Manga 17 taon lay apalabas manlapu nen tinepetan nen Jesus iray managbangat ed templo. Diad saman et 12 años to ni labat. Natan et Marso o Abril la na 29 C.E. Pantotongtongan na dakel so nipaakar ed kanayon nen Jesus a si Juan, ya manpupulong ed amin a lugar diad bandad sagur na Ilog Jordan.

Panbiliban day Juan lapud itsura tan panagsalita to. Say kawes to et gawad bagoy kamelyo, tan akabalkes na katat. Say kakanen to et duron tan dilo ed katakelan. Antoy mensahe to? “Magbabawi kayo, ta asingger lay Panarian na tawen.”​—Mateo 3:2.

Say mensahe nen Juan et labalabay na saray akadngel. Atalosan na dakel a kaukolan day magbabawi, labay ton ibaga et kaukolan dan umaney ugali tan kagagawa ra, ya ipulisay day mauges a kabibilay da. Saramay dinmengel ed sikato et nanlapud “Jerusalem tan ed interon Judea tan ed amin a pasen ed kaliberliber na Jordan.” (Mateo 3:5) Dakel ed sikara so nagbabawi. Binautismoan to ra, impalgep to rad danum na Jordan. Akin?

Binautismoan to ray totoo bilang simbolo, odino pakapatnagan na impapuson panagbabawi ra ed saray kasalanan dad Ganggan na Dios. (Gawa 19:4) Balet aliwan amin et kualipikado. Nen linmad sikato iray relihyoson lider, saray Fariseo tan Saduceo, tinawag ira nen Juan ya “ilalak na saray uleg.” Kuan to: “Ipanengneng yo . . . ed saray gawa yo a magbabawi kayo. Agyo ibabagan, ‘Si Abraham so ama mi.’ Ta ibagak ed sikayo a nayarian na Dios so mamawala na ananak parad si Abraham manlapud sarayan bato. Say wasay et wala lad sengeg na saray kiew. Balang kiew sirin ya agmanbubunga na maong et nepeg a batangen tan ibantak ed apoy.”​—Mateo 3:7-10.

Lapud interes ya ipapanengneng na totoo ed si Juan, mabiskeg so mensahe to, tan dakel so babautismoan to, sikatoy tinepetan na saray saserdote tan Levita: “Siopa ka?”

“Aliwan siak so Kristo,” so inamin nen Juan.

“Siopa ka sirin? Si Elias?” so intepet da.

Inmebat: “Aliwan siak.”

“Sika imay Propeta?” so tepet da, tutukoyen da so Propeta ya imbaga nen Moises ya onsabi.​—Deuteronomio 18:15, 18.

“Andi!” so inyebat nen Juan.

Mapilit ira: “Siopa ka sirin? Ibagam ed sikami pian walay niyebat mid saramay angibaki ed sikami. Antoy ibabagam nipaakar ed sarilim?” Inkuan to: “Siak imay onkekelyaw diad kalawakan, ‘Gawa yon maptek so dalanen nen Jehova,’ unong ya imbaga nen propeta Isaias.”​—Juan 1:19-23.

Labay dan naamtaan, “Akin sirin et manbabautismo ka no aliwan sika so Kristo odino si Elias odino say Propeta?” Oniay makabaliksan ya inyebat to: “Siak so manbabautismo ed danum. Balet walay Sakey ed limog yo ya agyo kabat, samay onsasabi a manumtumbok ed siak.”​—Juan 1:25-27.

On, imbaga nen Juan ya ipaparaan toy dalan diad pangipaparaan tod totoo a nawalaay dugan kipapasen na puso pian awatey nipasakbay a Mesias, say magmaliw ya Ari. Oniay imbaga nen Juan nipaakar ed sikato: “Samay onsublay ed siak et mas mabiskeg nen siak, ya agak anggan makanepegan a mangekal ed sandalyas to.” (Mateo 3:11) Onia ni ingey imbaga to: “Samay manumtumbok ed siak et akauna la nen siak, ta sikatoy wala la sakbay ko.”​—Juan 1:15.

Kanian dugaruga so mensahe nen Juan ya “Magbabawi kayo, ta asingger lay Panarian na tawen.” (Mateo 3:2) Lapud saya et nipakabat ya onggapo lay ministeryo na onsabin Ari nen Jehova, si Jesu-Kristo.