Levitico 1:1-17
-
Say apay a popoolan (1-17)
1 Tan tinawag nen Jehova si Moises tan akitongtong ed sikato manlapud tolda a pantitiponan,+ ya inkuan to:
2 “Mitongtong kad saray Israelita,* tan ibagam ed sikara, ‘No siopaman ed sikayo et mangiyapay ed si Jehova na bagat a manlapud saray kokomponien ya ayayep, nepeg a say iyapay to et manlapud pulok na saray baka odino karnero.+
3 “‘No say apay to et sakey ya apay a popoolan a manlapud pulok na saray baka, nepeg ya andiay depekto a kalakian ya ayep so iyapay to.+ Mabulos ton iyapay itan+ ed arapan nen Jehova diad lolooban na tolda a pantitiponan.
4 Itapew toy lima to diad ulo na ayep ya apay a popoolan, tan awaten itan parad sikato pian onkanan pananakbong parad sikato.
5 “‘Insan pakgeran so kilaw a kalakian a baka diad arapan nen Jehova, tan iyapay na saray ananak nen Aaron, saray saserdote,+ so dala tan iwalsik da iyan dala ed amin a diking na altar,+ a walad lolooban na tolda a pantitiponan.
6 Nepeg a katatan tan tegtegtegen so apay a popoolan.+
7 Iyan na saray ananak nen Aaron, saray saserdote, so apoy ed altar+ tan ilira da so kiew diad apoy.
8 Ilira na saray ananak nen Aaron, saray saserdote, iray tegteg+ a pati say ulo tan say taba* diad tapew na kiew a walad apoy na altar.
9 Nepeg ya urasan iray pait tan sali na satan, tan paaseweken itan ya amin na saserdote diad altar bilang apay a popoolan, sakey ya apay a pinoolan a walaay ambalingit* ya angob parad si Jehova.+
10 “‘No say apay to parad apay a popoolan et manlapud pulok na saray karnero,+ saray kilaw a kalakian a karnero odino kanding, nepeg ya andiay depekto a kalakian so iyapay to.+
11 Pakgeran itan diad bandad amianen a diking na altar ed arapan nen Jehova, tan iwalsik na saray ananak nen Aaron, saray saserdote, so dala diad amin a diking na altar.+
12 Tegtegtegen to itan, a pati say ulo tan taba* na satan, tan ilira iratan na saserdote diad tapew na kiew a walad apoy na altar.
13 Urasan to iray pait tan sali, tan amin itan et iyapay na saserdote tan paaseweken to ed altar. Apay itan a popoolan, sakey ya apay a pinoolan a walaay ambalingit* ya angob parad si Jehova.
14 “‘Balet, no sikatoy mangiyapay na saray manok bilang apay a popoolan parad si Jehova, nepeg a say iyapay to et saray palekpek odino sibong a malapati.+
15 Iyapay itan na saserdote diad altar tan yesyesen to so ulo na satan tan paaseweken tod altar, balet nepeg ton ipaikik so dala ed diking na altar.
16 Nepeg ton ekalen so balon-balonan tan saray bago na satan tan ibantak to iratan diad abay na altar, a kawalaan na saray dapol,*+ diad bandad bukig.
17 Pisagen to itan ed saray payak balet agto itan pansianen. Insan paaseweken itan na saserdote diad altar diad tapew na kiew a walad apoy. Sakey itan ya apay a popoolan, sakey ya apay a pinoolan a walaay ambalingit* ya angob parad si Jehova.
Paimanod leksab
^ Literal, “lalakin ananak nen Israel.”
^ Odino “taba ed liber na saray bato.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “taba ed liber na saray bato.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “saray dapol a nantaba,” salanti, saray dapol ya atalem ed taba na saray bagat.
^ Odino “makapakepay liknaan; makapakalmay liknaan.” Literal, “makapainawa.”
