Genesis 50:1-26
50 Insan nilakap nen Jose so ama to+ tan inakisan to tan inangoban to.
2 Kayari na saman et ingganggan nen Jose iray lingkor to, saray managtambal, pian balsamoen+ day ama to. Kanian binalsamo na saray managtambal si Israel,
3 tan 40 agew so inggana ra parad sikato, ta saya so kabayag na panagbalsamo ra, tan sikatoy intultuloy a ninangisan na saray Ehipsio diad loob na 70 agew.
4 Sanen asumpal la ray agew na paneermen parad sikato, nansalitay Jose ed saray opisyal* na Faraon, ya inkuan to: “No agamoran koy panangabobon yo, ipasabi yod Faraon iyan mensahe:
5 ‘Impansamba ak nen amak,+ ya inkuan to: “Ompatey ak la.+ Iponpon mo ak ed panagponponan ko,+ a kinotkot ko ed dalin na Canaan.”+ Ipangasim, abuloyan mo ak ya onlan mangiponpon ed amak, tan kayari na satan et ompawil ak.’”
6 Inmebat so Faraon: “La ka tan iponpon mo so amam unong ya insambam ed sikato.”+
7 Kanian linmay Jose pian iponpon toy ama to, tan akila ed sikato so amin a lingkor na Faraon, saray mamatatken+ ed palasyo to tan amin a mamatatken diad dalin na Ehipto
8 tan say interon sankaabungan nen Jose tan saray agagi to tan say sankaabungan nen ama to.+ Say atilak labat ed dalin na Gosen et saray angkekelag ya ananak da tan saray karnero ra tan baka ra.
9 Akila met ed sikato iray akakarwahe+ tan saray lalakin akakabayo, tan dakdakel ira.
10 Insan akasabi ra ed panag-ilikan na Atad, a walad rehyon na Jordan, tan diman et alablabas tan agaylay impanermen da, tan intultuloy toy nanermen parad si ama to ed loob na pitoran agew.
11 Anengneng na saray manaayam ed saman a dalin, saray Canaanita, so paneermen da diad panag-ilikan na Atad, tan inkelyaw da: “Agayla yan paneermen na saray Ehipsio!” Kanian ningaran itan ya Abel-mizraim,* a walad rehyon na Jordan.
12 Kanian ginawa ed sikato na saray ananak to so amin ya imbilin tod sikara.+
13 Sikatoy inawit na saray ananak to diad dalin na Canaan tan imponpon da ed ungib a walad uma na Macpela, say uma a walad arap na Mamre a sinaliw nen Abraham ed si Efron a Heteo bilang dalin a ponponan.+
14 Kayari ton imponpon so ama to, pinmawil si Jose ed Ehipto a kaiba iray agagi to tan amin iramay akila ed sikato ya angiponpon ed ama to.
15 Kayari na impatey na ama ra, oniay inkuan na saray agagi nen Jose ed balang sakey: “Ompan maneem-em na sanok si Jose ed sikatayo tan sikatoy ombales lapud amin a mauges a ginawa tayod sikato.”+
16 Kanian impasabi rad si Jose iyan mensahe: “Saya so bilin nen amam antis na ipatey to:
17 ‘Oniay ibaga yod si Jose: “Mikasi ak ed sika, ipangasim a perdonaen so impakasumlang na agagim tan say kasalanan a ginawa ra lapud ontan lay impamasakit dad sika.”’ Natan, ipangasim a perdonaen so impakasumlang na saray lingkor na Dios nen amam.” Tan akaakis si Jose sanen imbaga ra iya ed sikato.
18 Insan linma met iray agagi tod sikato tan dinmakmomo ra ed arapan to tan inkuan da: “Wadia kami bilang ariripen mo!”+
19 Inkuan nen Jose ed sikara: “Agkayo natatakot. Siak ta so Dios a mangukom ed sikayo?
20 Anggaman ginetma yon sakitan ak,+ inggagala na Dios a maabig so pansumpalan na satan pian niliktar so bilay na dakel a totoo, a singa gagawaen to natan.+
21 Kanian agkayo natatakot. Itultuloy kon iter ed sikayo tan ed saray angkekelag ya ananak yo so abasto yon kakanen.”+ Diad ontan et niligliwa to ra tan pinabiskeg toy liknaan da.
22 Tan nantultuloy a nanayam ed Ehipto si Jose, sikato tan say sankaabungan nen ama to, tan nambilay si Jose na 110 taon.
23 Anengneng ni nen Jose iray apo nen Efraim,+ ontan met ed ananak nen Makir+ ya anak nen Manases. Niyanak ira diad saray pueg nen Jose.*
24 Diad kaunoran et inkuan nen Jose ed saray agagi to: “Ompatey ak la, balet seguradon tulongan kayo na Dios,+ tan ipaway to kayo ed sayan dalin pian iyakar ed dalin ya insipan tod si Abraham, ed si Isaac tan ed si Jacob.”+
25 Kanian impansamba nen Jose iray ananak nen Israel, ya inkuan to: “Seguradon tulongan kayo na Dios. Kanian isipan yod siak ya ipaway yo dia iray pukel ko.”+
26 Tan inatey si Jose ed edad a 110, tan sikatoy binalsamo ra+ tan inyan dad sakey a lungon diad Ehipto.
Paimanod leksab
^ Odino “ed sankaabungan.”
^ Kabaliksan toy “Paneermen na Saray Ehipsio.”
^ Salanti, impasen bilang ananak tan inikdan na espisyal a pabor.
