Antam no siopa irayay walad litrato?— Si Mateo, Marcos, Lucas, Juan, Pedro, Santiago, Judas, tan Pablo. Nambilay ira nen wadiad dalin si Jesus, tan insulat day nipaakar ed si Jesus. Kabaten ta pa ra.

Say talora ed sikara et apostol nen Jesus ya kaiba ton nampulong. Kabat mo ra?— Si Mateo, Juan, tan Pedro. Kabkabat nen apostol Mateo tan Juan si Jesus, tan insulat day istoryay bilay to. Insulat met nen apostol  Juan so libron tatawagen ya Apocalipsis tan say taloran sulat a tatawagen ya Unonan Juan, Komaduan Juan, tan Komatlon Juan. Insulat nen apostol Pedro so duaran libro ed Biblia. Say tawag ed saratan et Unonan Pedro tan Komaduan Pedro. Diad komaduan sulat nen Pedro, inistorya to imay impansalita nen Jehova manlapud tawen nen imbaga tod si Jesus: ‘Saya so anako ya inad-arok. Proud ak ed sikato.’

Dakel met so naaralan tayod si Jesus diad libron insulat na saray arum nin lalaki ya walad litrato. Sakey ed sikara si Marcos. Nayarin wadman si Marcos nen inerel day Jesus tan anengneng toy amin ya agawa. Say sakey ni et si Lucas. Sikatoy sakey ya doktor tan posiblin nagmaliw ya Kristiano nen inatey lay Jesus.

Say duara nin nansulat ya walad litrato et saray agagi nen Jesus. Antam so ngaran da?— Si Santiago tan Judas. Nen unaan, ag-ira anisia ed si Jesus. Inisip da ni ingen ya nanaambagel la. Balet anisia ra lanlamang ed sikato tan nagmaliw iran Kristiano.

Say sakey nin walad litrato et si Pablo. Antis ya nagmaliw a Kristiano, say ngaran to et Saulo. Kabkabusol to ray Kristiano tan papairapen to ra. Panon a nagmaliw ya Kristiano si Pablo?— Aminsan, sanen manaakar si Pablo, biglan walay nansalita manlapud tawen. Si Jesus man! Tinepetan toy Pablo: ‘Akin et papairapen mo ray manisia ed siak?’ Kayari na saman, anguman si Pablo tan nagmaliw a Kristiano. Insulat nen Pablo so 14 ya libro ed Biblia, manlapud Roma anggad Hebreos.

Di ba inagew-agew tayon babasaen so Biblia?— Dakel so naaral tayo nipaakar ed si Jesus ta babasaen tayo so Biblia. Labay mon lalon nakabat si Jesus?—