1, 2. Anto so sankaabigan ya imbitasyon a nayarin naawat na too, tan anto so nayarin itepet tayo ed inkasikatayo?

 ANTO so sankaabigan lan imbitasyon a naawat mo? Nayarin nanonotan mo so aminsan ya impangimbita ed sikan onatendi ed espisyal ya okasyon, nayari palagin bansal na duaran toon pinabpablim. Odino nayarin nanonotan mo imay agew sanen sikay inopresian na sakey ya importantin trabaho. No akaawat ka la na ontan iran imbitasyon, seguradon aliketan ka, tan apagalangan ni ingen diad impakagamor ed saratan. Ingen, say katuaan to et akaawat ka la na imbitasyon a mas maabig ya aminpigapiga. Balang sakey ed sikatayo so akaawat la ed satan. Tan balbaleg so epekto ed sikatayo na pilien tayon ikiwas ed satan ya imbitasyon. Satan so sankaimportantian a panagpili a gawaen tayo ed bilay.

² Anto itan ya imbitasyon? Manlalapu itan ed si Jesu-Kristo, say bogbogtong ya Anak na Makapanyarin-amin a Dios, si Jehova, tan satan so akarekord ed Biblia. Oniay nabasa tayo iran salita nen Jesus: “Gala magmaliw kan patumbok ko.” (Marcos 10:21, NW) Ontan met so iyiimbita nen Jesus ed balang sakey ed sikatayo. Maabig sirin a tepetan tayoy inkasikatayo, ‘Panon kasi ikiwas ko?’ Nayarin mapatpatnag lay ebat. Wala tay agmalabay a mangawat ed ontan karakep ya imbitasyon? Makapakelaw ta ag-itan aawaten na maslak a totoo. Akin?

3, 4. (a) Anto so nayarin ipasen a panibegan na arum ed samay lakin inmasingger ed si Jesus pian mantepet nipaakar ed bilay ya andi-anggaan? (b) Antoran maabig a kalidad so nayarin naimano nen Jesus ed mayaman tan kalangweran a manuley?

³ Alaen pan alimbawa imay laki a personal ya akaawat ed satan ya imbitasyon, ngalngalin 2,000 a taon lay apalabas.  Sikatoy respetadon tuloy a laki. Walad sikato so taloran bengatla a kaslakan lan pampirpirawatan tan panib-ibegan ni ingen na totoo​—kaksilan, kayamanan, tan pakapanyari. Say Biblia so aneskribe ed sikato bilang “balolaki,” “mayaman a tuloy,” tan sakey a ‘manuley.’ (Mateo 19:20; Lucas 18:18, 23) Balet, walay mas makanan kalidad na sayan balolaki. Nadngelan toy nipaakar ed Matalonggaring a Managbangat a si Jesus, tan agustoan toy nadngelan to.

⁴ Saray kaslakan a manuley ed saraman a panaon et ag-angiter ed si Jesus na galang a kanepegan to. (Juan 7:48; 12:42) Balet, duma so inkiwas na sayan manuley. Oniay ibabaga na Biblia ed sikatayo: “Sanen pinmaway [si Jesus] ed dalan, diman binmatik so sakey ed sikato, tan tinmalimukor ed sikato tan tinepet to’d sikato, Maong a Managbangat, anto so gawaen ko, pian natawir ko so bilay ya andi-anggaan?” (Marcos 10:17) Imanoen pay pampilalek na sayan laki a nakatongtong si Jesus, a binatik to nin nila ed publikon lugar, a singa nayarin ginagawa met na anggan siopan pobri tan ordinaryon totoo. Niarum ni, sikatoy marespeton tinmalimukor ed Kristo. Sirin sikatoy walaan na kapaabebaan tan kapagaan ed espiritual a pankaukolan to. Papablien nen Jesus so ontan iran maabig a kalidad. (Mateo 5:3; 18:4) Agpankelawan sirin, a “nen sikatoy ninengneng nen Jesus, sikato so inaro to.” (Marcos 10:21) Panon ya inebatan nen Jesus so tepet na balolaki?

5. Panoy inyebat nen Jesus ed mayaman a balolaki, tan panoy pakaamta tayo a say “sakey a bengatla” a kulang ed sikato et aliwan samay agto impagmaliw a duka? (Nengnengen met so paimano’d leksab.)

⁵ Impabitar nen Jesus ya angiter lay Ama to na impormasyon nipaakar ed makanan tepet a no panon so pakagamor na andi-anggaan a bilay. Tinukoy nen Jesus so Kasulatan, tan inkuan na balolaki a sitotoor ton uunoren so Mosaikon Ganggan. Ingen, lapud nikaduman katudioan nen Jesus, atebek to so walad puso na laki. (Juan 2:25) Atebek to a walay seryoson espiritual a problema ed sayan manuley. Kanian, inkuan nen  Jesus: “Sakey a bengatla so kulang ed sika.” Anto itan a “sakey a bengatla”? Inkuan nen Jesus: “Onla ka, ilakom so anggan anton walad sika, et iter mo ed saray duruka.” (Marcos 10:21) Labay kasin ibaga nen Jesus a say sakey a too et kaukolan a magmaliw a pobri pian makapanlingkor ed Dios? Andi. a Si Kristo so mangipaparungtal na sakey a bengatlan importantin tuloy.

6. Anto so imbitasyon nen Jesus, tan anto so walad puso na mayaman tan kalangweran a manuley unong ya imparungtal na inkiwas to?

⁶ Pian nipabitar no anto so kulang ed laki, si Jesus so angiyopresi ed sikato na marakdakep a pankanawnawa: “Gala magmaliw kan patumbok ko.” Isipen pa labat​—say Anak na Sankatagyan a Dios a mismo so angimbita ed satan a laki, pian ontumbok ed sikato! Insipan met nen Jesus ed sikato so agaylan abig a tumang. Inkuan to: “Wala naani kayamanan mo ed tawen.” Kasin inanamot iya na mayaman tan kalangweran a manuley, sayan alay dakep ya imbitasyon? Oniay nabasa ed salaysay: “Say lupa to inmermen ed sayan salita, et tinmaynan a maer-ermen, ta sikatoy sakey a walaan na baleg a kayarian.” (Marcos 10:21, 22) Kanian imparungtal na ag-inilaloan ya imbaga nen Jesus so problema a walad puso na sayan laki. Nigalet so puso to ed saray kayarian to, tan seguradon pati ed say pakapanyari tan posisyon a katekep na satan. Makapaermen ta mas baleg so panangaro to ed saratan a bengatla nen say panangaro to ed Kristo. Say “sakey a bengatla” sirin a kulang ed sikato et say interon puso tan masakripisyo-ed-dili ya aro ed si Jesus tan ed si Jehova. Lapud andian na ontan a panangaro so balolaki, agto inawat so anggapoy kapara ya imbitasyon! Balet, panon kan nalalanor ed saya?

7. Akin a makaseguro itayo ya anggan sikatayo natan et kaiba ed saray iimbitaan nen Jesus?

 ⁷ Say imbitasyon nen Jesus et aliwa labat a parad saman a laki; tan aliwa met a para labat ed pigaran totoo. Inkuan nen Jesus: “No siopaman a too, maliket ya ontumbok ed siak, . . . tumboken to ak.” (Lucas 9:23) Imanoen a nayarin magmaliw a patumbok nen Kristo so “siopaman,” no talagan sikato so “maliket.” Iyaasingger na Dios so ontan iran matuan totoo ed Anak to. (Juan 6:44) Aliwa labat a saray mayaman, aliwa labat a saray mairap, aliwa labat a diad espisipikon rasa odino nasyon, tan aliwa labat a diad saraman so nambilay ed saman a panaon, noagta amin so naikdan na pankanawnawa a mangawat ed imbitasyon nen Jesus. Kanian saray balikas nen Jesus a “Gala magmaliw kan patumbok ko” so diad tua et onaaplika met ed sika. Akin a nepeg mon kaliktanen a tumboken si Kristo? Tan anton talaga so nalalanor ed panggawa ed satan?

8. Anto so kaukolan na amin a totoo, tan akin?

⁸ Wala so katuaan a nepeg tayon bidbiren: Kakkaukolan tayo so maong a panangidaulo. Anggaman agbidbiren na amin a totoo itan a pankaukolan, siansian wala itan. Pinuyanan so propeta nen Jehova a si Jeremias a mangisulat ed sayan agmanguman a katuaan: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Saray totoo so andian na abilidad nisay kanepegan ya uleyan so inkasikara. On, napno so awaran na katooan na rekord na agmatalonan panangidaulo. (Eclesiastes 8:9) Nen panaon nen Jesus, saray lider so amairap, angabuso, tan angibalang ed saray totoo. Dugarugay impaneskribe nen Jesus ed situasyon na saray kabanyakan a totoo sanen inkuan ton “singa ira karnero ya andian na managpastol.” (Marcos 6:34) Ontan met so sasagmaken na katooan natan. Bilang grupo tan bilang indibidual, kaukolan tayo so panangidaulo a napanmatalkan tan narespeto tayo. Kasin sarag nen Jesus a peneken itan a pankaukolan? Konsideraen pa so pigaran rason no akin a nibaga tayon sarasarag to.

9. Antoy pidumaan nen Jesus ed amin lan lider?

 ⁹ Unona, si Jesus so pinili nen Jehova a Dios. Maslak a toon lider so pinili na kapara ra ya aliwan perpekto a totoo, a mabetbet a napapalikdo tan mililingo ed panagdesisyon. Balet si Jesus et duman klase a lider, tan papaneknekan itan a mismo na say titulo to. Say salitan “Kristo,” a singa met say salitan “Mesias,” so mankabaliksay “Alanaan a Sakey.” On, anggapoy arum a nanlana, odino anuro ed si Jesus parad sagradon posisyon to, noag say mismon Soberano a Katawan ed uniberso. Oniay inkuan nen Jehova a Dios nipaakar ed Anak to: “Nia, so aripen ko a pinilik; inararok a diad sikato napaliket so kamarerwak. Say espirituk iyan ko naani ed sikato.” (Mateo 12:18) Say Manamalsa tayo labat so makaamta no anton klase na lider so nakaukolan tayo. Anggapoy geter na kakabatan nen Jehova, kanian dakel so rason tayo pian manmatalek ed pinili to.​—Uliran 3:5, 6.

10. Akin a say ehemplo nen Jesus so sankaabigan ya aligen na totoo?

¹⁰ Komadua, angiletneg si Jesus na ayadyari tan makapakiwas ya ehemplo pian aligen tayo. Say sankaabigan a klase na lider et walaay kalidades a napandinayewan tan naalig na saray uuleyan to. Sikatoy mangidadaulo panamegley na ehemplo to, a mamapakiwas ed arum a magmaliw a mas maong a totoo. Antoran kalidad so papablien mon maong ed sakey a lider? Inkakpel? Kakabatan? Inkamaabagey? Komusta met so nipaakar ed panag-anos sano nidudunget ed kairapan? Legan mon aaralen so rekord na impanbilay nen Jesus diad dalin, naamtaan mo a walad sikato iratan ya amin​—tan dakel nira. Lapud si Jesus so naspot a mangisisindag ed inkapersona na mangatatawen ya Ama to, walad sikato so amin a kalidad na Dios. Bilang too, peteg a sikatoy perpekto ed amin ya aspekto. Kanian diad amin a bengatlan ginawa to, diad kada salitan imbesngaw to, diad kada aralem a liknaan ya impatnag to, makaromog itayoy bengatla a makanakanan aligen. Ibabaga na Biblia a sikatoy angiter “na panuliranan, pian tumboken yo so bakat to.”​—1 Pedro 2:21.

11. Panon a pinaneknekan nen Jesus a sikatoy “maong a pastol”?

¹¹ Komatlo, sigpot a tinoor nen Kristo so imbaga ton: “Siak so maong a pastol.” (Juan 10:14) Sayan piguratibon pananalita so kabkabisado na saray totoo diad samay panaon a say Biblia so  isusulat. Saray managpastol so mangaasikason maong ed saray karneron walad pudir da. Iyuuna ni na sakey a “maong a pastol” so kaligenan tan pankaabigan na pulok nen say inkasikato. Alimbawa, si David a laki nen Jesus et sakey a pastol sanen tobonbalo ni, tan aminpiga ton inrisgay bilay to pian labanan iray masebeg ya atap ya ayep ya onaataki ed saray karnero to. (1 Samuel 17:34-36) Ingen, nagkalalo ni so ginawa nen Jesus parad saray patumbok ton totoo. Inter toy bilay to parad sikara. (Juan 10:15) Pigaran lider so walaay ontan a panagsakripisyo?

12, 13. (a) Diad anton pantalos a kabat na pastol iray karnero to, tan diad anton pamaakaran a sikatoy kabat met na saraya? (b) Akin a labay mo so manpasakop ed panangidaulo na Maong a Pastol?

¹² Si Jesus so “maong a pastol” ed sananey nin pantalos. Inkuan to: “Kabat ko ray karnerok tan kabat da ak.” (Juan 10:14, Maung a Balita) Isipen pay impaneskribe nen Jesus. Parad sakey ya agtanto maobserba, say pulok na karnero et singa labat la mukot na mabagon pinalsa. Ingen, kabat na pastol so balang sakey a karnero. Kabat to no dinan iran kabatyan so magano lan mankaukolan na tulong to sano mananak, no dinan iran kordero so kaukolan nin alsaen, a lapud melag tan maletey ni ra et agni ra makaakar na arawi, tan no dinan a karnero so agano nin nansakit odino arisgo. Ontan met, kabat na saray karnero so pastol da. Sikatoy nabosesan da, kanian agdan balot nabaloan a boses to imay boses na arum a managpastol. Sano nalikas dan apurado so tonada na panatawag to, ontulok iran tampol. Tumboken na saraya no iner so pangiwanwanan to, tan amta na pastol no iner so pangiwanwanan to ed sikara. Kabisado to no iner so mabuna tan mabirdin karikaan, no iner so aagusan na danum a tariwa tan malinis, tan no iner so aliwan mapeligron panagpastolan. Legan to ran babantayan, nalilikna na saray karnero a maligen ira.​—Salmo 23.

¹³ Agmo ta pirawrawat so ontan a panangidaulo? Say Maong a Pastol so walaan na ontan ya agnaparaan a rekord na panagtrato ed saray patumbok to. Isisipan to ya itonton to ka ed maliket tan makapenek a bilay natan tan angga ed magnayon ya arapen! (Juan 10:10, 11; Apocalipsis 7:16, 17) Sirin, kaukolan tayon kabaten no anton talaga so nalalanor ed panumbok ed Kristo.

14, 15. Pian magmaliw a patumbok nen Kristo, akin et aliwan magenap so basta pankuan a Kristiano itayo odino say basta pakawalaan na emosyonal a siglaotan ed si Jesus?

¹⁴ Nayarin ipapasen na minilmilyon a totoo natan ya inawat da la so imbitasyon nen Kristo. Diad tua, tinawag da so inkasikara a Kristianos. Nayarin membro ira na sakey a relihyon a ditan ira impabinyagan na atateng da. Odino nayarin ibaga ran walay emosyonal a siglaotan da ed si Jesus tan sikatoy aawaten da bilang say personal a Manangisalba ra. Balet kasin nibaga lan papatumbok la ra nen Kristo lapud satan? Kasin ontan so walad isip nen Jesus sanen inimbitaan to itayon magmaliw a papatumbok to? Wala ni mas nen say satan.

¹⁵ Nonoten pa so mundo na Kakristianoan​—saramay bansa a kaslakan ed saray manaayam ditan et mankuan a papatumbok nen Kristo. Kasin uunoren na Kakristianoan iray bangat nen Jesu-Kristo? Odino say nanenengneng tayo ed saratan a bansa et pambubusolan, panaglames, krimen, tan ag-inkahustisya, ya anggapoy pidumaan to ed saray nagagawa ed arum nin kabiangan na mundo? Aminsan et oniay inkuan nen Mohandas Gandhi, a dederlengen a lider na Hindu: “Anggapo lay kabat ko a mas dakel ni so agawaan to parad katooan nen say si Jesus. Diad tua et aliwa pan makapuy so Inkakristiano.” Insan to inyarum: “Say kawalaay problema et sikayoran Kristiano. Agyo anggan natotoor iray dilin bangat yo.”

16, 17. Anto so kaslakan a kulang ed saray mankuan a Kristiano, tan anto so pidumaan na saray peteg a patumbok nen Kristo?

¹⁶ Imbaga nen Jesus a nagkalautlan nabidbir iray tuan patumbok to diad saray gawa ra aliwa labat a diad saray ibabaga ra odino diad pananawag ed sikara. Bilang alimbawa et oniay inkuan to: “Aliwan balang sakey a mankuan ed siak na Katawan, Katawan, et onloob naani ed panariay tawen; noag ingen say mangunor na linawa nen Amak a wala ed tawen.” (Mateo 7:21) Akin a dakerakel ed saray mangibabagan Katawan da si Jesus so agmakatotoor ed linawa na Ama to? Nonoten pa imay  kalangweran a mayaman a manuley. Kaslakan lan walay “sakey a bengatla [a] kulang” ed limog na saray mankuan a Kristiano, salanti, say interon-kamarerwa a panangaro ed si Jesus tan ed Samay angibaki ed sikato.

¹⁷ Panon a nagmaliw ya ontan? Agta saray minilmilyon a mankuan a Kristiano so mangibabaga met ya inaro ray Kristo? On, balet ta mas ni so lalanoren na panangaro ed si Jesus tan ed si Jehova nen say pangibaga labat na ontan. Inkuan nen Jesus: “No say sakey a too aroen to ak, unoren toy salitak.” (Juan 14:23) Tan bilang sakey a pastol et oniay inkuan to: “Saray karnerok dengelen da so boses ko, et kabat ko ra, tan ontumbok ira ed siak.” (Juan 10:27) On, say manunan peteg a pakasukatan na panangaro tayo ed Kristo et aliwa labat lan diad saray salita odino diad nalilikna tayo noag diad saray kiwas tayo.

18, 19. (a) Antoy nepeg ya epekto ed sikatayo na panaral nipaakar ed si Jesus? (b) Antoy gagala na sayan libro, tan panon a nagunggonaan iramay abayag da lan ipapasen so inkasikara bilang papatumbok nen Kristo?

¹⁸ Anggaman ontan, walan walay sengegan na saray kiwas tayo. Ipapatnag na saratan no antoy inkatoo tayo. Kanian satan so nepeg tayon unaen a pambanikelan a paaligwasen. Oniay kuan nen Jesus: “Saya sikato so andi-anggaan a bilay, a naamtaan da ka [“onggamor na pikakabat ed sika,” NW] a saksakey a tuan Dios, tan saman so imbakim, salanti si Jesu-Kristo.” (Juan 17:3) No onggamor tan dalepdepen tayoy suston pikakabat nipaakar ed si Jesus, walay epekto na satan ed puso tayo. Sikatoy mas lalo tayon aroen, tan nagkalalon napabiskeg tayo so pampilalek a sikatoy mantultuloy a tumboken.

¹⁹ Satan so rason a pinawala iyan libro. Say gagala na saya et aliwan pian mangiter na kompleton sumaryo na impanbilay tan ministeryo nen Jesus, noag pian tulongan itayon natalosan a maong no panon a sikatoy natumbok. b Denisinyo iya pian ontulong ed sikatayon onnengneng ed pinagka-espiho a Kasulatan tan tepetan so inkasikatayo, ‘Kasin siak so peteg a manutumbok  ed si Jesus?’ (Santiago 1:23-25) Nayarin abayag mo lan ipapasen so inkasika a singa sakey a karnero ya iwawanwan na Maong a Pastol. Ingen, agka ta miabobon, a wala niray naromog tayon paraan pian onaligwas? Papasesegen itayo na Biblia: “Dalepdep yo [odino subok yo] ed sikayon dili, no wala kayo ed pananisia, sali yo so sikayon dili.” (2 Corinto 13:5) Nabawbawi tayoy pansagpot tayo diad paneguro a talagan igigiya itayo na maaro tan Maong a Pastol tayo, si Jesus, a tinuro nen Jehova a mismo pian mangiwanwan ed sikatayo.

20. Anto so singbaten tayo ed ontumbok a kapitulo?

²⁰ Komon ta say panaral mo ed sayan libro so ontulong ed sika a napaelet so panangarom ed si Jesus tan ed si Jehova. Leleg ya igigiya na ontan ya aro so bilay mo, naeksperiensyam so kareenan tan inkakontento a posible diad sayan daan a mundo, tan makapambilay ka pian nadayew si Jehova ed ando lan ando lapud impangiter to’d sikatayo na Maong a Pastol. Siempre, say panagaral tayo nipaakar ed si Kristo so nepeg a nipagapo’d dugan letnegan. Matukoy sirin, ya usisaen tayo ed Kapitulo 2 so betang nen Jesus diad gagala nen Jehova parad saray pinalsa to.