Abigla iray bibii sanen anengneng dan anggapoy karga na lubok. Batik si Maria Magdalena paonlad si “Simon Pedro tan ed samay sakey nin disipulo, a pinabpabli nen Jesus”​—si apostol Juan. (Juan 20:2) Balet, saray arum a bibiin wadman ed lubok et walay anengneng dan anghel. Tan diad loob na lubok et walay sakey nin anghel, ya “akakawes na andukey tan amputi.”​—Marcos 16:5.

Imbagad sikara na samay sakey ya anghel: “Agkayo natatakot, ta amtak ya aanapen yoy Jesus a nipasak ed poste. Anggapo la dia, ta apaoli la, unong ya imbaga to. Gali dia, nengneng yo yay angiparukolan ed sikato. Tan onla kayon tampol a mangibaga ed saray disipulo to a sikatoy apaoli manlapud inaatey, tan sikatoy unona lad Galilea.” (Mateo 28:5-7) Kanian saray bibii, a “manggiwgiw tan mankelkelaw,” et batik pian ibalita iya ed saray disipulo.​—Marcos 16:8.

Diad saman et akasabi lay Maria ed si Pedro tan Juan. Sikatoy maningas ya angibalitad sikara: “Inala ray Katawan diad lubok, tan agmi amta no iner so anginan dad sikato.” (Juan 20:2) Batik si Pedro tan Juan. Mas maples si Juan kanian akaunan sinmabi ed lubok. Tinmakiling ditan tan anengneng to iray abel ya impanbalkot, balet nansiansia ed paway.

Kasabi nen Pedro, sikatoy linmoob a tampol. Anengneng to ray abel a linen tan samay impanbalkot ed ulo nen Jesus. Linmoob met lay Juan, tan anisia la ed samay imbalita nen Maria. Anggano imbaga la nen Jesus iya ed sikara nensaman, agda atalosan a sikatoy apaoli la. (Mateo 16:21) Mankelkelaw ira a sinmempet. Balet si Maria, a pinmawil ed lubok, et nansiansia diman.

Diad saman, saray arum a bibii et paonlad saray disipulo pian ibalita ra ya apaoli lay Jesus. Legan iran ombabatik, inabet ira nen Jesus tan  inkuan to: “Maabig ya agew!” Binembenan da iray sali to tan ‘inggalang da.’ Insan inkuan nen Jesus: “Agkayo natatakot! La kayo, ibaga yod saray agagik pian onla rad Galilea, tan nanengneng da ak diman.”​—Mateo 28:9, 10.

Sanen agawa imay yegyeg tan nampanengneng iray anghel, saray sundalo a mangguaguardia ed lubok et ‘manggiwgiw tan nagmaliw iran singa inatey.’ Nen kinmalma la ra, linma rad syudad tan “imbaga rad saray manunan saserdote so amin ya agawa.” Kanian kinatongtong na saray saserdote iray mamatatken na saray Judio. Nandesisyon ira a bayaran iray sundalo pian isekreto ra so agawa tan ibaga ran: “Nen labi et sinmabi iray disipulo to tan sikatoy tinakew da sanen nanaugip kami.”​—Mateo 28:4, 11, 13.

Saray Romanon sundalo et nayarin ipapatey no sikaray akaugip legay pangguaguardia ra, kanian insipan na saray saserdote: “No narengelan iya na gobernador [salanti, say pantila ra a nanaugip ira], ipaliwawa mid sikatoy agawa, kanian agkayo mapaga.” (Mateo 28:14) Inawat na saray sundalo so bayar tan ginawa ra so imbaga na saray saserdote. Kanian say gawagawa labat ya istoryan tinakew so bangkay nen Jesus et kinmayat ed saray Judio.

Si Maria Magdalena et wadman nin siansiad lubok tan onaakis. Nen tinmakiling ditan, akanengneng na duaran anghel ya akaamputi! Akayurong ira diman ed angiparukolan ed bangkay nen Jesus, sakey diad uloan tan sakey diad salian. Tinepet dad sikato: “Akin et onaakis ka?” Inmebat si Maria: “Inala ray Katawan ko, tan agko amta no iner so anginan dad sikato.” Nen linmingaw si Maria, wala ni sakey ya anengneng to. Tinepet to met ed si Maria imay intepet na saray anghel tan inkuan to ni: “Siopay aanapen mo?” Lapud abaloan to a saman imay hardinero, inkuan tod sikato: “Katawan, no sikatoy inalam, ibagam ed siak no iner so anginan mod sikato, tan alaen ko.”​—Juan 20:13-15.

Diad tua, say katongtong nen Maria et si Jesus ya apaoli la, balet diad saman et agto abidbir. Balet nen inkuan ton, “Maria!” abidbir ton si Jesus iman lapud paraan na pitotongtong tod sikato. Malikeliket si Maria, tan inkuan to: “Rabboni!” (a mankabaliksay “Managbangat!”) Balet lapud inisip nen Maria ya ompan onla lad tawen si Jesus, binembenan to. Kanian imbagad sikato nen Jesus: “Agka ompepeket ed siak, ta agak ni sinmegep ed Ama. Balet la kad saray agagik tan ibagam ed sikaran, ‘Onsegep ak ed kawalaan nen Amak tan Ama yo tan Dios ko tan Dios yo.’”​—Juan 20:16, 17.

Batik si Maria diman ed nantitiponan na saray apostol tan arum ni ran disipulo. Imbaga tod sikara: “Anengneng koy Katawan!” Akaarum ni iya ed samay imbalitad sikara na arum nin bibii. (Juan 20:18) Ingen ta sarayan nadngel da et “impasen dan anggapoy kakanaan.”​—Lucas 24:11.