Diad templo nen Lunes, Nisan 10, ibabaga nen Jesus so asingger lan ipatey to. Lapud mapaga ya naapektoay reputasyon na Dios, imbaga to: “Ama, igloriam so ngaran mo.” Walay inmebat ya maksil a boses a nanlapud tawen: “Inggloriak itan tan igloriak lamet.”​—Juan 12:27, 28.

Aguloan iray totoo. Iisipen na arum ya kinmarol. Say arum balet et inkuan da: “Walay anghel ya akitongtong ed sikato.” (Juan 12:29) Balet diad tua si Jehova so arengel dan nansalita! Aliwan saya so sankaunaan ya arengel so boses na Dios ya nansalita nipaakar ed si Jesus.

Talora tan kapalduan taon lay apalabas, diad bautismo nen Jesus, arengel nen Juan Bautista so boses na Dios ya oniay imbaga to nipaakar ed si Jesus: “Saya so Ana’ko, say inad-arok, ya inabobonan ko.” Insan kayari na Paskua nen 32 C.E., anengneng nen Santiago, Juan, tan Pedro ya angumay itsura nen Jesus. Arengel dan talo ya inyabawag na Dios: “Saya so Ana’ko, say inad-arok, ya inabobonan ko. Dengel kayod sikato.” (Mateo 3:17; 17:5) Balet diad sayan komatlon impansalita nen Jehova et dakel so akarengel!

Inkuan nen Jesus: “Nadngel iyan boses, aliwan lapud siak, noagta lapud sikayo.” (Juan 12:30) Prueba itan ya sikaton talaga so Anak na Dios, say insipan ya Mesias.

Sakey ni, say matoor ya impanbilay nen Jesus et maabig ya alimbawa no panon so nepeg ya pambilay na totoo tan paneknek ya say manuuley ed mundo, si Satanas a Diablo et manepeg labat ya pateyen. Imbaga nen Jesus: “Natan et nauukom iyan mundo; tan napataynan so manuley na sayan mundo.” Aliwan inkatalo so ipatey nen Jesus noagta pananalo. Panon? Impaliwawa to: “Balet no niyatagey ak la manlapud dalin, iyasingger kod siak so amin a klase na totoo.” (Juan 12:31, 32) Panamegley na ipatey to, niyasingger nen Jesus so arum ed sikato, tan posiblin nawalaan iray bilay ya andi-anggaan.

Oniay intepet na totoo ed imbaga nen Jesus ya sikatoy “niyatagey”: “Nadngelan mid Ganggan a say Kristo et mansiansiad andi-anggaan. Akin et ibabagam a nepeg a niyatagey so Anak na too? Siopa iyan Anak na too?” (Juan 12:34) Anggano dakel so ebidensya, kaiba lay impakadngel ed mismon boses na Dios, maslak ed sikara et ag-anisian si Jesus so tuan Anak na too, say insipan a Mesias.

Inkompara lamet nen Jesus so sarili to ed “liwawa.” (Juan 8:12; 9:5) Binilin to ray totoo: “Manayam ed sikayo so liwawa diad daiset nin panaon. Manakar kayo legan a walad sikayo so liwawa, pian agkayo nadaeg na kabilungetan . . . Legan a walad sikayo so liwawa, ipatnag yoy pananisia ed liwawa, ta pian magmaliw kayon ananak na liwawa.” (Juan 12:35, 36) Insan inmalis si Jesus lapud aliwan Nisan 10 so agew na ipatey to. Diad Paskua na Nisan 14 et sikatoy “niyatagey”​—nipasak ed poste.​—Galacia 3:13.

No pawilen tayoy ministeryo nen Jesus, malinew ya asumpal so propesiya nen ag-anisia iray Judio ed sikato. Impasakbay nen Isaias ya nabulag iray totoo tan onawet so puso da kanian ag-ira manguman pian onabig ira komon. (Isaias 6:10; Juan 12:40) On, maslak ed saray Judio et agda binidbir so ebidensya ya si Jesus imay insipan ya Manangiliktar, pian nawalaan iray bilay.

Si Nicodemo, Jose na Arimatea, tan dakel nin manuley et ‘manisia’ ed si Jesus. Balet kasin ipanengneng da itan, odino iyamot da ta antakot iran napapaway ed sinagoga odino lapud “inaro ray gloria na totoo”?​—Juan 12:42, 43.

Impaliwawa nen Jesus no antoy kaibad panisia ed sikato: “Siopaman a manisia ed siak, aliwan siak labat so papanisiaan to, noagta saman met so angibaki ed siak; tan siopaman a  makanengneng ed siak et nanenengneng to met imay angibaki ed siak.” Saray katuaan ya ingganggan na Dios ya ibangat nen Jesus tan tuloytuloy to ya ipapaamta et importante, kanian nibaga ton: “Siopaman a mangipulisay ed siak tan agto awaten iray salitak et walay sakey a mangukom ed sikato. Say salita ya imbagak so mangukom ed sikato diad kaunoran ya agew.”​—Juan 12:44, 45, 48.

Diad sampot et oniay imbaga nen Jesus: “Agak nansalita unong ed panlabayan ko, noagta say mismon Ama ya angibaki ed siak so angiter na ganggan no antoy ibagak tan ibangat ko. Tan amtak a say ganggan to et mankabaliksay bilay ya andi-anggaan.” (Juan 12:49, 50) Amta nen Jesus ya agla manbayag et iter toy dala to bilang bagat parad totoo ya manisiad sikato.​—Roma 5:8, 9.