Ukom 7:1-25
7 Insan asakbay a binmangon si Jerubaal, salanti, si Gideon,+ tan say amin a totoon kaiba to, tan nankampo rad abay na Subol na Harod, balet say kampo na Midian et walad bandad amianen na kampo nen Gideon, diad pukdol na More, diad patar a lawak.*
2 Oniay inkuan natan nen Jehova ed si Gideon: “Dakdakel a maong so kaibam a totoo pian iyawat kod lima ra so Midian.+ Ompan manpasirayew ed siak so Israel tan ikuan ton, ‘Siak a mismo so angiliktar ed sarilik.’+
3 Natan, ipangasim ya iyabawag ed arap na saray totoo, ‘Siopaman a natatakot tan manggiwgiw, onsempet la.’”+ Kanian sinubok ira nen Gideon. Diad saman et 22,000 so sinmempet, tan 10,000 so tinmilak.
4 Balet inkuan nen Jehova ed si Gideon: “Dakdakel nin siansia so totoo. Palasur mo rad kawalaan na danum pian nasubok ko ra diman. Sano ibagak ed sika, ‘Saya so milad sika,’ sikatoy milad sika, balet sano ibagak ed sika, ‘Saya et agmilad sika,’ sikatoy agmila.”
5 Kanian pinalasur toy totoo ed kawalaan na danum.
Insan inkuan nen Jehova ed si Gideon: “Ibiig mo iramay dildilan day danum a singa kakainum na aso, ed saramay ontalimukor pian oninum.”
6 Tan say bilang na saramay dinildilan day danum ed panamegley na lima ra et 300 a lalaki. Saraman lay arum et tinmalimukor ira pian oninum.
7 Inkuan natan nen Jehova ed si Gideon: “Iliktar ta kayod panamegley na 300 a lalaki a dinildilan day danum, tan iyawat kod limam so Midian.+ Balet pasempet mo lay arum a totoo.”
8 Kanian kayari ran inala ed totoo so abasto tan saray tambuyog, pinasempet to la iramay arum a lalaki ed Israel, tan impansiansia to labat so 300 a lalaki. Say kampo na Midian et walad leksab na kampo to diad patar a lawak.+
9 Diad saman a labi et inkuan nen Jehova ed sikato: “La ka, lusob moy kampo, ta inyawat ko la itan ed limam.+
10 Balet no antakot kan onlusob, ipilam si Pura a lingkor mo diad ilasur mo ed kampo.
11 Dengel moy ibaga ra, tan kayari na satan et magmaliw kan makpel* ya onlusob ed kampo.” Diad saman et linmasur ira nen Pura a lingkor to diad gilig na kampo na armada.
12 Say Midian, Amalek, tan amin a taga Bukig+ et amungkog ed patar a lawak a singa ra dakerakel a duron,+ tan agnabilang iray kamelyo ra a singa karakel na saray buer ed gilig na dayat.
13 Natan et sinmabi si Gideon, tan walay sakey a lakin iistoryaen tod kaiba to so akugip to, ya inkuan to: “Akugip kon walay sakey a malimpek a tinapay a sebada ya ontutulin a mamaarap ed kampo na Midian. Tan maksil itan a kinmena ed sakey a tolda kanian atumba.+ On, imbalintuag toy tolda kanian akusbo.”
14 Diad saman et oniay inkuan na kaiba to: “Saya et anggapoy arum noag say espada nen Gideon+ ya anak nen Joas, sakey a laki ed Israel. Inyawat la na Dios ed lima to so Midian tan say interon kampo.”+
15 Sanen nadngel nen Gideon so inistorya ton kugip tan say kabaliksan na satan,+ sikatoy dinmakmomo pian idayew toy Dios. Kayari na satan et sikatoy pinmawil ed kampo na Israel tan inkuan to: “Alagey kayo, ta inyawat la nen Jehova ed lima yo so kampo na Midian.”
16 Insan inapag tod taloran grupo so 300 a lalaki tan inikdan to ran amin na tambuyog+ tan angkakabaleg a buyog a wala ray panagsilew ed loob na saratan.
17 Insan inkuan tod sikara: “Nengneng yo ak tan alig yoy gawaen ko. Sano makasabi ak ed gilig na kampo, gawa yo no antoy gawaen ko.
18 Sano paknolen ko tan amin a kaibak so tambuyog, paknol yo met iray tambuyog yo diad liber na interon kampo, tan iyeyag yo, ‘Parad si Jehova tan parad si Gideon!’”
19 Akasabi si Gideon tan say 100 a lalakin kaiba to ed gilig na kampo diad kagapo na pegley-labi a panagbantay,* sanen akapuesto la iray sinmalat a bantay. Pinaknol da iray tambuyog+ tan binetag da iray angkakabaleg a buyog a sankaegnaan da.+
20 Kanian pinaknol na taloran grupo iray tambuyog da tan binetag da iray angkakabaleg a buyog. Binembenan dad kawigin lima da iray panagsilew tan pinaknol da iray tambuyog da ed kawanan a lima ra, tan inyeyag da: “Say espada nen Jehova tan Gideon!”
21 Legan na satan et nansiansia so balang laki ed pasen to diad interon liber na kampo, tan batik so interon armada, a maneyag ira legan iran ontatakas.+
22 Nantultuloy a pinaknol na 300 iray tambuyog da, tan impanlalaban nen Jehova so amin a totoo diad interon kampo+ tan nampapateyan ira; tan tinmakas so armada ya anggad Bet-sita, diad Zerera, ya anggad saray ketegan na Abel-mehola+ diad abay na Tabat.
23 Tan nantitipon iray lalaki ed Israel a nanlapud Neftali, Aser, tan interon Manases,+ tan inusilan da so Midian.
24 Angibaki si Gideon na saray mensahero diad interon mapalandey a rehyon na Efraim pian ibaga ra: “Lasur kayo tan lusob yoy Midian, tan sakop yoy dalan ya anggad Bet-bara tan Jordan pian anggapoy makabaliw ed ilog.” Kanian nantitipon so amin a lalaki ed Efraim, tan asakop da so ilog ya anggad Bet-bara tan say Jordan.
25 Narel da met so duaran prinsipe na Midian, si Oreb tan Zeeb; pinatey day Oreb diad bato ya inngaran dan Oreb,+ tan pinatey day Zeeb diad panagpespesan na ubas nen Zeeb. Nantultuloy dan inusilan so Midian,+ tan inawit da ed si Gideon so ulo nen Oreb tan Zeeb diad rehyon na Jordan.
Paimanod leksab
^ Odino “abeban patar.”
^ Literal, “ombiskeg iray limam.”
^ Manlapud manga alas-10 na labi ya anggad manga alas-2 na palbangon.
