Jeremias 51:1-64
51 Oniay inkuan nen Jehova:
“Pasiplogen koy makaderal a dagemEd Babilonia+ tan saray manaayam ed Leb-kamai.*
2 Ibakik ed Babilonia iray managtaep,Tan sikatoy taepan da tan upoten da iray walad dalin to;Onlusob ira ed sikato tan paliberan da diad agew na kaderal to.+
3 Agla pinaten* na managpana so pana to.
Tan anggapoy onalagey ya akasulong na samben ed pagew.
Agyo kakasian iray kalangweran a lalaki ditan.+
Deral yoy interon armada to.
4 Tan ompatey ira ed dalin na saray Caldeo,Ya aduyok-duyok diad saray karsada to.+
5 Agtinaynan nen Jehova na saray armada so Israel tan Juda, kanian ag-ira nagmaliw a singa saray abalon bibii.+
Balet napno na kasalanan so dalin da* diad pakanengneng na Masanton Dios na Israel.
6 Taynan yoy Babilonia,Tan iliktar yoy bilay* yo.+
Agyo abuloyan ya ompatey kayo lapud kasalanan to.
Ta saya so panaon na panangibales nen Jehova.
Ibales tod sikato so ginawa to.+
7 Nensaman, say Babilonia et sakey a balitok a kopa ed lima nen Jehova;Binuek to so interon dalin.
Ininum na saray nasyon so alak to;+Kanian kinmiwas iran singa atapis.+
8 Biglan naplag so Babilonia, kanian aderal.+
Ugaog kayo lapud sikato!+
Mangala kayoy tambal a balsamo parad panotot to; agla pigan sikatoy onabig ni.”
9 “Sinali min paabigen so Babilonia, balet agla onabig.
Taynan yo la tan onla tayo lan amin ed dilin dalin tayo.+
Ta sinmabi anggad tawen so panangukom ed sikato;Singa itan katagey na saray lurem.+
10 Inikdan itayo nen Jehova na hustisya.+
Gali, ta isalaysay tayo ed Sion so ginawa nen Jehova a Dios tayo.”+
11 “Iyubol yo ray pana;+ iparaan yo ray panagsamper.*
Pinakiwas nen Jehova so espiritu na arari na Medo,+Lapud gagala ton deralen so Babilonia.
Ta saya so panangibales nen Jehova, say panangibales parad templo to.
12 Mangitagey kayo na tanda*+ sumpad saray padir na Babilonia.
Eletan yoy panagbantay, mangipuesto kayo na saray managbantay.
Iparaan yo la iramay mantambang.
Ta si Jehova so nanggawa na estratehiya,Tan gawaen toy insipan to sumpad saray manaayam ed Babilonia.”+
13 “O biin manaayam ed tapew na dakerakel a danum,+A walaay dakel a kayamanan,+Sinmabi lay panampot mo tan say anggaan* na panagpatubom.+
14 Si Jehova na saray armada et nansamba ed ngaran to,*‘Panoen ta ka na saray lalaki, a singa karakel na saray duron,Tan oneyag ira lapud atalo da ka.’+
15 Sikato so amalsa na dalin ed panamegley na pakayari to,Say angiletneg ed mabunan dalin diad panamegley na karunongan to+Tan say angibilkag ed tawen diad panamegley na pakatalos to.+
16 Sano iparengel toy boses to,Onungol iray danum ed tawen,Tan papaatageyen to ray lurem* manlapud saray sampot na dalin.
Sikatoy mamapawala na kirmat parad* uran,Tan ipapaway toy dagem manlapud saray pasen a panagsimpenan to.+
17 Kada too et kinmiwas ya agmakatunongan tan andiay kakabatan.
Nabaingan so kada latero lapud ginawa ton imahen;+Ta katilaan so ginawa ton metal ya imahen,Tan andian iratan na espiritu.*+
18 Saratan et ilusyon,*+ sakey a kimey a naludlurey.
Naandi iratan sano onsabi so agew na pikuentaan ed sikara.
19 Say Apag na Jacob et aliwan singa sarayan bengatla,Ta sikato so amorma ed amin a bengatla,Anggan say baston na tawir to.+
Say ngaran to et Jehova na saray armada.”+
20 “Sakey kan pekpek ya usaren kod guerra, sakey ya armas ed panlalaban,Ta mekmeken ko ray nasyon diad panamegley mo,
Tan deralen ko ray panarian.
21 Diad panamegley mo et mekmeken ko so kabayo tan samay akalugan.
Diad panamegley mo et mekmeken ko so karwahen pan-guerra tan samay akalugan.
22 Diad panamegley mo et mekmeken ko so laki tan bii,
Say masiken tan ugaw,
Tan say balolaki tan marikit.
23 Tan diad panamegley mo et mekmeken ko so managpastol tan say pulok to,
Say dumaralus tan saray ayayep a pambabaka to,
Tan saray gobernador tan saray kasandin manuley.
24 Tan ombales ak ed Babilonia tan ed amin a manaayam ed CaldeaLapud amin a kaugsan a ginawa ra ed Sion diad arapan yo,”+ so imbaga nen Jehova.
25 “Onsumpa ak ed sika,+ O sikan palandey a managderal,” so imbaga nen Jehova,“Sikan managderal ed interon dalin.+
Iyunat koy limak sumpad sika tan ipatulin ta ka manlapud saray angkakabaleg a batoTan pagmaliwen ta kan palandey ya apoolan.”
26 “Saray totoo et agla mangala ed sika na bato parad suyok odino bato parad pundasyon,Ta magmaliw kan pasen ya agnapanayaman ed andi-anggaan,”+ so imbaga nen Jehova.
27 “Mangitagey kayoy tanda* diad dalin.+
Paknol yoy tambuyog ed limog na saray nasyon.
Manuro* kayo na saray nasyon a miguerra ed sikato.
Patawag yo ray panarian na Ararat,+ Mini, tan Askenaz+ a milaban ed sikato.
Mamili kayo na opisyal na armada a milaban ed sikato.
Patatdang yo ray kabayo a singa saray mabagon duron.
28 Manuro* kayo na saray nasyon a miguerra ed sikato,Saray arari na Media,+ saray gobernador to tan amin a kasandin manuley to,Tan amin a dalin ya uuleyan da.
29 Tan onyegyeg tan onggiwgiw so dalin,Ta nagawa so ninonot nen Jehova sumpad Babilonia,Pian say dalin na Babilonia et magmaliw a pakataktakotan, tan anggapoy manayam ditan.+
30 Tinmunda lan milaban iray sundalo na Babilonia.
Yinmurong la rad saray pasen a pansasalimbengan da.
Anggapo lay biskeg da.+
Nagmaliw iran singa bibii.+
Apoolan iray ayaman to.
Aderal iray balewet to.+
31 Ombatik so sakey a manangipasabi na mensahe pian onabet ed sananey a manangipasabi na mensahe,Tan onabet so sakey a mensahero ed sananey a mensahero,Pian ibalita ra ed ari na Babilonia ya asakop lay interon syudad to,+
32 Asaraan la ray atapew a kulos,+Pinoolan da ray baloto a gawad papiro,Tan ataktakot iray sundalo.”
33 Ta oniay inkuan nen Jehova na saray armada, say Dios na Israel:
“Say anak a bii na Babilonia et singa panag-ilikan.
Panaon la pian sikatoy gatin-gatinan.
Maganggano lan onsabid sikato so panaon na panag-ani.”
34 “Inakmon ak nen Arin Nabucodonosor* na Babilonia;+Winetwet to ak.
Inggaton to ak a singa pananginan ya anggapoy karga.
Inakmon to ak a singa impangakmon na baleg ya uleg;+Pinano toy eges to na mararakep a kayarian ko.
Imbantak to ak.
35 ‘Nagawa met komon ed Babilonia so inkaruksan agawa ed siak tan ed inkatook!’ so inkuan na biin manaayam ed Sion.+
‘Tan nasingil komon iray manaayam ed Caldea lapud dalak!’ so inkuan na Jerusalem.”
36 Kanian oniay inkuan nen Jehova:
“Idepensak so kasom,+Tan ombales ak parad sika.+
Paekaten koy dayat to tan saray bobon to.+
37 Tan magmaliw a bunton na saray bato so Babilonia,+Ya ayaman na saray ason jakal,+Pakataktakotan tan balbalawen,*Tan anggapoy manayam ditan.+
38 Onaglem iran amin a singa saray malangwer a leon.*
Onngernger ira a singa saray kilaw a leon.”
39 “Sano pinasyay pilalek da, itaryaan ko ra na ponsia tan bueken ko ra,Pian manliket ira;+Insan onugip ira ed andi-anggaan,Tan agla ra nabangon,”+ so imbaga nen Jehova.
40 “Iyakar ko ra ed panagpateyan a singa saray kordero,Singa saray kalakian a karnero a kaiba iray kanding.”
41 “O agaylay impakasakop ed Sesac,*+Agaylay impakarel ed syudad ya indayew na amin a totoo!+
Agaylay impagmaliw na Babilonia a sakey a pakataktakotan na saray nasyon!
42 Sinmapat so dayat ed Babilonia.
Sikatoy asakbongan na saray daluyon.
43 Saray syudad to et nagmaliw a pakataktakotan, dalin ya andiay danum tan sakey a desierto.
Dalin ya agpanayaman na too, tan anggapoy ondalan ditan.+
44 Iteen koy imanok ed si Bel+ diad Babilonia,Tan ipaway kod sangi to imay inakmon to.+
Agla ondagsa ed sikato iray nasyon.Tan nageba so padir na Babilonia.+
45 Paway kayo ed pegley to, O totook!+
Iliktar yoy bilay* yo+ manlapud mandarlang a sanok nen Jehova!+
46 Agkayo ontatalaw odino ontatakot ed balita a narengelan ed dalin.
Diad sakey a taon, onsabi so balita,Tan diad onsublay a taon, onsabi so sananey a balita,Nipaakar ed inkaruksa diad dalin tan say manuley sumpad manuley.
47 Kanian onsabi agewSano iteen koy imanok ed saray imahen na Babilonia.
Nabaingan so interon dalin to,Tan natumba so amin a napatey a totoo to.+
48 Say tawen tan dalin tan amin a wadtanEt oneyag ed liket lapud Babilonia,+Ta onlad sikato iray managderal manlapud amianen,”+ so imbaga nen Jehova.
49 “Aliwa labat a saray totoo ed Israel so pinatey na Babilonia,+Noagta saray totoo ed interon dalin so pinatey met ed Babilonia.
50 Sikayo ran ontatakas ed espada, agkayo ontutunda, agkayo manmemeneng!+Nonot yoy Jehova manlapud arawi,
Tan nonot yo met komon so Jerusalem.”+
51 “Abaingan kami, ta nadngel mi so panag-insulto.Asakbongay kababaingan so kalupaan mi,
Ta sinmabi ray dayo* ya onsumpad saray masanton pasen ed abung nen Jehova.”+
52 “Kanian onsabi agew,” so imbaga nen Jehova,“Ya iteen koy imanok ed saray imahen to,Tan onakis iray asugatan diad interon dalin to.”+
53 “Anggano onsegep ed tawen so Babilonia,+Anggano pabiskegen to iray atagtagey a pasen a pansasalimbengan to,Onsabi ed sikato ray managderal ya ibakik,”+ so imbaga nen Jehova.
54 “Dengel yo! Walay pannangis ed Babilonia,+Say tanol na baleg ya inkaderal ed dalin na saray Caldeo,+
55 Ta dederalen nen Jehova so Babilonia,Paandien to so maksil a boses to,Tan onungol iray daluyon da a singa dakerakel a danum.
Narengel so tanol na boses da.
56 Ta onsabid Babilonia imay managderal;+Naerel iray sundalo to,+Naputerputer iray pana ra,Ta si Jehova et Dios na panangibales.+
Seguradon sikatoy ombales.+
57 Bueken ko ray prinsipe to tan saray makabat ditan,+Saray gobernador to, saray kasandin manuley to, tan saray sundalo to,Tan onugip ira ed andi-anggaan,Tan agla ra nabangon,”+ so imbaga na Ari, a say ngaran to et Jehova na saray armada.
58 Oniay inkuan nen Jehova na saray armada:
“Sigpot a nageba so padir na Babilonia, anggano makapal itan,+Tan napoolan iray puerta to, anggano ataragey iratan.
Anggapoy nagunggona na totoo ed pansasagpot da;Mankesaw iray nasyon pian wala labat so ipakan dad apoy.”+
59 Saya so ingganggan nen propeta Jeremias ed si Seraias ya anak nen Nerias+ ya anak nen Masias, sanen sikatoy akila ed si Arin Zedekias na Juda diad Babilonia, diad komapat a taon na panuuley to; si Seraias so manangasikaso ed saray pankaukolan na ari.
60 Insulat nen Jeremias ed sakey a libro so amin a kadederal ya onsabi ed Babilonia, salanti, amin irayan salita a nisulat sumpad Babilonia.
61 Ontan met, oniay inkuan nen Jeremias ed si Seraias: “Kasabim ed Babilonia tan sano nanengneng moy syudad, ibasam a maksil irayan amin a salita.
62 Tan ibagam, ‘O Jehova, inkuan mon naderal iyan pasen tan anggapoy nakeran too odino ayep, tan agla napanayaman ed andi-anggaan.’+
63 Kayarim a basaen iyan libro, isinger mod sakey a bato tan ibantak mod pegley na Eufrates.
64 Insan ibagam, ‘Oniay ilereg na Babilonia, tan sikatoy aglan balot makaimwas+ lapud kadederal ya idapok ed sikato; tan onkapuy ira.’”+
Dia anampot iray salita nen Jeremias.
Paimanod leksab
^ Mapatnag a sananey a pananawag ed Caldea pian niyamot so tuan ngaran na saya.
^ Literal, “gatinan.”
^ Say dalin na saray Caldeo.
^ Odino “kamarerwa.”
^ Odino posiblin, “pano yo ray panagkargaan na pana.”
^ Odino “palitek a pinagkatanda.”
^ Literal, “sukat.”
^ Odino “kamarerwa to.”
^ Odino “sengaw.”
^ Odino posiblin, “manggagawa na saray aagusan parad.”
^ Odino “linawa.”
^ Odino “andiay kakanaan.”
^ Odino “palitek a pinagkatanda.”
^ Literal, “Mamasanto.”
^ Literal, “Mamasanto.”
^ Literal, “Nabucodorosor,” sananey ya espeling.
^ Literal, “panngisiwan.”
^ Odino “saray mabiskeg tan malangwer a leon.”
^ Mapatnag a sananey a pananawag ed Babel (Babilonia) pian niyamot so tuan ngaran na saya.
^ Odino “kamarerwa.”
^ Odino “ray agkabat a totoo.”
