No ugaw so inmarap ed sikatayo, ibaga tayo ya labay tayon nakatongtong iray ateng to. Nipanengneng tayod saya so respeto ed inkaulo. (Pro 6:20) No labay to tayon palooben ed abung, agtayo onloloob. No agtayo nakatongtong iray ateng to, ompawil tayo la diad arum ya agew.

No say ugaw et manga 15 ya anggad 19 la so taon to, siansia nin ibaga tayo ya labay tayon nakatongtong iray ateng to. No agtayo ra nakatongtong, tepetan tayo no aabuloyan da lan manpili na basaen to. No aabuloyan da la, nayari tayon opresian na literatura tan nayarin ipanengneng ed sikato so jw.org.

No pawilen tayo so sakey ya kabataan ya angipanengneng na interes, ibaga tayo ya labay tayon nakabat iray ateng to. No ontan, nipaliwawa tayo so gagala tayo tan nipanengneng tayod sikara so napanmatalkan iran simbawa ed Biblia parad saray pamilya. (Sal 119:86, 138) No ipanengneng tayoy respeto tan konsiderasyon ed saray atateng, maabig itan ya pantasi tan nayarin mangiter ed sikatayo na pankanawnawa ya ipasabi so maong a balita ed pamilya to.—1Pe 2:12.