1-3. (a) Antoy nalilikna na dakel ed trabaho da? (b) Antoy ibabaga na Biblia nipaakar ed trabaho, tan anto ran tepet so pantongtongan tayo ed sayan kapitulo?

 DAKEL a totoo natan so agnaliliketan ed trabaho da, kanian napipilitan labat iran onloob kada agew. Antoy makatulong pian nalabayan day trabaho da tan naliketan ira?

² Ibabaga na Biblia ya nepeg a maliket tayo ed trabaho tayo. Nabasa ditan ya say trabaho tan say resulta na satan et bendisyon na Dios. Insulat nen Solomon: “Balang sakey et nepeg a mangan tan oninum tan manliket ed amin a pansasagpot to. Saya et regalo na Dios.” (Eclesiastes 3:13) Inad-aro itayo nen Jehova tan sankanonot toy pankaabigan tayo, kanian labay ton panliketan tayoy mantrabaho tan na-enjoy so bunga na pansasagpot tayo. Pian mansiansia tayod panangaro to, nepeg a manbilay tayo base ed saray estandarte tan prinsipyo to nipaakar ed kimey odino trabaho.​—Basaen so Eclesiastes 2:24; 5:18.

³ Diad sayan kapitulo, pantongtongan tayoy apatiran tepet: Panon itayon naliketan ed pansasagpot tayo? Anto ran klase na trabaho so agnayari ed saray tuan Kristiano? Panon itayon magmaliw a balanse ed trabaho tayo tan ed panagdayew tayod Dios? Tan anto so sankaimportantian a kimey ya nagawaan tayo? Balet aralen tayo nin unona so alimbawa na duaran sankamaongan ya komikimey ed uniberso​—si Jehova tan si Jesu-Kristo.

4, 5. Anto ray nabasa ed Biblia ya pakanengnengan a si Jehova et makulikuli?

⁴ Si Jehova so Supremon Komikimey. Imbaga na Genesis 1:1: “Diad gapo et pinalsa na Dios so tawen tan say dalin.” Nen asumpal na Dios so amin ya kimey to diad dalin, imbaga ton “agaylay abig iya.” (Genesis 1:31) Labay ton ibaga, agustoan nen Jehova so amin a ginawa to diad dalin. Lapud sikatoy “maliket a Dios,” seguradon aliketan ed resulta na impankimey to.​—1 Timoteo 1:11.

⁵ Agbalot ontutundan mankikimey so makulikulin Dios tayo. Kalabas na dakerakel a taon manlapud impamalsa ed dalin, imbaga nen Jesus: “Say Amak et mankikimey ni anggad natan.” (Juan 5:17) Antoy gagawaen na Ama? Tuloytuloy ton igigiya tan aasikasoen iray totoo. Sikatoy amawala na “sakey a balon pinalsa,” saray alanaan a Kristiano ya kaiba nen Jesus a manuley diad tawen. (2 Corinto 5:17) Sikatoy mankikimey pian nasumpal so gagala ton manbilay na andi-anggaan diad balon mundo iray mangaaro ed sikato. (Roma 6:23) Seguradon malikeliket si Jehova ed resulta na sayan kimey to. Minilyon so angawat ed mensahe na Panarian, inyasingger ira na Dios ed Anak to tan inuman day kabibilay da pian mansiansia rad panangaro to.​—Juan 6:44.

6, 7. Akin ya nibagan makulikuli si Jesus manlapu lad gapo?

⁶ Manlapu lad gapo et makulikuli si Jesus. Antis ya linma ed dalin, sikatoy nanlingkor bilang “marundunong a komikimey” na Dios diad impanggawa ed amin a bengatlan “walad tawen tan walad dalin.” (Proverbio 8:22-31; Colosas 1:15-17) Makulikuli nin siansiay Jesus nen wadia lad dalin. Anggano ugaw ni et naaralan to lay mankarpentero, kanian  akabkabat ed satan a trabaho. (Marcos 6:3) Ambelat iyan trabaho tan dakel so kaukolan ton gawaen, lalo la nensaman ta anggapo ni tistisan, saliway materyales, tan de-kuryentin kagawaan. Imadyin mo pan si Jesus a mismo so onlan manbatang na kiew insan to uloren diad pasen ya pantratrabahoan to. Tan mangipapaalagey na kaabungan, ipaparaan tan ililira to ray biga, manggagawa na saray puerta, tan arum ni ran kagawaan ed abung. Seguradon alikna nen Jesus so liket ed polidon panagtrabaho.

⁷ Makulikuli met ya nampulong si Jesus. Diad talora tan kapalduan taon et talagan impasyay impansagpot to ed sayan sankaimportantian ya kimey. Lapud labay ton napulongan so dakel a totoo anggad posible, anggapoy pinerdi ton panaon. Sikatoy ombabangon a masakbay tan manpupulong ya anggad labi. (Lucas 21:37, 38; Juan 3:2) Sikatoy “linmad saray syudad tan ed saray baryo, ya impupulong tan inyaabawag to so maong a balita na Panarian na Dios.” (Lucas 8:1) Nilasus a kilometro so inakar to diad marabok iran dalan pian nipasabi tod totoo so maong a balita.

8, 9. Akin ya nibaga tayon aliketan si Jesus ed impansagpot to?

⁸ Kasin aliketan si Jesus ed impansagpot tod ministeryo? On! Sikatoy angitanem na bini na katuaan nipaakar ed Panarian tan tinmubo iratan anggad akaparaan lan anien. Say panggawa ed kimey na Dios so angiter ed si Jesus na biskeg kanian sarag toy mamalabas na panangan pian nasumpal toy pampupulong to. (Juan 4:31-38) Isipen pay alikna ton liket nen asumpal toy ministeryo to diad dalin tan matalek ton imbagad si Ama to: “Inggloria ta ka diad dalin, a sinumpal koy kimey ya impagawam ed siak.”​—Juan 17:4.

⁹ On, talagan nanliketan nen Jehova tan Jesus so  impansagpot da. Inaro tayoy Jehova kanian ‘aaligen’ tayo. (Efeso 5:1) Inaro tayo met si Jesus kanian ‘maapit tayon tutumboken iray bakat to.’ (1 Pedro 2:21) Aralen tayo sirin no panon tayo met ya naliketan ed pansasagpot tayo.

10, 11. Antoy makatulong pian mansiansia tayon positibo ed trabaho tayo?

¹⁰ Kaukolan met na saray tuan Kristiano so mantrabaho. Labay tayo ya maliket tan kontento tayo ed trabaho tayo. Balet mairap itan no say nalmo tayon trabaho et aliwan samay labalabay tayo. Panon itayon naliketan anggano ontan so situasyon tayo?

¹¹ Mansiansian positibo. No maminsan, agtayo sarag ya umanen so situasyon tayo, balet sarag tayon umanen so panagnonot tayo. No aligen tayoy kanonotan na Dios, ontulong itan pian mansiansia tayon positibo ed trabaho tayo. Singa bilang, no sakey kan ulo na pamilya, nonot mon lapud trabahom et nalelegpet moy pamilyam. Tandaan mo ya anggano singa abeba so pakanengneng na totoo ed trabahom, say importante ed Dios et naasikasom so pamilyam. Ibabaga na Biblia ya say sakey ya agto tataryaan so pamilya to et “alabas ni nen say toon anggapoy pananisia to.” (1 Timoteo 5:8) No isipen mon lapud pantratrabahom et nagagawaan moy inter na Dios a responsabilidad mo, makatulong itan pian naliknam so inkakontento tan inspirasyon ya nayarin agnalilikna na saray katrabahom.

12. Akin ya nabendisyonan tayo no makuli tan matua tayod trabaho?

¹² Magmaliw a makuli tan matua. Nabendisyonan tayo no makuli tayo tan aliwan paspasaray so panagtrabaho  tayo. Saray makuli tan maabilidad ya empleyado et labalabay na amo ra. (Proverbio 12:24; 22:29) Bilang tuan Kristiano, kaukolan ya matua tayod trabaho tayo. Ag-itayo mantatakew na kuarta, materyales, odino oras. (Efeso 4:28) Singa inaral tayod apalabas ya kapitulo, nabendisyonan itayo no matua tayo. No say sakey ya empleyado et kabkabat ya matua, sikatoy pampiyaan na amo to. Anggano agnaimano na amo tayo so inkakuli tayo, maliket tayo nin siansia lapud “malinis so konsiensia” tayo tan amta tayon naliliketan so Dios ya inad-aro tayo.​—Hebreo 13:18; Colosas 3:22-24.

13. Antoy resulta no maong so ugali tayo diad trabaho?

 ¹³ Tandaan a nigloria tayoy Dios panamegley na ugali tayo. No say ugali tayo diad trabaho et base ed atagey iran estandarte na Biblia, naimano itan na arum. Antoy resulta? ‘Naparakep tayo so bangat na Dios a Manangiliktar tayo.’ (Tito 2:9, 10) On, no maong so ugali tayo, nasagyat tayoy arum ed dugan panagdayew. Isipen pa labat no antoy naliknam no walay katrabahom ya mangawat ed katuaan lapud naobserbaan to ya maong so ugalim diad trabaho! Balet nia so sankaimportantian: No maong so ugalim diad trabaho, nigloriam si Jehova tan napaliket moy puso to!​—Basaen so Proverbio 27:11; 1 Pedro 2:12.

14-16. No mandedesisyon tayo nipaakar ed trabaho, anto ran tepet so nepeg tayon ikonsidera?

¹⁴ Anggapoy nabasad Biblia ya detalyadon listaan na saray trabahon nayari odino agnayari ed sikatayo ran Kristiano. Balet agto labay ya ibagan nayari ed sikatayo so amin a klase na trabaho. Natulongan itayo na Biblia ya manpili na desente tan matuan trabaho ya makapaliket ed Dios, tan napaliisan tayo ray trabahon agmakapaliket ed sikato. (Proverbio 2:6) No mandedesisyon tayo nipaakar ed trabaho, walay duaran importantin tepet ya nepeg tayon ikonsidera.

¹⁵ Kasin diad sayan trabaho et walay nagawaan kon kontra ed ibabaga na Biblia? Ibabaga na Biblia ya mauges so mantakew, mantila, tan manggaway imahen. (Exodo 20:4; Gawa 15:29; Efeso 4:28; Apocalipsis 21:8) Agtayo aawaten sirin so antokaman ya trabahon makapanggawa tayo na ontan iran bengatla. No inaro tayoy Jehova, agtayon balot labay iray trabahon kontra ed saray ganggan to.​—Basaen so 1 Juan 5:3.

 ¹⁶ No awaten ko iyan trabaho, kasin magmaliw ak met lan kasabwat odino promotor na mauges iran kagagawa? Niay sakey ya alimbawa. Aliwan mauges so pantrabaho bilang receptionist. Panon to balet no opresian so sakey a Kristiano na ontan a trabaho diad clinic parad aborsion? Nayarin sikatoy agmet kaiban mismo ed proseso na aborsion. Anggaman ontan, no mantrabaho ed satan ya clinic, agta susuportaan toy aborsion​—sakey a kagagawan kontra ed ibabaga na  Biblia? (Exodo 21:22-24) Lapud inad-aro tayoy Jehova, agtayo labay so nalanor ed saray kagagawan kontra ed panlabayan to.

17. (a) Anto ni ray nepeg tayon ikonsidera no mandedesisyon tayo nipaakar ed trabaho? (Nengnengen so kahon ya “ Awaten Ko Kasi Iyan Trabaho?”) (b) Panon itayon natulongan na konsiensia tayo pian makapanggawa tayoy desisyon ya makapaliket ed Dios?

¹⁷ Dakel nin tepet nipaakar ed trabaho so naebatan no aralen a maong so duaran tepet ya walad parapo 15 tan 16. Likud ed satan, wala ni ray nepeg tayon ikonsidera no mandedesisyon tayo no kasin awaten tayo so sakey a trabaho odino andi. a Agtayo iilaloan ya mangiter so matoor ya aripen na saray ganggan parad amin a situasyon. Dia tayo  nepeg ya usaren so pakatebek tayo. Singa inaral tayod Kapitulo 2, kaukolan tayon ibangat tan ipasal so konsiensia tayo diad pangiyaplika ed saray prinsipyo na Biblia diad inagew-agew. ‘No usaren tayoy pakayari tayon manebek,’ nipasal so konsiensia tayo pian makapanggawa tayoy desisyon ya makapaliket ed Dios tan mansiansia tayod panangaro to.​—Hebreo 5:14.

18. Akin ya aliwan mainomay so mansiansian balanse ed espiritual?

¹⁸ Diad sayan “kaunoran iran agew” ya “mapeligro tan mair-irap [so] panaon,” aliwan mainomay so mansiansian balanse ed espiritual. (2 Timoteo 3:1) Mair-irap so makaalmoy trabaho tan mansiansia ed trabaho. Bilang tuan Kristiano, amta tayon kaukolan tayoy mankuli pian nalegpet tayoy pamilya tayo. Balet ompan lapud dakel so papagawa na amo tayo odino magmamaliw tayo lan materyalistiko et napaulyan tayo lay panaglingkor tayo ed Dios. (1 Timoteo 6:9, 10) Aralen tayo sirin no panon itayon mansiansian balanse pian naseguro tayo ‘no anto ray mas importante.’​—Filipos 1:10.

19. Akin ya manepeg labat a manmatalek tayod si Jehova, tan antoy napaliisan tayo no manmatalek tayo ed sikato?

¹⁹ Manmatalek ed si Jehova. (Basaen so Proverbio 3:5, 6.) Agta manepeg labat ya manmatalek tayod Dios? Lalo la ta amta tayon iyaansakit to tayo. (1 Pedro 5:7) Mas amta to no antoy kaukolan tayo, tan aliwan antikey so lima to. (Salmo 37:25) Maabig sirin no unoren tayo iyan simbawa na Biblia: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo. Ta inkuan na Dios: ‘Agta kan balot taynanan, tan agta kan balot paulyanan.’” (Hebreo 13:5) Apruebaan la na dakel ya walad full-time ya sarag na Dios ya iter so pankaukolan  da. No talagan manmatalek tayod si Jehova ya asikasoen to tayo, agtayo masyadon mapaga ed panlegpet tayod pamilya tayo. (Mateo 6:25-32) Agtayo sirin aabuloyan ya lapud trabaho et napaulyan tayoy espiritual iran aktibidad, singa say pampulong tan piaral.​—Mateo 24:14; Hebreo 10:24, 25.

20. Antoy tutukoyen na akasentron mata, tan panon tayon napansiansia ya akasentro so mata tayo?

 ²⁰ Pansiansiaen ya akasentro so matam. (Basaen so Mateo 6:22, 23.) Say akasentron mata et ontutukoy ed bilay ya aliwan komplikado. Say mata na Kristiano et saksakey so akasentroan to​—say panggawa ed panlabayan na Dios. No akasentro sirin so mata tayo, agtayo iyupot so panaon tayo ed pananap na trabahon baleg so sueldo tan agtayo aambisyonen so maluhon bilay. Agtayo met natutukson mangaliw na sankabaloan tan sankarakepan iran gamit anggano ibabaga na saray advertisement ya kaukolan tayo kuno iratan pian magmaliw tayon maliket. Panon mon napansiansia ya akasentro so matam? Paliisan moy onutang. Agmo gagawaen ya komplikado so bilay mo lapud saray gamit ya manguupot na panaon tan atension. Unor moy simbawa na Biblia ya mankontento la “no walay naakan tan kawes.” (1 Timoteo 6:8) Pasimplim so bilay mo anggad posible.

21. Akin ya nepeg ya walay iprayuridad tayo, tan antoy nepeg ya manunaan ed bilay tayo?

²¹ Iprayuridad iray espiritual a bengatla, tan desididon gawaen iratan. Lapud limitado so panaon tan biskeg tayo, nepeg ya walay iprayuridad tayo. Ta no andi et ompan naupot so panaon tayo ed saray agmasyadon importante, tan agtayo la balet nagawaan iray mas importante. Antoy nepeg ya sankaimportantian ed bilay tayo? Dakel a totoo so manisia ya importante so pangalay atagey ya edukasyon pian makalmo ra kunoy marakep a trabaho. Balet binilin nen Jesus iray papatumbok to ya “itultuloy . . . ya anapen nin unona so Panarian.” (Mateo 6:33) On, nepeg ya say Panarian na Dios so manunaan ed bilay na saray tuan Kristiano. Nepeg ya nanengneng ed saray desisyon, plano, tan gagawaen tayo ya mas importante ed sikatayo so Panarian tan say panlabayan na Dios nen say materyal tan trabaho.

22, 23. (a) Antoy manunan kimey na saray tuan Kristiano, tan panon tayon nipanengneng ya importante ed sikatayo itan? (Nengnengen so kahon ya “ Lapud Desisyon Ko, Maliket Tan Kontento Ak.”) (b) Antoy determinasyon mon gawaen nipaakar ed trabaho?

²² Lapud amta tayon manbibilay tayo lad panaon na anggaan, akapokus tayod manunan kimey tayo​—say pampulong tan pambangat. (Mateo 24:14; 28:19, 20) Si Jesus so aaligen tayo, kanian makulikuli tayo ed sayan kimey ya makapangisalbay bilay. Panon tayon nipanengneng ya importante ed sikatayo iyan kimey? Dakel ed saray lingkor na Dios so manguusar ed panaon tan biskeg da diad impapuson pampupulong da bilang manangipalapag. Nanggaway paraan so arum pian makapanlingkor ira bilang payunir o misionero. Atalosan na dakel ya ateng ya importante so pangiyuna ed espiritual kanian pinaseseg da ray ananak dan onloob ed full-time a panaglingkor. Kasin naliliketan iray maseseg a mangipupulong ed Panarian diad pansasagpot da ed satan ya kimey? On! No usaren moy interon bilay mo diad panlingkor ed si Jehova, seguradon maliket tan kontento ka, tan nabendisyonan ka.​—Basaen so Proverbio 10:22.

²³ Dakel ed sikatayo so kaukolan ya mantrabaho na dakel ya oras pian nalegpet tayoy pamilya tayo. Tandaan ya labay nen Jehova ya naliketan tayod pansasagpot tayo. No say ugali tan gagawaen tayo et unong ed kanonotan tan prinsipyo to, naliketan tayod trabaho tayo. Balet, nepeg ya agtayon balot aabuloyan ya lapud trabaho et napaulyan tayoy manunan kimey​—say pangipulong ed maong a balita na Panarian na Dios. No satan so manuna ed bilay tayo, ipapanengneng tayon inad-aro tayoy Jehova tan labay tayoy mansiansia ed panangaro to.