Job 1:1-22
1 Walay sakey a laki diad dalin na Uz a manngaran na Job.*+ Sikatoy maptek a too a walaay integridad;*+ tatakotan toy Dios tan aarawian toy kaugsan.+
2 Pitora so anak ton lalaki tan talora so anak ton bibii.
3 Saray ayayep to et manbilang na 7,000 karnero, 3,000 kamelyo, 1,000 baka,* tan 500 ya asno,* tan dakdakel so ariripen to, kanian sikato so sankayamanan ed amin a taga Bukig.
4 Kada anak ton laki et mangipaparaan na ponsia ed dilin abung to diad agew a nigana ed sikato.* Iimbitaan da ray taloran agagi ran bibii a mangan tan oninum a kaiba ra.
5 Sano nasumpal lay nantutumbokan ya agew na ponsia, ipapatawag ira nen Job pian linisan day inkasikara. Insan sikatoy masakbay ya ombangon diad kabuasan pian mangiyapay na saray bagat a popoolan+ parad kada sakey ed sikara. Ta inkuan nen Job: “Ompan nankasalanan iray anak ko tan diad puso ra et minudmora day Dios.” Ontan so naynay a gagawaen nen Job.+
6 Natan et sinmabi so agew a linma iray ananak na tuan Dios*+ pian onarap ed si Jehova,+ tan si Satanas+ et linma met a kaiba ra.+
7 Inkuan nen Jehova ed si Satanas: “Iner so nilam?” Et inmebat si Satanas ed si Jehova: “Nanliberliber ak diad dalin tan nanakar-akar ak diman.”+
8 Tan inkuan nen Jehova ed si Satanas: “Naimanom tay* lingkor kon si Job? Anggapoy miparad sikato diad dalin. Sikatoy maptek a too a walaay integridad,*+ tatakotan toy Dios tan aarawian toy kaugsan.”
9 Et inmebat si Satanas ed si Jehova: “Anggapo kasi rason no akin a tatakotan nen Job so Dios?+
10 Agta sikatoy proprotektaan mo, ya angiyan kay alar ed paliber to+ tan ed abung to tan ed amin a walad sikato? Benendisyonan mo ray kimey na lima to,+ tan pinarakel mo iray ayayep to.
11 Balet salim pan iyunat so limam tan paandim so amin a walad sikato, seguradon mudmoraen to ka ya arap-arapan.”
12 Diad saman et inkuan nen Jehova ed si Satanas: “Amin a kayarian to et walad limam.* Basta sikatoy agmo didiwiten!” Kanian tinmaynan si Satanas ed arapan* nen Jehova.+
13 Diad samay agew a saray anak ton lalaki tan bibii et mamangan tan oniinum na alak diad abung na panguloan a kuya ra,+
14 walay sinmabin mensahero ed si Job, tan inkuan to: “Sanen manbabaka iray baka tan mankakabkab iray asno diad abay da,
15 inmataki iray Sabeo tan inaala da iratan, tan pinapatey dad espada iray lingkor. Siak labat so akabatik a mangibagad sika.”
16 Legan ton mansasalita, wala ni sakey a sinmabi tan inkuan to: “Pinmelag manlapud tawen so apoy a nanlapud Dios* tan apoolan iray karnero tan saray lingkor tan naupot iran amin! Siak labat so akabatik a mangibagad sika.”
17 Legan ton mansasalita, wala lamet so sinmabi tan inkuan to: “Walay taloran grupo na saray Caldeo+ a linmusob tan inaala da ray kamelyo, tan pinapatey dad espada iray lingkor. Siak labat so akabatik a mangibagad sika.”
18 Legan ton mansasalita, wala ni lamet so sakey a sinmabi tan inkuan to: “Saray anak mon lalaki tan bibii et mamangan tan oniinum na alak diad abung na panguloan a kuya ra.
19 Et biglan sinmabi so maksil a dagem manlapud kalawakan, tan binmasig ed apatiran suyok na abung, et nagba so abung tan pinmata ed saray anak mo kanian inaatey ira. Siak labat so akabatik a mangibagad sika.”
20 Diad satan et inmalagey si Job tan pinilat toy kawes to tan kiniskisan toy ulo to; insan sinmubsob ed dalin tan dinmakmomo
21 tan inkuan to:
“Labos ak a pinmaway ed eges nen inak,Tan labos ak met ya ompawil.+
Si Jehova so angiter,+ tan si Jehova met so angala.
Mantultuloy komon a narayew so ngaran nen Jehova.”
22 Diad sayan amin ya agawa et agnankasalanan si Job, tan agto imbagan say Dios et manggagawa na antokaman a mauges.*
Paimanod leksab
^ Odino “Sikatoy andiay pakabalawan tan maptek a too.”
^ Nayarin mankabaliksay “Puntirya na Isusumpa.”
^ Literal, “500 a paris na baka.”
^ Literal, “kabatyan iran asno.”
^ Odino “diad abung na kada sakey no turno to.”
^ Sakey a balikas ed Hebreo ya ontutukoy ed saray anghel ya ananak na Dios.
^ Literal, “Inteen mo tay pusom ed.”
^ Odino “ya andiay pakabalawan tan maptek a too.”
^ Odino “walad pakayarim.”
^ Literal, “lupa.”
^ Odino posiblin, “so kirmat.”
^ Odino “anggapoy agmanepeg a bengatlan imbaga to ed Dios.”
