No Akin Ya Inabuloyan Na Dios So Panirap
Parte 6
No Akin Ya Inabuloyan Na Dios So Panirap
1, 2. Panon ya aderal na inmunan atateng tayo so maabig a gapon inter na Dios ed sikara?
ANTO so inmuges? Anto so agawa ya aneral ed maabig a gapon inter na Dios ed inmunan atateng tayo ed Paraison Eden? Akin, ya imbes a kareenan tan pantutunosan ed Paraiso, say karelmengan tan irap so tinmalona ed nilibun taotaon?
2 Say rason et lapud agsuston impangusar nen Adan tan Eva ed kawayangan dan manpili. Sinmaew iran mangunsidera ed katuaan ya ag-ira apalsan ontalona a biig ed Dios tan ed saray ganggan to. Deniside ran magmaliw ya independente ed Dios, ya isisipen dan mamaaligwas iya ed saray bilay da. Kanian sikara so sinmuwawi ed inpasen-na-Dios iran limitasyon na kawayangan a manpili.—Genesis, kapitulo 3.
Say Salisalan na Sankatalbaan ya Inkasoberano
3-5. Akin ya agdineral a tampol na Dios si Adan tan si Eva tan angigapo lamet?
3 Akin ya agdineral a tampol na Dios si Adan tan si Eva tan angigapo lamet na sananey ya atooan a paris? Lapud say sankatalbaan ya inkasoberano to, salanti, say agniiter ed siopaman a kanepegan ton manuley, so naangat.
4 Say tepet so: Siopa so walaan na kanepegan a manuley, tan siopa uley so maptek? Say inkamakapanyarin-amin to tan bilang say Manamalsa ed amin na saray pinalsa so mangiter na kanepegan ed Dios a manguley ed sikara. Nisesengeg ta sikato so makabat-ed-amin, say uley to so sankaabigan parad amin iran pinalsa. Balet say uley na Dios so naangat natan. Ontan met, wala ta so bengatlan aliwa ed impamalsa to—say too? Usisaen tayo ed saginonor no panon a say isusuppiat ed katooran na too so nalalanor.
5 Diad impagmaliw na toon independente ed Dios, sananey a tepet so nipatnag: Nayarian kasi na katooan so manggawa na magmaong no ag-uleyan na Dios? Seguradon kabat na Manamalsa so ebat, balet say maseguron dalan pian nakabatan na katooan et say pangiyabuloy ed sikaran nawalaan na sigpot a kawayangan a kaliktan da. Pinili da itan a kurso ed dilin kawayangan dan manpili, kanian inabuloyan itan na Dios.
6, 7. Akin ya inabuloy na Dios ed saray totoo so sigpot a kawayangan ed ontanlan kabayag?
6 Diad impangiyabuloy ed katooan na magenap a panaon pian salien tekep na sigpot a kawayangan, iletneg na Dios a maminpinsan no kasin magmaong parad totoo a walad silong na uley na Dios odino ed inkasikaran dili. Tan say panaon ya iyabuloy so nakaukolan ya andukey a tuloy pian abuloyan iray totoo ya onsabi ed ipapasen dan say kapantokan ed pulitikal, industrial, sientipiko, tan medikal iran iyaaligwas da.
7 Kanian, inabuloyan na Dios ed too so naspot a pankanawnawa angga ed agew tayo pian andi-duaruwan ipanengneng no kasin say uley na too ya independente ed sikato et ontalona. Kanian makapanpipili so too ed baetan na kaabigan tan karuksaan, ed baetan na aro tan panamusol, ed baetan na inkatunong tan ag-inkatunong. Balet sikato met so nipapaarap ed saray pansumpalan na dilin pili to: kamaongan tan kareenan odino karelmengan tan kairapan.
Rebelyon na Espiritu Iran Pinalsa
8, 9. (a) Panon ya agawa so rebelyon ed espiritun ayaman? (b) Siopa nilikud ed si Adan tan si Eva so inimpluensyaan nen Satanas a manrebelde?
8 Wala so sananey a bengatlan kunsideraen. Aliwan say orihinal ya atateng tayo lambengat so nanrebelde sumpad uley na Dios. Balet siopa ni so wala ed saman a panaon? Epiritu iran pinalsa. Sakbay a palsaen na Dios so totoo, sikato so amalsa na atagtagey a nengneng na bilay, baleg a bilang na angheles, a manbilay ed mangatatawen ya ayaman. Sikara met so apalsa a walaan na kawayangan a manpili tan ontan met ed pankaukolan a manpasakup ed uley na Dios.—Job 38:7; Salmo 104:4; Apocalipsis 5:11.
9 Ipapanengneng na Biblia a say rebelyon so inmunan agawa ed espiritun ayaman. Labay na sakey ya espiritun pinalsa so sigpot a kawayangan. Labay to ni ingen a mandayew so katooan ed sikato. (Mateo 4:8, 9) Sayan rebelden espiritu so nagmaliw a sengegan ed impangimluensya ed si Adan tan si Eva a manrebelde, a sititilan mangibabagan say Dios so mangiyaamot na bengatlan maong parad sikara. (Genesis 3:1-5) Kanian sikato so atawag a Diablo (Managpauges) tan Satanas (Sumusumpa). Agnambayag, sinagyat to so arum iran espiritun pinalsan manrebelde. Sikara so akabkabat a bilang dedemonyos.—Deuteronomio 32:17; Apocalipsis 12:9; 16:14.
10. Anto so nansumpalan na rebelyon na saray totoo tan espiritun pinalsa?
10 Saray totoo, diad impanrebelden sumpad Dios, so angiparayag na inkasikara ed impluensya nen Satanas tan saray demonyos to. Atan so rason a tatawagen na Biblia si Satanas “a say dios na sayan sistema na bengabengatla,” ya “amulag ed kanonotan na saray agmananisia.” Kanian, ikuan na Salita na Dios a “say interon mundo so mandukdukol ed pakayari na sakey a marelmeng.” Tinawag a mismo nen Jesus si Satanas a “manuley na sayan mundo.”—2 Corinto 4:4; 1 Juan 5:19; Juan 12:31.
Duaran Salisalan
11. Nipaakar ed anton arum nin salisalan ya inangat nen Satanas so Dios?
11 Pinalesa nen Satanas so sananey a salisalan a nanangat ed Dios. Diad nansumpalan, inakusa to ya alingo so Dios ed paraan na impamalsa To ed katooan tan anggapo so malabay a manggawa na maptek a bengatla sano walad silong na desdes. Diad tua, ibabaga ton diad leksab na subok et ayewen da ni ingen so Dios. (Job 2:1-5) Diad sayan dalan a susuppiaten nen Satanas so katooran na atooan a pinalsa.
12-14. Panon na panaon ya iparungtal so katuaan nipaakar ed saray duaran salisalan a pinalesa nen Satanas?
12 Kanian, inabuloyan na Dios so magenap a panaon parad amin iran matudion pinalsa pian nengnengen no panon a naresolbi iyan salisalan tan say salisalan met ed inkasoberano na Dios. (Ipareng so Exodo 9:16.) Saray ebenton naeksperiensia ed awaran na too so mangiparungtal na katuaan nipaakar ed sarayan duaran salisalan.
13 Ununa ed amin, anto so iparungtal na panaon nipaakar ed salisalan na sankatalbaan ya inkasoberano, say kanepegan na uley na Dios? Kasin nayarian na totoon uleyan so inkasikaran magmaong nen say Dios? Kasin wala so antokaman a sistema na uley na too a likud ed Dios so mangipaarap ed sakey a maliket a mundon bulos manlapud bakal, krimen, tan ag-inkahustisya? Wala ta so makaekal ed inkaduka tan mangitarok na iyaaligwas parad amin? Wala ta so makapaandi ed sakit, itatatken, tan patey? Say uley na Dios so adesinyon manggawa ed atan ya amin.—Genesis 1:26-31.
14 Nipaakar ed komaduan salisalan, anto so iparungtal na panaon no nipaakar ed kablian na inkapalsa na too? Kasin alingo so Dios diad paraan na impamalsa to ed totoo? Kasin wala so siopaman ed sikara a manggawa na dugan bengatla ed leksab na subok? Kasin wala so siopaman ed totoon mangipanengneng a labay da so uley na Dios imbes ed independenten uley na too?
[Tepetepet Parad Panagaral]
[Litrato ed pahina 13]
Inabuloyan na Dios so panaon parad katooan ya onsabi ra ed say kapantokan ed saray iyaaligwas da
[Credit Line]
Shuttle: Based on NASA photo
