1, 2. Anton tepet so aralen tayo, tan akin?

 WALA ta lay asawam? No wala la, kasin maliket so ulopan yo, odino dakel so problema yo? Kasin ombebetel lay aroan yo? Kasin aanosan yo labat so sakey tan sakey? No ontan situasyon yo, seguradon maermen kayon dua ta aliwa lan singa dati so petang na aroan yo. Bilang Kristiano ya mangaaro ed Dios, labay mon say ulopan yon sanasawa et mangiter na dayew ed si Jehova. Kanian nayarin naaaburido ka tan singa bebetagen so pusom lapud situasyon yon sanasawa natan. Anggaman ontan, agmo komon iisipen ya agla manguman so situasyon yo.

² Wala ray Kristianon sanasawa ya dati et manaanosan labat ira tan ag-ira maliket ed ulopan da. Balet inaral da no panon dan paeleten so relasyon da. Wala met so nagawaan mo pian magmaliw ya maliket so ulopan yon sanasawa. Anto iratan?

3, 4. Akin ya mas onasingger so liknaan na sanasawa ed sakey tan sakey no pampelengan day onasingger ed Dios? Mangiter na ilustrasyon.

³ Mas onasingger so liknaan yon sanasawa no pansagpotan yon dua so onasingger ed Dios. Akin? Nengnengen tayo yan ilustrasyon: Imadyin mo pan onkakalab ed palandey so sakey a laki tan sakey a bii. Wala rad biek tan biek.  Nen wala ni rad bandad leksab, arawi ni distansia ra ed sakey tan sakey. Balet legan iran manasingger ed toktok, manasingger met so distansia ra. Antoy naaralan mo ed sayan ilustrasyon?

⁴ Say pansasagpot mon manlingkor ed si Jehova ed anggaay nayarian mo et nikompara ed sagpot ya onkalab ed palandey. Lapud inad-arom si Jehova, nibagan mansasagpot ka lan onkalab. Balet no sikayon sanasawa et arawi liknaan yo ed sakey tan sakey, singa kayo onkakalab ed biek tan biek na palandey. Balet antoy resulta no itultuloy yoy onkalab? Siempre, diad gapo et arawi so distansia yo. Balet no ituloy yoy onkalab, agmanbayag et nabawasan lay distansia ed baetan yo. Ontan met ed iyasingger ed Dios. No itultuloy yon sanasawa  so onasingger ed sikato, onasingger met so liknaan yo ed sakey tan sakey. On, no labay yon onelet so relasyon yon sanasawa, nepeg ya onasingger kayo ed Dios. Balet panon yon nagawaan itan?

5. (a) Antoy sakey a paraan pian say sanasawa et mas onasingger irad si Jehova tan ed sakey tan sakey? (b) Antoy pakanengneng nen Jehova ed panangasawa?

⁵ Pian nagawaan yo itan, nepeg yon unoren so bilin na Biblia parad saray sanasawa. (Salmo 25:4; Isaias 48:17, 18) Aralen tayo sirin so espisipikon bilin ya insulat nen apostol Pablo. Imbaga to: “Komon ta say panangasawa et galangen na amin a totoo.” (Hebreo 13:4) Antoy labay ya ibaga na satan? No imbagan say sakey a bengatla et nepeg a “galangen,” labay ton ibaga et importante tan mabmabli itan. Ontan so pakanengneng nen Jehova ed panangasawa​—importante tan mabmabli itan ed sikato.

6. Antoy idadanet na samay konteksto na simbawa nen Pablo ed panangasawa, tan akin ya importantin tandaan tayo itan?

⁶ Siempre, no pareho kayon manlilingkor ed Dios, amta yon say panangasawa et mabmabli tan sagrado. Si Jehova ya mismo so angiletneg ed uksoyan na panangasawa. (Basaen so Mateo 19:4-6.) Balet no walay problema yon sanasawa, nayarin agkayo napakiwas ya ipapanengneng so panangaro tan respeto ed sakey tan sakey anggano amta yon sagrado so panangasawa. Anto sirin so mamakiwas ed sikayo? No imanoen tayo imay imbaga nen Pablo, agto labat imbaga ya “mapagalang so panangasawa,” noagta isisimbawa to ya “komon ta say panangasawa et galangen na amin a totoo.” a  No tandaan mo yan punto, mas napakiwas kan pablien tan aroen so asawam. Akin ey?

7. (a) Anto ran ganggan ed Biblia so uunoren tayo, tan akin? (b) Antoy maabig a resulta no unoren tayoy Dios?

⁷ Isip mo pa no panon kaimportante ed sika iray arum ya ganggan ed Biblia, singa say ganggan ya manpulong tan manbangat odino say ganggan ya mantitipon pian mandayew. (Mateo 28:19; Hebreo 10:24, 25) Tua ya no maminsan et aliwan mainomay ya unoren iratan ya ganggan. Nayarin ag-ondengel iray pupulongan mo, odino makapakesaw so trabahom kanian nanairapan kan miaral. Anggaman ontan, manpupulong tan mimiaral ka nin siansia. Anggapoy makapanpatunda ed sika ya gawaen iratan, anggan si Satanas! Akin ey? On ta inad-arom si Jehova. (1 Juan 5:3) Antoy maabig a resulta? Maliket ka tan mareen so nonot mo lapud antam ya gagawaen moy panlabayan na Dios. Kanian lalon ombibiskeg so determinasyon mo. (Nehemias 8:10) Antoy naaralan tayo ed satan?

8, 9. (a) Antoy mamakiwas ed sikatayon pagalangan so uksoyan na panangasawa, tan akin? (b) Anton duaran punto so aralen tayo?

⁸ Say panangarom ed Dios so mamapakiwas ed sikan unoren so ganggan ya manpulong tan miaral anggano aliwan mainomay. Atan met ya panangaro so mamakiwas ed sika ya unoren so simbawa na Biblia ya “komon ta say panangasawa et galangen,” anggano singa mairap itan ya gawaen. (Hebreo 13:4; Salmo 18:29; Eclesiastes 5:4) Sakey ni, antam ya bebendisyonan nen Jehova so sagpot mon miaral tan manpulong, kanian nailaloan mo ya bendisyonan to met so sagpot mon pagalangan so uksoyan na panangasawa.​—1 Tesalonica 1:3; Hebreo 6:10.

⁹ Anto sirin so gawaen mo pian napagalangan moy uksoyan na panangasawa? Nepeg mon paliisan iray ugali tan kagagawa ya maneral ed relasyon yon sanasawa. Tan nepeg ya manggawa kay paraan pian onelet so aroan yo.

10, 11. (a) Anton ugali so agmamapagalang ed panangasawa? (b) Antoy nepeg mon itepet ed asawam?

¹⁰ Oniay imbaga na sakey ya Kristianon asawan bii: “Ipipikasik ed si Aman Jehova ya tulongan to ak ya makapan-anos.” Antoy aanosan to? Imbaga to: “Ansakit so panagsalita nen asawak. Tua ya agto ak bubugbogen, balet susugatan toy pusok ta naynay ton ibabaga ed siak ya ‘Pabelat ka labat!’ tan ‘Anggapoy kuentam!’” Grabe so problema na sayan asawan bii​—say ansakit ya panagsalita na asawa to.

¹¹ Talagan makapaermen no ansakit so panagsalita na Kristianon sanasawa, ya lapud satan et nasusugatan day liknaan na sakey tan sakey. Mairap itan ya tambalen! No ontan so gagawaen da, agda papagalangan so uksoyan na panangasawa. Sikayon sanasawa ey? Maabig no tepetan moy asawam, “Kasin wala ray nibabagak ed sika ya nasasakitan ka?” No ibaga na asawam ya mabetbet mon nasasakitan lapud panagsalitam, nepeg ya akaparaan kan manguman pian ondakep so ulopan yo.​—Galacia 5:15; basaen so Efeso 4:31.

12. Panon a magmaliw ya andi-kakanaan so panaglingkor tayo ed Dios?

¹² Tandaan ya say paraan na pitotongtong mo ed asawam et walay epekto tod relasyon mo ed si Jehova. Oniay ibabaga na Biblia: “No iisipen na siopaman a too a sikatoy mandadayew ed Dios balet agto kokontrolen so dila to, papalikdoen toy puso to, tan say panagdayew to et andi-kakanaan.” (Santiago 1:26) Agmo iisipen ya anggapoy epekto na panagsalitam diad panagdayew mo ed Dios. Ag-ibabaga na Biblia ya say nagagawa ed abung et agla tanton importante basta manlilingkor ka ed Dios. Agmo lolokoen so sarilim. Seryoso iyan bengatla. (Basaen so 1 Pedro 3:7.) Nayarin maabilidad tan  maseseg ka, balet no sasakitan moy asawam lapud panagsalitam, agmo napapagalangan so uksoyan na panangasawa tan diad pakanengneng na Dios et andi-kakanaan so panaglingkor mo.

13. Panon a nayarin nasakitan na sakey a Kristiano so liknaan na asawa to?

¹³ Nepeg met ya manalwar so sanasawa pian agda nasakitan so sakey tan sakey diad agdirektan paraan. Imanoen so duaran alimbawa: Naynay ya ontatawag so sakey ya single mother ed kakongregasyon ton brother ya wala lay asawa to pian onkerew na simbawa, tan mabayag iran mantongtong ed telepono; saniban lanang ed panagpulong so sakey a single a brother tan sakey a sister ya wala lay asawa to. Diad sarayan alimbawa et ompan anggapo met so mauges ya intension na saramay walaan na asawa; balet, anto kasi epekto na gagawaen da ed kaasawaan da? Oniay imbaga na sakey ya asawan bii: “Nasasakitan ak no nanenengneng ko ya sobsobra lay panaon tan atension ya iiter na asawak ed arum ya sister diad kongregasyon. Pakaliknak et agak la importante ed sikato.”

14. (a) Anton instruksion na Dios so nabasa ed Genesis 2:24? (b) Antoy nepeg tayon itepet ed sarili tayo?

¹⁴ Natural labat ya nasakitan iray asawa ya makakaeksperiensya na onia. Ibabaliwala na asawa da iyan bilin na Dios: “Taynan na laki so ama tan ina to tan iyamong toy asawa to.” Diad lenguahen Hebreo, idadanet na saramay salitan “iyamong toy asawa to” ya say asawan laki et nepeg ya “mansiansia ed” asawa to odino naynay ton kaiba. (Genesis 2:24, paimano ed leksab) Siempre, saramay walaan na asawa et rerespetoen da nin siansia iray ateng da. Balet labay na Dios ya say prayuridad da et say pankaukolan na asawa ra. Ontan met ed kongregasyon, inad-aro tayo ray agagi balet say prayuridad tayo nin siansia et say pankaukolan na asawa tayo. Kanian  no say sakey a Kristiano a walaan na asawa et masyadon pamilyar odino sobra lay panaon ya iiter tod saray agagi, lalo lad saramay agto kaparay sekso, iiyan tod peligro so relasyon dan sanasawa. Kasin atan so rason no akin ya naproproblema kayon sanasawa? Tepetan moy sarilim, ‘Kasin iiter kod asawak so panaon, atension, tan panangaro ya para labat ed sikato?’

15. Unong ed Mateo 5:28, akin ya saray Kristianon walaan na asawa et agnepeg ya mangipanengneng na sobran atension ed agda asawa?

 ¹⁵ Ontan met, no say sakey ya Kristiano et sobra lay atension ya iiter to ed agto asawa, ipepeligro toy sarili to. Makapaermen ta wala ray Kristiano ya awalaan na romantikon liknaan ed arum ya indibidual lapud masyado la ran pamilyar ed sakey tan sakey. (Mateo 5:28) Kanian akagawa iray kasalanan ya lalon agmamagalang ed panangasawa. Imanoen so imbaga nen Pablo nipaakar ed saya.

16. Anton ganggan so insulat nen Pablo nipaakar ed panangasawa?

¹⁶ Nen insulat nen Pablo imay simbawa ya “komon ta say panangasawa et galangen,” inyarum to: “Ag-itan komon narutakan, ta ukomen na Dios iray manggagawa na seksual ya imoralidad tan mikakalugoran.” (Hebreo 13:4) Say seksual ya relasyon et para labat ed sanasawa. Kanian nepeg ya unoren na saray Kristiano iyan ibabaga na Biblia: “Manliket ka komon ed bii ya asawam ed inkaugaw mo.”​—Proverbio 5:18.

17. (a) Akin ya agmanpapaimpluensya iray Kristiano ed opinyon na dakel a totoo nipaakar ed pikakalugoran? (b) Panon tayon naalig si Job?

¹⁷ Saramay misesekso ed agda asawa et anggapon balot so respeto dad saray ganggan na Dios. Iisipen na dakel a totoo natan ya normal labat so mikalugoran. Balet, anggan antoy opinyon na arum a too, nepeg ya agpaimpluensyaan iray Kristiano. Amta ra ya “ukomen na Dios iray manggagawa na seksual ya imoralidad tan mikakalugoran.” (Hebreo 10:31; 12:29) Kanian say uunoren na saray tuan Kristiano et say estandarte na Dios. (Basaen so Roma 12:9.) Nonoten iyan imbaga nen Job: “Akisipanan ak la ed matak.”  (Job 31:1) On, pian agtayo makagawa na bengatlan mansumpal ed pikalugoran, nepeg ya kontrolen tayo so mata tayo tan agtayon balot onnenengneng ya walaan na pilalek ed agtayo asawa.​—Nengnengen so Apendise ed artikulon “No Antoy Ibabaga na Biblia Nipaakar ed Diborsyo tan Pansian.”

18. (a) Parad si Jehova, panon kaseryoso so pikalugoran? (b) Antoy pamparehoan na pikalugoran tan pandayew ed idolo?

¹⁸ Parad si Jehova, panon kaseryoso so pikalugoran? Nanengneng tayo ed Mosaikon Ganggan no antoy nalilikna nen Jehova ed satan. Diad Israel nensaman, patey so dusa ed saramay akikalugoran tan ed saray mandadayew ed idolo. (Levitico 20:2, 10) Antoy pamparehoan na pikalugoran tan pandayew ed idolo? No nandayew ed idolo so sakey ya Israelita, agto tinoor so sipan to ed si Jehova. Mipadpara, no akikalugoran so sakey ya Israelita, agto tinoor so sipan to ed asawa to. Pareho ran traidor. (Exodo 19:5, 6; Deuteronomio 5:9; basaen so Malaquias 2:14.) Kanian pareho iran dusaen nen Jehova, say Dios ya matoor tan napanmatalkan.​—Salmo 33:4.

19. Antoy nayarin mamabiskeg ed determinasyon tayon agbalot mikalugoran, tan akin?

¹⁹ Siempre, aliwa lan Mosaikon Ganggan so tutumboken na saray Kristiano natan. Balet no tandaan tayo a diad Israel nensaman et ambelat a kasalanan so pikakalugoran, mas determinado tayon ag-itan gawaen. Akin? Nonot mo pa yan situasyon: Kasin labay moy onloob ed simbaan, ontalimukor ed arap na imahen, insan ka manpikasi? ‘Agkon balot itan gawaen!’ so kuan mo lagi. Balet panon to no ikdan da kay baleg ya kuarta no gawaen mo itan? ‘Anggano ni!’ so ibagam. On, aglabay na saray tuan Kristiano ya traidoren day Jehova diad pandayew dad imahen. Tan agda met labay ya traidoren si Jehova tan say asawa ra diad pikalugoran da anggan anto ni kasalat na satan. (Salmo 51:1, 4; Colosas 3:5) Agtayo labay  so manggawa na anggan sakey ya bengatlan mamaliket ed si Satanas balet ta agmamagalang ed si Jehova tan ed sagradon uksoyan na panangasawa.

20. Antoy agawa ed relasyon na arum a sanasawa? Mangiter na ilustrasyon.

²⁰ Anto ni nagawaan mo pian nipawil moy respetom ed asawam? Pian naebatan itan, ikompara tayo so panangasawa ed sakey ya abung. Tan ikompara tayo ray dekorasyon ya mamaparakep ed satan ya abung ed saray maabig ya salita, balibalin ugali, tan saray balikas na panangaro yon sanasawa. No maapit so liknaan yo ed sakey tan sakey, say ulopan yo et singa abung ya mararakep so dekorasyon to, kanian balibalin nengnengen tan mabilabilay. Balet no ombebetel lay aroan yo, daiset-daiset ya naeekal iratan ya dekorasyon, kanian say ulopan yo et singa la abung ya maer-ermen a nengnengen ta anggapo lay dekorasyon to. No talagan labay yon unoren so ganggan na Dios ya ‘pagalangan so panangasawa,’ gawa yoy anggaay nayarian yon ayosen so ulopan yo. Mabmabli so relasyon yon sanasawa kanian nabawbawi yoy sagpot yo no ayosen yo itan. Antoy gawaen yo? Oniay ibabaga na Biblia: “Diad panamegley na karunongan et nipapaalagey so abung, tan diad panamegley na pakatebek et magmamaliw itan a malet. Diad panamegley na kakabatan et napapano iray kuarto to na amin a klase na mabli tan makapaliket iran kayamanan.” (Proverbio 24:3, 4) Amtaen tayo no panon tayo itan ya niyaplika ed panangasawa.

21. Antoy gawaen yo pian onelet lamet so relasyon yon sanasawa? (Nengnengen met so kahon ya “ Panon Kon Napaelet so Ulopan Min Sanasawa?”)

²¹ Kaiba ed saray mabmablin kayamanan ya mamaliket ed ulopan na sanasawa et say tuan panangaro, takot ed Dios, tan mabiskeg a pananisia. (Proverbio 15:16, 17;  1 Pedro 1:7) Paeleten na saratan so relasyon na sanasawa. Balet kasin naimano yo ed samay walad Proverbio 24:3, 4 no panon ya napapano iray kuarto na mabmabli iran kayamanan? “Diad panamegley na kakabatan.” On, no iyaplika yoy kakabatan ya walad Biblia, walay pakayari na satan ya umanen so kanonotan yo tan mamakiwas ed sikayon ipawil so petang na panangaro yo ed sakey tan sakey. (Roma 12:2; Filipos 1:9) Kanian no saniba yon pantongtongan tan aralen so ibabaga na Biblia, singa say pambasa yo ed inagew-agew a teksto odino saray artikulo ed Panag-bantayan tan Onliing! nipaakar ed bilay na sanasawa, singa yo pantotongtongan so dekorasyon ya mamarakep ed abung yo. No lapud panangaro yo ed si Jehova et iyaplika yoy simbawan naaralan yo, singa yo iloloob itan ya dekorasyon diad saray kuarto na abung yo. Kanian magmaliw lamet ya maligsa tan mabilabilay so ulopan yon sanasawa.

22. Antoy naliknam no gawaen moy anggaay nayarian mo ya paeleten so relasyon yon sanasawa?

²² Siempre, kaukolan so panaon tan sagpot pian kalkalnan nipawil iratan ya dekorasyon. Balet no gawaen moy anggaay nayarian mo ya mitulongan, naliknam so liket ta antam ya uunoren mo iyan ganggan: “Idaulo yo so pangipanengneng na galang ed sakey tan sakey.” (Roma 12:10; Salmo 147:11) Manuna ed amin, say pansasagpot mon pagalangan so uksoyan na panangasawa et ontulong ed sikan mansiansia ed panangaro na Dios.