Jeremias 25:1-38
25 Sinmabi ed si Jeremias so mensahe nipaakar ed amin a totoo na Juda diad komapat a taon nen Jehoiakim+ ya anak nen Josias, say ari na Juda, salanti, diad unonan taon nen Arin Nabucodonosor* na Babilonia.
2 Saya so imbaga nen propeta Jeremias nipaakar ed* amin a totoo na Juda tan ed amin a manaayam ed Jerusalem:
3 “Manlapud koma-13 taon nen Josias+ ya anak nen Amon, say ari na Juda, ya anggad sayan agew, et 23 taon lan onsasabi ed siak so mensahe nen Jehova, tan nansalita ak ed sikayo ya aminpigapiga,* balet agkayo dinmengel.+
4 Tan imbaki nen Jehova ed sikayo so amin a lingkor ton propeta, ya imbaki to ran aminpigapiga,* balet agkayo dinmengel odino tinmalineng.+
5 Ibabaga ran, ‘Ipangasi yo, tundaan komon na balang sakey ed sikayo so mauges a panagbilay to tan say mauges a kagagawa to;+ pian mansiansia kayo ed andukey a panaon diad sayan dalin ya abayag lan inter nen Jehova ed sikayo tan ed saray inmuunan atateng yo.
6 Agkayo ontutumbok ed arum a dirios pian manlingkor tan ondakmomo ed saratan, tan pasanoken yo ak lapud kimey na saray lima yo; ta no andi et deralen ta kayo.’
7 “‘Balet agkayo dinmengel ed siak,’ so imbaga nen Jehova. ‘Imbes, pinasanok yo ak lapud kimey na saray lima yo, a sengegay pakaderal yo.’+
8 “Kanian oniay inkuan nen Jehova na saray armada, ‘“Lapud agyo tinulok iray salitak,
9 patawag ko so amin a pamilya ed amianen,”+ so imbaga nen Jehova, “patawag koy Arin Nabucodonosor* na Babilonia, say lingkor ko,+ tan iyakar ko ra ed sayan dalin+ tan saray manaayam dia tan amin a nasyon ed kaliberliber.+ Deralen ko ra tan pagmaliwen ko ran sakey a bengatlan pakataktakotan tan balbalawen* tan ageray.
10 Paandien kod sikara so tanol na panliliket tan gayaga,+ say boses na nobyo tan nobya,+ say ungol na gilingan tan say liwawa na lamparaan.
11 Tan magmaliw ya aderal a pasen iyan dalin, sakey a bengatlan pakataktakotan, tan 70 taon a panlingkoran na sarayan nasyon so ari na Babilonia.”’+
12 “‘Balet sano asumpal lay 70 taon,+ mikuentaan ak ed* ari na Babilonia tan ed satan a nasyon lapud kasalanan da,’+ so imbaga nen Jehova, ‘tan pagmaliwen kon agnapanayaman so dalin na saray Caldeo ed amin a panaon.+
13 Gawaen kod satan a dalin so amin ya imbagak, amin a nisulat ed sayan libro ya impropesiya nen Jeremias sumpad amin a nasyon.
14 Ta aripenen met ira na dakel a nasyon tan makapanyarin arari,+ tan ombales ak ed sikara unong ed saray ginawa ra tan unong ed kimey na saray lima ra.’”+
15 Ta oniay imbagad siak nen Jehova a Dios na Israel: “Alam ed limak iyan kopa a nankargay alak na sanok, tan ipainum mo ed amin a nasyon a pangibakian kod sika.
16 Tan oninum ira tan mantugingging ira tan onkiwas iran singa ambagel a totoo lapud espada ya ibakik ed sikara.”+
17 Kanian inalak so kopa ed lima nen Jehova tan impainum kod amin a nasyon ya angibakian nen Jehova ed siak:+
18 manlapud Jerusalem tan saray syudad na Juda,+ saray arari tan prinsipe to, pian magmaliw iratan a geray, sakey a bengatlan pakataktakotan, sakey a balbalawen tan ayew,+ a singa nagagawa natan;
19 insan say Faraon ya ari na Ehipto tan saray lingkor to, priprinsipe to, tan amin a totoo to,+
20 tan amin a dayo a manaayam ed Ehipto; amin ya arari ed dalin na Uz; amin ya arari ed dalin na saray Filisteo,+ Askelon,+ Gaza, Ekron, tan saramay akera ed Asdod;
21 say Edom,+ Moab,+ tan saray Ammonita;+
22 amin ya arari na Tiro, amin ya arari na Sidon,+ tan saray arari ed isla a walad dayat;
23 say Dedan,+ Tema, Buz, tan amin iramay akatlian so buek ed alupising da;+
24 amin ya arari na saray Arabiano+ tan amin ya arari na saray dayo a manaayam ed kalawakan;
25 amin ya arari na Zimri, amin ya arari na Elam,+ tan amin ya arari na saray Medo;+
26 tan amin ya arari ed amianen a walad asingger tan arawi, mantutumbokan ira, tan amin a panarian a walad tapew na dalin; tan kayari ra et oninum so ari na Sesac.*+
27 “Tan ibagam ed sikara, ‘Oniay inkuan nen Jehova na saray armada, say Dios na Israel: “Oninum tan nabuek kayo, tan manuta tan natumba kayo tan agkayo la makabangon+ lapud espada ya ibakik ed sikayo.”’
28 Tan no agda labay ya alaen so kopa ed limam pian oninum ira, ibagam ed sikara, ‘Oniay inkuan nen Jehova na saray armada: “Inum yo!
29 Ta diad syudad a tinawag ed ngaran ko so unonan pangidapoan koy kadederal,+ kanian napaliisan yo kasi so dusa?”’+
“‘Agyo napaliisan so dusa, ta manawag ak na sakey ya espada sumpad amin a manaayam ed dalin,’ so imbaga nen Jehova na saray armada.
30 “Tan ipropesiyam ed sikara irayan amin a salita tan ibagam ed sikara,‘Si Jehova et onaglem a singa leon manlapud tagey,Tan ikasil toy boses to manlapud masanton ayaman to.
Sikatoy onaglem na maksil sumpad ayaman to ed dalin.
Sikatoy mangikansion na pananalo sumpad amin a manaayam ed dalin,Singa paneyag na saray manggagatin diad panagpespesan na ubas.’
31 ‘Sakey ya ungol so narengel anggad saray sampot na dalin,Ta misuppiatan si Jehova ed saray nasyon.
Sikaton mismo so mangukom ed amin a totoo.*+
Tan iyawat tod espada iray mauges,’ so imbaga nen Jehova.
32 Oniay inkuan nen Jehova na saray armada:
‘Walay kadederal ya onkayat ed kada nasyon,+Tan onsabi so maksil a bagyo manlapud sankaarawian iran pasen ed dalin.+
33 “‘Tan saramay napatey nen Jehova ed satan ya agew et manlapud sakey a sampot na dalin ya anggad sananey a sampot na dalin. Ag-ira akisan, tan ag-ira natipon odino niponpon. Magmaliw iran singa tai na ayep ed tapew na dalin.’
34 Ugaog kayo, sikayo ran managpastol, tan akis kayo!
Lespak kayo, sikayo ran gagalangen a totoo ed pulok,Lapud sinmabi lay panaon a pamatey ed sikayo tan pangitayak ed sikayo,Tan napelag kayo a singa sakey a mablin banga!
35 Anggapoy nabatikan na saray managpastol,Tan agmakatakas iray gagalangen a totoo ed pulok.
36 Dengel yo! Say akis na saray managpastol,Tan say ugaog na saray gagalangen a totoo ed pulok,Ta dederalen nen Jehova so panagpastolan da.
37 Tan anggapo lay mabilay ed saray pasen a datin mareen a panaayamanLapud mandarlang a sanok nen Jehova.
38 Tinaynan to so ayaman to a singa sakey a mabiskeg a leon,+Ta say dalin da et nagmaliw a bengatlan pakataktakotanLapud maruksan espadaTan lapud mandarlang a sanok to.”
Paimanod leksab
^ Literal, “Nabucodorosor,” sananey ya espeling.
^ Odino “imbaga nen propeta Jeremias ed.”
^ Literal, “ombabangon ak a masakbay tan mansasalita ak.”
^ Literal, “ombabangon a masakbay tan mangibabaki.”
^ Literal, “panngisiwan.”
^ Literal, “Nabucodorosor,” sananey ya espeling.
^ Odino “dusaen ko so.”
^ Mapatnag a sananey a pananawag ed Babel (Babilonia) pian niyamot so tuan ngaran na saya.
^ Literal, “amin a laman.”
