Levitico 26:1-46
26 “‘Agkayo manggagaway andi-kakanaan a dirios parad sikayo,+ tan agkayo mangipapaalagey na inukit ya imahen+ odino sagradon lusek parad sikayo, tan agkayo mangileletneg na baton imahen+ diad dalin yo pian pandakmomoan yo;+ ta siak si Jehova a Dios yo.
2 Ngilinan yo iray sabaton ko tan igalang* yoy santuaryok. Siak si Jehova.
3 “‘No mantultuloy kayon ontumbok ed saray totontonen ko tan sumpalen yo iray ganggan ko tan unoren yo iratan,+
4 ikdan ta kayoy uran diad dugan panaon,+ tan say dalin et mamawala na bunga to,+ tan saray kiew ed uma et manbunga.
5 Say panaon na panag-ilik yo et mantultuloy ya anggad panagburbor na ubas, tan say panagburbor na ubas et mantultuloy ya anggad panaon na panagtanem; tan kanen yoy tinapay yo ya anggad napesel kayo tan maligen kayon manayam ed dalin yo.+
6 Mangiyan ak na kareenan diad dalin,+ tan ondukol kayo ya anggapoy manaktakot ed sikayo;+ tan paandien kod dalin iray masesebeg ya atap ya ayep, tan ag-ondalan so espada na guerra ed dalin yo.
7 Seguradon usilan yo iray kakabusol yo, tan natumba ra ed arapan yo diad panamegley na espada.
8 Usilan na limara ed sikayo so 100, tan usilan na 100 ed sikayo so 10,000, tan natumba ed arapan yo iray kakabusol yo diad panamegley na espada.+
9 “‘Ipaarap koy panangabobon ko* ed sikayo tan pagmaliwen ta kayon mabunga tan parakelen ta kayo,+ tan tooren koy impisipanan ko ed sikayo.+
10 Kakanen yo ni labat so datin inani yo ed apalabas a taon et kaukolan yo lan ibantak itan pian walay panginan ed balon aanien.
11 Tan ipasen ko so tabernakulok diad pegley yo,+ tan agta kayo ipulisay.*
12 Manakar ak ed limog yo tan magmaliw ak a Dios yo,+ tan sikayoy magmaliw a totook.+
13 Siak si Jehova a Dios yo, ya angipaway ed sikayo ed dalin na Ehipto pian agda kayo la naaripen, tan pinuter ko iray pako yo tan impanakar ta kayo ya akatangwa so ulo yo.*
14 “‘Balet no agyo ak dengelen odino agyo unoren irayan amin a ganggan,+
15 tan no ipulisay yo iray totontonen ko,+ tan busolen yo* iray ganggan ko ta pian agyo unoren so amin a bilin ko, tan sumlangen yoy sipanan ko,+
16 gawaen ko iraya ed sikayo: Dusaen ta kayo ed panamegley na gonigon, sakit ed bala tan mangapoy-apoy ya inagem, tan pakapuyen ko iray mata yo tan kalkalnan naandi so bilay* yo. Anggapoy kakanaan na pantanem yoy bini, ta kanen itan na saray kakabusol yo.+
17 Onsumpa ak ed sikayo, tan taloen kayo na saray kakabusol yo;+ tan gatinan kayo na saramay mamubusol ed sikayo,+ tan ombatik kayo anggaman anggapoy manguusil ed sikayo.+
18 “‘Balet no siansia nin agyo ak dengelen, maminpito ta kayon disiplinaen lapud saray kasalanan yo.
19 Buyaken ko so alabas ya inkamapaatagey yo tan gawaen kon singa balatyang so tawen yo+ tan singa gansa so dalin yo.
20 Iyupot yoy biskeg yo ed andi-kakanaan, ta agmamawala na bunga so dalin yo,+ tan agmanbunga iray kiew ed dalin.
21 “‘Balet no mantultuloy kayon onsumpa ed siak tan agyo ak dengelen, diad satan et dusaen ta kayo ya anggad maminpiton danay, unong ed saray kasalanan yo.
22 Ibakik ed limog yo iray atap ya ayayep ed uma,+ tan upoten da iray ananak yo+ tan saray ayayep yo tan paraiseten da kayo, tan anggapo lay ondalan ed saray karsada yo.+
23 “‘Balet no siansia nin agkayo paipetek+ tan ipilit yoy onsumpad siak,
24 diad satan et onsumpa ak met ed sikayo, tan maminpito ta kayon dusaen lapud saray kasalanan yo.
25 Iyakar kod sikayo so espada ya ombales lapud impanumlang yo ed sipanan.+ No mantitipon kayo ed saray syudad yo, idapok so sakit ed pegley yo,+ tan niyawat kayo ed lima na sakey a kabusol.+
26 Sano deralen ko iray suplay* na tinapay* yo,+ nayarian ya iluto na samploran bibii so tinapay yo diad saksakey a pugon tan apagen day tinapay yo unong ed kabelat;+ tan mangan kayo balet agkayo napesel.+
27 “‘No siansia nin agyo ak dengelen tan ipilit yoy onsumpad siak,
28 lalon onsumpa ak ed sikayo,+ tan siak a mismo so maminpiton mandisiplina ed sikayo lapud saray kasalanan yo.
29 Kanian kanen yoy laman na saray ananak yon lalaki, tan kanen yoy laman na saray ananak yon bibii.+
30 Upoten ko iray sagradon atagey a pasen yo+ tan itumbak iray panagpoolan yoy insenso tan ibunton ko iray bangkay yo ed tapew na saray andiay-bilay a makapadimlan idolo* yo,+ tan arawian ta kayo* lapud pandimla.+
31 Deralen ko iray syudad yo tan saray santuaryo yo ed panamegley na espada,+ tan agko panliketan so ambalingit* ya angob na saray bagat yo.
32 Pagmaliwen kon agnapanayaman so dalin,+ tan saray kakabusol yon manaayam ditan et nengnengen da itan tan mankelaw ira.+
33 Tan itaytayak ta kayo ed saray nasyon,+ tan manguyos ak na espadan mangusil ed sikayo;+ tan pagmaliwen kon agnapanayaman so dalin yo,+ tan naderal iray syudad yo.
34 “‘Diad satan a panaon et bayaran na dalin iray sabaton to diad amin ya agew a napaulyanan itan, legan a wala kayod dalin na saray kakabusol yo. Diad satan a panaon et manpainawa* so dalin, pian bayaran to iray sabaton to.+
35 Manpainawa itan diad amin ya agew a napaulyanan itan, ta ag-itan akapanpainawa legan na saray sabaton yo sanen manaayam kayo ditan.
36 “‘Nipaakar ed saramay makaliktar,+ panoen ko na gonigon so puso ra diad saray dalin na kakabusol da; tan ombatik ira lapud tanol na nititikyab a bulong, tan ombatik iran singa samay ombabatik lapud espada tan natumba ra anggano anggapoy onuusil ed sikara.+
37 Natumtumba tan mantatapilan ira a singa saramay ombabatik lapud espada, anggano anggapoy onuusil ed sikara. Agyo nayarian a labanan iray kakabusol yo.+
38 Ompatey kayo ed limog na saray nasyon,+ tan akmonen kayo na dalin na saray kakabusol yo.
39 Saramay natilak ed sikayo et nabulok diad saray dalin na kakabusol yo+ lapud saray kasalanan yo. On, nabulok ira lapud saray kasalanan na kaamaan da.+
40 Diad satan et ipatua da iray kasalanan da+ pati say kasalanan tan ag-impanmatoor na kaamaan da, tan bidbiren dan ag-ira nanmatoor lapud insumpa rad siak.+
41 Kanian sinmumpa ak met ed sikara,+ diad impangiyakar ko ed sikara diad dalin na saray kakabusol da.+
“‘Nayarin diad satan et manpaabeba iray ag-asegat* a puso ra,+ tan diad satan et bayaran da so kasalanan da.
42 Tan nonoten koy impisipanan kod si Jacob,+ tan say impisipanan kod si Isaac,+ tan nonoten koy impisipanan kod si Abraham,+ tan nonoten ko so dalin.
43 Sanen tinaynanan da so dalin, binayaran na satan iray sabaton to+ tan apaulyanan itan sanen anggapo ra, tan binayaran da iray kasalanan da, lapud impulisay da iray ganggan ko tan binusol da* iray totontonen ko.+
44 Anggaman ontan, legan a wala rad dalin na saray kakabusol da et agko ra sigpot ya ibeneg+ odino ipulisay ya anggad naupot ira, ta saya so manumlang ed impisipanan ko+ ed sikara, lapud siak si Jehova a Dios da.
45 Nisengeg ed sikara et nodnonoten ko so impisipanan ko ed saray inmuunan atateng da+ ya impaway ko ed dalin na Ehipto diad pakanengneng na saray nasyon,+ pian napaneknekan ko a siak so Dios da. Siak si Jehova.’”
46 Saraya so totontonen, ganggan, tan bilibilin ya inletneg nen Jehova ed baetan to tan saray Israelita diad Palandey Sinai ed panamegley nen Moises.+
Paimanod leksab
^ Odino “pandinayewan.” Literal, “takotan.”
^ Literal, “Onarap ak.”
^ Odino “agkayo ipulisay na kamarerwak.”
^ Literal, “impanakar ta kayoy maptek.”
^ Odino “na kamarerwa yo.”
^ Odino “kamarerwa.”
^ Odino “kakanen.”
^ Literal, “baston.” Posiblin manutukoy ed saray baston a pangisasabitan na tinapay.
^ Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
^ Odino “arawian kayo na kamarerwak.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “manngilin na sabaton.”
^ Odino “benger.”
^ Odino “na kamarerwa ra.”
