KAALIS dad kuarto ed tagey, linma ra di Jesus tan saray apostol to diad hardin na Getsemani. Lanang iran oonla ditan. Imbaga natan nen Jesus ed sikara ya manbantay tan manpikasi ira. Insan inmarawi na daiset, dinmakmomo tan nampikasi.

Kayari to, pinawil nen Jesus iray apostol to. Antam no antoy gagawaen da? Nanaugip ira! Amitlon imbaga nen Jesus ya manbantay ira, balet kada ompawil et nasasabian to ran nanaugip. Insan imbaga la nen Jesus: ‘Anggad natan et nanaugip kayo ni? Asabi lay oras pian iter ak ed saray kalaban ko.’

Diad saman a bekta, sinmabi so dakel a totoo. Walay awit dan espada tan pekpek! Tan akaegna ira na silew. Nen asingger la ra, walay sakey ya dinmago tan inangoban toy Jesus. Sayan laki et si Judas Iscariote! Akin et inangoban toy Jesus?

Tinepet nen Jesus: ‘Judas, kasin inangoban mo ak pian traidoren?’ On, tanda so inyangob to. Impaamta nen Judas ed saray kakaiba to ya si Jesus iman. Kanian siningkat day Jesus. Balet biglan inuyos nen Pedro so espada to pian milaban, tan atapyas toy layag na sakey a laki. Pero inaplos nen Jesus so layag na laki tan inmabig.

Imbaga nen Jesus ed si Pedro: ‘Ipawil moy espadam ed pananginan to. Agmo sirin amta ya nayarian koy onkerew ed Amak na nilibon anghel pian iliktar ak?’ On, sarasarag to! Balet agkinmerew si Jesus ta amta ton sinmabi lay oras pian sikatoy erelen na saray kalaban to. Kanian inabuloyan to ra. Nengnengen tayoy onsublay a nagawad si Jesus.