Levitico 25:1-55
25 Onia ni inkuan nen Jehova ed si Moises diad Palandey Sinai:
2 “Mitongtong kad saray Israelita tan ibagam ed sikara, ‘Sano akaloob kayo lad dalin ya iter kod sikayo,+ diad satan et ngilinan na dalin so sakey a sabaton parad si Jehova.+
3 Anem taon a taneman moy bukel so umam, tan anem taon a putotan moy sanga so kaubasan mo, tan tiponen mo so bunga na dalin.+
4 Balet diad komapiton taon et walay sabaton na sigpot a pampainawa na dalin, sakey a sabaton parad si Jehova. Agmo nepeg a tanemay bukel so dalin mo odino putotan na sanga so kaubasan mo.
5 Agmo nepeg ya anien iray ilik a tinmubon bukor manlapud saramay atilak kayari na impan-ani, tan agmo nepeg a tiponen iray ubas ed agpinutotan a kaubasan. Nepeg a walay sakey taon a sigpot a pampainawa na dalin.
6 Balet sarag yon kanen iray bunga na dalin legan na sabaton a parad satan; sika, say aripen mon laki tan bii, say uupaan mon trabahador, tan saray dayon miaayam ed sika et nayarin mangan ed satan,
7 ontan met ed saray kokomponien tan atap iran ayayep ed dalin mo. Amin a bunga na dalin et nayarin kanen.
8 “‘Nepeg kan manbilang na pitoran taon na sabaton, maminpito a pitoran taon, kanian saray agew na pitoran taon na sabaton et 49 a taon.
9 Insan paknol mon maksil so tambuyog diad komasamplon agew na komapiton bulan; diad Agew na Pananakbong+ et nepeg yon paknolen so tambuyog pian narengel ed interon dalin yo.
10 Nepeg yon pasantosen so koma-50 taon tan iyabawag yo so kibulos diad amin a manaayam ed dalin.+ Magmaliw itan a sakey a Jubileo parad sikayo, tan ompawil so balang sakey ed kayarian ton dalin tan ompawil so balang sakey ed pamilya to.+
11 Say koma-50 taon et magmaliw a Jubileo parad sikayo. Agkayo mantatanem na bukel odino manaani na ilik a tinmubon bukor manlapud saramay atilak odino mantipon na saray ubas ed agpinutotan iran kaubasan.+
12 Ta sakey itan a Jubileo. Magmaliw itan a masanto parad sikayo. Kanen yo labat iray bungan pawalaen na dalin.+
13 “‘Diad satan a taon na Jubileo et nepeg ya ompawil so balang sakey ed kayarian ton dalin.+
14 No lakoan moy antokaman so kaparam a too, odino no mangaliw kad sikato, agkayo mansasaolan.+
15 No mangaliw kay dalin ed kaparam a too, nepeg mon ikonsidera so bilang na saray taon kayari na Jubileo, tan nepeg a lakoan to ka unong ed nakekera iran taon na panag-ani.+
16 No dakel ni nakekeran taon, nayari ton aruman so bili na satan, balet no daiset lay nakekeran taon, nepeg ton bawasan so bili na satan, ta say ilalako to ed sika et say bilang na tinaon a panag-ani.
17 Agyo sasaolen so kapara yon too,+ tan nepeg yon takotan so Dios yo,+ ta siak si Jehova a Dios yo.+
18 No unoren yo iray totontonen ko tan sumpalen yo iray ganggan ko, maligen kayon manayam ed dalin.+
19 Iter na dalin so bunga to,+ tan mangan kayo ya anggad napenek kayo tan maligen kayon manayam ditan.+
20 “‘Balet no bilang ta ibaga yon: “Antoy kanen mi ed komapiton taon no agkami mantanem na bukel odino mantipon na aanien mi?”+
21 Agkayo mapaga ta iter kod sikayo so bendisyon ko diad komanem a taon, tan say dalin et mamawala na magenap ya aanien parad taloran taon.+
22 Insan mantanem kayoy bukel diad komawalon taon tan say kanen yo anggad komasiam a taon et manlapud samay dati lan inani. Anggad isabi na panag-ani et mangan kayo ed samay dati lan inani.
23 “‘Say dalin et agnepeg a permanentin nilako,+ ta kien ko so dalin.+ Parad siak et dayo tan miaayam kayo labat.+
24 Diad dalin a nakayarian yo, iter yod samay angilako so kanepegan ton manondon ed dalin to.
25 “‘No onirap so bilay na agim tan kaukolan ton ilako so arum ed kayarian to, sakey a mananondon a maapit a kanayon to so nepeg a manondon ed inlako na agi to.+
26 No anggapoy mananondon na sakey, balet sikatoy inmasenso tan wala lay pakasarag ton manondon ed satan,
27 nepeg ton kuentaen so bili na satan unong ed saray taon manlapud impangilako to, tan ipawil to so sulok ed samay too ya angilakoan to. Insan sarag to lay ompawil ed dalin to.+
28 “‘Balet no anggapoy pakasarag ton nabawi itan, samay inlako to et mansiansia ed samay angaliw anggad taon na Jubileo;+ tan nipawil itan ed sikato diad Jubileo, tan sikatoy ompawil ed dalin to.+
29 “‘Natan no say sakey a too et mangilako na abung a walad loob na apadir a syudad, say kanepegan ton manondon et mantultuloy ya anggad sampot na taon manlapud samay panaon ya alako to itan; say kanepegan ton manondon+ et mansiansia ed sakey taon.
30 Balet no agni itan arondon kayari na sakey taon, samay abung a walad loob na apadir a syudad et magmaliw lan permanentin kayarian na samay angaliw ed satan diad amin a henerasyon to. Ag-itan nepeg ya ipawil diad Jubileo.
31 Balet saray abung ed saray pasen ya ag-apaliberan na padir et nibilang a kabiangan na kaumaan. Mantultuloy so kanepegan a narondon itan, tan nepeg ya ipawil itan diad Jubileo.
32 “‘Nipaakar ed saray kaabungan na saray Levita diad loob na saray syudad da,+ walaan na permanentin kanepegan iray Levita a manondon ed saratan.
33 Sano ag-arondon so kayarian na saray Levita, say nilakon abung a walad loob na syudad da et nipawil met diad Jubileo,+ ta saray kaabungan ed saray syudad na saray Levita et kayarian da diad limog na saray Israelita.+
34 Ontan met, say uma a panagpastolan+ a walad liber na saray syudad da et agnayarin ilako, ta permanentin kayarian da itan.
35 “‘No onirap so bilay na agim a kaabay mo tan agto nalegpet so inkasikato, nepeg a sikatoy tulongan mo+ a singa gagawaen mod sakey a dayo tan sakey a miaayam,+ pian sikatoy manbilay a kaibam.
36 Agka mangaala na interes odino manggagaway pakatuboan* mod sikato.+ Nepeg mon takotan so Dios mo,+ tan manbilay so agim a kaibam.
37 Agmo nepeg ya ipautang ed sikato so kuartam a walay interes+ odino ikday naakan pian pakatuboan mo.
38 Siak si Jehova a Dios yo, ya angipaway ed sikayo manlapud dalin na Ehipto+ pian iter ko ed sikayo so dalin na Canaan, pian magmaliw ak a Dios yo.+
39 “‘No onirap so bilay na agim a kaabay mo tan kaukolan ton ilakod sika so sarili to,+ agmo pupuersaen a mankimey a singa aripen.+
40 Nepeg a sikatoy tratoen a singa sakey ya uupaan a trabahador,+ singa sakey a miaayam. Nepeg a sikatoy manlingkor ed sika ya anggad taon na Jubileo.
41 Diad satan et taynan to ka la, sikato tan saray ananak to* a kaiba to, tan ompawil ed pamilya to. Sikatoy nepeg ya ompawil ed kayarian na saray inmuunan atateng to.+
42 Ta ariripen ko ra ya impaway kod dalin na Ehipto.+ Agda nepeg ya ilako so inkasikara a singa pangilako ed sakey ya aripen.
43 Sikatoy agmo nepeg a pairapen,+ tan nepeg mon takotan so Dios mo.+
44 Saray ariripen mon lalaki tan bibii et nepeg a manlapud saray nasyon a walad kaliberliber yo, nayari yon saliwen ed sikara so aripen a laki odino bii.
45 Nayarian yo met so mangaliw na saray aripen ed saray ananak na saray dayon miaayam ed sikayo,+ ed sikara tan ed saray pamilya ran niyanak ed sikara diad dalin yo, tan magmaliw iran kayarian yo.
46 Nayarian yo ran ipatawir ed saray ananak yon ontumbok ed sikayo bilang permanentin kayarian. Nayarian yo ran pankimeyen, balet saray agagi yo, saray Israelita, et agyo nepeg a pairapen.+
47 “‘Balet no onyaman so sakey a dayo odino sakey a miaayam ed sikayo, tan onirap so bilay na sakey ya agi yon asingger ed sikayo tan ilako toy inkasikato ed dayo odino samay miaayam ed limog yo, odino ed sakey a kapamilya na dayo,
48 mansiansia ed sikato so kanepegan a manondon kayari na impangilako tod inkasikato. Sikatoy nayarin dondonen na sakey ed saray agagi to,+
49 odino say pangamaen to odino anak na pangamaen to, odino siopaman a maapit a kanayon to, sakey ed pamilya to, so nayarin manondon ed sikato.
“‘Odino no sikaton mismo so onyaman, nayarian to met a dondonen so inkasikato.+
50 Nepeg ton kuentaen ed samay angaliw ed sikato so panaon manlapud taon na impangilako tod inkasikato anggad taon na Jubileo,+ tan say bili to et mipetekan ed bilang na saray taon.+ Saray agew na impankimey to ed saman a panaon et kuentaen unong ed sueldo na sakey ya uupaan a trabahador.+
51 No dakel ni nakekeran taon, nepeg ton bayaran so bili na panondon ed sikato unong ed saray nakekeran taon.
52 Balet no daiset lay nakekeran taon ya anggad taon na Jubileo, nepeg ton kuentaen ed inkasikato tan bayaran to so bili na panondon ed sikato unong ed saray nakekeran taon.
53 Sikatoy mantultuloy a manlingkor ed katawan to ed kada taon bilang uupaan a trabahador; tan seguroen mon sikatoy agpairapen na katawan to.+
54 Balet no agto nayarian a dondonen so inkasikato ed sarayan kondisyon, sikato lay nibulos ed taon na Jubileo,+ sikato tan saray ananak to* a kaiba to.
55 “‘Ta saray Israelita et ariripen ko. Sikara so ariripen ko ya impaway kod dalin na Ehipto.+ Siak si Jehova a Dios yo.
Paimanod leksab
^ Odino “mangaalay alablabas ya interes.”
^ Literal, “saray ananak ton lalaki.”
^ Literal, “saray ananak ton lalaki.”
