Minilyon ya Kristiano so agmanseselebra na Krismas. Anto kasi nalilikna da ta ontan so desisyon da? Kasin nalilikna dan walay kulang ed bilay da? Kasin pakaskasi laingen iray ananak da? Imanoen no antoy ibabaga na Saray Tasi nen Jehova ed nanduruman pasen nipaakar ed saya.

Pannodnonot ed si Jesus: “Antis ak ya nagmaliw ya Tasi nen Jehova, mataltalag ak ya oonlad simbaan. Onla ak labat no Krismas odino no Easter. Tan anggano mimimisa ak, agak met masyadon manisia ed si Jesus. Agak la manseselebra na Krismas natan. Mimiaral ak na mamidua’d sakey simba tan ibabangat kod arum no antoy ibabaga na Biblia tungkol ed si Jesus.”—EVE, AUSTRALIA.

Makapaliket so mangiter: “Labalabay ko no makakaawat ak na regalo, lalo la no agko iilaloan. Balibali nasurprisa! Mahilig ak met ya manggaway card tan man-paint insan ko iratan iter ed arum. Lapud satan et maliket ira, tan siempre, maliket ak met.”—REUBEN, NORTHERN IRELAND.

Itulong ed arum: “Labalabay min ilutoan iramay mansasakit. No maminsan iyawitan mi ray rosas, cake, odino melag ya regalo pian ombalibali liknaan da. Labalabay min gawaen iya ta sarag min bisitaen iray totoo ed anggan anton agew.”—EMILY, AUSTRALIA.

Paniiba na sankakapamilya: “No maniiba so pamilya mi, maliket iray ananak mi ta nakakabat da ray uncle, auntie, bai, laki, tan kakapinsan da. Bibisitaen mi ra anggano kapigan kanian agkami napre-pressure, tan nalilikna na pamilya mi ya talagan inaro mi ra ta papasyaren mi ra anggano aliwan holiday.”—WENDY, CAYMAN ISLANDS.

Deen na nonot: “No Krismas, dakdakel so gagawaen na totoo kanian daiset labat so makanonot na tungkol ed kareenan. Naaralan koy sipan odino promise na Biblia parad saray totoo kanian, mareen so nonot ko. Atalosan ko ya panliketan na ananak ko so balibalin arapen.”—SANDRA, SPAIN.