Si anghel Gabriel et imbaki ed marikit a si Maria. Imbaga ton mananak si Maria na ugaw a tuloytuloy a magmaliw ya ari. Say ugaw a si Jesus et inyanak ed kulongan na ayayep, tan diman binisita na saray managpastol tan na saray lalakin taga-Bukig. Naaralan tayo no siopay nampasinag ed bitewen, tan no panon ya niliktar si Jesus ed saray mamatey ed sikato.

Sanen mantaon na 12 si Jesus, nabasa tayo so impitongtong tod saray managbangat ed templo. Kalabas na labinwalon taon, abautismoan si Jesus, tan ginapoan ton impulong tan imbangat so Panarian ya angibakian na Dios ed sikato diad dalin. Insan, amili si Jesus na 12 a lalaki tan ginawa to ran apostol to.

Dakel met so ginawa nen Jesus a milagro. Pinakan to ray nilibon totoo, pinaabig to ray mansasakit, tan binilay to ni ingen iray inaatey. Naaralan tayo met iray agawgawad si Jesus diad unor iran agew na bilay to, tan no panon dan pinatey. Manga talora tan kapalduan taon a nampulong si Jesus, kanian say PARTE 6 et sakopen toy masulok a 34 ya taon.