Ukom 19:1-30
-
Seksual a krimen a ginawa na saray Benjaminita ed Gibea (1-30)
19 Diad saraman ya agew, sanen anggapoy ari ed Israel,+ sakey a Levita a manaayam diad nisulinek a pasen na mapalandey a rehyon na Efraim+ et angala na sakey a bii ed Betlehem+ diad Juda bilang onkokomaduan asawa to.
2 Balet agnanmatoor ed sikato so onkokomaduan asawa to, tan sikatoy tinaynanan na bii pian onlad abung na ama to ed Betlehem diad Juda. Sikatoy nansiansia diman ed loob na apat bulan.
3 Insan sikatoy tinumbok na asawa to pian kuyongen ton ompawil; kaiba toy lingkor ton laki tan duaran asno. Kanian sikatoy pinaloob na bii ed abung nen ama to. Sanen sikatoy anengneng nen ama to, sikatoy maliket ton inawat.
4 Kanian sikatoy kinombinse na katulangan to, say ama na samay bii, a miayam nid man a taloy agew; tan nanaakan tan inmiinum ira, tan sikatoy mansasanlabi diman.
5 Diad komapat ya agew, sanen kabkabuasan iran binmangon pian onsipot la, inkuan na ama na kalangweran a bii ed manugang to: “Mangan ki ni pian walay kasil yo* insan ki la onla.”
6 Kanian yinmurong ira, tan angan tan inminum iran dua; kayari na satan et inkuan na ama na kalangweran a bii ed samay laki: “Ipangasim, mansanlabi ka ni dia kari, tan manliket ka.”*
7 Sanen onsipot la so laki, akikasi ed sikato so katulangan to, kanian sikatoy nansanlabi lamet diman.
8 Sanen sikatoy kabkabuasan a binmangon ed komaliman agew pian onla la, inkuan na ama na kalangweran a bii: “Ipangasim, mangan ki ni pian walay kasil yo.”* Tan nampaleen iran anggad mansirunget, tan nantultuloy ni ran angan a dua.
9 Sanen onsipot la imay laki a kaibay onkokomaduan asawa to tan say lingkor to, inkuan ed sikato na katulangan to, say ama na kalangweran a bii: “Magano lan onlabi. Ipangasim, mansanlabi kayo ni dia. Magano lan onselek so agew. Mansanlabi ka ni dia tan manliket ka. Nabuas et nayari kayon mangabkabuasan a manbiahen pasempet ed abung mo.”*
10 Balet ag-inmabuloy so laki a mansanlabi lamet diman, kanian sikatoy inmalagey la tan nambiahen anggad Jebus, salanti, Jerusalem.+ Kaiba toy duaran asno, say onkokomaduan asawa to, tan say lingkor to.
11 Onseselek lay agew sanen asingger la rad Jebus. Kanian inkuan na lingkor ed katawan to: “Sarag ton onsamar ti nid sayan syudad na saray Jebuseo tan mansanlabi tayo dia?”
12 Balet inkuan ed sikato na katawan to: “Agtayo nepeg ya onsamar ed syudad na saray aliwan Israelita. Ontuloy tayo lad Gibea.”+
13 Insan oniay inkuan tod lingkor to: “Gali ta salien tayoy onlad sakey ed sarayan pasen; mansanlabi tayo balanglan diad Gibea odino diad Rama.”+
14 Kanian tinmuloy la ra, tan sinmelek lay agew sanen asingger la rad Gibea, a sakop na Benjamin.
15 Kanian sinmamar ira diman pian mansanlabi rad Gibea. Sanen akaloob ira, yinmurong ira diad plaza na syudad, balet anggapoy amatuloy ed sikara diad abung to pian pansanlabian da.+
16 Agnambayag, diad saman a labi et nitan lay sakey a masiken a nanlapud impankimey tod uma. Sikatoy datin manaayam ed mapalandey a rehyon na Efraim,+ tan agano nin manaayam ed Gibea; balet Benjaminita+ iray totoo ed saman a syudad.
17 Sanen anengneng na masiken so managbiahe diad plaza na syudad, sikatoy tinepetan to: “Iner so laen mo, tan iner so nanlapuan mo?”
18 Inyebat to: “Manbiabiahe kami a nanlapud Betlehem ed Juda tan paarap kami ed nisulinek a pasen ed mapalandey a rehyon na Efraim, a diman so nanlapuan ko. Linma ak ed Betlehem diad Juda,+ tan onla ak ed abung nen Jehova,* balet anggapoy mamatuloy ed siak diad abung to.
19 Magenap so awit min dayami tan kakaney ayep a parad saray asno mi.+ Wala met so tinapay+ tan alak a parad siak tan say kaibak a bii tan lingkor mi. Walan amin so nakaukolan mi.”
20 Balet oniay inkuan na masiken: “Niwala komon ed sika so kareenan! Akauley ak ed antokaman a nakaukolan mo. Basta agka labat mansasanlabi diad plaza.”
21 Kanian sikatoy pinaloob tod abung to tan inikdan toy naakan* iramay asno. Insan inurasan da iray sali ra tan angan tan inminum ira.
22 Legan iran manliliket, pinaliberan na pigaran andi-kakanaan a lalaki ed syudad so abung tan pinepekpek day puerta, tan imbaga rad samay masiken ya akan-abung: “Ipaway mo may laki a linmoob ed abung mo, pian makapiakdol kamid sikato.”+
23 Diad saman et pinmaway imay akan-abung tan inkuan tod sikara: “Aleg, agagik, agkayo manggagawa na mauges. Ipangasi yo, ta sayan laki et bisita ed abung ko. Agyo gagawaen iyan makapabaing a bengatla.
24 Nia so ana’kon bii a birhen tan say onkokomaduan asawa na sayan laki. Abuloyan yon ipaway ko ra, tan pabanday yo ra no labay yo.*+ Balet agyo gagawaen ed sayan laki iyan makapabaing a bengatla.”
25 Balet sikatoy agdinengel na saray lalaki, kanian inegnaan na samay laki so onkokomaduan asawa to+ tan impaway tod sikara. Sikatoy puersaan dan inakdolan tan inabuso ran sanlabi ya anggad kabuasan. Insan sikatoy pinataynan da sanen palbangon la.
26 Sanen onkakabuasan la, akasabi imay bii tan atumba ed puerta na abung na samay laki a kawalaan na katawan to tan niparukol diman anggad kaliwawa na agew.
27 Sanen binmangon ed kabuasan imay katawan to tan nilukasan to iray puerta na abung pian ompaway tan ituloy toy pambiahe to, anengneng to imay bii, say onkokomaduan asawa to, ya akarukol ed arap na puerta na abung, a saray lima to et walad entrada na puerta.
28 Kanian inkuan tod sikato: “Alagey ka; onla ti la.” Balet sikatoy agla onebat. Diad saman et sikatoy inlugan tod asno tan amaarap lad abung to.
29 Kasabi tod abung to, sikatoy angala na kutsilyon panagpakger tan inegnaan toy bangkay na onkokomaduan asawa to tan tinegteg to ed 12 piraso unong ed saray pukel tan impawit to ed kada teritorya na Israel.
30 Amin ya akanengneng ed satan et inkuan to: “Anggapo ni onian agawa odino anengneng manlapu lad samay agew ya impaway na saray Israelita diad dalin na Ehipto ya anggad sayan agew. Nodnonot yo iya,* mantotongtong kayo,+ tan ibaga yod sikami no antoy gawaen.”
Paimanod leksab
^ Odino “pian onkasil so puso yo.”
^ Odino “paliket moy pusom.”
^ Odino “pian onkasil so puso yo.”
^ Literal, “toldam.”
^ Odino posiblin, “tan manlingkor ak ed abung nen Jehova.”
^ Odino “impanlalaok a kakanen na ayep.”
^ Odino “abuso yo ra tan gawa yo no antoy maabig ed pakanengneng yo.”
^ Odino “Ipapuso yo iya.”
