Numeros 29:1-40
29 “‘Tan diad unonan agew na komapiton bulan, nepeg kayon manggawa na masanton pandaragup. Agkayo mankikimey na ambelat.+ Paknol yoy trumpeta ed satan ya agew.+
2 Mangiyapay kayo na sakey a kilaw a kalakian a baka, sakey a kilaw a karnero, tan pitoran kalakian a kordero a saratan et mantaon na sakey, nepeg ya andiay depekto iratan ya amin, bilang apay a popoolan a walaay ambalingit* ya angob parad si Jehova,
3 tan kaiba na saratan so apay a kakanen a gawad pinon arina a nilaokay larak, a taloran kakaplo na sakey sukat ya efa parad kalakian a baka, duaran kakaplon sukat parad kalakian a karnero,
4 tan sakey a kakaplon sukat parad kada sakey ed saray pitoran kalakian a kordero,
5 tan sakey a kilaw a kalakian a kanding bilang apay parad kasalanan pian makapanggaway pananakbong parad sikayo.
6 Kaaruman iyad samay binulan ya apay a popoolan tan say kaiba ton apay a kakanen+ tan say regular ya apay a popoolan tan say kaiba ton apay a kakanen,+ pati saray apay ya iinumen,+ unong ed kaslakan lan gagawaen ed saratan, bilang ambalingit* ya angob, sakey ya apay a pinoolan parad si Jehova.
7 “‘Tan diad komasamplon agew na satan a komapiton bulan et nepeg kayon manggawa na masanton pandaragup,+ tan nepeg yon pairapen so sarili yo.* Agkayon balot mankikimey.+
8 Tan mangiyapay kayo na sakey a kilaw a kalakian a baka, sakey a kalakian a karnero, tan pitoran kalakian a kordero a saratan et mantaon na sakey, nepeg ya andiay depekto+ iratan ya amin, bilang apay a popoolan a walaay ambalingit* ya angob parad si Jehova.
9 Tan kaiba na saratan so apay a kakanen a gawad pinon arina a nilaokay larak, a taloran kakaplon sukat parad kalakian a baka, duaran kakaplon sukat parad samay sakey a kalakian a karnero,
10 sakey a kakaplon sukat parad kada sakey ed saray pitoran kalakian a kordero,
11 tan sakey a kilaw a kanding bilang apay parad kasalanan, likud nid samay apay parad kasalanan ya onkanan pananakbong+ tan samay regular ya apay a popoolan tan say kaiba ton apay a kakanen, a kaiba na apay ya iinumen.
12 “‘Tan diad koma-15 agew na komapiton bulan et nepeg kayon manggawa na masanton pandaragup. Agkayo mankikimey na ambelat, tan selebraan yo so piesta parad si Jehova ed loob na pitoran agew.+
13 Tan mangiyapay kayo na 13 kilaw a kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin, bilang apay a popoolan+ a walaay ambalingit* ya angob parad si Jehova.
14 Tan kaiba na saratan so apay a kakanen a gawad pinon arina a nilaokay larak, a taloran kakaplon sukat parad kada sakey ed saray 13 kalakian a baka, duaran kakaplon sukat parad kada sakey ed saray 2 kalakian a karnero,
15 tan sakey a kakaplon sukat parad kada sakey ed saray 14 a kalakian a kordero,
16 tan sakey a kilaw a kanding bilang apay parad kasalanan, likud nid samay regular ya apay a popoolan, tan say kaiba ton apay a kakanen tan apay ya iinumen.+
17 “‘Tan diad komaduan agew et 12 kilaw a kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
18 pati samay kaiban apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen,
19 tan sakey a kilaw a kanding bilang apay parad kasalanan, likud nid samay regular ya apay a popoolan tan say kaiba ton apay a kakanen tan apay ya iinumen.+
20 “‘Tan diad komatlon agew et 11 a kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
21 tan kaiba na saratan so apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen,
22 tan sakey a kanding bilang apay parad kasalanan, likud nid samay regular ya apay a popoolan tan say kaiba ton apay a kakanen tan apay ya iinumen.+
23 “‘Tan diad komapat ya agew et 10 kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
24 kaiba na saratan so apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen,
25 tan sakey a kilaw a kanding bilang apay parad kasalanan, likud nid samay regular ya apay a popoolan, tan say kaiba ton apay a kakanen tan apay ya iinumen.+
26 “‘Tan diad komaliman agew et 9 kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
27 tan kaiba na saratan so apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen,
28 tan sakey a kanding bilang apay parad kasalanan, likud nid samay regular ya apay a popoolan tan say kaiba ton apay a kakanen tan apay ya iinumen.+
29 “‘Tan diad komanem ya agew et 8 kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
30 tan kaiba na saratan so apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen,
31 tan sakey a kanding bilang apay parad kasalanan, likud nid samay regular ya apay a popoolan, tan say kaiba ton apay a kakanen, tan saray apay ya iinumen.+
32 “‘Tan diad komapiton agew et 7 kalakian a baka, 2 kalakian a karnero, tan 14 a kalakian a kordero a saratan et mantaon na sakey, nepeg ya andiay depekto+ iratan ya amin,
33 tan kaiba na saratan so apay a kakanen tan saray apay ya iinumen parad saray kalakian a baka, saray kalakian a karnero, tan saray kalakian a kordero unong ed bilang da a singa ed kaslakan lan gagawaen ed saratan,
34 tan sakey a kanding bilang apay parad kasalanan, likud nid samay regular ya apay a popoolan, tan say kaiba ton apay a kakanen tan apay ya iinumen.+
35 “‘Diad komawalon agew et nepeg kayon manggawa na sagradon pantitipon. Agkayo mankikimey na antokaman ya ambelat.+
36 Mangiyapay kayo na sakey a kalakian a baka, sakey a kalakian a karnero, tan pitoran kalakian a kordero a saratan et mantaon na sakey, nepeg ya andiay depekto+ iratan ya amin, bilang apay a popoolan a walaay ambalingit* ya angob parad si Jehova,
37 tan kaiba na saratan so apay a kakanen tan saray apay ya iinumen parad kalakian a baka, kalakian a karnero, tan saray kalakian a kordero unong ed bilang da a singa ed kaslakan lan gagawaen,
38 tan sakey a kanding bilang apay parad kasalanan, likud nid samay regular ya apay a popoolan tan say kaiba ton apay a kakanen tan apay ya iinumen.+
39 “‘Saraya so iyapay yo ed si Jehova diad saray piesta yo,+ a kaaruman ed saray apay ya insipan yo+ tan saray boluntaryon apay yo+ bilang saray apay yon popoolan+ tan apay yon kakanen+ tan apay yon iinumen+ tan saray bagat yon pandurungoan.’”+
40 Imbaga nen Moises ed saray Israelita so amin ya ingganggan nen Jehova ed sikato.
Paimanod leksab
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “kamarerwa yo.” Say pamairap ed sarili et kaslakan a manutukoy ed nanduruman klase na restriksion ed sarili, a kaiba so panag-ayunal.
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “makapakepay liknaan; makapakalmay liknaan.” Literal, “makapainawa.”
