Josue 3:1-17
-
Binmaliw ed Jordan so Israel (1-17)
3 Insan asakbay a binmangon ed kabuasan si Josue, tan sikatoy binmuat manlapud Sitim+ a kaiba toy amin ya Israelita* tan akasabi rad Jordan. Nansanlabi ra diman antis iran binmaliw.
2 Kayari na taloy agew, linmiber ed kampo iray opisyal+
3 tan oniay ingganggan dad saray totoo: “Sano nanengneng yo so kaban na sipanan nen Jehova a Dios yo a sasakbaten na saray saserdoten Levita,+ ombuat kayo la, tan tumbok yo itan.
4 Balet ondistansia kayo na manga 2,000 kasiko* manlapud satan; agyo itan aasinggeran, pian naamtaan yo no dinan a dalan so laen yo, ta agyo ni asali so dinmalan ditan.”
5 Inkuan natan nen Josue ed saray totoo: “Pasantos yoy inkasikayo,+ ta nabuas et manggawa si Jehova na makapakelaw iran bengatla diad sikayo.”+
6 Insan inkuan nen Josue ed saray saserdote: “Sakbat yo so kaban+ na sipanan tan la kayod unaan na saray totoo.” Kanian sinakbat da so kaban na sipanan tan linma rad unaan na saray totoo.
7 Insan oniay inkuan nen Jehova ed si Josue: “Diad sayan agew et itandoro ta ka ed pakanengneng na interon Israel,+ pian naamtaan da a wala ak ed sika+ no panon a wala ak ed si Moises nensaman.+
8 Oniay iganggan mo ed saray saserdote a manasakbat ed kaban na sipanan: ‘Kasabi yod tambib na Jordan, lasur kayod danum tan manalagey kayo.’”+
9 Tan inkuan nen Josue ed saray Israelita: “Gali dia, tan dengel yo iray imbaga nen Jehova a Dios yo.”
10 Insan inkuan nen Josue: “Diad saya et naamtaan yon walad limog yo so sakey a mabilay a Dios,+ tan seguradon pataynanen tod arapan yo iray Canaanita, Heteo, Heveo, Perizeo, Girgaseo, Amoreo, tan saray Jebuseo.+
11 Say kaban na sipanan na Katawan ed interon dalin et ombaliw ed Jordan diad unaan yo.
12 Mangala kayo natan na 12 lalaki manlapud saray tribu na Israel, sakey a laki ed kada tribu,+
13 tan sano akagatin lad danum na Jordan iray dapan na saserdote a manasakbat ed Kaban na sipanan nen Jehova, say Katawan ed interon dalin, ontundan tampol iray danum na Jordan ya onaagus manlapud tagey, tan magmaliw iratan a singa sakey a dam.”*+
14 Kanian sanen binmuat iray totoo manlapud saray tolda ra antis na ibaliw da ed Jordan, linmad unaan da iray saserdote a manasakbat ed kaban+ na sipanan.
15 Sanen akasabi ed Jordan iray saserdoten manasakbat ed Kaban tan akadakat lad danum iray sali ra (onleleppua so Jordan ed saray tambib+ to diad kada panaon na panag-ani),
16 tinmunda iray danum ya onaagus manlapud tagey. Nagmaliw iratan a singa sakey a dam* ed arawi, diad Adan, say syudad diad abay na Zaretan, tan naupot iramay onaagus a paarap ed Dayat na Araba, say Dayat na Asin.* Tinmunda iratan, tan binmaliw iray totoo diad petek na Jerico.
17 Legan a saray saserdote a manasakbat ed kaban na sipanan nen Jehova et akaalagey ed amagan dalin+ diad pegley na Jordan, binmaliw so interon Israel diad amagan dalin+ ya anggad akabaliw lad Jordan so interon nasyon.
Paimanod leksab
^ Literal, “lalakin ananak nen Israel.”
^ Manga 890 metro (2,920 piye). Nengnengen so Apendise B14.
^ Odino “padir.”
^ Odino “padir.”
^ Salanti, say Inatey a Dayat.
