1-4. (a) Anto so agawa sanen imparungtal nen Pilato si Jesus ed saray masanok a pangkat a nantitipon ed paway na palasyo to? (b) Antoy reaksion nen Jesus ed sinagmak ton inkapabpabaingan tan irap, tan antoran importantin tepet so pinalesa?

 “NIA so too!” Ontan so impangipresenta na Gobernador na Roma a si Poncio Pilato ed si Jesu-Kristo ed masanok a pangkat a nantitipon ed paway na palasyo to nen palbangoy Paskua na 33 C.E. (Juan 19:5) Pigay agew antis na satan, si Jesus so inggalgalang na saratan a totoo sanen sikatoy matalonan linmoob ed Jerusalem bilang Ari a tinuro na Dios. Balet, natan et duma lay panmoria ed sikato na saratan a maramsak a karaklan.

² Si Jesus so kinawesan na kolor-ube a mipara ed isusulong na ari, tan sikatoy kinoronaan da. Balet, satan a kawes ya imbalabal ed asugatsugat tan mandaldalan beneg to, tan say koronan niliken a sabisabit ya intelmer ed lapislapis na ulo to, so diad tua et panagleglemew ed inka-ari to. Saray totoo a sinugsogan na saray atagey a saserdote so angipulisay ed sayan apairap a too a walad arap da. Oniay inyeyag na saray saserdote: ‘Ipasak mo! Ipasak mo!’ Onia met so inkelyaw na saray totoo lapud sikatoy determinado ran ipapatey: “Nepeg to so ompatey.”​—Juan 19:1-7.

³ Tekep na dignidad tan pakpel, si Jesus so matinunos a nananos ed saratan ya inkapabpabaingan tan irap. a Talagan sikatoy  akaparaan ya ompatey. Diad saginonor na saman ya Agew na Paskua, mabulbulos ton inawat so maot-ot ya ipapatey diad panamairapan a kiew.​—Juan 19:17, 18, 30.

⁴ Diad impangisuko nen Jesus ed bilay to, pinaneknekan to a sikatoy sakey a tudtuan kaaro na saray patumbok to. Inkuan to: “Andian so too na babaleg ya aro nen saya, a sakey a too ya italaga to so bilay to nipaakar ed saray kakaaro to.” (Juan 15:13) Satan so mamapalesa na importante iran tepet. Talaga ta’n kaukolan a sagmaken nen Jesus so amin na saratan ya irap insan ompatey? Akin a mabulbulos ton ginawa itan? Bilang “kakaaro” tan papatumbok to, panon tayon naalig so ehemplo to?

5. Panon ya amta nen Jesus iray espisipikon subsubok a sagmaken to?

⁵ Bilang insipan a Mesias, amta nen Jesus so nagawa ed sikato. Amta to so dakerakel a propesiya ed Hebreon Kasulatan a detalyadon angipasakbay ed panirap tan ipatey na Mesias. (Isaias 53:3-7, 12; Daniel 9:26) Aliwa labat ya aminpinsan ton pinasakbayan iray babangatan to nipaakar ed saray subok a nasagmak to. (Marcos 8:31; 9:31) Sanen mamapaarap ira ed Jerusalem parad unor lan Paskua to, oniay espisipiko ton inkuan ed saray apostol to: “Say Anak na too niyawat ed saray manunaan a saserdote tan saray eskribas; tan sikatoy dusaen da naani na ipapatey, tan sikatoy yawat da naani ed saray Gentiles. Tan sikatoy ludlureyen da naani, tan sikatoy lutdaan da, tan sikatoy bakbaken da naani, tan sikatoy pateyen da.” (Marcos 10:33, 34) Aliwan andi-kabaliksan irayan salita. Unong a naamtaan tayo la, si Jesus et talagan niludlurey, nilutdaan, nilelewet, tan pinatey.

6. Akin a kaukolan a manirap tan ompatey si Jesus?

⁶ Akin, balet, a kaukolan a manirap tan ompatey si Jesus? Lapu ed pigaran importantin tuloy a rason. Unona, diad pansiansia ton matoor, napaneknekan toy integridad to tan nitandoro toy inkasoberano nen Jehova. Tandaan tayo a sititilan imbaga nen Satanas a manlilingkor labat so totoo ed Dios lapud sinisiblet iran pakagunggonaan. (Job 2:1-5) Diad pansiansia  nen Jesus a matoor “anggad say ipapatey” ed panamairapan a kiew, niiter to so sankabiskegan ya ebat ed andiay basiyan ya akusasyon nen Satanas. (Filipos 2:8; Uliran 27:11) Komadua, onkanan pananakbong ed kasalanan na totoo so panirap tan ipatey na Mesias. (Isaias 53:5, 10; Daniel 9:24) Inter nen Jesus so “bilay to a panondon ed amayamay,” pian magmaliw a posible so pakawalaan tayo na maabig a relasyon ed Dios. (Mateo 20:28) Komatlo, diad impansungdo to ed amin a klase na irap, sikatoy “asubok ed amin a pamaakaran a singa sikatayo.” Sikatoy sakey sirin a maabagey ya Atagey a Saserdote, a “mangasi ed saray kakapuyan tayo.”​—Hebreos 2:17, 18; 4:15, NW.

7. Kaunongan kabaleg so insakripisyo nen Jesus sanen linma dia ed dalin?

⁷ Pian natalosan tayon maong no anto so mabulos a gawaen nen Jesus, nonot yo pa iya: Siopan too so manaynan ed pamilya tan ayaman to pian onla ed arum a bansa, no amta ton karaklan ed saray taga diman et agmangabrasa ed sikato, a sikatoy pabaingan tan pairapen da, tan insan da pateyen? Nonot yo pa natan imay ginawa nen Jesus. Antis ton linma diad dalin, alay abig na posisyon to ed katawenan diad abay na Ama to. Ingen ta mabulos ton tinaynan so ayaman to ed tawen tan linma dia ed dalin bilang too. Sikatoy linma dia anggaman amta ton sikatoy ag-abrasaen na karaklan, anggaman sikatoy maruksan pabaingan, pairapen na pirmi, tan managmak na maot-ot ya ipapatey. (Filipos 2:5-7) Antoy amakiwas ed si Jesus a mansakripisyo na ontan lan kabaleg?

8, 9. Anto so amakiwas ed si Jesus ya isuko so bilay to?

⁸ Manuna ed amin, si Jesus so pinakiwas na ontan lan panangaro ed Ama to. Say impansungdo to et prueba na panangaro to ed si Jehova. Satan a panangaro so sengegan na impangiyansakit to ed ngaran tan reputasyon nen Ama to. (Mateo 6:9; Juan 17:1-6, 26) Say nagkalalon labay nen Jesus a nagawa et say pakalinis ed apabanday a ngaran nen Ama to. Kanian impasen ton sankabalgan a kagalangan tan pribilehyo so panirap  nisesengeg ed katunongan, lapud amta to a baleg so nagawaan na panmatoor to ed kapasantos na maabig tan galgalangen a ngaran nen Ama to.​—1 Awaran 29:13.

⁹ Wala ni sananey ya amakiwas ed si Jesus a mangiter ed bilay to​—say panangaro ed totoo. Sayan panangaro et sani nen pinalsay too. Abayag nin panaon antis a linma diad dalin si Jesus, imbaga la na Biblia ya oniay nalilikna to: “Say panggayagaan ko wala nensaman ed saray anak na totoo.” (Uliran 8:30, 31) Sankapatnagan so panangaro to sanen sikatoy wadiad dalin. Unong a naamtaan tayo la ed tinumbokan a taloran kapitulo na sayan libro, impanengneng nen Jesus ed nanduruman paraan so panangaro to ed saray totoo tan nagkalautla ed saray patumbok to. Balet nen Nisan 14, 33 C.E., mabulos ton inter so bilay to parad sikatayo. (Juan 10:11) Talagan anggapo lay mas maabig nin paraan na pangipanengneng toy panangaro ed sikatayo nen say satan. Nepeg kasin sikatoy aligen tayo ed sayan pamaakaran? On. Say katuaan to et satan so igaganggan ed sikatayo.

10, 11. Anto so balon ganggan ya inter nen Jesus ed saray patumbok to, anto so lalanoren na satan, tan akin ya importantin unoren tayo itan?

¹⁰ Diad samay labi antis na impatey nen Jesus, inkuan to ed saray sankaapitan a babangatan to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabirbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Akin a “balon ganggan” so ‘pangaro ed sakey tan sakey’? Ingganggan la na Mosaikon Ganggan a: “Nepeg mo ya aroen so kaparam a too unong ed sikan dili.” (Levitico 19:18) Balet, kakaukolanen na balon ganggan so mas baleg a panangaro, panangaro a mamakiwas ed sikatayon iter so mismon bilay tayo parad arum. Impalinew nen Jesus iya sanen inkuan to: “Saya so ganggan ko, a manaaroan so sakey tan  sakey ed sikayo, salanti singa impangarok ed sikayo. Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:12, 13) Singa onia ay so ibabaga na balon ganggan: “Agyo labat basta aaroen so arum a singa ed sikayon dili, noagta aroen ira a mas nen say sikayon dili.” Diad impanbilay tan impatey nen Jesus, peteg a sikatoy akapangipanengneng na ontan a napanuliranan a panangaro.

¹¹ Akin ya importantin unoren tayo so balon ganggan? Tandaan ya inkuan nen Jesus: “Lapu ed saya [ya aron masakripisyo-ed-dili] amin a too nabirbiran da a sikayo ray babangatan ko.” On, say aron masakripisyo-ed-dili so pakabidbiran ed saray tuan Kristiano. Nikompara tayo iyan panangaro ed sakey a “badge.” Saray delegadon onaatendi ed tinaon a kombension na saray Tasi nen Jehova so mangipepeket na “badge.” Satan so pakaamtaan ed ngaran tan kongregasyon da. Say aroan a masakripisyo-ed-dili et singa satan a “badge” a mangipapabidbir ed saray tudtuan Kristiano. Diad arum a salita, say panaaroan tayo et nepeg a sankaimano a singa met ed sakey a “badge,” a mangibaga ed saray makakanengneng a sikatayo so talagan tuan papatumbok nen Kristo. Maabig no tepetan tayoy inkasikatayo, ‘Kasin singa say “badge” et napatnagan ed kabibilay ko so masakripisyo-ed-dili ya aro?’

12, 13. (a) Panon kabaleg so mabulos tayon isakripisyo pian nipanengneng so aroan tayo? (b) Antoy kabaliksan na panagsakripisyo ed dili?

¹² Bilang papatumbok nen Jesus, kaukolan a manaaroan itayo a singa ed impangaro to ed sikatayo. Kabaliksan na saya a mabulos itayon mansakripisyo parad saray kapara tayon mananisia. Panon kabaleg so nepeg a mabulos tayon isakripisyo? Ibabaga ed sikatayo na Biblia: “Dia ed saya abidbir tayo so aro, ta sikato inter to so bilay to nisesengeg ed sikatayo: tan sikatayo nepeg tayo met ya italaga so bilay tayo nisesengeg ed saray agagi.” (1 Juan 3:16) Singa si Jesus, nepeg a mabulos itayo met ya ompatey parad sakey tan sakey no nakaukolan. Sano  walay panamasegsegang, mas labayen tayo lan isakripisyo so mismon bilay tayo nen say itapat iray agagi tayo a sengegay kapeligro na bilay da. Diad saray bansan manbubusolan iray nandurumaay poli, irisga tayo so mismon bilay tayo pian protektaan iray agagi tayo, antokaman so poli ra. Sano mangueguerra iray bansa, mas labayen tayo lay nipriso odino ompatey ni ingen nen say mangegna na armas a pamatey ed saray kapara tayon mananisia odino ed anggan siopaman ni.​—Juan 17:14, 16; 1 Juan 3:10-12.

¹³ Aliwan satan labat so paraan a nipanengneng tayo so aron masakripisyo-ed-dili. Diad tua, pigpigara labat so ondadalan ed ontan kabaleg a sakripisyo. Anggaman ontan, no talagan inaro tayo ray agagi tayo, ya anggad punton mabulos tayon iter so bilay tayo, agta mabulbulos tayon isakripisyo iray angkekelag a bengatla, a pansagpotan tayoy ontulong ed sikara natan? Say panagsakripisyo-ed-dili et kabaliksan toy pangitalirak ed saray pakainawaan tayo parad pakagunggonaan na arum. Iyuuna tayo ray pankaukolan tan pankaabigan da anggano aliwan mainomay itan a gawaen. (1 Corinto 10:24) Antoray praktikal a paraan a nipanengneng tayo so aro a masakripisyo-ed-dili?

14. (a) Antoran panagsakripisyo so kakaukolanen ed saray mamatatken? (b) Antoy nibaga yo ed saray makukulin mamatatken ed kongregasyon yo?

¹⁴ Dakel so isasakripisyo na saray mamatatken ed kongregasyon pian ‘napastolan da so pulok.’ (1 Pedro 5:2, 3) Nilikud ed pangaasikaso ra ed dilin pamilya ra, nayarin kaukolan dan asikasoen diad saray labi tan sampot-simba iray nakaukolan na kongregasyon, a kabiangan la’d satan so pangiparaan ed saray betang da, panagpastol, tan pangasikaso ed saray hudisyal a kaso. Dakel a mamatatken so mansasakripisyo na kaaruman lapud kimkimey diad saray asamblea tan kombension tan panlilingkor da bilang membro na saray Hospital Liaison Committee, Patient Visitation Group, tan Regional Building  Committee. Sikayoran mamatatken, agyo lilingwanan a diad mabulos a panlilingkor yo​—say panguusar yo ed panaon, sagpot, tan kaykayarian yo pian napastolan so pulok—​nipapanengneng yo so aron masakripisyo-ed-dili. (2 Corinto 12:15) Aliwa labat lan si Jehova so mangaapresya ed mabulos a pansasagpot yo noag pati say kongregasyon a papastolan yo.​—Filipos 2:29; Hebreos 6:10.

15. (a) Antoray pigaran pansasakripisyoan na kaasawaan na mamatatken? (b) Antoy nibaga yo ed saray masuportan kaasawaan a bibii ya agda isisiblet iray kaasawaan da pian makapanlingkor ed kongregasyon yo?

¹⁵ Komusta balet iray kaasawaan na mamatatken, agta mansasakripisyo met irayan masuportan kaasawaan pian naasikaso na mamasiken da so pulok? Seguradon sakripisyo parad sakey ya asawan bii sano say panaon a para komon ed pamilya et kaukolan ya igana na asawa to parad saray pamaakaran na kongregasyon. Nonoten pa met iray kaasawaan na saray ombiabiahen manangasikaso, ontan met ed pansasakripisyo ra pian naibaan so kaasawaan da ed nanduruman kongregasyon tan sirkito. Insakripisyo ray nawalaan na dili ran abung tan anganko et nanduruma so panuugipan da kada simba. Nakomendaan iray kaasawaan a bibii a mabulos a mangiyuuna ed pankaabigan na kongregasyon lapud panangipanengneng da na masakripisyo-ed-dili ya aro.​—Filipos 2:3, 4.

16. Antoray pansasakripisyoan na saray Kristianon atateng parad anak da?

¹⁶ Diad pamilya, panon tayon nipanengneng so masakripisyo-ed-dili ya aro? Dakel so isasakripisyo yo iran kaatengan pian naasikaso so ananak yo tan napabaleg ira diad “panagdisiplina tan panamilin” nen Jehova. (Efeso 6:4, Maung a Balita) Nayarin andukey tan makapabanal so pantatalikarkar yon mantrabaho pian nataryaan labat na tagano so pamilya yo tan naseguron walay magenap a kawesen tan panayaman na ananak yo. Mas labayen yo nin sikayoy naandian nen saray ananak yo. Pansasagpotan yo met ya iyaralan iray anak yo, awiten ed Kristianon pantitipon, tan ulopen a manpulong. (Deuteronomio 6:6, 7) Makapaliket ed say Angigapo na pamilya so masakripisyo-ed-dili a panangaro yo tan nayarin pakagamoran  itan na ananak yo na bilay ya andi-anggaan.​—Uliran 22:6; Efeso 3:14, 15.

17. Panon a naalig na Kristianon kaasawaan a lalaki so agmasiblet ya ugali nen Jesus?

¹⁷ Kaasawaan a lalaki, panon yon naalig si Jesus diad pangipanengneng na masakripisyo-ed-dili a panangaro? Oniay ebat na Biblia: “Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato.” (Efeso 5:25) Unong a naamtaan tayo, ontan lay pangaro nen Jesus ed saray papatumbok ya inter toy bilay to parad sikara. Aaligen na Kristianon asawan laki so agmasiblet ya ugali nen Jesus, ya “agto pinaliket so inkasikaton dili.” (Roma 15:3) Say ontan ya asawan laki so mabulos a mangiyuna ed saray pankaukolan tan pankaabigan na asawa to. Agto ipipilit so labay to, noagta sikatoy mabulos a mamalugar no anggapo met so nasusumlang a prinsipyo na Biblia. Abobonan nen Jehova so asawan laki a mangipapanengneng na panangaron masakripisyo-ed-dili tan sikato so aroen tan respetoen na asawa to tan ananak to.

18. Anto so mamapakiwas ed sikatayo a tumboken so balon ganggan a manaaroan itayo?

¹⁸ Aliwan mainomay so pangunor ed balon ganggan a manaaroan itayo, balet walay mabiskeg a mamakiwas ed sikatayo pian nagawaan itan. Insulat nen Pablo: “Say aro nen Kristo pasooten to kami; ta isipen mi [ya] inatey so sakey lapu ed amin . . . Tan sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Corinto 5:14, 15) Lapud inatey si Jesus parad sikatayo, agta napakiwas itayon manbilay parad sikato? Nagawaan tayo itan diad pangalig ed masakripisyo-ed-dili a panangaro to.

19, 20. Anton mablin regalo so inter nen Jehova ed sikatayo, tan panon tayon nipanengneng ya aawaten tayo itan?

¹⁹ Aliwan panangilablabas so inkuan nen Jesus ya: “Andian so  too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:13) Say mabulos ya impangitalaga odino impangisuko to ed bilay to parad sikatayo, so sankabalgan a panangipatnag na panangaro to ed sikatayo. Balet, wala ni sananey ya angipanengneng na mas babaleg a panangaro ed sikatayo. Oniay impaliwawa nen Jesus: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Ontan lay panangaro na Dios ed sikatayo ya inter to so Anak to bilang dondon, pian makalukpos itayo ed kasalanan tan ipapatey. (Efeso 1:7) Sayan dondon et sakey a mablin regalo nen Jehova, balet agto itayo pipiliten a mangawat ed satan.

²⁰ Walad sikatayo no awaten tayo itan a regalo nen Jehova. Panon tayon nipanengneng ya aawaten tayo itan? Panamegley na ‘panisia’ ed Anak to. Balet, aliwan magenap so basta pangibagan manisia itayo. Napaneknekan itan ed kiwas tayo, salanti, diad paraan na panagbilay tayo. (Santiago 2:26) Napaneknekan tayoy pananisia tayo ed si Jesu-Kristo diad panumbok ed sikato ed kada agew. Say panggawa ed satan so mangiter na dakel a bendisyon natan tan ed arapen, unong ya ipapaliwawa na unor a kapitulo na sayan libro.