Genesis 27:1-46
27 Natan, sanen masiken lay Isaac tan makapuy lay pakanengneng to, tinawag toy Esau+ a panguloan ya anak to tan inkuan to: “Ana’ko!” Sikatoy inmebat: “Wadia ak!”
2 Tan inkuan to: “Masiken ak la. Agko amtay agew na ipatey ko.
3 Kanian natan, ipangasim, alam iray armas mo, say pananginay pana tan say bekang mo, tan la kad uma tan iyerelan mo ak na atap ya ayep.+
4 Insan ilutoan mo ak na samay mananam a putahi a labalabay ko tan iyakar mod siak. Insan kanen ko itan pian nabendisyonan ta ka antis ak ya ompatey.”
5 Balet ondedengel si Rebeca legan a mitotongtong si Isaac ed si Esau ya anak to. Tan linmay Esau ed uma pian mangerel na ayep ya isempet to.+
6 Tan inkuan nen Rebeca ed si Jacob ya anak to:+ “Nadngel koy amam a mitotongtong ed si Esau ya agim. Inkuan ton,
7 ‘Isempetan mo ak na ayep tan ilutoan mo ak na mananam a putahi. Insan mo ak pakanen ta pian nabendisyonan ta ka ed arapan nen Jehova antis ak ya ompatey.’+
8 Tan natan, ana’ko, dengel kan maong tan gawam so ibagak ed sika.+
9 Ipangasim, la kad kawalaan na pulok tan iyalaan mo ak diman na duaran maabig a kilaw a kanding pian nitaryaan koy amam na mananam a putahi a labalabay to.
10 Insan mo itan iyakar ed amam pian kanen to, ta pian nabendisyonan to ka antis na ipatey to.”
11 Inkuan nen Jacob ed si Rebeca ya ina to: “Balet mabagoy Esau ya agik,+ tan siak et andi.
12 Panon to no aplosen ak nen amak?+ Diad ontan et ompaway laingen a sikatoy agko rerespetoen, tan ayew so naawat ko imbes a bendisyon.”
13 Diad saya et inkuan nen ina to ed sikato: “Siak so mangawat ed ayew a parad sika, ana’ko. Gawam labat so imbagak tan la ka, alam iraman parad siak.”+
14 Kanian sikatoy linma tan inala to iraman insan to inyakar ed ina to, tan nanlutoy ina to na mananam a putahi a labalabay nen ama to.
15 Kayari na satan et inala nen Rebeca ed abung to iray sankaabigan a kawes nen Esau a panguloan ya anak to, tan insulong to iratan ed si Jacob a yugtan ya anak to.+
16 Inyan to met iray katat na saray kilaw a kanding ed saray lima to tan ed andiay-bago a parte na beklew to.+
17 Insan inyawat tod si Jacob ya anak to so mananam a putahi tan say tinapay a ginawa to.+
18 Kanian sikatoy linma ed ama to tan inkuan to: “Ama!” a diad satan et inkuan to: “Wadia ak! Siopa ka, ana’ko?”
19 Inkuan nen Jacob ed ama to: “Siak si Esau a panguloan mo,+ ginawak la imay imbagam. Yurong ka, ipangasim, tan mangan ka ed sayay ayep a narel ko, pian nabendisyonan mo ak.”+
20 Diad saman et inkuan nen Isaac ed anak to: “Panoy impakalam a tampol, ana’ko?” Sikatoy inmebat: “Lapud inyakar itan ed siak nen Jehova a Dios mo.”
21 Insan inkuan nen Isaac ed si Jacob: “Singger ka, ipangasim, pian naaplos ta ka, ana’ko, ta pian naamtaan ko no talagan sika si Esau ya ana’ko odino andi.”+
22 Kanian inmasingger si Jacob ed si Isaac ya ama to, tan sikatoy inaplos to, insan inkuan to: “Say boses et boses nen Jacob, balet saray lima et lima nen Esau.”+
23 Sikatoy agto abidbir lapud mabago iray lima to a singa saray lima nen Esau ya agi to. Kanian sikatoy benendisyonan to.+
24 Kayari na satan et intepet to: “Talaga ta’n sika si Esau ya ana’ko?” a diad satan et inyebat to: “On, siak.”
25 Insan inkuan to: “Ana’ko, ikdan mo ak na samay ayep a narel mo pian kanen ko, insan bendisyonan ta ka.” Diad saman et inyasingger to itan tan sikatoy angan, tan inyalaan toy alak tan sikatoy inminum.
26 Insan inkuan nen ama ton Isaac ed sikato: “Ipangasim, singger ka, tan angoban mo ak, ana’ko.”+
27 Kanian sikatoy sinmingger tan inangoban to, tan naangob to iray kawes to.+ Insan sikatoy benendisyonan to tan inkuan to:
“Nia, say angob na ana’ko et singa angob na uma a benendisyonan nen Jehova.
28 Iter komon ed sika na tuan Dios iray linaew na tawen+ tan saray mabunan dalin+ tan dakel a naakan* tan balon alak.+
29 Panlingkoran ka komon na saray totoo tan ondakmomo komon ed sika iray nasyon. Magmaliw kan katawan na saray agagim, tan ondakmomo komon ed sika iray ananak nen inam.+ Naayew so amin a mangayew ed sika, tan nabendisyonan so amin a mamendisyon ed sika.”+
30 Natan et kasumsumpal nen Isaac ya amendisyon ed si Jacob tan kapawapaway nen Jacob manlapud kawalaan nen Isaac ya ama to, sanen sinmabi si Esau ya agi to a nanlapud impangerel toy ayep.+
31 Sikatoy angitarya met na mananam a putahi tan inyakar to ed ama to, insan inkuan tod ama to: “Ombangon komon so amak tan mangan ed sayay ayep a narel na anak to, ta pian nabendisyonan mo ak.”
32 Diad saya et inkuan ed sikato nen Isaac ya ama to: “Siopa ka?” a diad satan et inkuan to: “Siak si Esau, a panguloan ya anak mo.”+
33 Tan ginmiwgiw a maong si Isaac, kanian inkuan to: “Siopa sirin imay angerel na ayep tan inyakar to ed siak? Angan ak la antis kan sinmabi, tan sikatoy benendisyonan ko—tan seguradon sikatoy nabendisyonan!”
34 Sanen nadngel nen Esau so imbaga nen ama to, sikatoy inmakis a maksil tan ampaipait tan inkuan to ed ama to: “Bendisyonan mo ak, on, siak met, ama!”+
35 Balet inkuan to: “Linma diay agim, tan siniliban to ak pian nagamoran toy bendisyon a para komon ed sika.”
36 Diad saya et inkuan to: “Agta nepeg labat a sikatoy ningaran a Jacob,* pian mamidua to ak a samsaman?+ Inala to lay kanepegan ko bilang panguloan,+ tan natan et inala toy bendisyon a parad siak!”+ Inyarum to ni: “Anggapo ta lay inkeram a bendisyon a parad siak?”
37 Balet oniay inyebat nen Isaac ed si Esau: “Sikatoy tinurok a magmaliw a katawan mo,+ tan inter ko lad sikato so amin ya agagi to bilang lingkor, tan inter ko lad sikato so bukebukel tan balon alak bilang abasto to.+ Anto ni nagawaan ko parad sika, ana’ko?”
38 Inkuan nen Esau ed ama to: “Wala tay anggan sakey a bendisyon mo, ama? Bendisyonan mo ak, on, siak met, ama!” Insan inmurangal tan inmakis si Esau.+
39 Kanian oniay inyebat ed sikato nen Isaac ya ama to:
“Nia, manayam ka ya arawi manlapud mabuna iran dalin, tan arawi manlapud linaew na tawen.+
40 Tan manbilay ka ed panamegley na espadam,+ tan manlingkor ka ed agim.+ Balet sano agka la makaanos et seguradon puteren mo so pako to a walad beklew mo.”+
41 Balet nanem-em na sanok si Esau ed si Jacob lapud bendisyon ya inter ed sikato na ama to,+ tan ibabaga nen Esau ed sarili to: “Asingger lan onsabi iray agew na panermen parad amak.+ Kayari na satan et pateyen koy Jacob ya agik.”
42 Sanen nibaga ed si Rebeca iray salita nen Esau a panguloan ya anak to, impatawag ton tampol si Jacob a yugtan ya anak to tan inkuan tod sikato: “Plaplanoen nen Esau ya agim so ombales diad pamatey tod sika.*
43 Natan, ana’ko, gawam sirin so ibagak. Alagey ka tan batik kad si Laban ya agik a walad Haran.+
44 Miayam ka nid sikato anggad onkepa so sanok nen agim,
45 anggad naandi lay pasnok nen agim ed sika tan nalingwanan to lay ginawam ed sikato. Insan patawag ta ka diman. Agko labay a nabalang ta kayon dua ed saksakey ya agew.”
46 Kayari na satan et naynay lan ibabaga nen Rebeca ed si Isaac: “Onsasawa ak lad bilay ko lapud saray bibiin ananak nen Het.+ No bilang ta mangasaway Jacob ed saray ananak nen Het, a singa sarayan bibiin ananak ed sayan dalin, anto ni kakanaan na bilay ko?”+
Paimanod leksab
^ Odino “bukebukel.”
^ Kabaliksan toy “Samay Akabemben ed Mukor; Managsamsam.”
^ Odino “Liligliwaen nen Esau so inkasikato diad pannononot tod pamatey ed sika.”
