaan ed bilay mo tan mansiansia ka “ed panangaro na Dios . . . a mangitonton ed bilay ya andi-anggaan.”​—Judas 21.