NENGNENG moy Moises, ibabatikan toy Ehipto. Nanenengneng mo iratay onuusil ed sikato? Antam no akin ya labay dan pateyen? Nengnengen tayo.

Binmaleg si Moises ed abung nen Faraon, say ari ed Ehipto. Sikatoy nagmaliw ya matattalino tan kabkabat a too. Amta nen Moises ya sikatoy aliwan Ehipsio, tan saray ateng to et Israelitan aripen.

Aminsan, nen 40 to la, pinasyar to ray kapara ton Israelita pian kumustaen ira. Sikaray napapairap. Anengneng toy sakey ya Ehipsio ya mamobogbog ed sakey ya Israelitan aripen. Ninengneng nen Moises no walay arum ya makakanengneng, et nen anggapo, pinekpek to may Ehipsio kanian inatey. Insan to tinabonan na buer so bangkay.

Kaimbuasan, dinalaw lamet nen Moises iray Israelita. Inisip ton natulongan to ira pian agla ra magmaliw ya aripen. Balet, anengneng toy duaran Israelitan lalaki ya manlalaban, kanian imbaga to ed samay akankasalanan: ‘Akin et sasakitan moy agim?’

Inkuan na laki: ‘Ari ka sirin tan ukom? Labay mo ak met ya pateyen ya singa samay Ehipsio?’

Ataktakot si Moises. Amta to ya naamtaan la na arum so ginawa to ed Ehipsio. Abalitaan met la itan nen Faraon tan angibaki na mamatey ed si Moises. Kanian, imbatikan to so Ehipto.

Sikatoy akasabid arawin pasen diad Midian. Diman to akabat so pamilya nen Jetro. Ag-abayag, inasawa to so sakey ed saray marikit nen Jetro, si Zipora. Nagmaliw si Moises ya managpastol na karnero nen Jetro. Diad loob na 40 ya taon, sikatoy nanayam ed Midian. Aminsan nen 80 taon la nen Moises, legan ya manpapastol et walay nikadkaduman agawa ed bilay to. Ibukay mo pad onsublay ya pahina, tan nengnengen tayo no anto itan.