AMINSAN et intepet na Sankamaongan a Managbangat so makasurprisan tepet. ‘Siopa so inak tan siopara so agagik?’ (Mateo 12:48) Kasin naebatan mo itan a tepet?— Nayarin antam a say ina nen Jesus so manngaran na Maria. Balet kasin antam so kangaranan na agagi to?— Kasin walaray agagi to met a bibii?—

Ibabaga na Biblia a saray agagi nen Jesus so manngaran na “Santiago tan Jose tan Simon tan Judas.” Tan awalaan na agagin bibii si Jesus a mabilay sanen sikatoy manpupulong. Lapud si Jesus et panguloan, sarayan amin so yugtan to.—Mateo 13:55, 56; Lucas 1:34, 35.

Kasin saray agagi nen Jesus et babangatan to met?— Ibabaga na Biblia a diad inmuna et sikaray ‘ag-anisia ed sikato.’ (Juan 7:5) Balet, diad saginonor, si Santiago tan Judas so nagmaliw a babangatan to, tan angisulat ira ni ingen na saray libro ed Biblia. Antam no dinan iray libro ya insulat da?— On, Santiago tan Judas.

Anggaman saray agagin bibii nen Jesus so ag-abitla ed Biblia, amta tayon walay agagi to ya ag-onkulang ed duara. Balet, nayarin onsulok ni. Kasin sarayan agagi ton bibii et nagmaliw a papatumbok to?— Ag-ibabaga na Biblia, kanian agtayo amta. Balet antam ta no akin ya intepet nen Jesus a, ‘Siopa so inak, tan siopara so agagik?’— Amtaen ta.

Ibabangat nen Jesus iray babangatan to sanen walay sinmalet ed sikato ya angikuan: “Si inam tan saray agim wala’ra ed paway, ya anapen day pakapisalita ed sika.” Kanian inanamot nen Jesus so pankanawnawa pian ibangat so importantin leksion diad impangitepet to  na makasurprisan tepet a: ‘Siopa so inak, tan siopara so agagik?’ Inturo toray babangatan to tan inebatan to itan, a kuanto: “Niraya, so inak tan saray agik!”

Insan impaliwawa nen Jesus so labay ton ibaga, a kuanto: “Siopaman a manggawa na linawa nen Amak a walad tawen sikato so agik a laki, tan agik a bii, tan inak.” (Mateo 12:47-50) Ipapanengneng na saya no panon kaapit si Jesus ed saray babangatan to. Ibabangat to ed sikatayo a saray babangatan to et singa ira peteg ya agagi to, tan kainaan to.

Diad saman et agpanisiaan na saray mismon agagi nen Jesus—si Santiago, Jose, Simon, tan Judas—a si Jesus et Anak na Dios. Agda panisiaan so imbaga na anghel Gabriel ed ina ra. (Lucas 1:30-33) Kanian sikaray nayarin agmapangasi ed si Jesus. Siopaman ya onkiwas a singa ontan et aliwan peteg ya agi. Wala ta so kabat mo ya aliwan mapangasi ed agi to?—

 Ibabaga na Biblia so nipaakar ed si Esau tan Jacob tan no panon a si Esau et sinmanok a maong ya inkuan to: “Pateyen koy agik a Jacob.” Say ina ra, si Rebeca, so tinmakot a maong kanian pinaarawi toy Jacob ta pian agnapatey nen Esau. (Genesis 27:41-46) Balet, kalabas na dakel a taon et anguman si Esau, tan nilakap tan inangoban toy Jacob.—Genesis 33:4.

Asabi panaon, awalaan na 12 ananak si Jacob. Balet ag-inaro na saray panguloan ya ananak nen Jacob so yugtan ya agi ra a si Jose. Sikatoy panimonan da lapud sikatoy paboriton anak na ama ra. Kanian sikatoy inlako da ed saray managsaliw na aripen a paonla ed Ehipto. Insan inkuan da ed ama ra a pinatey na atap ya ayep si Jose. (Genesis 37:23-36) Agta makapakebbiew itan?—

Diad inlabas na panaon et maermen iray agagi nen Jose ed ginawa ra. Kanian sikaray pinerdona nen Jose. Agta kaparpara nen Jose si Jesus?— Saray mismon apostol nen Jesus so binmatik sanen sikatoy inerel da, tan ag-inamin ni ingen nen Pedro  a sikatoy kabat to. Ingen, singa si Jose, sikaran amin so pinerdona nen Jesus.

Insan wadtan so duaran sanagi a si Cain tan Abel. Makaaral ta na sakey a leksion manlapud sikara met. Anengneng na Dios ed puso nen Cain ya agton talaga inaro so agi to. Kanian imbaga na Dios ed si Cain a kaukolan ton umanen so ugali to. No talagan inaro nen Cain so Dios, sikatoy dinmengel komon. Balet ta agto inaro so Dios. Sakey ya agew inkuan nen Cain ed si Abel: “Onla ta ed uma.” Akila si Abel ed si Cain. Sanen bukbukor dan dua ed uma, pinekpek nen Cain so agi to tan inatey.—Genesis 4:2-8, NW.

Ibabaga na Biblia ed sikatayo a wala so nikaduman leksion a naaralan tayo manlapud satan. Antam no anto itan?— ‘Saya so mensahe a nadngel mo ed gapo: Nepeg a manaaroan itayo; aliwan singa si Cain, a nanlapu ed mauges a sakey.’ Kanian saray sanaagi so nepeg a manaaroan. Nepeg ya agda aligen si Cain.—1 Juan 3:11, 12.

Akin a makapuy so magmaliw a singa si Cain?— Lapud ibabaga na Biblia a sikatoy ‘nanlapud mauges a sakey,’ si Satanas a Diablo. Lapud kinmiwas si Cain a singa Diablo, ompatnag a singa say Diablo so ama to.

Natalosan mo ta no akin ya importante so pangaro ed agagim?— No agmo ra aroen, siopan ananak so aaligen mo?— Ananak na Diablo. Agta agmo labay so magmaliw a singa ontan?— Kanian panon mon napaneknekan a labay moy magmaliw ya anak na Dios?— Diad tudtuan pangaro ed agagim.

Balet anto so aro?— Say aro et aralem a liknaan a walad sikatayo a mamakiwas ed sikatayon malabay a manggawa na maong iran bengatla parad arum a totoo. Ipapanengneng tayo ya inaro tayo so arum sano walaan itayo na panamabli ed sikara tan sano manggawa tayo na  maong iran bengatla parad sikara. Tan siopara so agagi tayo a nepeg tayon aroen?— Tandaan, imbangat nen Jesus a sikaramay manutugyop ed baleg a Kristianon pamilya.

Agaylan importante ya aroen tayo irayan Kristianon agagi?— Ibabaga na Biblia: “Say agmangaro ed agi to, anta anengneng to, agto nayarian ya aroen so Dios ya agto anengneng.” (1 Juan 4:20) Kanian agtayo naaro so pigara labat ed Kristianon pamilya. Nepeg tayon aroen iran amin. Inkuan nen Jesus: “Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.” (Juan 13:35) Kasin aaroen moy amin ya agagim?— Tandaan, no agmo ira aaroen, agmo talaga naaro so Dios.

Panon tayon nipanengneng a talagan aaroen tayoray agagi tayo?— Onia’ay, no aroen tayo ira, agtayo ira arawian lapud ta agtayo labay so mitongtong ed sikara. Kaukolan a makaaro tayo ed amin da. Naynay tayon gawaen so maong ed sikara tan mabulos a manginabang ed sikara. Tan no bilang et walay problema ra, tulongan tayo ira lapud sikatayoy tudtuan baleg a pamilya.

No talagan inaro tayoray amin ya agagi tayo, antoy papaneknekan na satan?— Papaneknekan na satan a babangatan itayo nen Jesus, say Sankamaongan a Managbangat. Tan agta ontan so labay tayo?—