Kakkasumpal nen Pedro ya nadngel so simbawa nen Jesus no panon ya resolbien so agpantatalosan na saray agagi panamegley na pantongtong a personal. Balet, singa labay nen Pedro ya naamtaan so eksakton bilang na pamerdona to.

Intepet nen Pedro: “Katawan, maminpigak a perdonaen so agik a mankasalanan ed siak? Anggad maminpito?” Ibabangat na arum ya lider na relihyon a nepeg ya mamerdona so sakey anggad mamitlo. Kanian nayarin iisipen nen Pedro ya sobra la no mamerdona ya “anggad maminpito.”​—Mateo 18:21.

Balet, say pambilang na lingo et aliwan unong ed bangat nen Jesus. Kanian impetek toy Pedro: “Ibagak ed sika, aliwan anggad maminpito, noagta, anggad mamin-77.” (Mateo 18:22) Diad arum a salita, anggapoy anggaan to. Agnepeg ya limitaan nen Pedro so karakel na pamerdona tod agi to.

Insan insalaysay nen Jesus ed si Pedro tan ed arum so sakey ya ilustrasyon pian idanet so obligasyon dan mamerdona. Nipaakar iyad sakey ya aripen ya agto inalig so mapangasin katawan to. Labay na ari so mikuentaan ed saray aripen to. Inawit dad sikato so aripen ya balbaleg so utang to, 10,000 talento [60,000,000 denario]. Imposible lan nabayaran toy utang to. Kanian ingganggan na ari ya ilako so aripen, say asawa to, tan saray ananak to pian makabayar. Diad saman et tinmalimukor may aripen ed salian na katawan to tan akikasi: “Anosan mo ak pa ni, ta bayaran ko itan ya amin ed sika.”​—Mateo 18:26.

Akasian na ari so aripen tan agto la impabayaran imay utang to. Kayari na satan, pinmaway itan ya aripen tan aromog toy kapara ton aripen ya akautang ed sikato na 100 a denario. Dinegkem toy kapara ton aripen tan tinikel to, ya inkuan to: “Bayaran mo lay amin ya utang mo.” Balet tinmalimukor so kapara ton aripen ya mikakasi: “Anosan mo ak pa ni, ta bayaran ta kan siansia.” (Mateo 18:28, 29) Balet samay aripen  ya agla impabayaran na ari so utang to et agto inalig so katawan to. Impaipriso toy kapara ton aripen ya dagdaiset so utang to ya anggad makabayar.

Insan imbaga nen Jesus ya nen anengneng na saray kapara ton aripen so andiay panangasin ginawa na saman ya aripen, linma ra tan indalem dad katawan. Kanian impatawag na mamapasnok ya ari tan inkuan to: “Mauges kan aripen, agko la impabayaran so amin ya utang mo sanen akikasi kad siak. Agta nepeg a kinasian mo met komon so kaparam ya aripen, a singa impangasik ed sika?” Impaipriso na ari so agmapangasin aripen anggad nabayaran toy amin ya utang to. Oniay konklusyon nen Jesus: “Ontan met so gawaen ed sikayo na Amak ed tawen no agkayo manpeperdonaan a sanaagi manlapud kapusoan yo.”​—Mateo 18:32-35.

Talagan balibalin leksion so naaralan tayo nipaakar ed panamerdona! Dakel lay kasalanan tayon pinerdona na Dios. Anggano anto ni kasalanan ed sikatayo na agi tayo, melmelag itan no ikomparad kasalanan tayo ya pinerdona la nen Jehova. Tan aliwan aminpinsan so impamerdona nen Jehova ed sikatayo noagta aminlibo la. Agtayo met kasi sarag ya maminpigan perdonaen so agi tayo, anggano walay katunongan tayo? Singa imbangat nen Jesus ed Sermon ed Palandey, say Dios et ‘perdonaen to iray utang tayo, no panon a peperdonaen tayo met iray akautang ed sikatayo.’​—Mateo 6:12.