SARAYAY totoo et papatumbok nen Jesus. Tinulok day imbaga to tan ag-ira inmalis ed Jerusalem. Legan iran saniiban manaalagar, walay singa maksil a siplog na dagem, tan manungol ed loob na interon abung. Insan dinmapo iray diladilan singa apoy ed ulo na saray disipulo. Nanenengneng mo tay apoy ed ulo da? Anto itan?

Sakey itan a milagro! Wala lad tawen si Jesus kaibay Ama to, tan ikakalbo toy masanton espiritu na Dios ed saray papatumbok to. Antam no antoy agawaan da lapud sayan espiritu? Akapansalita ran amin na nanduruman lenguahe.

Arengel na amayamay a totoo ed Jerusalem so ungol ya singa maksil a dagem, kanian dinmadago ra. Dakel ed sikara so nanlapud arum a bansa tan linma dia parad piesta na Israel ya Pentecostes. Mankelaw ira ta amta na saray disipulo so mansalita na lenguahe ra! Narerengel da ran mangibabagad marakdakep iran bengatla ya ginawa na Dios.

Imbaga na sarayan bisita: ‘Taga-Galilea irayan totoo, akin et makapansalita ray lenguahe tayo?’ Kanian inmalagey si Pedro tan impaliwawa tod sikara no panon a pinatey si Jesus tan binilay nen Jehova. Imbaga to: ‘Natan et wala lad tawen si Jesus diad nikawanan na Dios. Tan inkalbo to so impormisa ton masanton espiritu. Kanian anengneng tan nadngel yo irayan milagro.’

Lapud saya, nagbabawi so dakel a totoo ed ginawa rad si Jesus. Intepet da: ‘Antoy gawaen mi?’ Imbaga nen Pedro: ‘Manguman kayo tan manpabautismo.’ Diad saman ya agew, manga 3,000 a totoo so nampabautismo tan nagmaliw a papatumbok nen Jesus.