Kapitulo Dos

Itandoro si Jehova Bilang say Alenleneg a Tuan Dios

1. Siopa so alenleneg a tuan Dios?

 IBABAGA na Biblia ya anggaman walaray dakerakel ya impasen bilang dirios, “diad [sikatayo et] wala so saksakey a Dios, say Ama.” (1 Corinto 8:5, 6) Satan a “saksakey a Dios” et si Jehova, say Amalsa ed amin a bengatla. (Deuteronomio 6:4; Apocalipsis 4:11) Sikato so tinukoy nen Jesus bilang “Dios ko tan Dios yo.” (Juan 20:17) Sikato so akipakna ed si Moises, ya akauna lan angibaga: “Si Jehova et sikato so Dios; anggapo lan balot so sananey ni nen say sikato.” (Deuteronomio 4:35) Si Jehova so sankamatalonaan ed anggan dinan iran dadayewen, a singa saray talintao, totoon diodiosen, odino si Satanas a Diablo a kabusol to, “say dios na sayan panaon.” (2 Corinto 4:3, 4) Miduma ed amin na saraya, si Jehova so “alenleneg a tuan Dios,” singa impanawag nen Jesus ed sikato.​—Juan 17:3, NW.

2. Legan tayon aaralen so nipaakar ed Dios, panon so nepeg a kaapektaan na bilay tayo?

² Saray maapresyan totoo a makakaamta ed saray makapaligsay-puson kalidad na Dios, ontan met ed agawaan to la tan gawaen to ni parad sikatayo, so natatangguyor ed sikato. Legan ya ombubulaslas so aro ra ed si Jehova, naragdag iran mangitandoro ed sikato. Panon? Sakey a dalan et say pangibaga ed arum nipaakar ed sikato. “Say sangi so manggawa na panangipatua na onkana ed kilalaban,” so kuan na Roma 10:10. Sananey a dalan et diad pangalig ed sikato ed salita tan gawa. “Aligen yo sirin so Dios, singa anak to kayon inararo,” kuan na Efeso 5:1. Pian sigpot itan a nagawaan, kaukolan tayon kabaten so peteg iran kalidad nen Jehova.

3. Antoray manunan kalidad na Dios?

 ³ Dakel iray balikas ed interon Biblia a mangipapakabat ed saray matalonan kalidad na Dios. Saray apatiran manunan kalidad to et say kakabatan, inkahustisya, pakayari, tan aro. ‘Diad sikato wala so kakabatan.’ (Job 12:13) “Ta kaptekan [“inkahustisya,” NW] so saray amin a dalan to.” (Deuteronomio 32:4) Sikato so “mabiskeg ed pakayari.” (Isaias 40:26) “Say Dios so aro.” (1 Juan 4:8) Anggaman ontan, diad apatiran manunan kalidad na Dios, dinan so sankatalonggaringan, samay nagkalalon mangipapabidbir ed sikato no anton nengneng a Dios?

“Say Dios so Aro”

4. Dinan ed saray kalidad na Dios so amakiwas ed sikaton mamalsa ed talba tan ed amin a bengatlan mabilay?

⁴ Umamengen pa no anto so amakiwas ed si Jehova diad impamalsa to ed talba tan ed saray matudion espiritu tan totoon pinalsa. Kasin lapud kakabatan odino pakayari to? Andi, ta anggaman inusar iratan na Dios, aliwan saratan so manamakiwas iran puersa. Tan agkinaukolan na inkahustisya to so panginabang ed langkap a bilay. Imbes, say baleg a panangaro na Dios so amakiwas ed sikaton manginabang na likeliket na kiwawala ed arum bilang matudion persona. Say aro so amakiwas ed sikaton mangiletneg bilang gagala to a say matulok a katooan so manbilay na ando lan ando ed Paraiso. (Genesis 1:28; 2:15) Lapud aro, inyuksoy toy kaekal na dusan intarok nen Adan ed katooan diad impankasalanan to.

5. Unong ed Biblia, si Jehova so personipikasyon na anton kalidad, tan akin?

⁵ Sirin, diad amin a kalidad na Dios, say sankatalonggaringan et say aro to. Inkapersona to itan. Agbalot ibabaga na Biblia a si Jehova so kakabatan, kaptekan, tan pakayari, anggaman importante met iratan. Balet peteg ya ibabaga ton sikato so aro. On, si Jehova so personipikasyon na aro. Saya so aro ya iwawanwan na prinsipyo, aliwan emosyon. Say aro na  Dios so uuleyan na saray prinsipyo na katuaan tan inkatunong. Satan so sankatageyan a nengneng na aro, a singa impanengneng nen Jehova a Dios a mismo. Say ontan ya aro so balikas na nagnap ya inkabunlok tan naynay ya ulopen na nanengneng ya ebidensya na kiwas.

6. Anto so manggawan posible ed sikatayo ya aligen so Dios, anggaman sikato so superyor nen say sikatayo?

⁶ Sayan alay abig a kalidad na aro so ontutulong ed sikatayon mangalig ed ontan a Dios. Bilang makapuy, ag-ayadyari, maililingon totoo, nayarin isipen tayo ya agtayon balot maaligwas a naalig so Dios. Balet nia so sananey ya alimbawa na baleg a panangaro nen Jehova: Sikato so sikakabat tan natatalosan toray kaleteyan tayo tan agto kakaukolanen so inkayadyari ed sikatayo. Kabat ton sikatayo so agla ayadyari. (Salmo 51:5) Satan so rason no akin ya ibabaga na Salmo 130:3, 4: “No sika, Jehova, et uninengen mo so saray kasulitan, O Katawan, siopa kasi naani makaalagey? Bangbalet wala so panamerdona ed sika.” On, si Jehova so “Dios a mapangasi tan mapaaro, mapalna ya onsanok, tan daakan ed maaro ya abig na linawa.” (Exodo 34:6) “Sika, Katawan, maong ka tan maparaan ka a mamerdona.” (Salmo 86:5) Agaylan makaligliwa! Agaylan makarepresko so panlingkor ed sayan makapakelaw a Dios tan liknaen so maaro, mapangasin panagtalima to!

7. Panon a napatnagan so aro nen Jehova diad saray kimey to ed impamalsa?

⁷ Say aro nen Jehova so napatnagan met ed saray kimey to ed impamalsa. Isipen pa so dakerakel a maabig a bengatlan intarya nen Jehova a panggayagaan tayo, a singa say mararakep a kapalandeyan, katakelan, saray ilog, tan kadayatan. Inikdan to itayo na makapakelaw a nanduruman tuloy a tagano pian panliketen toy pantaway tayo tan pabiskegen itayo. Ontan met, intarya nen Jehova so agaylan karakel na masasanting tan masamyong a karosasan ontan met ed makapalikliket  a pinalsan ayayep. Ginawa toray bengatlan mamaliket ed totoo, anggano agto nakaukolan a gawaen iray bengatlan para panliketan to. Tua, agtayo napanggayagaan a nagnap so pinalsa to leleg a manbibilay itayo ed sayan marelmeng a mundo ed peles ya ag-ayadyarin kipapasen tayo. (Roma 8:22) Ingen isipen pa lambengat so gawaen nen Jehova para ed sikatayo diad Paraiso! Ipapaseguro ed sikatayo na salmista: “Sika buskagen mo so limam, tan peneken mo so saray [manepeg a] pilalek na ami bengatlan mabilay.”​—Salmo 145:16.

8. Anto so sankatalonggaringan ya ehemplo na panangaro nen Jehova ed sikatayo?

⁸ Anto so sankatalonggaringan ya ehemplo na panangaro nen Jehova ed katooan? Isasalaysay na Biblia: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw noag ingen wala so bilay ton andi-anggaan.” (Juan 3:16) Kasin lapud kaabigan na too a saya so ginawa nen Jehova? Onebat so Roma 5:8: “Say Dios ipurek to so dilin aro to ed sikatayo, ta anta, makasalanan itayo ni, si Kristo inatey lapud sikatayo.” On, imbaki na Dios ed dalin so ayadyarin Anak to pian iter to so bilay to bilang bagat a panondon ed sikatayo manlapud panangondena na kasalanan tan patey. (Mateo 20:28) Saya so angilukas na dalan pian nagamoran na totoon mangaaro ed Dios so andi-anggaan a bilay. Makapaliket ta onnanatnat so aro na Dios ed amin a malabay a manggawa na linawa to, ta ibabaga na Biblia ed sikatayo: “Say Dios anggapo so pangiduma to ed saray totoo; noag ingen diad balang nasyon akoen to so antakot ed sikato tan manggawa na matunong.”​—Gawa 10:34, 35.

9. Panon itayon nepeg a naimpluensyaan ed katuaan ya inter nen Jehova so Anak to bilang dondon ed sikatayo?

⁹ Panon a say katuaan ya inter nen Jehova so Anak to bilang dondon ed sikatayo, ya angilukas na dalan a mangitonton ed andi-anggaan a bilay, so mangimpluensya ed no panon so  pangusar tayo ed saray bilay tayo natan? Nepeg a paaralemen na satan so aro tayo ed tuan Dios, si Jehova. Ontan met, nepeg a pakiwasen to itayon mankaliktan ya ontalineng ed si Jesus, a mangilalaman ed Dios. “[Si Jesus] so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara.” (2 Corinto 5:15) Agaylan makapaliket so itumbok ed saray bakat nen Jesus, ta sikato so ehemplo diad panangalig ed aro tan panangabagey nen Jehova! Saya so nipanengneng ed samay imbaga nen Jesus ed saray mapaabeba: “Dago kayo’d siak, amin yon nasasagpotan tan nabebelatan, et ikdan takayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak ed puso, et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”​—Mateo 11:28-30.

Ipanengneng so Aro ed Arum

10. Antoray pigaran dalan a nipanengneng tayo so aro ed saray kaparan Kristiano?

¹⁰ Panon tayon nipanengneng so panangaro ed saray kaparan Kristiano a singa panangaro nen Jehova tan si Jesus ed sikatayo? Imanoen so dakel a paraan a saya so nagawaan tayo: “Say aro manangitepel, tan mauyamo; say aro anggapoy siblet to; say aro agto ipasirayew so inkasikato, aliwan mapangta, aliwan mabanday so kagagawa to, agto anapen so kien to, agmanpasnok, agmanisip na mauges; agto panliketan so ag-onkatunongan, balet manliket ed katuaan; amin itepel to, amin sisiaen to, amin ilaloan to, amin sungdoan to. Say aro agbalot mangangga.”​—1 Corinto 13:4-8; 1 Juan 3:14-18; 4:7-12.

11. Siopa ni so nepeg a pangipanengnengan tayo na aro, tan panon?

¹¹ Siopa ni so pangipanengnengan tayo na aro, tan panon? Inkuan nen Jesus: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo, ya ibangat yo ran mangunor na amin a bengabengatla ya ingganggan  ko ed sikayo.” (Mateo 28:19, 20) Sasaglawien na saya so panginabang ed maong a balita nipaakar ed onsabin balon mundon paraiso na Dios diad saraman so agtayo ni kaparan Kristianos. Malinlinew ya impanengneng nen Jesus a say aro tayo so agnepeg ya igeter ed saray kapananisiaan tayo, ta inkuanto: “No aroen yo [lambengat] iray mangaro ed sikayo, anto so tumang a naalagar yo? Anggan saray publikanos agda kasi gawaen so ontan lanlamang? Et no galangen yo so saray agagi yo lambengat, anto so gawaen yo ni a nagkalalo nen saray arum? Anggan saray Gentiles agda ta kasi gawaen so ontan lanlamang?”​—Mateo 5:46, 47; 24:14; Galacia 6:10.

“Manakar ed Ngaran nen Jehova”

12. Akin a say ngaran na Dios so onaplika labat ed sikato?

¹² Sananey nin importantin nengneng na panangitandoro ed tuan Dios et say pangamta, pangusar, tan pangibangat ed arum nipaakar ed nikadkaduman ngaran to, a Jehova. Imbalikas na salmista so onian impapuson pirawat to: “Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.” (Salmo 83:18) Say ngaran a Jehova et kabaliksan to so “Pagmaliwen To.” Sikato so Baleg a Managgagala, a matalona lawas a manusumpal ed saray gagala to. Tan say tuan Dios lambengat so makanepegan a mangakbibit ed satan a ngaran, lapud saray totoo so agbalot makaseguro ed italona na saray sagpot da. (Santiago 4:13, 14) Si Jehova lambengat so makapangibagan say salita to so “onaligwas” unong ed pangibakian to. (Isaias 55:11) Dakel so aliketan sanen primero ran anengneng so ngaran na Dios ed saray Biblia ra tan naaralan so kabaliksan to. (Exodo 6:3) Balet ta sikaray nagunggonaan labat ed sayan pikakabat no sikara so ‘manakar ed ngaran nen Jehova ed ando lan ando lawas.’​—Miqueas 4:5.

13. Anto so lalanoren na pikabat ed ngaran nen Jehova tan panakar ed ngaran to?

¹³ Nipaakar ed ngaran na Dios, inkuan na Salmo 9:10:  “Saray mikabat na ngaran mo, ‘yan da so panmatalek da ed sika.” Lalanoren na saya so mas nen say basta pikabat ed ngaran nen Jehova, ya aliwan automatikon mankabaliksan na panmatalek ed sikato. Say pikabat ed ngaran na Dios et mankabaliksan na pangapresya ed no anton nengneng a Dios si Jehova, respetoen so autoridad to, unoren iray ganggan to, manmatalek ed sikato ed amin a bengatla. (Uliran 3:5, 6) Mipadpara, say panakar ed ngaran nen Jehova so manutukoy ed pagmaliw a dedikado ed sikato tan sikatoy irepresenta bilang sakey ed saray managdayew ed sikato, a petepeteg ya uusaren so bilay tayo unong ed linawa na Dios. (Lucas 10:27) Kasin gagawaen mo itan?

14. No panlingkoran tayo si Jehova ed ando lan ando, anto so nakaukolan nilikud ed panlikna ya obligasyon itan?

¹⁴ No maando tayon panlingkoran si Jehova, sikatayo so agnepeg a nadagdag makasengeg labat ed obligasyon. Pinaseseg nen apostol Pablo si Timoteo, a manlilingkor la ed si Jehova ed dakerakel lan taon: “Ipasal mo so inkasika tekep na maridios a debosyon bilang gagalam.” (1 Timoteo 4:7, NW) Say debosyon so manlalapud puso a napno na apresasyon ed personan pangipapaarapay debosyon. Say “maridios a debosyon” so mangipapatnag na aralem a panamagalang tan respeto ed si Jehova diad personal a paraan. Ipapatnag na satan so maaron siglaotan ed sikato lapud pirmin pananerleng ed sikato tan ed saray dalan to. Dagdagen to itayon kaliktanen ya amin komon so manrespeton maong ed ngaran to. Nepeg tayon bayuboan so maridios a debosyon ed kabibilay tayo no manakar itayo ed ngaran nen Jehova, say alenleneg a tuan Dios, ed ando lan ando.​—Salmo 37:4; 2 Pedro 3:11.

15. Panon tayon niiter ed Dios so sigpot a debosyon tayo?

¹⁵ Ta pian makapanlingkor ed Dios ed makapaliket a paraan, nakaukolan ya iter tayo so agnaapag a panagdayew ed sikato, lapud sikato so “Dios a mankaukolan na sigpot a  debosyon.” (Exodo 20:5, NW) Agtayo nayarin napanbansag ya aroen so Dios tan say marelmeng a mundo a si Satanas so dios. (Santiago 4:4; 1 Juan 2:15-17) Amta nen Jehova no anton nengneng na inkatoo so pagmamaliwan tayo. (Jeremias 17:10) No tuan inaro tayo so inkatunong, satan so nanengneng to tan tulongan to itayon mansungdo ed inagew-agew a subsubok ed sikatayo. Diad pananulong to ed sikatayo panamegley na mabiskeg a masanton espiritu to, tulongan to itayon manalona ed karelmengan a kasmak a tuloy ed sayan mundo. (2 Corinto 4:7) Tulongan to itayo met a napansiansia so mabiskeg ya ilalo tayo ed andi-anggaan a bilay diad paraison dalin. Agaylan maglorian iilaloan itan! Nepeg a pablien tayon tuloy itan tan mabulos a panlingkoran so tuan Dios, si Jehova, a pagmaliwen ton posibli itan.

16. Anto so nepeg mon kaliktan a gawaen kaiba so minilyon nin arum?

¹⁶ Minilyon a totoo ed sankadalinan so malikeliket ya angawat ed imbitasyon na salmista sanen insulat to: “O yabalbaleg [“itandoro,” NW] tayo si Jehova, tan bansagan yo ak a mangiyabalbaleg ed ngaran to.” (Salmo 34:3) Sika so iimbitaan nen Jehova a mikasakey ed ombabaleg ya ulop ed amin a nasyones a manggagawa ed satan.

Repason Pantongtongan

• Anton nengneng na persona si Jehova? Panon itayon nagunggonaan diad pakagamor na malinew a pakatalos ed saray kalidad to?

• Panon tayon natulongan so arum a totoo pian makaaral ira ed katuaan nipaakar ed Dios?

• Anto so lalanoren na pikabat ed ngaran nen Jehova tan panakar ed ngaran to?

[Tepetepet Parad Panagaral]

 [Saray litrato ed pahina 14]

Si Jehova, ed baleg ya aro to, ‘buskagen to so lima to tan peneken to so pilalek na amin a bengatlan mabilay’