Ukom 8:1-35
8 Insan oniay inkuan ed sikato na saray lalaki ed Efraim: “Anto iyay ginawam ed sikami? Akin et agmo kami tinawag nen nilabanan moy Midian?”+ Tan ampetang so ulo ran akisangsangan ed sikato.+
2 Balet inkuan tod sikara: “Anto ta so agawaan ko no ikompara ed sikayo? Agta say ubas a tinudtor na Efraim+ et magmaong nen say ubas a binurbor na Abi-ezer?+
3 Diad lima yo inyawat na Dios iray prinsipe na Midian a si Oreb tan Zeeb,+ tan anto ta so agawaan ko no ikompara ed sikayo?” Kinmepay sanok da* sanen oniay imbaga* to.
4 Insan akasabi si Gideon ed Jordan tan binaliw to itan, sikato tan say 300 a lalakin kaiba to. Naksawan la ra, balet intuloy da ni so panguusil da.
5 Kanian oniay inkuan tod saray lalaki ed Sucot: “Ipangasi yon ikdan na tinapay iray totoon ontutumbok ed siak, ta naksawan la ra tan uusilan koy Zeba tan Zalmuna ya arari na Midian.”
6 Balet inkuan na saray prinsipe na Sucot: “Narel mo la sirin si Zeba tan Zalmuna pian ikdan mi na tinapay so armadam?”
7 Diad saman et inkuan nen Gideon: “No ontan sirin, sano iyawat nen Jehova ed limak si Zeba tan Zalmuna, sugaten ko iray baog yo na saray sabit tan turok ed kalawakan.”+
8 Tan manlapu diman et sikatoy tinmatdang ed Penuel tan onman met so kinerew tod sikara, balet say ebat na saray lalaki ed Penuel et pareho ed samay ebat na saray lalaki ed Sucot.
9 Kanian oniay imbaga to met ed saray lalaki ed Penuel: “Sano ompawil ak ya analo, igebak iyan tori.”+
10 Natan et walad Karkor si Zeba tan Zalmuna a kaiba day armada ra, manga 15,000 lalaki. Saraya labat la so akera ed interon armada na saray taga Bukig,+ ta 120,000 lalakin aka-espada so inatey la.
11 Nantultuloy a tinmatdang si Gideon diad dalan na saramay manaayam ed tolda diad bukig na Noba tan Jogbeha,+ tan nilusob toy kampo sanen ag-itan akaparaan.
12 Sanen tinmakas si Zeba tan Zalmuna, inusilan to ra tan narel toy duaran arari na Midian, si Zeba tan Zalmuna, a lapud saya et ataktakot so interon kampo.
13 Insan pinmawil manlapud guerra si Gideon ya anak nen Joas tan dinmalan diad patatdang ed Heres.
14 Diad dalan et narel toy sakey a kalangweran a laki a taga Sucot tan sikatoy tinepetan to. Kanian insulat na kalangweran a laki so kangaranan na saray prinsipe tan mamatatken na Sucot, 77 lalaki.
15 Diad saman et nila to iray lalaki ed Sucot tan inkuan to: “Nia si Zeba tan Zalmuna, a lapud sikara et kinantiawan yo ak, ya inkuan yon, ‘Narel mo la sirin si Zeba tan Zalmuna pian ikdan mi na tinapay iray naksawan a totoom?’”+
16 Insan inala to iray mamatatken ed syudad, tan diad panamegley na saray sabit tan turok ed kalawakan et inikdan toy leksion iray lalaki ed Sucot.+
17 Tan inggeba toy tori na Penuel+ tan pinapatey to iray lalaki ed syudad.
18 Tinepetan toy Zeba tan Zalmuna: “Anton klase na lalaki iramay pinatey yo ed Tabor?” Inmebat ira: “Singa ra sika, balang sakey et singa anak na ari.”
19 Diad saman et inkuan to: “Agagik ira, ananak ira nen inak. Unong a mabilay si Jehova, no agyo ra komon pinatey, agta kayo met komon pateyen.”
20 Insan inkuan tod si Jeter a panguloan ya anak to: “Alagey ka, patey mo ra.” Balet ag-inuyos na kalangweran a laki so espada to; sikatoy antakot, ta ugaw ni.
21 Kanian inkuan nen Zeba tan Zalmuna: “Sikan mismo so onalagey tan mamatey ed sikami, ta napatnagan so sakey a laki unong ed inkabiskeg to.”* Kanian inmalagey si Gideon tan pinatey toy Zeba tan Zalmuna+ tan inala to iray kurti-bulan a dekorasyon a walad beklew na saray kamelyo ra.
22 Diad saginonor et oniay inkuan na saray lalaki na Israel ed si Gideon: “Uleyan mo kami, sika tan say anak mo tan say apom, ta inliktar mo kami ed lima na Midian.”+
23 Balet inkuan nen Gideon ed sikara: “Aliwan siak odino say anak ko so manuley ed sikayo. Si Jehova so manuley ed sikayo.”+
24 Inkuan ni nen Gideon: “Kerewen ko pad sikayo: iter komon ed siak na balang sakey so singsing a parad eleng ya asamsam to.” (Ta saramay asakop et walaay balitok a singsing a parad eleng, lapud Ismaelita ra.)+
25 Inkuan dad sikato: “Iter mid sika.” Diad saman et imbilkag da so sakey a balabal tan ditan imbuntok na balang sakey so singsing ton parad eleng ya asamsam to.
26 Say kabelat na saray kinerew ton balitok a singsing a parad eleng et 1,700 a siklo* a balitok, likud nid saray kurti-bulan ya alahas, saray ikaw, saray kolor-ube a kawes* ya isusulong na saray arari na Midian, tan saray kuwintas a walad beklew na saray kamelyo.+
27 Ginawa itan nen Gideon a sakey ya efod+ tan imparungtal tod syudad ton Ofra;+ tan say interon Israel et akibiang ed espiritual a prostitusyon ed satan,+ kanian nagmaliw itan a patit ed si Gideon tan ed sankaabungan to.+
28 Kanian atalo na saray Israelita so Midian,+ tan agda la ra inangatan a milaban;* tan say dalin et awalaay kaligenan* ed loob na 40 taon legan na saray agew nen Gideon.+
29 Kanian pinmawil lay Jerubaal+ ya anak nen Joas ed abung to tan nanayam la diman.
30 Awalaan si Gideon na 70 ananak a lalaki,* ta dakdakel so asawa to.
31 Say onkokomaduan asawa to a walad Siquem et angiyanak met na sakey a laki, tan nginaranan to na Abimelec.+
32 Tan inatey si Gideon ya anak nen Joas kayari na andukey a bilay tan imponpon diad lubok nen Joas ya ama to diad Ofra na saray Abi-ezerita.+
33 Sanen inatey lay Gideon, akibiang lamet ed espiritual a prostitusyon iray Israelita ed saray Baal,+ tan pinili ray Baal-berit bilang dios da.+
34 Nilingwanan na saray Israelita si Jehova a Dios da,+ ya angiliktar ed sikara ed lima na amin a kalaban da ed kaliberliber;+
35 tan agda impatnag so matoor a panangaro ed sankaabungan nen Jerubaal, salanti, si Gideon, bilang bales ed amin a kamaongan a ginawa tod Israel.+
Paimanod leksab
^ Literal, “Kinmalmay espiritu ra ed sikato.”
^ Literal, “salita.”
^ Odino “ta no anto so laki, ontan met so biskeg to.”
^ Odino “kolor-ube ya abel a gawad bagoy karnero.”
^ Say sakey a siklo et 11.4 gramo. Nengnengen so Apendise B14.
^ Literal, “agda la intangwa iray kauloan da.”
^ Odino “kareenan.”
^ Literal, “70 ananak a lalaki a pinmaway ed ulpo to.”
