NENGNENG mo tay maliwawan bitewen ya ituturo na sayay laki. Taga-Bukig irayan lalaki, tan aaralen da iray bitewen. Panisiaan da ya ituturod sikara na sayan balon bitewen so sakey ya importantin too.

Kasabi rad Jerusalem, intepet da: ‘Kulaan to may ugaw a magmaliw ya ari na saray Judio?’ Say “Judio” et sananey nin tawag ed saray Israelita. Tan imbaga da ni: ‘Anengneng mid Bukig so bitewen na ugaw tan linma kami dia pian pagalangan mi.’

Sanen naamtaan iya nen Herodes ya ari na Jerusalem, pinmetang so ulo to. Agto labay ya walay onsalat ed sikaton man-ari. Kanian impatawag to ray atagey a saserdote tan intepet to: ‘Iner iyanak so impormisan ari?’ Et inmebat ira: ‘Ibabaga na Biblia ya diad Betlehem.’

Kanian tinawag nen Herodes iray lalakin taga-Bukig, tan imbaga to: ‘La kayo tan anap yo so ugaw. No nalmo yo, ibaga yod siak. Ta labay ko met ya igalang.’ Pero diad tua, labay ton pateyen so ugaw!

Tinumbok na saray lalaki so bitewen anggad Betlehem, tan tinmunda itan ed petek na kulaay ugaw. Sanen linmoob irad abung, anengneng day Maria tan Jesus. Nanregalo ira ed si Jesus. Balet nen pasempet la ra, pinasakbayan ira nen Jehova diad sakey a kugip ya agla ra ompapawil ed si Herodes. Kanian sananey lay dinalanan da.

Sanen naamtaan nen Herodes ya sinmempet la iramay lalakin taga-Bukig, nampasnok ya maong. Kanian ingganggan ton pateyen so amin ya ugaw a lalaki ed Betlehem a mantaon na duara paleksab. Balet diad sakey a kugip et pinasakbayan nen Jehova si Jose, kanian tinmakas irad Ehipto. Ag-abayag, sanen abalitaan nen Jose ya inatey lay Herodes, sinmempet irad Nazaret. Ditan binmaleg si Jesus.

Siopay antam ya nampasinag ed samay balon bitewen? Tandaan, linma nid Jerusalem iramay lalaki sanen anengneng da itan. Labay nen Satanas a Diablo ya pateyen so Anak na Dios, tan amta ton labay met nen Arin Herodes ya pateyen so ugaw. Kanian malinew a si Satanas so nampasinag ed samay bitewen.