“Managbangat kayo.” (Heb. 5:12) Nonot yo pa iya: Inikdan itayo nen Jehova, say sankarunongan ya Managbangat ed interon uniberso, na pribilehyo ya ibangat so arum nipaakar ed sikato! Antokaman so asainmin tayo ya pangibangat ed katuaan nipaakar ed si Jehova​—diad pamilya, kongregasyon, odino diad ministeryo—​et mabmablin pribilehyo tan ambelat ya responsabilidad. Panon tayon nagawaan itan?

Say ebat et naromog ed samay insulat nen apostol Pablo ed si Timoteo: “Itultuloy moy manseet ed panagbasa diad publiko, ed panamilin, tan ed panagbangat.” Inyarum ni nen Pablo: “Diad panggawam ed saya et niliktar moy sarilim tan saramay ondedengel ed sika.” (1 Tim. 4:13, 16) Makapangiliktar na bilay so mensahe ya ipaamta tayo. Kanian importante ya pankimeyan tayon paaligwasen so panagbasa tan panagbangat tayo. Adesinyo iyan brosyur ya ontulong ed sikatayon nagawaan itan. Nia ray pigaran feature na sayan brosyur:

Si Jehova so “Makapadinayew a Managbangat.” (Isa. 30:20) Tua ya natulongan itayo na sayan brosyur ya napaaligwas so abilidad tayon manbasa tan manbangat, balet agtayo lilingwanan ya si Jehova so Lapuan na mensahe tayo tan sikato so mangiyaasingger ed saray totoo. (Juan 6:44) Kanian lanang yon kerewen ed pikakasi so masanton espiritu. Usar yon naynay so Salita to. Ipaarap yoy imano ed si Jehova, aliwan diad sarili yo. Tulongan yo ray ondedengel ed sikayo ya nawalaan na aralem a panangarod sikato.

Walaan kayo na pribilehyo ya ibangat so sankaimportantian ya mensahe ya niiter ed saray totoo. Matalek kami ya no mandepende kayo “ed biskeg ya iiter na Dios,” nagawaan yo itan.​—1 Ped. 4:11.

Saray kapara yon managbangat,

Mananguley ya Ulop na Saray Tasi nen Jehova