Jeremias 29:1-32
29 Saraya so salita a walad sulat ya impawit nen propeta Jeremias manlapud Jerusalem parad saray akeran mamatatken ed saray nibantak a totoo, saray saserdote, saray propeta, tan amin a totoo, ya inerel nen Nabucodonosor ed Jerusalem tan inyakar tod Babilonia,
2 kayarin apataynan ed Jerusalem si Arin Jeconias,+ say reyna ya ina to,+ saray opisyal ed palasyo, saray prinsipe na Juda tan Jerusalem, tan saray marunong a komikimey tan saray latero.*+
3 Impawit to so sulat ed si Elasa ya anak nen Safan+ tan si Gemarias ya anak nen Hilkias, a sikara so imbaki nen Arin Zedekias+ na Juda ya onlad Babilonia ed si Arin Nabucodonosor na Babilonia. Oniay walad sulat:
4 “Oniay inkuan nen Jehova na saray armada, say Dios na Israel, ed amin a totoon nibantak ed arum a bansa, ya inabuloyan ton naerel ed Jerusalem pian niyakar ed Babilonia,
5 ‘Mangipaalagey kayo na kaabungan tan panayaman yo. Mantanem kayo na saray tanaman tan kanen yoy bunga ra.
6 Mangasawa kayo tan manilalak kayo na lalaki tan bibii; pangasawa yo iray ananak yon lalaki tan piasawa yo iray ananak yon bibii, pian mananak met ira na lalaki tan bibii. Manparakel kayo ditan, tan agkayo nepeg ya ondaiset.
7 Tan mikareenan kayo ed syudad ya angibantakan kod sikayo tan ipikasi yo itan ed si Jehova, ta nawalaan kayoy kareenan no walay kareenan ditan.+
8 Ta oniay inkuan nen Jehova na saray armada, say Dios na Israel: “Agyo aabuloyan a natilaan kayo na saray propeta yo a walad limog yo tan saray managparles yo,+ tan agyo dedengelen iray kugkugip da.
9 Ta ‘katilaan so ipropropesiya rad sikayo diad ngaran ko. Agko ra imbaki,’+ so imbaga nen Jehova.”’”
10 “Ta oniay inkuan nen Jehova, ‘Kayari na 70 taon diad Babilonia, ipaarap koy imanok ed sikayo,+ tan tooren koy sipan ko ya ipawil ta kayo ed sayan pasen.’+
11 “‘Ta amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal,+ pian ikdan ta kayoy maong ya arapen tan ilalo.+
12 Tan ontawag tan onasingger tan manpikasi kayod siak, tan dengelen ta kayo.’+
13 “‘Anapen yo ak tan naromog yo ak,+ ta anapen yo ak diad interon puso yo.+
14 Tan abuloyan ko a naromog yo ak,’+ so imbaga nen Jehova. ‘Tan tiponen ko iray narel ed sikayo tan tiponen ta kayo manlapud amin a nasyon tan pasen ya angitayakan kod sikayo,’+ so imbaga nen Jehova. ‘Tan ipawil ta kayod pasen a ditan ta kayo pinataynan.’+
15 “Balet inkuan yo, ‘Wala ray propeta tayo ed Babilonia a tinuro nen Jehova.’
16 “Ta oniay inkuan nen Jehova ed ari ya akayurong ed trono nen David+ tan ed amin a totoon manaayam ed sayan syudad, saray agagi yon agyo kaiban nibantak ed arum a dalin,
17 ‘Oniay inkuan nen Jehova na saray armada: “Ibakik ed sikara so espada, eras, tan salot,*+ tan gawaen ko ran singa saray abulok* tan aliwliwan igos ya agnayarin kanen.”’+
18 “‘Tan usilan ko ra diad panamegley na espada,+ eras, tan salot, tan pagmaliwen ko ran sengegay pakataktakotan na amin a panarian ed dalin,+ sakey ya ayew, sakey a bengatlan pankelkelawan, balbalawen,*+ tan kabandayan ed amin a nasyon a pangitayakan kod sikara,+
19 lapud agda dinengel iray salitak ya impasabik ed sikara ed panamegley na saray lingkor kon propeta ya aminpigapigan imbakik,’* so imbaga nen Jehova.+
“‘Balet agkayo dinmengel,’+ so imbaga nen Jehova.
20 “Kanian dengel yoy salita nen Jehova, amin yon totoo a nibantak ed arum a bansa, a pinataynan kod Jerusalem pian onlad Babilonia.
21 Oniay inkuan nen Jehova na saray armada, say Dios na Israel, nipaakar ed si Ahab ya anak nen Kolaias tan ed si Zedekias ya anak nen Maasias, a manpropropesiya ed sikayo na katilaan ed ngaran ko,+ ‘Iyawat ko ra ed lima nen Arin Nabucodonosor* na Babilonia, tan pateyen to rad pakanengneng yo.
22 Tan samay nagawa ed sikara et magmaliw a sakey ya ayew ya ibalikas na amin a narel ed Juda a walad Babilonia, ya ibaga ran: “Pagmaliwen kayo komon nen Jehova a singa si Zedekias tan Ahab, ya inkalot na ari na Babilonia!”
23 lapud nanggawa ray mabanday diad Israel,+ akikalugoran ira ed asawa na kapara ran too tan nansalita ray tila diad ngaran ko ya agko ingganggan ed sikara.+
“‘“Siak so makaamta, tan atasian ko,”+ so imbaga nen Jehova.’”
24 “Tan ibagam ed si Semaias+ a taga Nehelam,
25 ‘Oniay inkuan nen Jehova na saray armada, say Dios na Israel: “Lapud diad ngaran mo et nansulat kad amin a totoo na Jerusalem, ed si Sofonias+ ya anak nen Maasias, say saserdote, tan ed amin a saserdote, ya inkuan mon,
26 ‘Sika so ginawa nen Jehova bilang saserdote ya onsalat ed si Jehoiada a saserdote, pian magmaliw kan manangasikaso ed abung nen Jehova, pian erelen moy siopaman a natatapis tan onkikiwas a singa propeta, tan sikatoy iyan mo ed saray panangipangawan;+
27 kanian akin et agmo dinusa si Jeremias a taga Anatot,+ ta sikatoy onkikiwas a propeta yo?+
28 Ta sikatoy angipasabi ni ingen na mensahe ed sikami diad Babilonia, ya ibabaga ton: “Andukey nin panaon so onlabas! Manpaalagey kayo na kaabungan tan panayaman yo. Mantanem kayo na saray tanaman tan kanen yo iray bunga ra,+—”’”’”
29 Sanen binasa nen Sofonias+ a saserdote iyan sulat ed si propeta Jeremias,
30 oniay mensahe nen Jehova a sinmabi ed si Jeremias:
31 “Ipasabim ed amin a totoon nibantak ed arum a bansa, ‘Oniay inkuan nen Jehova nipaakar ed si Semaias a taga Nehelam: “Lapud nampropesiya ed sikayo si Semaias, anta sikatoy agko imbaki, tan impanmatalek to kayod tila,+
32 kanian oniay inkuan nen Jehova, ‘Ipaarap koy imanok ed si Semaias a taga Nehelam tan saray ilalak to. Anggapoy anggan sakey a makaliktar ed saray ilalak to ed limog na sayan totoo, tan agto nanengneng so maabig a gawaen kod totook,’ so imbaga nen Jehova, ‘ta inlagyat toy panagrebelde ed si Jehova.’”’”
Paimanod leksab
^ Odino posiblin, “saray managpaalagey na saray padir a pandepensa.”
^ Odino posiblin, “binmetag.”
^ Odino “sakit.”
^ Literal, “panngisiwan.”
^ Literal, “ya ombabangon ak a masakbay tan mangibabaki.”
^ Literal, “Nabucodorosor,” sananey ya espeling.
